Taro Dau Tarogi Wasoma
Na cava era dau cakava na tamata ena valetabu?
Eda dau vakavulici ena loma ni valetabu, eda caka veiyalayalati, ka yalataki kina vei keda na veivakalougatataki. Eda ciqoma na veicakacaka vakalotu me rawa kina vei keda me da laki bula ena iserau ni Kalou.
E dua na cakacaka vakalotu eda dau ciqoma ena loma ni valetabu na edaumeni. Na vosa edaumeni e kena ibalebale na “iloloma” se “isolisoli.” Me tiki ni cakacaka vakalotu oqo, eda sa vakavulici kina me baleta na inaki ni bula, na itavi kei na Veisorovaki nei Jisu Karisito, kei na ituvatuva ni Tamada Vakalomalagi ena vukuda na Luvena. Eda sa raica kina vakalailai na ivakarau ni bula eda na laki bula kina ena Nona iserau ni da vakila na draki ni vakacegu ena valetabu.
E dua tale na cakacaka vakalotu ni valetabu sai koya na cakacaka vakalotu ni veivauci, ka ra vauci vata kina na tagane kei na yalewa me ra veiwatini ka ra vauci na gone vei ira na nodra itubutubu ena veimatavuvale tawamudu. Sa kena ibalebale oqo kevaka eda na yalodina tikoga ki na noda veiyalayalati, ena tomani yani na noda matavuvale ena veigauna tawamudu.
Me ikuri ni noda rawa ni rawata na cakacaka vakalotu me baleti keda, sa rawa talega ni da ciqoma ena vukudra na tubuda era sa mate yani. Ena kena ivakarau oqo, o ira na tamata era mate ka ra sega ni ciqoma na cakacaka vakalotu e dodonu me ra cakava me vaka na papitaiso kei na veivakadeitaki, na edaumeni kei na veivauci sa nodra kina na madigi me ra ciqoma na veicakacaka vakalotu oqori.
E vakaevei tu na draki ni bula ena loma ni valetabu?
Na valetabu e dua na vanua sautu, vanua tabu, ka vakatikitikitaki mai na bula leqaleqa ka yavavala ni vuravura. Na veitikina kece sara ena valetabu era vakarairaivinakataki ka qarauni sara vakamatau me taqomaki kina na yalo ni vakarokoroko. Me vaka ni vale ni Turaga, kei na cakacaka tabu e dau vakayacori kina, eda na dau vakila vakalevu sara kina na Yalotabu ka da vakila ni da voleka sara vua na Turaga. E kea e rawa ni da ciqoma kina na ivakatakila me baleti keda yadua kei na igu vakayalo me da vorata rawa kina na noda veivakatovolei. Oqo e dua na vuna eda dau vakauqeti kina me da dau lako wasoma ki na valetabu.
Meu vakaisulu vakacava niu lako ki na valetabu?
Dau daramaka na isulu rakorako ni Sigatabu ni o lako ki na valetabu. Kakua soti ni sa rui sivia sara na isulu kei na iukuuku e tokari, me vaka ga na noda dau lako ki na soqoni ni sakaramede. Ko na vakaraitaka na vakarokoroko kei na veidokai vua na Turaga kei na Nona vale ka sureta na Yalotabu ni o savasava ka rairai rakorako.
Ena loma ni valetabu era tu kina na rumu ni veisau ni tamata yadua mo veisau kina mai na nomu isulu ni Sigatabu ka tokara na isulu vulavula. Na veisau ni isulu oqo sa kena ibalebale ni o sa luvata laivi tu vakawawa na vuravura ka curuma yani e dua na vanua savasava. Na isulu vulavula sa ivakatakarakara ni savasavavuka, ka vakakina na tautauvata ni isulu eda daramaka ena valetabu sa vakavurea e dua na yalo ni duavata kei na tautauvata.
Na gauna cava e dodonu meu qai ciqoma kina na noqu edaumeni?
E rairai ni o na ciqoma na nomu edaumeni ni sa voleka na gauna mo lako kina ki kaulotu se ni vakarau mo vakamau ena valetabu. O ira na lewenilotu sega ni vakawati sa voleka ni ra yabaki ruasagavulu se sivia vakalailai na ruasagavulu ka ra se bera ni ciqoma na nodra veikacivi ni kaulotu ka ra sega ni sa veimusumusuki tu me ra vakamau ena valetabu, vakararaba ni ra sega ni dau vakaturi me ra ciqoma na nodra edaumeni.
O ira na lewenilotu vou era dau wawa me yabaki dua se sivia ni oti na nodra papitaiso kei na vakadeitaki ni bera ni ra qai ciqoma na nodra edaumeni.
Na nomu ciqoma na nomu edaumeni sa dua na ka bibi sara. Veitalanoataka vata kei na nomu bisopi. Masu ka vakasama vakatitobu mo kila ni o sa vakarau.
Na cava e rawa niu tukuna vei ira tale eso me baleta na veika au sotava ena loma ni valetabu?
E rawa ni o talanoataka na irairai ni loma ni valetabu, ka rawa ni o wasea ena galala na veika o vakila ena loma ni valetabu. Ia, na veiyalayalati ni valetabu kei na cakacaka vakalotu, oka kina na vosa e vakayagataki, era sa rui ka bibi me ra veitalanoataki vakamatailalai tu ena taudaku ni valetabu. Ena noda levea na veitalanoataki ni veika bibi oqo ena taudaku ni valetabu, eda sa taqomaki ira tiko kina mai na veivakalialiai, na veivakacacani, se na veibeci. Kakua ni dau wasea tu vakarawarawa na veika o sotava ena loma ni valetabu.
Na cava e vakayagataki kina na ivakatakarakara ena loma ni valetabu?
Ena gauna ni nona veiqaravi e vuravura, e dau veivakavulici vakavuqa na iVakabula ena italanoa vakatautauvata me tukuna ena ivakatakarakara na veidina tawamudu. Sa veidusimaki kina o Koya me da vakavulici ena ivakarau vata oqori ena loma ni valetabu. E tu na ivakatakarakara ena cakacaka vakalotu kei na veiyalayalati ni valetabu, na kena icakacaka, na kena ituvatuva vakayago, kei na isulu e daramaki. Kevaka o vakasamataka vakatitobu na ibalebale ni ivakatakarakara oqo ena veidusimaki ni Yalo Tabu, e rawa ni ra vukei iko mo raica ka kila na dina, vulica na veika e baleti rau na Tamada Vakalomalagi kei Jisu Karisito, ka tubu vakayalo.
Era tu na lewe ni noqu matavuvale ka sega ni rawa ni ra curuma na valetabu. Na cava e rawa niu cakava meu vukei ira kina me ra vakila ni ra okati tiko ena noqu vakamau ena valetabu?
Oqori e rawa ni iulutaga dredre toka. Me vaka ni vale ni Turaga na valetabu, ka sa vakatabui Vua, o ira me ra curu kina me na tu na nodra ivolatara ni valetabu e sa vakayagataki tiko, ka vakadeitaka ni ra sa bula tiko ena ivakatagedegede sa virikotora tu o Koya. Ia, o ira e sega tu na nodra ivolatara ni valetabu e sega ni vakatabui me ra curu mai ki na lomanibai ni valetabu, ka vuqa na valetabu e tu kina e dua na rumu e rawa ni ra mai wawa toka kina ni vauci vata tiko na nodra matavuvale. E rawa vei rau na veiwatini ka tiko na lewe ni nodrau matavuvale era sega ni rawa ni curuma na valetabu me rau sureta na nodrau bisopi se dua tale na lewe ni Lotu me tiko vata kei ira ena rumu ni wawa.
E rawa talega vei rau na veiwatini me rau tuvalaka rawa vata kei na nodrau bisopi me dua na soqoni ni oti na vakamau me baleti ira na weka kei na itokani ka sega tu na nodra ivolatara. Na soqoni oqo ena vakarautaki kina na madigi me ra vakila ni ra okati ka ra vulica kina e dua na ka me baleta na vakamau tawamudu. E dina ni sega ni caka tale kina e dua na soqonitabu ka sega ni caka kina na veiyalayalati, e rawa ni caka na veisoli mama ena soqoni oqo.
Na cava beka e dodonu meu cakava meu vakarau kina meu ciqoma na cakacaka vakalotu ni valetabu?
E rawa ni o vakavakarau ena nomu dau lako wasoma ki na valetabu mo vakaitavi ena papitaiso me baleti ira na mate, ena nomu lewena e dua na kalasi ni vakavakarau ki na valetabu ka vakarautaka na nomu bisopi, kei na nomu vulica na ivolanikalou kei na itukutuku eso e tu ena ivolalailai oqo.
E rawa talega ni o vakavakarau ena nomu bulataka na Nona ivakatagedegede ni bula kilikili na Turaga me baleta na valetabu. Vakabulabulataka na nomu ivakadinadina me baleta na Kalou na Tamada kei Jisu Karisito kei na Nona kosipeli vakalesui mai. Rokova na Vosa ni Vuku kei na lawa ni tiko savasava. Tokoni ira na nomu iliuliu ena Lotu, sauma vakadodonu na nomu ikatini, ka dau lakova na nomu soqoni ni Lotu. Mo dina ena nomu cakacaka vata kei ira tale eso, ka vakadeitaka ni sala vata tiko kei na ivakavuvuli ni Lotu na nomu bula vakamatavuvale. Rokova na nomu veiyalayalati ni papitaiso me rawa kina ni o vakarau ni ciqoma na veiyalayalati cecere cake ni valetabu.
Rumu vaka-Silesitieli, Valetabu na Mount Timpanogos Utah.
Valetabu na Jordan River Utah. Vakatabui ena ika 16 ni Nove., 1981.
Valetabu na Nauvoo Illinois. Vakatabui ena ika 27 ni June, 2002.