C. C. A. Christensen (1831–1912), ’, c. 1878, tempera ilo muslin, 78 × 114 iniij. Brigham Young University Museum of Art, gift of the grandchildren of C. C. A. Christensen, 1970

Jeptōm̧ba 13–19

Katak im Bujen Ko 102–105

“Ālikin Eļap En̄taan … Ej Itok Kōjeraam̧m̧an”

Am̧ ekkatak jān Katak im Bujen Ko 102–5 ej m̧ōttan kōppopo eo eaorōk ilo am̧ katakin. Ron̄jake jetōbin im̧we kōn wāween n̄an katakin ajri ro meļeļe ļo̧k kōn jeje ko rekwojarjar.

Je En̄jake ko Rej Im̧we Eok

Kajjitōk bwe ren Kwaļo̧k

Jipan̄ ajri ro kālet juon al n̄an al kake me ej kakeememej er kōn jet men rekar ekkatak ilo kapijuknen ak ilo m̧ōnjar eo.

Katakin Katak eo: Ajri ro Reddikļo̧k

Katak im Bujen Ko 103:9

Imaron̄ juon “meram n̄an laļin.”

Elmen am̧ maron̄ rōjan̄ ajri ro kwoj katakin n̄an kwaļo̧k meram in gospel eo n̄an ro ipeļakier?

Makūtkūt ko Maron̄ Kōm̧m̧ani

• Riiti Katak im Bujen Ko 103:9 n̄an ajri ro, im karuwaineneik er n̄an kotak juon pija in tōm̧a, kāāntōļ, ak meram ko jet. Kajjitōk ippāer n̄an kwaļo̧k pija eo aer n̄an ro jet ilo kūlaaj eo. Ba n̄an ajri ro elmen aer āinwōt juon meram n̄an ro jet n̄e rej ļoor Jisōs Kraist.

• Al juon al ippān ajri ro kōn kōm̧m̧an waanjon̄ok, āinwōt “Jesus Wants Me for a Sunbeam” ak “I Am like a Star” (Children’s Songbook, 60–61, 163). Jipan̄ ajri ro kōm̧m̧ane m̧akūtkūt ko n̄an etal ippān naan ko. Elmen ad juon meram, ak waanjon̄ok, n̄an armej ro ipeļaakid?

  

  Imaron̄ juon meram n̄an laļin.

Katak im Bujen Ko 104:42

Irooj enaaj kōjeraam̧m̧an eō n̄e ij kōjparok kien ko.

Elōn̄ alen ilo jekjōn 104, Irooj eaar kallim̧ur “inaaj koorļo̧k kōjeraam̧m̧an ko” n̄an ro rej tiljek in pokake kien ko An. Elmen am̧ naaj jipan̄ ajri ro en̄jake bwe E ej kōņaan kōjeraam̧m̧an kōj?

Makūtkūt ko Maron̄ Kōm̧m̧ani

• Karuwaineneik ajri ro n̄an kōm̧m̧ane, āinwōt kam̧akūtkūti addiin peier, kajjojo iien rej ron̄ naan eo “kōjeraam̧m̧an ko” ilo am̧ riit Katak im Bujen Ko 104:42. Ba n̄an ajri ro elmen an Jemewōj Ilan̄ kar kōjeraam̧m̧an eok jen kōjparok kien ko An. Kajjitōk ippān ajri ro n̄an kwaļo̧k elmen An kar kōjeraam̧m̧an er. Karuwaineneik kajjojo ajri n̄an kwaļo̧k juon kien remaron̄ pokake.

• N̄an jipan̄ ajri ro meļeļe ta meļeļein “koorļo̧k,” jin̄n̄aik juon doulul ioon bo̧o̧t eo ak ilo juon peba. Kajjitōk ippān ajri ro n̄an jipan̄ eok aleni oraņ doulul ko—jin̄n̄aiki ruo, innām emen, innām ralitōk, innām jon̄ouljiljino, im etal wōt—m̧ae aolepān bo̧o̧t eo ak peba eo im obrak kōn doulul ko. Kajjojo iien kwoj kobaiki doulul ko, jipan̄ ajri ro ļōmņak juon kōjeraam̧m̧an Jemedwōj Ilan̄ eaar leļo̧k n̄an er. Kōmeļeļeiki bwe “koorļo̧k in kōjeraam̧m̧an ko” meļeļein bwe Irooj enaaj kobrak mour ko ad kōn kōjeraam̧m̧an ko eļan̄n̄e jej pokake kien ko An.

Katak im Bujen Ko 105:38–40

Imaron̄ juon rikōm̧m̧an aenōm̧m̧an.

Ekanooj lōn̄ katak ko jemaron̄ ekkatak jān waanjon̄ok eo an Zaion kāām. Juon iaan katak ko emaron̄ aorōk n̄an ajri ro ej bwe jum̧ae im ire rej bōktok men ko reppen, ilo an ippān doon im aenōm̧m̧an bōktok kōjeraam̧m̧an ko.

Makūtkūt ko Maron̄ Kōm̧m̧ani

• Ilo naan ko am̧ make, ba n̄an ajri ro kōn bwebwenatoon Zaion kāām eo (lale kadkadin laajrak eo an wiik in Itok, Ļoor Eō—N̄an Kajjojo Armej im Baam̧le Ko; Saints, 1:194–206; ak “The Acceptable Offering of Zion’s Camp” [Revelations in Context, 213–18]). Ebōjrakrak n̄an kalikkar katak ko jej ekkatak jān Zaion kāām—n̄an waanjon̄ok, Irooj ekōņaan bwe jen aenōm̧m̧an im jerbal ippān doon ijeļo̧kin akweļ im ire.

• Riiti Katak im Bujen Ko 105:38–40, im kajjitōk ippān ajri ro n̄an jutak n̄e rej ron̄ naan eo “aenōm̧m̧an.” Kōmeļeļeiki bwe Irooj ekar kōņaan bwe ro Rekwojarjar ren kōm̧m̧an aenōm̧m̧an ippān armej ro rekar jab jouj. Jipan̄ ajri ro ļōmņake men ko me remaron̄ kōm̧m̧ane n̄an kōm̧m̧an aenōm̧m̧an, im karuwaineneik er n̄an kōm̧m̧an arin jet wāween ak jekjek ko.

• Kwaļo̧k juon bwebwenato kōn juon ajri āinwōt juon rikōm̧m̧an aeņōm̧m̧an ilo mour eo am̧ make Eo Jera ak Liaona. Al juon al ippān doon kōn iakwe ro jet, āinwōt “Jesus Said Love Everyone” (Children’s Songbook, 61), ak kadedeikļo̧k peij in m̧akūtkūt eo an wiik in.

Katakin Katak Ko: Ajri ro Rerūttoļo̧k

Katak im Bujen Ko 104:13–18

Irooj ekōņaan bwe in jeere ta ko ewōr ippa n̄an ro rej pād ilo aikuj.

Ļōmņake elmen am naaj jipan̄ ajri ro meļeļe wāween an Irooj leļo̧k n̄an armej ro An n̄e rej pād ilo aikuj.

Makūtkūt ko Maron̄ Kōm̧m̧ani

• Leļo̧k n̄an ajri ro jejjo̧ minit n̄an kōm̧m̧ane juon laajrak in kōjeraam̧m̧an ko Anij eaar liļo̧k n̄an er. Rojan̄ er n̄an kōlaajraki jon̄an wōt aer maron̄. Innām riiti ippān doon Katak im Bujen Ko 104:13–18, pukot uwaak ko n̄an kajjitōk ko āinwōt kein: Wōn ej unjen men otemjeļo̧k? Etke Ej letoki n̄an kōj? Ta eo Ej kōņaan bwe jen kōm̧m̧ani kōn men kein? Jipan̄ ajri ro ļōmņak kōn wāween ko remaron̄ jeere kōjeram̧m̧an ko aer ippān ro jet.

• Kwaļo̧k juon waanjon̄ok me juon eaar lewaj jet men kwar aikuji, im kajjitōk ippān ajri ro n̄an kwaļo̧k ejja kain en̄jake in wōt. Ak juon pija kōn jerbal n̄an ro jet, āinwōt “The Coat” (ChurchofJesusChrist.org). Ta eo jej ekkatak jān en̄jake kein kōn jerbal n̄an ro jet? Karuwaineneik ajri ro n̄an jeļā ļōmņak kōn ro rej pād ilo aikuj im pukot juon n̄an jerbal in jipan̄ ilo wiik in, āinwōt juon ilo jikuuļ ak eļaptata juon ilo baam̧le eo aer.

• Karuwaineneik ajri ro n̄an lale Al ko an Ajri ak Al ko n̄an al ko me rej iookļo̧k jerbal in jipan̄ ak jipan̄ ro jet (lale topical indexes). Al juon ak ruo al ippān doon, im kōnono kōn ta al kein rej katakin kōj.

Katak im Bujen Ko 105:9–19

Imaron̄ pokake kien ko an Irooj men̄e ijjab meļeļe uniier.

En̄jake eo an Zaion kāām emaron̄ in juon wāween eo em̧m̧anļo̧k n̄an kōmeļeļeik kōjeraam̧m̧an ko me rej itok jān kappukot n̄an ļoor ankilaan Irooj.

Makūtkūt ko Maron̄ Kōm̧m̧ani

• Kwaļo̧k pija eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko, im kajjitōk ippān ajri ro n̄an kwaļo̧k ta eo rejeļā kōn Zaion kāām. Eļan̄n̄e rej aikuj jipan̄, kōjerbal kadkad in laajrak eo an wiik in Itok, Ļoor Eō—N̄an Kajjojo Armej im Baam̧le Ko; Saints, 1:194–206; ak “The Acceptable Offering of Zion’s Camp”(Revelations in Context, 213–18). Karuwaineneik ajri ro n̄an katen wōt n̄e rekar membōr ro ilo Zaion Kāām eo, ba n̄an ajri ro nejier kōn en̄jake ko aer. Ta eo ren kar kōņaan bwe ro nejier ren jeļā jān en̄jake kein?

• Riit ippān doon Katak im Bujen Ko 105:13–14, im kōmeļeļeik bwe ke Zaion Kāām eo rej tōkeākļo̧k ilo Missouri, Irooj eaar ba n̄an er n̄an jab kajjieon̄ in bōk āneo an ro Rekwojarjar. Jet membōr ilo kāām eo raar illu im bwilōn̄ etke kar kōmālim er n̄an etal n̄an ijo. Ta eo jemaron̄ kōm̧m̧ane n̄e jejjab meļeļe aolep men kōn juon kien? Kwaļo̧k jet iaan bwebwenato ko jān “Voices of the Restoration: Zion’s Camp” (ilo Itok, Ļoor Eō—N̄an Kajjojo Armej im Baam̧le Ko) n̄an jipan̄ ajri ro lo bwe kōjeraam̧m̧an ko rej itok n̄e jej pokake kien ko an Anij letok n̄an kōj kōn rikanaan ro An, men̄e jejjab meļeļe unin.

Kōketak Ekkatak ilo M̧weo

Rōjan̄ ajri ro n̄an kwaļo̧k en̄jake ko ilo Zaion Kāām eo ippān juon ilo kapijuknen, ippān ļo̧k juon katak raar ekkatak jān en̄jake ko. Ak karuwaineneik er n̄an ļōmņake jet men Anij eaar kōjeraam̧m̧an er kake me remaron̄ jeere ippān juon eo epād ilo aikuj.

Kōkōm̧anm̧anļo̧k Ad Katakin

Kōnono ilo iakwe kōn kakkure. “Jet iien paoktokin juon ajri emaron̄ in kakkure iien ekkatak eo an ro jet ilo kūlaaj eo. N̄e menin ewaļo̧k, kijenmej, iakwe, im meļeļe kōn apan̄ ko an ajri eo ej jelm̧aeiki. … Eļan̄n̄e ajri eo ej kakkure iien katak ewōr utam̧we ippān, kōnono kake ajri eo ippān eo ej bōk eddoin ro reutam̧we ilo ānbwin ilo stake ak etal n̄an [disabilities.ChurchofJesusChrist.org] n̄an pukot wāween am̧ maron̄ tōpar aikuj ko rem̧m̧anļo̧k” (Teaching in the Savior’s Way, 26).