O̧kwōj 2–8

Katak im Bujen Ko 85-87

“Kom̧in Jutak ilo Jikin ko Rekwōjarjar.”

Kōnke iien eo am̧ ippān ajri ro ewōr jon̄an, kappukōt tōl eo ilo jetōb n̄an jeļā ta pedped in katak ko jān jeje ko rekwojarjar kwoj aikuj in kōmejajaik. Lōke im̧weo ko kwoj būki.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k n̄an ajri ro jet pija ko ak peij in m̧akūtkūt ko kwar kōjerbali ilo katak ko im̧aanļo̧k, im kajjitōk ippān ajri ro n̄an kwaļo̧k ta eo rej keememej aer kar ekkatak kaki, jim̧or ilo kūlaaj eo ak m̧weo.

Katakin Katak eo: Ajri ro Reddikļo̧k

Katak im Bujen Ko 85:6

Jetōb eo ej ekōnono kōn juon “ainikien elur im mera.”

Elder Richard G. Scott eaar ba, “Eļan̄n̄e ejjeļo̧k bar juon kwoj tōprake ilo jemjerā eo am̧ ippān rijikuuļ ro am̧ ijello̧kin in n̄an jipan̄ er kile im ļoor im̧we ko an Jetōb, kwonaaj kōjeraam̧m̧an mour ko aer ilo juon jekjek eo ban jon̄e im ej n̄an indeeo” (“To Learn and to Teach More Effectively” [Brigham Young University Education Week devotional, Aug. 21, 2007], 5, speeches.byu.edu).

M̧akūtkūt ko Maron̄ Kōm̧m̧ani

• Riiti n̄an ajri ro ekōjkan an Josep Smith kar kōmeļeļeik Jetōb eo: “Aaet, āindein ainikien elur im mera” (Katak im Bujen Ko 85:6). Kajjitōk ippān ajri ro n̄an ba etan jet men ko me reddik (kwaļo̧k pija ko eļan̄n̄e rej aikuj jipan̄). Kajjijtōk ippāer n̄an jillak laļļo̧k ioon laļ n̄an erom dik im jab m̧akūtkūt jon̄an wōt aer maron̄. Jipan̄ er ļōmņak kōn ekōjkan an juon ainikien maron̄ in dik, im kōm̧m̧an bwe ren kōmālmel ron̄jake im ekōnono ilo juon ainikien edik. Ba kōn iien ko ke Jetōb eo ekar ekōnono n̄an eok ilo juon ainikien elur, edik.

• Al ippān doon juon al kōn Jetōb Kwojarjar, eo āinwōt “The Holy Ghost” (Children’s Songbook, 105). Kajjitōk ippāer n̄an al kake ippam̧ ilo unoojdikdik. Ta eo al in ej katakin kōn Jetōb Kwojarjar? Jipan̄ ajri ro kile n̄e remaron̄ in kar en̄jake kareel eo An (ko āinwōt n̄e jar, al al in jar ko, ak jipan̄ ro jet).

Katak im Bujen Ko 86:11

Imaron̄ juon meram n̄an ro jet.

Jekjōn 86 ej kōmeļeļeik aorōk in jerbal eo Irooj ej kōņaan bwe ro Rikarejeran ren kōm̧m̧ane ilo raan ko āliktata. Juon wāween ajri ro remaron̄ jipan̄ ilo jerbal in ej ilo aer erom juon meram n̄an armej ro ipeļakier.

M̧akūtkūt ko Maron̄ Kōm̧m̧ani

• Riiti n̄an ajri ro eoon kein jān Katak im Bujen Ko 86:11: “Kom̧in m̧ōņōņō eļan̄n̄e kom̧ij wōnm̧aanļo̧k ilo em̧m̧an eo Aō, juon meram n̄an ro riAelōn̄ ko [ak armej ro me ejjeļo̧k ippāer gospel eo].” Ekōjkan an meram eo kōjeraam̧m̧an kōj? Ewi wāween n̄e ejjeļo̧k ippād meram eo? Ekōjkan ad maron̄ in erom juon meram n̄an ro jet me rejjab jeļā kōn gospel eo? Jipan̄ ajri ro ļōmņak kōn wāween ko jemaron̄ in kwaļo̧k em̧m̧an eo an Jisōs ippān ro jet.

• Kajjitōk ippān ajri ro n̄an pijaikļo̧k bwe juon m̧ōttaer ej kajjieon̄ in etetal ilo merak (kune tōm̧ak ko eļan̄n̄e ej jipan̄). Etke epen n̄an etetal ilo marok? Ta eo jemaron̄ kōm̧m̧ane n̄an jipan̄ eo m̧ōttad? Kōmeļeļeik bwe n̄e jej ļoor Rilo̧mo̧o̧r eo, ej āinwōt juon meram ej erromaakļo̧k n̄an kwaļo̧k n̄an ro jet iaļ eo n̄an etal ie ļo̧k.

• Liaona im Friend mākjiin ko emakijkij an lōn̄ ie bwebwenato ko kōn ajri ro me rej waanjon̄ak ko rem̧m̧an. Pukōt juon n̄an kwaļo̧ke ippān ajri ro me enaaj im̧we er n̄an erom waanjon̄ak ko rem̧m̧an barāinwōt.

Katak im Bujen Ko 87

M̧ōko im̧ōd remaron̄ erom “jikin ko rekwojarjar.”

Ejjeļo̧k em̧ ej weeppān, bōtaab ewōr men ko jemaron̄ aolep kōm̧m̧ane n̄an kōm̧m̧an bwe im̧ōko im̧ōd ren jikin ko rekwojarjar an aenōm̧m̧an.

M̧akūtkūt ko Maron̄ Kōm̧m̧ani

• Kōmeļeļeik n̄an ajri ro bwe Josep Smith eaar inepata kōn men ko me raar waļo̧k ilo laļ in. Ba ilo tukadu in taitōļ in peij eo n̄an jekjōn 87, ak riiti “Chapter 30: A Revelation about War” (Doctrine and Covenants Stories, 117–18; lale barāinwōt pija in alooj eo ilo ChurchofJesusChrist.org). Kajjitōk ippān ajri ro n̄an ron̄jake men ko me emaron̄ kar kōm̧m̧an an Josep kar inepata. N̄an katakin ta eo Irooj eaar ba jej aikuj kōm̧m̧ane kōn jorrāān ko, riiti Katak im Bujen Ko 87:8.

• Kwaļo̧k juon pija in juon tampeļ, im kwaļo̧k etke tampeļ eo ej juon jikin ekwojarjar. Kwaļo̧k juon pija in juon em̧, im jipan̄ ajri ro ļōmņak kōn wāween ko remaron̄ kōm̧m̧an bwe im̧ōko im̧wer rej kwojarjar āinwōt wōt tampeļ eo (lale peij in m̧akūtkūt eo an wiik in). Etke jej kōņaan pād ilo jikin ko rekwojarjar?

Katakin Katak ko: Ajri ro Rerūttoļo̧k

Katak im Bujen Ko 85:6

Jetōb eo ej ekōnono kōn juon “ainikien elur im mera.”

Laļ in elōn̄ an kein kōm̧ad ko me remaron̄ kōm̧m̧an an pen n̄an ron̄jake Jetōb eo. Ekōjkan am̧ naaj jipan̄ ajri ro ron̄jake ainikien Jetōb eo?

M̧akūtkūt ko Maron̄ Kōm̧m̧ani

• Kajjitōk ippān ajri ro ta eo renaaj kar ba eļan̄n̄e juon ekar kajjitōk ippāer ekōjkan aer jeļā n̄āāt eo Jetōb Kwojarjar ej ekōnono n̄an er. Kajjitōk ippāer n̄an riit kōn juon wāween Josep Smith ekar kōmeļeļeik ainikien Jetōb eo ilo Katak im Bujen Ko 85:6.

• Kōjan̄ juon al in jar ak al in ajri ilo mera, im kajjitōk ippān juon iaan ajri ro n̄an kajidedeik al ta eo ilo an ro jet kōm̧m̧ani ainikien kōm̧ad ko, eo āinwōt kabokbok ak kam̧ūņm̧ūņ. Innām kajjitōk ippān bar juon ajri n̄an bōjrak, im ekōnono kōn ekōjkan an menin āiinwōt ron̄jake Jetōb Kwojarjar n̄e jej kōm̧akūtļo̧k kōm̧ad ko jān mour ko ad. Jipan̄ ajri ro ļōmņak kōn kōm̧ad ko remaron̄ kōm̧akūtlo̧k n̄an an maron̄ emakijkijļo̧k aer en̄jake Jetōb eo.

Katak im Bujen Ko 86

Imaron̄ jipan̄ aintok armej ro an Anij.

Būrabōļ eo kōn wiit im tāe ko ej kōn “raan ko āliktata, em̧ool kiiō” (Katak im Bujen Ko 86:4). Kōjerbal būrabōļ in n̄an jipan̄ ajri ro en̄jake im̧we n̄an bōk koņaan ilo “aini wiit ko” (eoon 7).

M̧akūtkūt ko Maron̄ Kōm̧m̧ani

• Jiron̄ ajri ro kōn būrabōļ eo kōn wiit eo im tāe ko, ak kajjitōk ippān juon ajri n̄an kwaļo̧ke (lale Matu 13:24–30). Kajjitōk ippān ajri ro n̄an jin̄aik juon pjia kōn juon men jān būrabōļ eo. Innām riiti ippān doon Katak im Bujen Ko 86:1–7, im kajjitok ippān ajri ro n̄an je ioon pija ko aer ta men eo raar jin̄aik ej jutak kake.

• Kōpooj jejjo pija jiddik ko ak jin̄a ko kōn wiit, im ņooji ipeļaakin ruum̧ eo. Kajjitōk ippān kajjojo ajri n̄an jipan̄ aiin wiit ko im je ioer etan juon eo remaron̄ “aini” n̄an Jisōs Kraist. Ta meļeļe n̄an aini armej ro n̄an Jisōs Kraist? Ta jet iaan wāween ko jemaron̄ kōm̧m̧ane menin? Ta meļeļe in n̄an “wōnm̧aanļo̧k ilo em̧m̧an eo [an Rilo̧mo̧o̧r] eo,” im ekōjkan an jipan̄ kōj aini armej ro n̄an E?Katak im Bujen Ko 86:11).

Katak im Bujen Ko 87

Imaron̄ “jutak … ilo jikin ko rekwōjarjar.”

Ajri ro kwoj katakin er renaaj jelm̧ae kauwōtata ko ilo jetōb im kanniōk ilo aolepān mour ko aer. Komaron̄ jipan̄ kōpooj er jelm̧ae kauwōtata ko kōn katak in er n̄an kappukōt im jutak ilo jikin ko rekwojarjar.

Jerbal in jipan̄ an tampeļ ej juon wāweeen jemaron̄ jipan̄ aini armej ro an Anij.

M̧akūtkūt ko Maron̄ Kōm̧m̧ani

• Riiti ippān doon Katak im Bujen Ko 87:6 n̄an ekkatak kōn men ko Irooj eaar ba naaj waļo̧k ilo raan ko āliktata. Kajjitōk ippān ajri ro n̄an kōnono kōn apan̄ ko me ajri ro dettaer wōt jet iien rej jelm̧ai. Kajjitōk ippāer n̄an kappukōt ilo eoon 8 ta eo Irooj eaar ba jej aikuj kōm̧m̧ane ilo iien ko reppen. Jiron̄ ajri ro kōn jikin ko rekwojarjar ilo mour eo am̧.

• Jipan̄ ajri ro kōm̧m̧ane juon laajrak in jikin ko rekwojarjar, ļōmņak ko rekwojarjar, im jerbal ko rekwojarjar me remaron̄ jipan̄ er jelm̧ae kauwōtata ilo jetōb (kōn ļōmņak ko, lale pija in alooj “Standing in Holy Places” and “Stand Ye in Holy Places—Bloom Where You’re Planted,” ChurchofJesusChrist.org). Kajjitōk ippāer n̄an dāpij wōt laajrak eo ippāer n̄an lale n̄e emenin aikuj.

Kōketak Ekkatak ilo M̧weo

Kajjitōk ippān ajri ro n̄an bōk juon men renaaj kōm̧m̧ane n̄an kōm̧m̧an bwe m̧weo im̧wer ak mour eo aer en juon “jikin ekwojarjar.”

Kōkōm̧anm̧anļo̧k Ad Katakin

Kōjerbal jeļā eo am̧. Jab kōm̧m̧an bwe kwon kōjerbal wōt ļōmņak in m̧akūtkūt ko kar elmakoti ilo laajrak in. Kōm̧m̧an bwe ļōmņak kein ren im̧we jeļā eo am̧ make. Ļōmņak kōn ta eo ajri ro ilo kūlaaj eo am̧ renaaj m̧ōņōņō kake im ta eo enaaj jipan̄ er ekkatak.