E Veivuke Vakacava na Valetabu
Na itubutubu kece sara e kila ni susu gone ena kauta mai na veibolebole kei na veivakalougatataki sega ni namaki. Keirau sa kila kei na turaga watiqu ni gauna eda vakasamataka kina ena kena irairai tawamudu na itavi vakaitubutubu, eda na vakila na bibi ni itavi vata kei na vakanuinui cecere.
E dina sara, sa solia vei keda na Turaga na veicocovi vakayalo me vakamamadataka na noda icolacola. Ena noqu matavuvale, na kena e cecere duadua vei ira na icocovi vakayalo oqori sai koya na neirau dau lako ki na vale ni Turaga me ciqoma na Nona veivuke ni ra sa tubu cake na luvei keirau ka sa dredre cake tikoga mai na bula. Keirau sa kila ni rawa ni keirau kauta na leqa kecega vua na Turaga ena Nona valetabu.
Ni ra sa itabagone mai na luvei keirau keirau vakila ni sa rawa me ra na cakava eso na cala bibi sara. E rairai ni ka rerevaki duadua beka na neirau vakila ni keirau sa cakava na veika kece sara keirau kila na cakava, ia se laurai tikoga na ivakatakilakila rerevaki eso e matai keirau.
Keirau qai vakila ni sokalou ena valetabu e rawa ni dua na iyaya bibi sara ena neirau sasaga me keirau vukei ira na luvei keirau me ra digia na dodonu. Keirau sa kunea na igu cecere kei na veivakalougatataki ena neirau dau lako ki na valetabu ena yalo ni lolo kei na masu ena vukudra na luvei keirau. Keirau dau masuta na yalo ni vakavakarau yadua, me baleta na vakanananu kilikili kei na ivakarau ni vakasama ni bera na neirau curuma na valetabu. Ena veigauna veiganiti eso, na neirau vakasama ni keirau tiko ena loma ni valetabu e dau baleta na neirau itavi vakaitubutubu ka vakakina na nona gagadre na gone o ya.
Ena so na gauna e dau totolo ka matata na kena yaco mai na kena isau. Na imatai ni gauna e yaco kina, e kena irairai ni keirau a nanuma ni vakacala ka. Ia sega ni dede sa votu mai ni keirau sa vakaitavi tiko ena dua na iwalewale ka sa kauta tiko mai na veivakalougatataki mai lomalagi.
Na kena isau ena so na gauna e dau kena waqawaqa mai na tamata ka ra dau veivakauqeti ena nodra bula na luvei keirau, me vaka beka e dua na bisopi dauloloma ka a vukea na luvei keirau yalewa ena vuli torocake ena dua na gauna dredre ni bula. Eso tale na gone era sa vakalougatataki ena veivakalougatataki vata vakaoqo. E dui tu na nodra galala yadua, ka ra na digitaka beka me ra kakua ni cakava me vaka na ka eda namaka, ia eda vakila ni noda veiqaravi ena valetabu sa kauta mai na veivuke vakalomalagi ki na nodra bula na luveda.
Na kena yaga vei keda na sokalou ena valetabu sa levu cake sara mai na nodra vakalougatataki walega na luvei keirau. Ena dua na gauna, a sotava kina na watiqu e dua na leqa ni cakacaka veivakayalolailaitaki ka nanuma me kauta ki na valetabu. Ena siga ko ya, a vakauqeti koya na Turaga ni nona isau ni nona taro e tiko ena dua na ivolanikalou.
Ni yaco mai ki vale, a cereka ena yalo nanamaki na ivolanikalou ka, ena marau, kunea na veivuke ena nona leqa. Na veika oqori a dolava e dua na ivakavakayagataki vou ni ivolanikalou. E rawa ni vosa vei ira na Luvena na Turaga ena Nona vakananuma vei keda eso na ivolanikalou ka tu kina na isau ni bolebole eda sotava. Keirau vakavinavinakataka na ivakavuvuli oqo keirau vulica mai na valetabu.
Ena dua na vuravura ka sinai tu kina na ca ka sa sereka tu kina ko Setani na nona kaukauwa me vakarusa na veimatavuvale, eda logaloga vinaka me da kila ni rawa ni da lako ki na vale ni Turaga ka vakasaqara na veidusimaki. Se cava ga na bolebole eda sotava ena noda qarava tiko na noda matavuvale, eda na kunea na marau ni da vakasaqara na ivakaruru kei na vakacegu ni valetabu.