Kirtland Tampeļ, jān Al Rounds

O̧kwōj 30–Jeptōm̧ba 5

Katak im Bujen Ko 94–97

“N̄an Lo̧mo̧o̧r eo an Zaion”

Pukot im̧we n̄an jeļā ta pedped in katak ko jān jekjōn 94–97 n̄an kwaļo̧ki ilo am̧ katakin. Kwomaron̄ ukukot itia in m̧akūtkūt ko n̄an ajri ro reddikļo̧k ilo am̧ katakin ajri ro rōrūttoļo̧k, ak ajri ro rōrūttoļo̧k ilo am̧ katakin ajri ro reddikļo̧k.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k n̄an ajri ro juon pija in tampeļ, im karuwaineneik er n̄an kwaļo̧k ta eo rejeļā kōn tampeļ ko. Remaron̄ bar kōnono kōn wāween aer en̄jake n̄e rej lo juon tampeļ.

Katakin Katak eo: Ajri ro Reddikļo̧k

Katak im Bujen Ko 95:8; 97:15–16

Tampeļ eo ej m̧weo im̧ōn Irooj.

Men̄e ajri ro ilo Kirtland rekar jipan̄, ilo men dikdik ko bōtaab eļap tokjeer, n̄an kalōk Tampeļ eo ilo Kirtland. Jipan̄ ajri ro kwoj katakin er kōkajoorļo̧k iakwe eo aer n̄an m̧weo im̧ōn Irooj ekwojarjar.

Makūtkūt ko Maron̄ Kōm̧m̧ani

• Kwaļo̧k juon pija in Kirtland Tampeļ (lale unin tōl eo an wiik in ilo Ļoor Eō—N̄an Kajjojo Armej im Baam̧le ko). Kōjerbal naan kein jān Katak im Bujen Ko 95:8 n̄an katakin ajri ro kōn kien ko an Irooj n̄an kalōk tampeļ in. Kōm̧m̧an bwe ajri ro ren kajjojo bōk koņaer jibwe pija eo im ba “Tampeļ ej m̧weo im̧ōn Irooj.”

  

  Ro Rekwojarjar raar kalōk juon tampeļ n̄an epaake ļo̧k Anij.

• Ba n̄an ajri ro bwe ilo aolep tampeļ ej jeje “Kwojarjar n̄an Irooj. M̧weo Im̧ōn Irooj.” N̄e ekkar, kwaļo̧k n̄an er juon pija in naan kein ilo juon tampeļ. Etke tampeļ ej juon jikin ejenoļo̧k? Riiti naan kein jān Katak im Bujen Ko 97:15–16 me ej kwaļo̧k kōn tampeļ āinwōt m̧weo im̧ōn Irooj, im kwaļo̧k en̄jake eo am̧ kōn tampeļ.

• Karuwaineneik ajri ro n̄an āinwōt n̄e rej jipan̄ kalōk juon tampeļ (m̧wijm̧wij alal, dila, uno, im ko jet). Kōmeļeļeik ewi jon̄an an aorōk juon tampeļ n̄an Irooj, ewi jon̄an an kar pen an Ro Rekwojarjar jerbal n̄an kalōk Kirtland Tampeļ, im ewi jon̄an aer kar kaarmājet n̄an kalōk tampeļ eo (lale Saints, 1:210).

• Al ippān doon juon al n̄an jipan̄ ajri ro en̄jake kautiej n̄an m̧weo im̧ōn Irooj, āinwōt “I Love to See the Temple” (Children’s Songbook, 95). Kōtļo̧k bwe ajri ro ren kwaļo̧k en̄jake ko aer kōn tampeļ.

Katak im Bujen Ko 97:8

Imaron̄ m̧ool.

Ilo Katak im Bujen Ko 97:8, Irooj eaar kalikkar m̧ool āinwōt juon m̧wil an ro rej “bōk eō.”

Makūtkūt ko Maron̄ Kōm̧m̧ani

• Kōmeļeļeik ajri ro bwe Anij eaar katakin bwe n̄e jej m̧ool, Ej bōk kōj (lale Katak im Bujen Ko 97:8). Kwaļo̧k n̄an er jet bwebwenato ko rekadu me ejipan̄ er meļeļe ta meļeļein m̧ool. Bwebwenato kein remaron̄ itok jān mour eo am̧ make, jān mour eo an ro jet kwojeļā kajjier, ak jān Eo Jera ak Liaona. Jipan̄ ajri ro bar kwaļo̧k bwebwenato ko n̄an eok ak kwaļo̧k en̄jake ko ilo m̧ool jān mour ko aer.

• Jipan̄ ajri ro ekkatak naan eo jinoin ilo laajrak in tōmak jon̄ouljilu: “Jej tōmak ilo m̧ool.” Jipan̄ ajri ro kōm̧m̧an arin waanjon̄ak ko kōn m̧ool im riab. N̄an waanjon̄ak, ajri ro remaron̄ kōm̧m̧an arin kōtōnn̄e ajri ro rej bōk juon men jān ro jeier ak jatier im ba n̄an ro jineer im jemāer ke rekar jab bōke. Innām jipan̄ ajri ro kōm̧m̧an arin ejja jekjek eo wōt eo me rej kwaļo̧k m̧ool n̄an ro jineer im jemāer. Kōmeļeļeik bwe en̄in meļeļein n̄e jej m̧ool.

Katakin Katak Ko: Ajri ro Rerūttoļo̧k

Katak im Bujen Ko 95:1–3, 8, 11–17; 97:10–17

Tampeļ eo ej m̧weo im̧ōn Irooj.

Kōļmenļo̧kjeņ elmen am̧ maron̄ kōjerbal eoon kein n̄an jipan̄ ajri ro meļeļe jon̄an aorōk in tampeļ n̄an Irooj—im jon̄an an aikuj aorōk n̄an kōjwōj aolep.

Makūtkūt ko Maron̄ Kōm̧m̧ani

• Kajjitōk ippān ajri ro n̄an kōnono kōn iien ko rekar aikuj in kōm̧m̧ane jet men ak ekar jab m̧ōkaj aer kōm̧m̧ane. Jipan̄ ajri ro riiti Katak im Bujen Ko 95:3, 8, im kajjitōk ippān ajri ro kien ta eo Irooj eaar ba Ro Rekwojarjar rekar jab pokake. Riit ippān doon eoon 11. Ta eo Ro Rekwojarjar reaikuj kōm̧m̧ane bwe ren kar aikuj kalōk tampeļ eo? Ta jemaron̄ ekkatak jān kallim̧ur in an Irooj n̄an er?

• Ioon kaat ko, je pedped in katak ko kōn tampeļ loi ilo Katak im Bujen Ko 95 im 97, ippānļo̧k uwaak in eoon in jipan̄ ko, im likūti kaat ko ilo juon pāāk. N̄an waanjon̄ak: Kalōk tampeļ ko emenin aikuj kaarmājet (Katak im Bujen Ko 97:11–12) im Jej aikuj in erreo n̄an deļo̧n̄e tampeļ eo (Katak im Bujen Ko 97:15–17). Ajeje kūlaaj eo n̄an ruo m̧ōttan ko. Kōm̧m̧an bwe kajjojo pea ren jin̄aik juon kaat jān pāāk eo innām jerbal ippān doon n̄an riiti eoon eo ilo ioon kaat eo im kōnono kake ta meļeļein pedped in katak eo n̄an er. Jipan̄ ajri ro meļeļe ta eo rej riiti n̄e emenin aikuj.

• Karuwaineneik juon armej rūm̧m̧an ded jān ward eo am̧ ak branch eo me em̧ōj an pād ilo tampeļ n̄an kwaļo̧k en̄jake eo an im ba n̄an ajri ro ta eo remaron̄ kōm̧m̧ane n̄an kōppopo n̄an tampeļ.

• Kōjerbal bwebwenato in “Your Path to the Temple” (ilo Tam̧peļ ko ilo Kabun̄ eo an Jisōs Kraist im Armej ro Rekwojarjar ilo Raan ko Āliktata [ennaan eo ilo Ensign ak Liaona, Okt. 2010], 72–75) n̄an jipan̄ ajri ro meļeļe ta eo ej waļo̧k ilowaan tampeļ ko im elmen aer maron̄ kōppopo. Ļōmņak in leļo̧k n̄an kajjojo ajri juon jekjōn in bwebwenato in bwe en riiti im kōtļo̧k bwe ren kwaļo̧k ta eo rej ekkatak.

• Kwaļo̧k pija in “Ruo Rijilōk ro Rej Tōl Iien Loļo̧k eo n̄an Rome Italy Tempeļ” (ChurchofJesusChrist.org), im karuwaineneik ajri ro n̄an kwaļo̧k aer en̄jake kōn etal n̄an tampeļ juon raan.

• Al ippān ajri ro juon al kōn tampeļ āinwōt “I Love to See the Temple” (Children’s Songbook, 95). Ta eoon ko ilo al in rej katakin kōj etke tampeļ ko rekwojarjar?

Katak im Bujen Ko 97:1–2, 8–9, 21

Zaion ej “ro erreo burueer.”

Jipan̄ ajri ro meļeļe bwe zaion ej jikin bajjōk, ak barāinwōt “ro erreo burueer” (Katak im Bujen Ko 97:21).

Makūtkūt ko Maron̄ Kōm̧m̧ani

• Karuwaineneik ajri ro n̄an riiti Katak im Bujen Ko 97:21, im kajjitōk ippāer ta meļeļe naan eo “erreo.” N̄an kalikkare, kwaļo̧k n̄an er juon kūlaaj in dān erreo, im kōnono etke eaorōk bwe en erreo dān eo. Likūt jidik men ilo dān eo bwe en kōm̧m̧an bwe en ettoon (āinwōt bwidej ak peba). Karuwaineneik ajri ro n̄an riiti Katak im Bujen Ko 97:21 im ba ren likūt pāier ioon naan eo “erreo.” Ta meļeļe erreo ilo buruwōd? Jipan̄ ajri ro meļeļe bwe erreo ilo bōro ejjab meļeļe jeban kōm̧m̧an bōd. Ta jemaron̄ kōm̧m̧ane n̄an kōļapļo̧k erreo ilo bururwōd? Ekōjkan an Rilo̧mo̧o̧r eo jipan̄ kōj kōm̧m̧ane menin?

• Jipan̄ ajri ro pukote Katak im Bujen Ko 97:1–2, 8–9, 21, pukot naan ko an eoon ko me rej kōmeļeļe elmen kōļapļo̧k erreo ilo buruwōd. Kajjitōk ippāer n̄an kālet juon naan ak eoon, je jidik ilo ioon juon peba, im likūti ilo juon kantāiner. Jin̄aik jidik peba ilo juon wōt iien, im kajjitōk ippān ajri ro n̄an kakobabaik men eo remaron̄ kōm̧m̧ane n̄an kōjerbale ilo mour ko aer. N̄an waanjon̄ak, ta eo jemaron̄ kōm̧m̧ane n̄an “lo m̧ool eo” (eoon 1) ak kōļapļo̧k “m̧ool” (eoon 8)?

Kōketak Ekkatak ilo M̧weo

Karuwaineneik ajri ro n̄an kōjerbal peij in makūtkūt ko an wiik in n̄an kwaļo̧k n̄an baam̧le ko aer ta eo rōkar ekkatak kōn tampeļ eo.

Kōkōm̧anm̧anļo̧k Ad Katakin

Rōjan̄ ajri ro n̄an kajjitōk kajjitōk ko. “Kajjieon̄ lo [kajjitōk ko an] ajri ro āinwōt iien em̧m̧an, ejjab inepata ak kapan̄pan̄ n̄an katak eo am̧. … Kain kajjitōk rot in elewaj n̄an eok ļōmņak ko n̄an ta eo ajri ro rej ļōmņake, ta inepata ko aer, im ewi wāween aer lo uwaak ko n̄an men ko rej ekkatak. Jipan̄ er lo uwaak ko n̄an kajjitōk ko aer maron̄ loi ilo jeje ko rekwojarjar im naan ko an rikanaan ro remour” (Teaching in the Savior’s Way, 25–26).