“O̧kwōj 16–22. Katak im Bujen Ko 89–92: ‘Juon Pedped ippān Kallim̧ur,’” Itok, Ļoor Eō—N̄an Būraimere: Katak im Bujen Ko 2021 (2020)
“O̧kwōj 16–22. Katak im Bujen Ko 89–92,” Itok, Ļoor Eō—N̄an Būraimere
O̧kwōj 16–22.
Katak im Bujen Ko 89–92
“Juon Pedped ippān Kallim̧ur”
Ilo am̧ ekkatak m̧ool ko ilo Katak im Bujen Ko 89–92, kōļmenļo̧kjeņ kōn wāween ko rekāāl im rem̧m̧an komaron̄ jipan̄ ajri ro meļeļe kaki.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an jin̄a im kōnono kōn men ko rem̧m̧an raar kōm̧m̧ani ilo wiik in n̄an kōjparok āinbwinier im jetōb ko aer.
Katakin Katak eo: Ajri ro Reddikļo̧k
Inaaj jeraam̧m̧an ilo aō pokake Naan in Mālōtlōt.
Katakin ajri ro bwe ābwin ko ad rej menin letok jān Jemedwōj Ilan̄ im Ej kōņaan bwe en em̧m̧an ad kōjparoki.
Ānbwin ko ad rej menin letok jān Anij.
M̧akūtkūt ko Maron̄ Kōm̧m̧ani
-
N̄an jipan̄ ajri ro meļeļe kien ko an Irooj ilo Katak im Bujen Ko 89:10–17, jin̄aik ak kwaļo̧k jipan̄ ko kōn men ko rem̧m̧an jemaron̄ m̧ōn̄ā ak men ko rem̧m̧an jemaron̄ kōm̧m̧ani n̄an dāpij ājmour eo an ānbwinid (lale peij in m̧akūtkūt eo an wiik in). Barāinwōt jipan̄ ajri ro meļeļe bwe dān in kadōk, jikka, tii, ko̧pe, im uno ko rekkajoor jet rej kōmetak ānbwinid im Irooj eaar kakkōl kōj n̄an jab kōjerbali. Kajjitōk ippān ajri ro n̄an kāāļet juon men remaron̄ kōm̧m̧ane ilo wiik in n̄an dāpij ājmour an ānbwin ko ad.
-
Kajjitōk ippān ajri ro n̄an bōk koņaer jin̄aik juon pija ioon boot eo me ej jutak kōn juon men kar katakin ilo Naan in Mālōtlōt. Kōm̧m̧an bwe aolep ajri ro jet ren kajidedeik ta eo kajjojo rej pijaik. Kōnono kōn kien eo an Irooj ilo jekjōn 89 me ainļo̧k wōt jin̄a eo.
-
Kōjerbal waanjon̄ak kein, ak ko jet kwoj ļōmņak kaki, n̄an kwaļo̧k ekōjkan ad jeraam̧m̧an jān pokake Naan in Mālōtlōt (lale Katak im Bujen Ko 89:18–21). Kōm̧m̧ane juon ekjerjaij ippān doon epidodo, ko āinwōt etetal ak ettōr ilo juon jikin, innām kōm̧m̧an kōtan ke kwoj “m̧ōk” ak “ļōtļo̧k” (eoon 20). Kam̧ool kōn kallim̧ur ko an Irooj.
-
Kwaļo̧k juon pija in tampeļ, im kajjitōk ippān ajri ro n̄an kōmeļeļeik ta eo rej loe. Kōjerbal juon al kōn ājmour ilo ānbwin, eo āinwōt “The Lord Gave Me a Temple” (Children’s Songbook, 153), n̄an katakin ajri ro bwe ānbwin ko ad rej āinwōt tampeļ ko n̄an jetōb ko ad im Anij ekōņan bwe ej dāpij ājmour eo an ānbwinid. Jipan̄ ajri ro ļōmņak kōn wāween jemaron̄ kōjparok ānbwin ko ad, im kōm̧m̧an bwe ajri ro rej kōm̧m̧an kōļ kaki.
Anij ej letok n̄an kōj rikanaan n̄an tōl im kōjparok kōj.
Jipan̄ ajri ro meļeļe ekōjkan an rikanaan eo an Irooj maron̄ jipan̄ kōj lo ineem̧m̧an jān ļan̄ ko an mour.
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro pija ko an rikanaan ro etto, im jiron̄ er kōn ekōjkan an rikanaan rein kar kakkōl armej ro ilo tōre eo aer. (N̄an ļōmņak ko, lale “Follow the Prophet,” Children’s Songbook, 110–11.)
-
Etke jej aikuj ron̄jake rikanaan ro an Anij? Kwaļo̧k pija eo an rikanaan eo kiiō, im kwaļo̧k jet men ko eaar katakin ak kakkōl kōj kaki kiiō eppak. Jipan̄ ajri ro ļōmņak kōn wāween ko jemaron̄ ļoor rikanaan eo. Kwaļo̧k naan in kam̧ool eo am̧ kōn m̧ool ko kar katakin ilo Katak im Bujen Ko 90:5. (Kile bwe “oracles” ej meļeļe in revelesōn ko ak rikanaan ro rej būki.)
Katakin Katak ko: Ajri ro Rerūttoļo̧k
Naan in Mālōtlōt ej jipan̄ eō ājmour iilo ānbwin im jetōb.
Elder Gary E. Stevenson eaar kapilōk armej ro reddik n̄an karōk m̧oktaļo̧k ta eo renaaj kōm̧m̧an n̄e kapoik er kōn dān in kadōk ak uno ko rekkajoor. Innān eaar katakin, “kwonaaj lo bwe kapo edikļo̧k an kajoor ioom̧. Em̧ōj am̧ kōm̧m̧ane kāālet eo kōn wāween am nej uwaak im ta eo kwonaaj kōm̧m̧ane. Koban aikuj in kālet aolep iien” (“Am̧ Bok in Ikkure in Priesthood,” Ensign ak Liaona, Māe 2019, 48). Kōketak ajri ro kwoj katakin er n̄an jokāālet kiiō—n̄an aolepān mour ko aer—n̄an mour kōn Naan in Mālōtlōt.
M̧akūtkūt ko Maron̄ Kōm̧m̧ani
-
Ajije ajri ro n̄an ruo kumi ko, im kajjitōk ippān juon kumi n̄an riiti Katak im Bujen Ko 89:1–4 im kumi eo juon n̄an riiti eoon 18–21. Kajjitōk ippāer n̄an kōļmenļo̧kjeņ kōn kajjitōk ko āinwōt kein: Etke Irooj eaar letok n̄an kōj Naan in Mālōtlōt? Ekōjkan an mour kōn Naan in Mālōtlōt maron̄ kōjeram̧m̧an eō ilo kanniōk im ilo jetōb?
-
Kōm̧m̧ane ennaan ko kōn kanne kobban būļāān̄ ko kōjerbal naan ko jān Katak im Bujen Ko 89, ko āinwōt “ ej kōmālim n̄an jerbal n̄an armej im an mennin mour kan” ak “Im renaaj im jab parōk” (eoon 14, 20). Kajjitōk ippān ajri ro n̄an jerbal ilo ruo iaan ruo n̄an pukōt uwaak ko ilo jekjōn 89. Ajri ro remaron̄ kōjepeļļo̧k enaan ko n̄an laajrak kein: men ko rem̧m̧an n̄an ānbwin ko ad, men ko renana n̄an ānbwin ko ad, im kōjeraam̧m̧an ko.
-
Kajjitōk ippān juon ajri n̄an riiti Katak im Bujen Ko 89:4 im bar juon n̄an riiti kout eo jān Elder Stevenson itulōn̄. Etke jej aikuj jokāālet kiiō n̄an poake Naan in Mālōtlōt ijello̧kin kōttar m̧ae iien eo an kapo eo? Jipan̄ ajri ro kōmālmel ekōjkan aer maron̄ uwaak eļan̄n̄e juon, em̧ool juon m̧ōttaer, ej leļo̧k n̄an er juon men eo me ej ņae Naan in Mālōtlōt. Ekōjkan an pokake Naan in Mālōtlōt kōjparok kōj?
Katak im Bujen Ko 90:2, 5, 14–16
Būreejtōnji eo Kein Kajuon ej kabwijer “kii ko an aelōn̄ in kiin̄ eo.”
Naan in kōmeļeļe ko an Irooj kōn Būreejtōnji eo Kein Kajuon ilo 1833 (Josep Smith, Sidney Rigdon, im Frederick G. Williams) emaron̄ jipan̄ ajri ro kōkajoorļo̧k naan in kam̧ool eo aer kōn Būreejtōnji eo Kein Kajuon rainin.
M̧akūtkūt ko Maron̄ Kōm̧m̧ani
-
Kajjitōk ippān ajir ro n̄an etale Katak im Bujen Ko 90:14–16 im je jet iaan men ko Irooj eaar kajjitōk ippān Būreejtōnji eo Kein Kajuon n̄an kōm̧m̧ane. Kwaļo̧k n̄an ajri ro juon pija in Būreejtōnji eo Kein Kajuon kiiō, im kwaļo̧k jet men kōn er. (Komaron̄ riiti bwebwenato in mour ko aer ium̧win “Living Prophets and Church Leaders” ilo ChurchofJesusChrist.org.) Kwaļo̧k naan in kam̧ool eo am̧ kōn kūr ko aer rekwojarjar im kōjeraam̧m̧an ko kwar būki jān ļoor kapilōk eo aer.
-
Etale ippān ajri ro jet men me juon uwaan Būreejtōnji eo Kein Kajuon eaar katakin. Innām riiti ippān doon Katak im Bujen Ko 90:5. Kalikkare bwe “oracles” rej revelesōn ko ak rikanaan ro jej bōk er. Ta meļeļe in n̄an “bōk revelesōn ko … āinwōt juon men eļem waan”? Ekōjkan ad maron̄ kwaļo̧k bwe rikanaan ro im men ko rej katakin kōj rej aorōk n̄an kōj?
Jetōb eo emaron̄ jipan̄ eō jeļā ta eo ej m̧ool.
Ilo am̧ riiti ta eo Irooj eaar jiron̄ Josep Smith kōn Apocrypha eo, ļōmņak kōn ekōjkan an kapilōk in maron̄ jipan̄ ajri ro jeļā ikōtaan m̧ool eo imi bōd eo renaaj ioone ilo aolepān mour ko aer.
M̧akūtkūt ko Maron̄ Kōm̧m̧ani
-
Riiti ippān doon taitōl in jekjōn n̄an Katak im Bujen Ko 91 n̄an jipan̄ ajri ro meļeļe ta eo Apocrypha (lale barāinwōt Unin Tōl Eo N̄an Jeje Ko Rekwōjarjar, “Apocrypha,” scriptures.ChurchofJesusChrist.org). Jipan̄ ajri ro ļōmņak kōn jikin ko jet, ko āinwōt ilo media, ijo jemaron̄ lo “men ko rellōn̄ … rejim̧we” im “men ko rellōn̄ … rej jab m̧ool” (ioono 1–2). Innām kajjitōk ippān ajri ro etale jekjōn 91 n̄an ekkatak ta eo Irooj eaar ba jemaron̄ kōm̧m̧ane n̄an jeļā kōtaan m̧ool im bōd.
-
Riiti ippān doon Katak im Bujen Ko 91:4–6, im kajjitōk ippān ajri ro ta eo eoon kein rej katakin kōn Jetōb Kwojarjar. Kajjitōk ippān ajri ro n̄an kwaļo̧k juon am̧ make en̄jake ke “Jetōb eo [kar kwaļo̧k] m̧ool eo” n̄an er. Barāinwōt kwaļo̧k en̄jake eo am̧ make. Ilo wāween ta ko jet Jetōb eo emaron̄ jipan̄ kōj?
Kōketak Ekkatak ilo M̧weo
Kajjitōk ippān ajri ro n̄an kwaļo̧k ippān baam̧le eo aer ta eo raar ekkatak rainin kōn kea kōn ānbwini im jetōb eo aer ak menin kōttōpar ko aer n̄an pokake Naan in Mālōtlōt.
Kōkōm̧anm̧anļo̧k Ad Katakin
Kappukot im̧we eo am̧ make. Unin tōl kein rejjab naan in kōmeļeļe ko kwoj aikuj ļoori ilo am̧ katakin. Ijello̧kin, rej meļeļe in n̄an jino im̧we eo am̧ make ilo am̧ kōļmenļo̧kjeņ kōn aikuj ko an ajri ro kwoj katakin er. (Lale Teaching in the Savior’s Way, 7.)