“Jeptōm̧ba 6–12. Katak im Bujen Ko 98–101: ‘Ikōn̄ wōt im Jeļā ke N̄a Anij,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Jeptōm̧ba 6–12. Katak im Bujen Ko 98–101,” Itok, Ļoor Eō—N̄an Kajjojo Armej im Baam̧le ko: 2021
C. C. A. Christensen (1831–1912), Armej ro Rekwojarjar Kadiwōjļo̧k Er jān Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, menin letok jān ajri ro jibūn C. C. A. Christensen, 1970
Jeptōm̧ba 6–12
Katak im Bujen Ko 98–101
“Ikōn̄ wōt im Jeļā ke N̄a Anij”
Ilo am̧ riiti, Katak im Bujen Ko 98–101, lukkun lale ļōmņak ko im im̧we ko me kwoj en̄jaki. Ewi wāween ilo am̧ kōm̧m̧an ekkar n̄an im̧we ko jipan̄ eok erom̧ juon armej Anij ekōņaan bwe kwon erom̧?
Je En̄jake ko Rej Im̧we Eok
N̄an Armej ro Rekwojarjar ilo 1830, Independence, Missouri, kar lukkuun juon laļ in kallim̧ur. Ekar “jikin ioļapļap” an Zaion (lale Katak im Bujen Ko 57:3)—jikin kweilo̧k eo an Anij ioon laļ in—eo me rekar kōm̧m̧an eļap kaarmejjet ko n̄an kalōke. N̄an Armej ro Rekwojarjar, aiintok doon eo an Armej ro Rekwojarjar ilo Independence Missouri ekar juon m̧akūtkūt eo ekam̧ōņōņō im aibojooj n̄an Itok eo Kein Karuo. Ak ro rūtūrūrer ilo eria eo rekar oktak aer lo men kein. Rekar jab errā kōn ļōmņak in ke Anij ekar leļo̧k n̄an er jikin Armej ro Rekwojarjar, im rekar jab koņ aer pād kōn poktak in kien, jāān, im tokjen ko ikūtōltōl ko an elōn̄ armej ro rejjab jeļā kōn an bar juon kabun̄ rejaje kake bar deļo̧n̄e eria eo ilo iien eo em̧ōkajtata, Ejjab to inepata ko aer rekar oktak n̄an kaamijak, im kaamijak rekar oktak n̄an kakkure im jorrāān. Ilo Juļae 1833, opij in būriin eo an Kabun̄ in rekar kakkure, im ilo Nobōm̧ba Armej ro Rekwojarjar rekar kipel er n̄an kakkuri m̧ōko m̧ōer ilo Jackson County, Missouri.
Josep Smith ekar ettoļo̧k elōn̄ļo̧k jān 800 m̧ael ilo Kirtland, im nuuj in ekar bōk elōn̄ wiik ko n̄an tōpar e. Ak Irooj ekar jeļā ta eo ekar waļo̧k, im Ekar kwaļo̧k n̄an Rikanaan eo An pedped in kaenōm̧m̧an im ketak bwe en maron̄ kaenōm̧m̧an Armej ro Rekwojarjar—pedped ko me remaron̄ bar jipan̄ kōj n̄e jej jelm̧ae kakkure, n̄e ikdeleel ko ad rejim̧we rejjab kūrm̧ool, ak n̄e jej aikuj juon kein kakemeemej bwe en̄taan ko ad aolep iien renaaj āliktata, “jerbal ippān doon n̄an em̧m̧an eo [ad]” (Katak im Bujen Ko 98:3).
Lale Saints, 1:171–93; “Waiting for the Word of the Lord,” Revelations in Context, 196–201.
Ļōmņak ko n̄an Ekkatak Jeje Ko Rekwojarjar Ippam̧ Make
Katak im Bujen Ko 98:1–3, 11–14; 101:1–16
Mellijon̄ ko aō remaron̄ jerbal ippān doon n̄an em̧m̧an eo aō.
Jet iaan en̄taan ko ad ilo mour in rekar kōm̧m̧an kōn jokālet ko ad make. Ro jet kar kōm̧m̧an jān jokālet ko an ro jet. Im jet iien ejjeļo̧k juon jej ņa ruōn—men ko renana rej baj waļo̧k wōt. Jekdo̧o̧n kōn ta un eo, apan̄ emaron̄ jipan̄ kakūrm̧ool kōttōpar ko rekwojarjar. Ilo am̧ riiti ta eo Irooj ekar ba kōn en̄taan ko an Armej ro Rekwojarjar ilo, Katak im Bujen Ko 98:1–3, 11–14 im 101:1–16, ta eo kwoj loe me emaron̄ jipan̄ eok kōn melejon̄ ko am̧? Elmen an eoon kein jelet wāween ad kalimjōk idajon̄jon̄ ko jej jelm̧aiki? Kejōkļo̧kjeņ kōn wāween an melejon̄ ko me rekar jerbal ippān doon n̄an em̧m̧an eo am̧ im kōttōprak jibadbad eo an Anij ilo mour eo am̧.
Bar lale 2 Nipai 2:2; Katak im Bujen Ko 90:24.
Irooj ekōņaan bwe in kappukot aenōm̧m̧an ilo wāween eo An.
Men̄e ejjab men otemjej ilo Katak im Bujen Ko 98:23–48 enaaj iookļo̧k am̧ iiaio ippān ro jet, ta pedped ko me kwoj loi me remaron̄ tōl eok n̄e kwoj bōd jān ro jet? Emaron̄ lukkuun jipan̄ jān kōkaļļeiki naan ak jentōj ko me rej kōmeļeļeik wāween an Irooj kar kōņaan bwe Armej ro Rekwojarjar ren jelm̧aeiki jorrāān eo ilo Missouri.
Bar lale Jeffrey R. Holland, “Jerbal in Karejar in Kajim̧we,” Ensign ak Liaona, Nob. 2018, 77–79.
Meļeļe jān: Christ and the Rich Young Ruler, jān Heinrich Hofmann.
Irooj ej kōjparok ro rej jerbal n̄an E.
Jejjo wiik tokālik Josep ekar ekkatak kōn kakkure eo ilo Missouri, juon eo ej kab oktak tok ekar kajjitōk ippān n̄an etal n̄an Canada n̄an kwaļo̧k kōn gospel eo ippān ļaddik ro nejin. Josep ekar errā, men̄e ekar inepata kōn an etal jān baam̧le eo an, eļaptata kōn kakkure im kaamijak ko n̄an baam̧le eo an im Kabun̄ in. Ilo iaļ eo aer ļo̧k n̄an Canada, Josep im kōmpānien eo an, Sidney Rigdon, rekar jar kōn kaeņōm̧m̧an, im jekjōn 100 kar uwaak eo an Irooj n̄an er. Ta eo kwoj loe ilo uwaak eo an Irooj me emaron̄ kar kallikkar im kar jipan̄ er?
Bolen kwomaron̄ kar bar en̄jake ke ekar menin aikuj bwe kwon jeļā peļane inepata ko am̧ kōn eddo ko am̧ ilo Kabun̄ in im inepata eo am̧ kōn baam̧le eo am̧. Ewi wāween an naan ko an Irooj ilo jekjōn 100 jipan̄ eok ilo jekjek rōt kein?
Lale barāinwōt “A Mission to Canada,” Revelations in Context, 202–7.
Ļoor kapilōk eo an Anij ejipan̄ kōjparok eō.
Būrabōļ eo ilo Katak im Bujen Ko 101:43–62 kar letok n̄an kōmeļeļeik etke Irooj ekar kōtļo̧k Armej ro Rekwojarjar n̄an diwōjļo̧k jān Zaion. Ilo am̧ riiti eoon kein, kwoj ke lo jabdewōt men ko me rej āinwōt ļo̧k wōt juon ikōtaan kwe make im rikarejar ro ilo būrabōļ in? Kwomaron̄ kajjitōkin eok make: Inan̄in ke kar kajjitōk ņae kien ko an Anij? Ewi wāween an ejjeļo̧k tōmak ak kallim̧ūr kōtļo̧k “rikōjdat eo” n̄an bōk im̧we ko ilo mour eo aō? Ewi wāween aō kwaļo̧k n̄an Anij ke ij “m̧ōņōņō in bōk tōl ilo juon iaļ eo ejim̧we im jejjet n̄an lo̧mo̧o̧ren eo aer”? (lale eoon ko 63–65).
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 98:16, 39–40.Ta ilo eoon kein emaron̄ jipan̄ kōj kōļapļo̧k wōt aeņōm̧m̧an ilo baam̧le ko ad? Kwomaron̄ al juon al kōn aeņōm̧m̧an ak jeorļo̧k bōd, āinwōt “Truth Reflects upon Our Senses” (Hymns, no. 273). Ajri jidik ro remaron̄ kōņaan kwaļo̧k juon kilen jeorļo̧k bōd n̄an doon.
-
Katak im Bujen Ko 99.Ke John Murdock kar kūr e n̄an em̧akūt jān m̧weo im̧ōn “n̄an kwaļo̧k kōn gospel eo ejjeļo̧k jem̧ļo̧kin” (eoon 1), ej kab kar rool tok jān juon mijen eo ebwe an to im epen ilo Missouri (lale “John Murdock’s Missions to Missouri,” Revelations in Context, 87–89). Ta eo jej lo ilo jekjōn 99 me emaron̄ lukkuun jipan̄ ak rōjan̄ Brother Murdock? Ta enaan ko me Irooj ekar kōpooj n̄an kōj ilo revelesōn in?
-
Katak im Bujen Ko 100:16; 101:3–5, 18.Ālkin am̧ riiti eoon kein, kwomaron̄ kōmeļeļeik wāween an rikōm̧m̧an metal an kōmeneeni n̄an joļo̧k men eo kobban metal eo ej kabene innem ļōme ilo an am̧m̧aiki elōn̄ kōttan (lale bitio eo “The Refiner’s Fire” on ChurchofJesusChrist.org). Kwomaron̄ bar ekkatak ippān doon kōn wāween an men ko jet erreo, āinwōt dān ak jo̧o̧ļ. Bolen kwomaron̄ karreoiki ak karreoiki juon men āinwōt juon baam̧le. Etke jekōņaan bwe jen erreo? Ta eo waanjon̄ak kein rej katakin kōj kōn wāween an melejon̄ ko ad maron̄ jipan̄ kōj erom̧ “juon armej erreo”?
-
Katak im Bujen Ko 101:22–36.Ewi wāween an eoon kein maron̄ kar jipan̄ Armej ro Rekwojarjar ro rekar jelm̧ae kakkure? Ewi wāween aer jipan̄ armej ro en̄jake mijak kōn jekjek ko an laļ in ad rainin?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar ļōmņake: “Help Me, Dear Father,” Children’s Songbook, 99.
Kōkm̧anm̧anļo̧k Am̧ Ekkatak Ippam Make
Pukot pedped in katak ko. Elder Richard G. Scott ekar katakin: “N̄e kwoj kappukot jeļāļo̧kjeņ ilo jetōb, kappukot pedped ko. … Pedped in katak ko me reobrak kōn m̧ool, emaron̄ iookļo̧k jabdewōt elōn̄ jekjek ko” (“Acquiring Spiritual Knowledge,” Ensign, Nov. 1993, 86).
Missouri Euruur, jān Glen S. Hopkinson