C. C. A. Christensen (1831–1912), Saints Driven from Jackson County Missouri, c. 1878, tempera ilo muslin, 77 ¼ × 113 iniij. Brigham Young University Museum of Art, gift of the grandchildren of C. C. A. Christensen, 1970

Jeptōm̧ba 6–12.

Katak im Bujen Ko 98–101

“Ikōn̄ Wōt im Jeļā Ke N̄a Anij”

Ta ennaan eo ajri ro ilo kūlaaj eo am rekōņaan ron̄jake wiik in? Elmen an pedped in katak ko ilo Katak im Bujen Ko 98–101 jipan̄ er rikaļoor ro rem̧m̧an ļo̧k an Jisōs Kraist?

Je En̄jake ko Rej Im̧we Eok

Kajjitōk bwe ren Kwaļo̧k

Rōjan̄ ajri ro n̄an kwaļo̧k jet men rekar ekkatak jān Katak im Bujen Ko ilo m̧weeo ak ilo Būraimere. Kajjitōk ippāer ta eļapļo̧k an kam̧ōņōņō n̄an ekkatak jen Katak im Bujen Ko.

Katakin Katak eo: Ajri ro Reddikļo̧k

Katak im Bujen Ko 98:39–40

Imaron̄ jeo̧rļo̧k bōd an ro rejjab jouj n̄an eō.

Irooj eaar kajjitōk ippān ro Rekwojarjar ro kar kōjdāt er ilo Jackson County, Missouri, n̄an jeo̧rļo̧k bōd an ro raar kōmetak er. Ilo am katakin ajri ro aorōk eo an jeo̧rļo̧k bōd, lukkuun lale bwe ren meļeļe bwe eļan̄n̄e ewōr en eaar kōmetak er, rej aikuj iien otemjej kwaļo̧k n̄an armej eo erūtto.

Makūtkūt ko Maron̄ Kōm̧m̧ani

• N̄an jipan̄ ajri ro meļeļe apan̄ ko an ro Rekwojarjar ilo Zaion raar iooni, kwaļo̧ki n̄an er “Jebta 34: Anij ekar kakkōl Armij in Zion” (Bwebwenato ko an Katak im Bujen Ko, 128–31, ak pija eo ilo ChurchofJesusChrist.org). Riiti Katak im Bujen Ko 98:39–40, im kajjitōk ippān ajri ro n̄an ron̄jake ta eo Irooj eaar ba n̄an ro Rekwojarjar n̄an kōm̧m̧ane n̄an rikōjdāt ro aer n̄an jeo̧rļo̧k bōd. Etke Jisōs ekōņaan bwe jen jeo̧rļo̧k an armej bōd, bar ro rejjab jouj n̄an kōj?

• Likūt juon pija in juon mej elem̧ōņōņō ilo dipin m̧weeo im juon mej ejelem̧ōņōņō ilo dem̧ eo juon. Kwaļo̧k n̄an ajri ro oktak in jekjek ko n̄e juon ejjab jouj (kwomaron̄ lale jet bwebwenato ko ilo Eo Jera ak Liaona). Kwaļo̧k wāween kōm̧m̧an ko an ro rejjab jouj, im jipan̄ ajri ro kālet eļan̄n̄e kajjojo uwaak ekōm̧m̧an aer lem̧ōņōņō ak burom̧ōj. Kajitōk ippān ajri ro n̄an kalikkar mej eo ilo dipin m̧weeo.

Katak im Bujen Ko 101:16

Jisōs Kraist emaron̄ bōktōk aenōm̧m̧an n̄an eō.

Ke ro Rekwojarar raar ioon kean̄tanaan, Irooj eaar kaenōm̧m̧an er im ba “Ikōn̄ wōt im jeļā ke N̄a Anij.” Ļōmņak kōn ekōjkan an kapilōk in maron̄ kōjeraam̧m̧an ajri ro kwoj katakin er.

Makūtkūt ko Maron̄ Kōm̧m̧ani

• Karuwaineneik ajri ro n̄an m̧ōkajin kōm̧akūt jea ko aer. Innām kajjitōk ippāer n̄an bōjrak n̄e kwonaaj kotak pijain Rilo̧mo̧o̧r im ba naan in “Ikōn̄ wōt im jeļā ke N̄a Anij” (Katak im Bujen Ko 101:16). Āliji ikkure in jejjo kōttan. Kōmeļeļeiki bwe n̄e mour in ekar pen n̄an ro Rekwojarjar ilo iien ko an Josep Smith, Jisōs ekar kōņaan bwe ren ikōn̄ wōt im leke E ijeļo̧kin inepata. Elmen an Jisōs maron̄ jipan̄ kōj n̄e jej ioon iien reppen?

• Al ippān doon kōn juon al kōn kautiej, āinwōt “Reverently, Quietly” ak “To Think about Jesus” (Children’s Songbook, 26, 71). Jipan̄ ajri ro kile en̄jake ko an aenōm̧m̧an me ej itok n̄e jej ikōn̄ im ļōmņak kōn Jisōs—n̄an waanjon̄ok, n̄e jej jar ak bōk kwojkwoj eo.

• Jipan̄ ajri ro kadedeļo̧k peij in m̧akūtkūt eo an wiik in. Ilo aer kōļar, ba n̄an er elmen ļōmņake Jisōs an kar jipan̄ eok en̄jake aenōm̧m̧an, men̄e iien ko reppen.

  

  Meļeļe jān Kraist im Rikōm̧m̧an Kien eo Edik, jān Heinrich Hofmann.

Katakin Katak Ko: Ajri ro Rerūttoļo̧k

Katak im Bujen Ko 98:1–3, 11–14; 101:16

Apan̄ ko aō remaron̄ jipan̄ eō eromļo̧k āinwōt Jisōs Kraist?

Ilo an ajri ro ioon apan̄ ko ilo mour ko aer, renaaj aikuj in tōmak bwe Rilo̧mo̧o̧r emaron̄ jipan̄ er kōn apan̄ ko aer im bwe apan̄ ko remaron̄ “jerbal ippān doon n̄an em̧m̧an eo [aer]” (Katak im Bujen Ko 98:3).

Makūtkūt ko Maron̄ Kōm̧m̧ani

• Kajjitōk ippān ajri ro n̄an jipan̄ eok kōm̧m̧ane juon laajrak ioon bo̧o̧t eo kōn jet apan̄ ko me juon ajri iiō eo aer emaron̄ ioone. Ba n̄an ajri ro kōn jet iaan apan̄ ko ro Rekwojarjar ilo Jackson County, Missiouri, ilo 1833 (lale jebta 34 im 35 ilo Bwebwenato ko ilo Katak im Bujen Ko, 128–34). Ta kapilōk eo remaron̄ leļo̧k n̄an ajri eo ej ioon apan̄ kein? Kajjitōk ippān ajri ro n̄an riiti Katak im Bujen Ko 98:1–3, 11–14, pukot tōl eo Irooj eaar leļo̧k. Elmen aer maron̄ ļoor kapilōk in ilo aer ioon apan̄ ko āinwōt in an elaajrak ioon bo̧o̧t in?

• Karuwaneneik ajri ro n̄an ikōn̄ im jab keroro jejjo̧ minit ilo aer kalimjōk pijain Rilo̧mo̧o̧r ak ron̄jake juon al kōn E. Innām karuwaneneik er n̄an kwaļo̧k ta eo raar en̄jake ilo iien ikōn̄ eo. Riiti Katak im Bujen Ko 101:16. Elmen an ikōn̄ im ļōmņak kōn Jisōs jipan̄ kōj? Jipan̄ ajri ro meļeļe jemdoon eo kōtaan kautiej im ad maron̄ en̄jake Jetōb im ļōmņak kōn Jisōs.

Katak im Bujen Ko 98:23, 39–40

Jisōs ekōņaan bwe in jeo̧rļo̧k bōd an ro rejjab jouj n̄an eō.

Kar kakien kōj n̄an iakwe doon, n̄an jeo̧rļo̧k an ro jet bōk “jiljilimjuonn̄oul alen jiljilimjuon,” im oktakļo̧k n̄an jepe eo juon (lale Matu 5:39, 43–44; 18:21–22). Elmen am maron̄ kōjerbal eoon kein n̄an katakin ajri rein m̧ool ko?

Makūtkūt ko Maron̄ Kōm̧m̧ani

• Ba n̄an ajri ro kōn jet iaan apan̄ ko ro Rekwojarjar ilo Jackson County, Missiouri, ilo 1833 (lale jebta 34 im 35 ilo Bwebwenato ko ilo Katak im Bujen Ko, 128–34). Kajjitōk ippān ajri ro ewi wāween aer maron̄ kar en̄jake eļan̄n̄e ren kar juon iaan membōr ro an Kabun̄ ilo tōre eo. Karuwaineneik er n̄an riiti Katak im Bujen Ko 98:23, 39–40 n̄an lo ta eo Irooj ekar kōņaan bwe ro Rekwojarjar ren kōm̧m̧ane. Etke ekar pen n̄an jeo̧rļo̧k bōd n̄an ro raar kōmetak kōj? Elmen ad jeraam̧m̧an n̄e jej kōm̧m̧ane?

• Kajjitōk ippān ajri ro eļan̄n̄e rej ļōmņak kōn juon tōre Jisōs Kraist ak ro jet ilo jeje ko rekwojarjar kar kōm̧m̧ane ta eo Katak im Bujen Ko 98:23 ej katakin. N̄an leļo̧k juon waanjon̄ok, kwaļo̧k juon pijain Dōbwāāl eo (āinwōt Gospel Art Book, no. 57). Kajjitōk ippān ajri ro n̄an kwaļo̧k ta eo rejeļā kōn dōbwāāl eo an Rilo̧mo̧o̧r (lale Luk 23). Karuwaineneik er n̄an riiti Luk 23:24. Ewi wāween ad maron̄ ļoor waajon̄ak ko an Jisōs Kraist?

Katak im Bujen Ko 101:23–32, 36, 38

Kōn Jisōs Kraist imaron̄ lo m̧ōņōņō.

Mour ejjab meļeļe kwonaaj ellā jen apan̄, ak kwomaron̄ jipan̄ ajri ro lo bwe remaron̄ lo tarlep in m̧ōņōņō kōn Jisōs Kraist.

Makūtkūt ko Maron̄ Kōm̧m̧ani

• Tein̄i dān ilo juon kab. Kajjitōk ippān ajri ro n̄an kwaļo̧k men ko Rilo̧mo̧o̧r eaar kōm̧m̧ani n̄an kōj bwe jen bōk m̧ōņōņō, im karuwaneneik er n̄an likūt jidik ebbool ilo kab eo kōn men ko ren kwaļo̧ki m̧ae iien eobrak kab eo. Riiti ippān ajri ro Katak im Bujen Ko 101:36, im kajjitōk ippāer n̄an pukote elmen ad maron̄ bōk juon m̧ōņōņō eo edipio. Ta jet iaan men ko jemaron̄ kōm̧m̧ani n̄an “kappuko … Irooj” (eoon 38) bwe jen maron̄ bōk m̧ōņōņō eo me Ej kōņaan letok n̄an kōj?

• Kōmeļeļeik bwe Katak im Bujen Ko 101:23–32 kwaļo̧k kōn ta eo laļin enaaj āinwōt n̄e Jisōs Kraist ebar itok. Ilo am riiti eoon kein ippān doon, kōnono kōn men ko ajri ro rej loe me enaaj bōktok m̧ōņōņō n̄an kōj n̄e Ej itok. Etke ejipan̄ n̄an jeļā kōn men kein n̄e epen tok n̄an kōj?

Kōketak Ekkatak ilo M̧weo

Jipan̄ ajri ro bōk juon eoon jen Katak im Bujen Ko 98–101 me rej kōņaan kwaļo̧k n̄an baam̧le ko aer. Jipan̄ er n̄an karōk elmen aer naaj kwaļo̧k ta eo em̧m̧an ippāer ilo eoon in.

Kōkōm̧anm̧anļo̧k Ad Katakin

Kōkōm̧anm̧anļo̧k āinwōt juon Rūkaki Āinwōt Kraist. Kōļmenļo̧kjeņ wāween ko kwomaron̄ in erom̧ rikaki eo eļapļo̧k Āinwōt Kraist. Ļōmņak in kōjerbale kajjitōk ko n̄an etale eok make ilo peij 37 in Teaching in the Savior’s Way n̄an im̧we eok.