C. C. A. Christensen (1831–1912), Tutuliga o le Au Paia mai le Itumalo o Siakisone, Misuri, e tusa o le 1878, atavali i luga o le ie lalaga, 77¼ x 113 inisi. Falemataaga o Faatufugaga a le Iunivesite a Polika Iaga, meaalofa a le fanau a fanau a C. C. A. Christensen, 1970

6–12 Setema

Mataupu Faavae ma Feagaiga 98–101

“Ia Filemu ma Iloa o Aʼu o le Atua”

A o e faitau i le Mataupu Faavae ma Feagaiga 98–101, ia faalogo i mafaufauga ma uunaiga e oo mai. E mafai faapefea e le faatinoina o na mea ona fesoasoani ia te oe ia avea ma tagata o loo finagalo le Atua e avea ai oe?

Tusifaamaumau Ou Lagona Uunai

Mo le Au Paia i le vaitaimi o le 1830, o Initipene Misuri, o le nuu moni lea o le folafolaga. Sa “o le nofoaga tutotonu” o Siona (tagai Mataupu Faavae ma Feagaiga 57:3)—o le nuu o le Atua i le lalolagi—lea sa latou faia ai ni osigataulaga maoae e fausia. Ia i latou, o le faapotopotoina o le Au Paia iina sa o se ta’imuaga fiafia ma matagofie i le Afio Mai Faalua. Peitai sa ese se auala sa vaai ai tuaoi i le eria ia i latou. Sa latou le fiafia i le faamatalaga e faapea, na tuuina atu e le Atua le laueleele i le Au Paia, ma latou te le’i maua ni lagona lelei i taunuuga faaupufai, faaletamaoaiga, ma faaleagafesootai o le anoano o tagata mai se tapuaiga sa le’i masani ai ua vave ona me’i atu i le eria. Sa le’i umi ae avea popolega ma faamata’uga, ma na avea faamata’uga ma sauaga ma osofaiga. Ia Iulai 1833, sa faapea ona faaleagaina ai le ofisa lomitusi a le Ekalesia, ma o Novema na faamalosia ai le Au Paia e lafoai o latou fale i le Itumalo o Siakisone, Misuri.

O Iosefa Samita sa silia ma le 800 maila na mamao ese ai i Katelani, ma na fia vaiaso faatoa oo atu lenei tala ia te ia. Ae sa silafia e le Alii le mea na tupu, ma sa Ia faaali atu i Lana Perofeta ni mataupu faavae o le toafilemu ma faalaeiauga o le a faamafanafanaina ai le Au Paia—o mataupu faavae e mafai foi ona fesoasoani ia i tatou pe a tatou feagai ma ni sauaga, pe a le faataunuuina o tatou manaoga amiotonu, po o le, pe a tatou manaomia se faamanatu o o tatou puapuaga i aso taitasi o le a, i se isi itu, iu lava ina, “galulue faatasi mo lo [tatou] lelei,” (Mataupu Faavae ma Feagaiga 98:3).

Tagai Au Paia, 1:171–93; “Faatalitali mo le Afioga a le Alii,” Revelations in Context, 196–201.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 98:1–3, 11–14; 101:1-16

O o’u tofotofoga e mafai ona galulue faatasi mo lo’u lelei.

O nisi o o tatou puapuaga i le olaga e mafua mai ona o a tatou lava filifiliga. O isi e mafua mai i filifiliga a isi. Ma o nisi taimi e leai se tasi e tuuaia—e tutupu lava mea leaga. Tusa lava po o le a le pogai, e mafai ona fesoasoani faigata e faataunuu ai faamoemoega paia. A o e faitau i mea sa fetalai mai ai le Alii e uiga i faigata o le Au Paia i le Mataupu Faavae ma Feagaiga 98:1–3, 11–14 ma le 101:1–16, o a ni mea ua e maua e mafai ona fesoasoani ia te oe i ou tofotofoga? E mafai faapefea e nei fuiaupu ona faatosinaina le ala e te vaai ai i luitau o feagai ma oe? Mafaufau loloto pe na faapefea ona galulue faatasi ou tofotofoga mo lou lelei ma ausia ai faamoemoega a le Atua i lou olaga.

Tagai foi i le 2 Nifae 2:2; Mataupu Faavae ma Feagaiga 90:24.

Mataupu Faavae ma Feagaiga 98:23-48

E finagalo le Alii ina ia ou sailia le filemu i Lana ala.

E ui e le o mea uma i le Mataupu Faavae ma Feagaiga 98:23–48 o le a faatatau i au fegalegaleaiga patino ma isi, o a mataupu faavae e te maua e mafai ona taiala ai oe pe a fai e isi tagata ni mea sese ia te oe? Atonu e fesoasoani le faailoga o upu po o fuaitau e faamatala ai le ala na finagalo le Alii i le Au Paia e taulima ai le feteenaiga i Misuri.

Tagai foi Jeffrey R. Holland, “O Le Poloaiga Muamua ma le Sili,” Ensign po o le Liahona, Nov. 2018, 77–79.

Faamatalaga mai le O Keriso ma le Taulealea Mauoa, saunia e Heinrich Hofmann

Mataupu Faavae ma Feagaiga 100

E tausi e le Alii i latou o e auauna ia te Ia.

O ni nai vaiaso talu ona faalogo Iosefa e uiga i sauaga i Misuri, sa talosaga atu ai se tagata faatoa liliu mai ia te ia e malaga i Kanata e faasoa atu le talalelei i ona atalii. Sa ioe i ai Iosefa, e ui ina sa popole o ia i le tuua o lona aiga, ae maise ona o sauaga ma faamata’uga i lona aiga ma le Ekalesia. I le la malaga atu i Kanata, sa tatalo ai Iosefa ma lana soa o Sini Rikitone, mo le faamafanafanaga, ma o le vaega 100 o le tali lea a le Alii ia i la’ua. O le a se mea e te maua i le tali mai a le Alii, atonu na faamautinoa ma fesoasoani ai ia i laua?

Atonu foi na i ai ni ou aafiaga na manaomia ai ona e faapalenia le popole mo ou tiutetauave i le Ekalesia ma popole mo lou aiga. E mafai faapefea e fetalaiga a le Alii i le vaega 100 ona fesoasoani ia te oe i tulaga faapena?

Tagai foi i “O Se Misiona i Kanata,” Revelations in Context,, 202–7.

Mataupu Faavae ma Feagaiga 101:43–65

O le mulimuli i fautuaga a le Atua e fesoasoani ou te saogalemu ai.

O le faataoto i le Mataupu Faavae ma Feagaiga 101:43–62 sa tuuina mai e faamalamalama mai ai le pogai na faatagaina ai e le Alii le Au Paia ina ia tutuliese i fafo o Siona. A o e faitauina nei fuaiupu, o e vaaia ni mea e tutusa ai i le va o oe lava ma auauna i le faataoto? Atonu e te fesili ifo ia te oe lava: Pe ou te fesiligia ea poloaiga a le Atua? E mafai faapefea e le leai o se faatuatua po o se tautinoga ona faataga “ai le fili” ia i ai se faatosinaga i lo’u olaga? E mafai faapefea ona ou faaali atu i le Atua o loo o’u “loto ia taitaiina i matou i se ala saʼo ma tatau ai mo [lo’u] faaolataga”? (tagai fuaiupu 63–65).

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 98:16, 39–40.O a ni mea o loo i totonu o nei fuaiupu e mafai ona fesoasoani ia i tatou e maua ai le filemu atili i totonu o o tatou aiga? E mafai ona outou usua se pese e uiga i le filemu po o le faamagalo atu, e pei o le “Tatou te Iloa Mea Tonu” (Viiga, nu. 172). Atonu e fiafia tamaiti laiti e faatino le faamagalo atu i le tasi ma le isi.

Mataupu Faavae ma Feagaiga 99.Ina ua valaauina Ioane Murdock e tuua lona aiga “e folafola atu [le] talalelei tumau-faavavau” (fuaiupu 1), na faatoa foi atu lava o ia mai i se misiona faigata, e tasi le tausaga le umi i Misuri (tagai “John Murdock’s Missions to Missouri,” Revelations in Context, 87–89). O le a se mea tatou te maua i le vaega 99 atonu sa fesoasoani pe na faamalosiauina ia Uso Murdock? O le a se savali a le Alii mo i tatou o loo i ai i lenei faaaliga?

Mataupu Faavae ma Feagaiga 100:16; 101:3–5, 18.A uma ona faitau nei fuaiupu, e mafai ona tou talanoa i le ala e tatau ai i tagata fai uamea ona tunu ia aasa le vevela o uamea e aveese ai mea leaga ona mamanu lea e ala i le samalaina mo se taimi umi (tagai i le vitio “The Refiner’s Fire” i le ChurchofJesusChrist.org). E mafai foi ona outou aoao faatasi i le ala e faamamaina ai isi mea, e pei o le vai po o le masima. Atonu e mafai ona outou faamama pe fufuluina se mea faatasi ai o se aiga. Aisea tatou te mananao ai ia mama atoatoa? O le a se mea ua aoao mai e nei faataitaiga ia i tatou e uiga i le ala e mafai ai e o tatou tofotofoga ona fesoasoani ia i tatou ia avea “o ni tagata mama”?

Mataupu Faavae ma Feagaiga 101:22–36.Na mafai faapefea e nei fuaiupu ona fesoasoani i le Au Paia o e sa feagai ma sauaga? E mafai faapefea ona latou fesoasoani i tagata o e lagona le fefefe e uiga i tulaga o le tatou lalolagi i aso nei?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fesoasoani Mai Ia Te A’u Tama Pele,” Tusipese a Tamaiti,52.

Faaleleia o Suesuega Faaletagata Lava Ia

Tagai mo mataupu faavae. Na aoao mai Elder Richard G. Scott: “A o e sailia le malamalama faaleagaga, saili mo mataupu faavae. … “O mataupu faavae, o ni upu moni ia ua filifilia, mo le faaaogaina i tulaga o mea eseese” (“Mauaina o le Malamalama Faaleagaga,” Ensign, Nov. 1993, 86).

Susunuina o Misuri, saunia e Glen S. Hopkinson