Ij lo Nejin Maan ej Jutak Iaanbwijmaron̄ in Anij, jān Walter Rane

O̧kwōj 23–29

Katak im Bujen Ko 93

“Bōk Tarlep eo An”

Ajri ro kwoj katakin er rej ļaddik im leddik in jetōb ro raiboojoj nejin Jined im Jemed Ilan̄ im raar jokwe Ippāer m̧okta jen aer itok n̄an laļin. Ālkin ekkatak Katak im Bujen Ko 93, ta eo kwoj en̄jake ekar im̧we n̄an kōm̧m̧ane n̄an jipan̄ ajri ro eddōkļo̧k “ilo meram im m̧ool”? (eoon 40).

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k pija ko kōn Rilo̧mo̧o̧r (āinwōt ko ilo Gospel Art Book ak māākjiin ko an Kabun̄ in), im kajjitōk ippān ajri ro n̄an kwaļo̧k ta eo rejeļā kōn E. Ajri ro rerūttoļo̧k remaron̄ in kwaļo̧k juon eoon jān Katak im Bujen Ko 93 me ekar jipan̄ er jeļā kōn Jisōs Kraist.

Katakin Katak eo: Ajri ro Reddikļo̧k

Katak im Bujen Ko 93:2–21

Jisōs Kraist ej Nejin Anij.

Eaorōk bwe ajri ro kwoj katakin er ren jeļā wōn eo Jisōs Kraist im etke rej aikuj ļoor E. M̧ool ko kōn Jisōs Kraist repād ilo jākjōn 93 remaron̄ jipan̄.

Jemaron̄ bōk meram in Jisōs Kraist n̄e jej kōjparok kien ko An.

Makūtkūt ko Maron̄ Kōm̧m̧ani

• Kālet jet iaan m̧ool ko kwar ekkatak kōn Rilo̧mo̧o̧r ilo jākjōn 93 me reim̧we eok. N̄an kajjojo m̧ool ko kwar kāleti, riit n̄an ajri ro eoon eo ijo ewaļo̧k, im leļo̧k n̄an er jidik kōkkaļļein naan eo n̄an ron̄jake ilo am riit. Kwaļo̧k jidik naan in kam̧ool kōn Rilo̧mo̧o̧r, im kōtļo̧k bwe ajri ro ren kwaļo̧k naan in kam̧ool ko aer make. Laajrak in tok kōn m̧ool ko emaron̄ lewaj n̄an eok itia ko:

  Jisōs Kraist eaar kōm̧m̧ane jerbal eo an Jemen (eoon 5).

  Jisōs Kraist ej Meram in Laļ (eoon 9).

  Jisōs Kraist ej Rikōm̧anm̧an in laļ (eoon 10).

  Jisōs Kraist eaar bōk aolep kajoor in lan̄ im ioon laļ (eoon 17).

  Jisōs Kraist eaar pād ippān Anij jen jinoin (eoon 21).

• Kajjitōk ippān ajri ro n̄an ron̄jake juon men raar ekkatak kōn Rilo̧mo̧o̧r ilo am̧ kōmeļeļe naan ko am make jet iaan m̧ool ko kar kwaļo̧ki ilo jākjōn 93. Kwomaron̄ bar kōjerbal “Jebta 33: Juon Revelesōn kōn Jisōs Kraist” [Bwebwenato ko ilo Katak im Bujen Ko, 126–27].)

Katak im Bujen Ko 93:23,29

Iaar mour ippān Jemedwōj Ilan̄ m̧okta jen aō itok n̄an laļin.

Etke eaorōk n̄an jipan̄ ajri ro kwoj katakin er meļeļe ke raar mour ippān Jemedwōj Ilan̄ m̧okta jen aer kar lo̧tak? Elmen jeļā kōn m̧ool in kar kōjeraam̧m̧an eok?

Makūtkūt ko Maron̄ Kōm̧m̧ani

• Āliji naan kein ippān ajri ro “Kom̧ ar barāinwōt ilo jinoin ippān Jemān” (Katak im Bujen Ko 93:23). Kōmeļeļeik bwe m̧okta jen ad kar lo̧tak ioon laļin, jaar mour ippān Jemedwōj Ilan̄ ilo lan̄. Al ippān doon “N̄a Nejin Anij” ak “I Lived in Heaven” (Al ko Al in Ajri, 44, 4).

• Karuwaineneik ajri ro n̄an kōļare peij in m̧akūtkūt eo im jin̄aik pija in er make ippān Jemedwōj Ilan̄ im Jisōs Kraist ilo mour eo m̧okta. Kwaļo̧k am̧ naan in kam̧ool bwe Anij ej iakwe kōj aolep im bwe jej ro Nejin.

Katakin Katak eo: Ajri ro Rerūttoļo̧k

Katak im Bujen Ko 93:2–21

Jisōs Kraist ej Nejin Anij.

Toon wōt ad meļeļe kōn Jisōs Kraist, toon wōt an ļapļo̧k im ad kōņaan kabun̄jar n̄an E im itok n̄an Jemed kōn E (lale Katak im Bujen Ko 93:19).

Makūtkūt ko Maron̄ Kōm̧m̧ani

• Kwaļo̧k juon pijain Rilo̧mo̧o̧r, im kajjitōk ippān ajri ro etke eaorōk bwe jen jeļā kōn Jisōs Kraist. Karuwaineneik er n̄an pukot eļapļo̧k uwaak ilo Katak im Bujen Ko 93:19. Karuwaineneik er n̄an ļōmņak juon wāween remaron̄ in jeļā eļapļo̧k kōn Jisōs Kraist ilo wiik eo ej itok, im leļo̧k n̄an er jidik iien n̄an kwaļo̧k ļōmņak ko aer.

• Ļōmņake juon wāween eo em̧m̧anļo̧k n̄an rōjan̄ ajri ro n̄an riit kōn Rilo̧mo̧o̧r ilo jākjōn 93. Kwomaron̄ je ioon peba ko jet eoon in jipan̄ ko jān jākjōn 93 me ej katakin m̧ool ko kōn Jisōs Kraist (n̄an waanjon̄ak, lale eoon 5, 9–10, 17, 21). Likūt peba ko ilo juon kanteinar, im kajjitōk ippān ajri ro n̄an juon ilo̧k juon kālete juon im riiti eoon eo n̄an kūlaaj eo. Ta eo jaar ekkatak kōn Jisōs Kraist jān eoon kein?

Katak im Bujen Ko 93:23, 29, 38

Iaar mour ilan̄ ippān Jemed Ilan̄ mokta jān ad kar itok n̄an laļ in.

Rilo̧mo̧o̧r eo ekar kwaļo̧k jilu katten ilo jākjōn 93 jekar ped ippen Anij “ilo kar jinoun” (eoon 23, 29, 38). Etke Ekar kōņaan bwe jen jeļā menin? Ekōjkan ilo ad jeļā kōn m̧ool in, ej kōjeraam̧m̧an ajri ro kwoj katakin er?

Makūtkūt ko Maron̄ Kōm̧m̧ani

• Riiti Katak im Bujen Ko 93:23, 29, 38 ippān doon, im karuwaineneik ajri ro n̄an pukot m̧ool eo kōn er make me eļap aer kōnono kaki ilo eoon kein. Kajjitōk ippān ajri ro n̄an kwaļo̧k jabdewōt men rejeļā kōn mour eo ad ippān Jemedwōj Ilan̄ m̧okta jen ad kar lo̧tak tok. Leļo̧k n̄an kajjojo ajri juon iaan eoon in jipan̄ kein, im jipan̄ er pukot men ko eoon kein rej kwaļo̧k kake kōn mour eo ad m̧okta jen ad kar itok n̄an laļin Jeremia 1:5; Katak im Bujen Ko 138:53–56; Moses 3:5; Ebream 3:22–26.

• Al ippān doon “N̄a Nejin Anij” ak “I Lived in Heaven” (Children’s Songbook, 44, 4). Ta m̧ool ko jaar ekkatak jen al in kōn unleplep in ad itok n̄an laļin?

Katak im Bujen Ko 93:24

M̧ool ej jeļāļo̧kjeņ in men ko m̧okta, kiiō, im jeklaj.

Laļ in elōn̄ oktak ko loi kōn ta eo m̧ool im elmen pukote. Elmen am̧ maron̄ jipan̄ ajri ro kwoj katakin er meļeļe m̧ool em̧ool men̄e ta eo ro jet rej ba im bwe Jemedwōj Ilan̄ ejeļā aolep m̧ool?

Makūtkūt ko Maron̄ Kōm̧m̧ani

• Je naan eo m̧ool ioon boot eo, im kajjitōk ippān ajri ro n̄an je meļeļein naan eo. Riit ippān doon elmen an Irooj kōmeļeļeik m̧ool in ilo Katak im Bujen Ko 93:24. Al juon al in jar, āinwōt “O Ba, Ta Eo Mol?” (Al, no. 31), im karuwaineneik ajri ro n̄an pukote ilo al eo jet wāween ko n̄an kōmeļeļeik m̧ool eo.

• N̄an jipan̄ ajri ro mour kake m̧ool ko ilo Katak im Bujen Ko 93, je jet eoon in jipan̄ ko jān jākjōn in ilo ioon jet m̧ōttan peba. Ioon m̧ōttan peba ko jet, je m̧ool ko me kajjojo iaan eoon kein rej katakin. Karuwaineneik ajri ro n̄an jerbal ippān doon n̄an riiti eoon ko im keidi m̧ool ko n̄an eoon ko rej riiti. Etke jej m̧ōņōņō n̄an bōk juon jeļāļo̧kjeņ kōn m̧ool in?

Kōketak Ekkatak ilo M̧weo

Karuwaineneik ajri ro n̄an je ak jin̄aik jet men raar ekkatak ilo kūlaaj im kwaļo̧k n̄an baam̧le ko aer n̄e repād ilo m̧ōko m̧weer.

Kōkōm̧anm̧anļo̧k Ad Katakin

Jipan̄ ajri ro kile Jetōb eo. Ilo am bōk jetōbin en̄jake ippān ajri ro (n̄an waanjon̄ok, ilo iien riiti jeje ko rekwojarjar ippāer, ron̄jake naan in kam̧ool ko aer, ak al ippān doon), jipan̄ er kile im̧we eo an Jetōb Kwojarjar.