Jeptōm̧ba 20–26

Katak im Bujen Ko 106–108

“N̄an Maron̄ Kōpeļļo̧k Lan̄ ko”

Kōļmenļo̧kjeņ ta eo kwojeļā kōn ajri ro kwoj katakin. Ta m̧akūtkūt ko renaaj kepaakļo̧k er n̄an Rilo̧mo̧o̧r? Keememej bwe m̧akūtkūt ko n̄an ajri ro reddikļo̧k ilo laajrak in emaron̄ in oktak jen ajri ro rōrūttoļo̧k im ko jet.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k n̄an ajri ro pija in ritōl ro an Kabun̄ in, āinwōt Rikanaan eo, Rijilōk ro, Būreejtōnji eo Eutiej an Būraimere, im Ritōl ro Routiej im Opija ro. Karuwaineneik ajri ro n̄an kōnono kōn ta eo ritōl rein rej kōm̧m̧ane im etke rej kam̧m̧oolol kake er.

Katakin Katak eo: Ajri ro Reddikļo̧k

Katak im Bujen Ko 107:18–20, 42–56

Ij jeraam̧m̧an kōn priesthood eo.

Aolep ro nejin Jemedwōj Ilan̄ remaron̄ bōk kōjeraam̧m̧an ko me rej itok jen priesthood eo. Ļōmņake wāween ko kwomaron̄ jipan̄ ajri ro kwoj katakin en̄jake kam̧m̧oolol kōn kōjeraam̧m̧an ko.

Makūtkūt ko Maron̄ Kōm̧m̧ani

• Je ioon bo̧o̧t eo juon pija en bōk jikin “lan̄ ko [maron̄] kōpeļļo̧k n̄an [kōj]” (Katak im Bujen Ko 107:19) kōnke priesthood (āinwōt meram ej romaak ilo kōdo̧ ko). Leļo̧k n̄an ajri ro pija ko rej bōk jikin kōjeraam̧m̧an ko me rej itok jen priesthood eo, āinwōt peptaij, kwojkwoj, im tampeļ. Karuwaineneik er n̄an kwaļo̧k etke rej kam̧m̧oolol kōn kōjeraam̧m̧an eo ilo pija eo aer, im kōtļo̧k bwe ren likūt pija eo aer ilo meram eo ioon bo̧o̧t eo. Kwaļo̧k naan in kam̧ool bwe jemaron̄ bōk kōjeraam̧m̧an kein kōnke Jemedwōj Ilan̄ eaar kōjepļaaki tok kōn priesthood eo.

• Kōm̧m̧ane juon iaļ ioon laļ, im leļo̧k n̄an ajri ro pija in kain̄i ko an priesthood renaaj aikuji bwe ren maron̄ ļoore iaļ ļo̧k n̄an Jemedwōj Ilan̄ (lale Gospel Art Book, no. 103–8, 119–20). Jipan̄ ajri ro likūti karōkin kain̄i ko ilo iaļ eo.

• Kwaļo̧k juon pijain Adam im Iv im baam̧le eo aer (lale peij in m̧akūtkūt eo an wiik in ak Gospel Art Book, no. 5). Ilo an ajri ro kalimjōk pija eo, kajjitōk elmen an Adam im Iv en̄jake kōn baam̧le eo aer. Kōjerbal Katak im Bujen Ko 107:53–56 kwaļo̧k n̄an ajri ro ta eo Adam ekar kōm̧m̧ane n̄an kwaļo̧k an iakwe baam̧le eo an. Kwaļo̧k am naan in kam̧ool kōn an priesthood eo juon kōjeraam̧m̧an eok im baam̧le eo am.

• Kwaļo̧k etan ro uwaan baam̧le eo Adam ekar kapit er n̄an priesthood eo, ekkar n̄an Katak im Bujen Ko 107:42–50, kajjitōk ippān ajri ro n̄an bwine jete armej ro eaar kapit er. Jipan̄ er meļeļe etke Adam ekōņaan bwe aolep ro uwaan baam̧le eo an ren bōk priesthood eo. Karuwaineneik ajri ro n̄an kōnono kōn iien eo raar ak baam̧le ko aer rekar bōk kōjeraam̧m̧an ko kōn priesthood in.

Katak im Bujen Ko 108:7

Imaron̄ kōkajoor ro jet.

Ajri ro reddik remaron̄ bar ļoor kapilōk in n̄an kōkajoorļo̧k ro jet “ilo aolep am bwebwenato, ilo aolep am jar, … im ilo aolep kōm̧m̧an ko am.”

Makūtkūt ko Maron̄ Kōm̧m̧ani

• Jin̄aik juon armej ioon bo̧o̧t eo, im kajjitōk ippān ajri ro n̄an ņaetan jet men me ekōm̧m̧an bwe armej eo en kajoor ilo ānbwin. (Kwomaron̄ jin̄aik m̧ajōļ ko dōdipen ippān armej eo ilo an ajri ro ba etan men ko) Riit Katak im Bujen Ko 108:7, im kajjitōk ippān ajri ro n̄an ron̄jake wāween ko jemaron̄ “kōkajoorļo̧k [jeid jatid] em̧m̧aan [im sister].” Kōmeļeļeik naan ko reppen me emaron̄ in pen.

• Jipan̄ ajri ro ļōmņake armej ro rejeļā kajjier me remaron̄ aikuj kajoorļo̧k. Ta eo jemaron̄ ba n̄an n̄an er ak kōm̧m̧an n̄an er? Jerbal ippān doon n̄an kōm̧m̧an kaat ko n̄an armej rein, ak rōjan̄ ajri ro n̄an keememej er ilo jar ko aer make ak jar ko an baam̧le.

Katakin Katak Ko: Ajri ro Rerūttoļo̧k

Katak im Bujen Ko 107:1–8, 13–14, 18–20

Priesthood eo enaaj jipan̄ eō ro̧o̧lļo̧k n̄an Jemedwōj Ilan̄.

Priesthood ko an Melkisedek im Aron kar jepļaaktok n̄an jipan̄ bōktok ro nejin Anij n̄an E. Jipan̄ ajri ro kwoj katakin n̄an meļeļe ta oktakin eddo ko an priesthood im elmen aer jipan̄ kōj jepļaakļo̧k ippān Anij.

Makūtkūt ko Maron̄ Kōm̧m̧ani

• Karuwaineneik ajri ro n̄an lale Katak im Bujen Ko 107:1–8, 13–14, 18–20 n̄an naan ko raorōk im eoon ko me rej katakin er kōn priesthood eo. Ta jerbal ko ippān rikabwijer priesthood ro? Ekōjkan an priesthood eo jipan̄ kōj bar ro̧o̧lļo̧k n̄an Jemedwōj Ilan̄?

• Je kajjitōk me remaron̄ in uwaak ilo Katak im Bujen Ko 107:1–8, 13–14, 18–20, āinwōt “Ta āt eo juon etan Melkisedek Priesthood?” Leļo̧k n̄an ajri ro jet minit n̄an pukot uwaak ko ilo eoon ko n̄an jon̄an wōt eo remaron̄e n̄an kajjitōk ko. Kwaļo̧k n̄an ajri ro kōjeraam̧m̧an ko kwaar būki kōn priesthood eo.

• Riit ippān ajri ro kōn Melkisedek ilo Bible Dictionary ak Tōļ n̄an Jejej ko Rekwojarjar (scriptures.ChurchofJesusChrist.org). Ta eo jaar ekkatak jen mour eo an kōn ta meļeļe n̄an kōjerbal priesthood mālim?

Katak im Bujen Ko 107:21–26, 33–35, 65–66

Irooj eaar kālet rikarejeran n̄an tōl Kabun̄ eo An.

Ta en̄jake ko kar kalōk naan in kam̧ool eo am̧ kōn ritōl rein an Kabun̄ in? Elmen an naaj jipan̄ ajri ro kalōk naan in kam̧ool ko aer make?

Rikanaan eo ej katak kōj ta eo Anij ekōņaan bwe jen jeļā.

Makūtkūt ko Maron̄ Kōm̧m̧ani

• Likūt juon pija ioon bo̧o̧t eo pijain Routiej ro ak Opija ro an Kabun̄ in jān kweilo̧k eo ekāāltata jen Ensign ak Kweilo̧k eo Eļap Ilo an ajri ro riiti Katak im Bujen Ko 107:21–26, 33–35, 65–66, karuwaineneik er n̄an je ioon bo̧o̧t eo ta eo raar ekkatak kōn jerbal ko an jet iaan ritōl rein. Etke jej kam̧m̧oolol kōn tōl eo aer? Kwaļo̧k n̄an doon elmen bōk juon naan in kam̧ool kōn rikanaan ro im rijilōk ro;

• Je ioon bo̧o̧t eo leke, tōmak, im jar ioon bo̧o̧t. Kajjitōk ippān ajri ro elmen ad maron̄ kotak Būreejtōnji eo Kein Kajuon an Kabun̄ in kōn ad leke, tōmak, im jar (jar Katak im Bujen Ko 107:22). Etke eaorōk n̄an rejetake ro karejeran Irooj em̧ōj kālet?

Katak im Bujen Ko 108:3

Mour kake bujen ko aō ebōktok kōjeraam̧m̧an ko.

Kōļmenļo̧kjeņ elmen am maron̄ jipan̄ ajri ro kwoj katakin “n̄an kōjparoke … ilo kōjparok kallim̧ur ko [aer],” ak bujen ko. Elmen kōm̧m̧ane menin naaj kōjeraam̧m̧an er kiiō im jeklaj?

Makūtkūt ko Maron̄ Kōm̧m̧ani

• Karuwaineneik ajri ro n̄an kōm̧m̧ane men eo ekkar n̄an lukkuun tōparakin, āinwōt kajjieon̄ in tein̄ juon kap in dān ijeļo̧kkin tein̄i ioon? Ta ej waļo̧k n̄e jejjab kōkm̧anm̧an? Kajjitōk ippāer n̄an riiti Katak im Bujen Ko 108:3 im pukōt un ko em̧m̧aan rein raar kajjitōk n̄an kōm̧m̧ane āindein. Laajraki ippān ajri ro kallim̧ur ko raar kōm̧m̧ani ippān Jemedwōj Ilan̄ ke raar peptaij im bōk m̧ōttan kwojkwoj eo. Jipan̄ er ļōmņak kōn wāween ko remaron̄ kōjparok kallim̧ur kein.

• Al juōn al ippān ajri ro kōn kappukot m̧ool eo, āinwōt “I Will Be Valiant” (Children’s Songbook, 162). Jipan̄ er kōm̧m̧ane juon kōkkaļļe kōn jidik naan jān al eo me ekakeememej er n̄an kōjparok bujen ko aer, im rōjan̄ er n̄an kwaļo̧k kōkaļļe eo ilo m̧weeo im̧weer.

• Leļo̧k n̄an kajjojo ajri jidikin katak eo an Sister Becky Cravin “Tiljek ņae Jatiljek” (Ensign ak Liaona, Māe 2019, 9–11), im kajjitōk ippāer n̄an kwaļo̧k jen men me eaar im̧we er n̄an kōjparokļo̧k mour kaki bujen ko aer.

Kōketak Ekkatak ilo M̧weo

Ilo emakijkij lo ro jinen im jemen ajri ro kwoj katakin n̄an rōjan̄ er ilo kijejeto ko aer n̄an kwaļo̧k gospel eo ilo kapijuknen. Kwomaron̄ ba n̄an ajri ro kōn men ko ajri ro nejier rej kōm̧m̧ane ilo Būraimere bwe raar ekkatak ilo kapijuknen.

Kōkōm̧anm̧anļo̧k Ad Katakin

Kōm̧m̧ane m̧akūtkūt ko n̄an jipan̄ aikuj ko. Jab lale laajrak in kein āinwōt kōmeļeļe bwe kwon ļoore. Ijoke, kōjerbali āinwōt juon kein jipan̄ n̄an ļōmņak ko n̄an im̧we eok make ilo am̧ kōļmenļo̧kjeņ kōn aikuj ko an ajri ro kwoj katakin. Ilo jet jekjek, kwomaron̄ en̄jake n̄an kōm̧m̧ane juon m̧akūtkūt n̄an ajri ro reddikļo̧k n̄an katakin ajri ro rōrūttoļo̧k, ak aolepāer.