Malumalu o Katelani

Malumalu o Katelani, saunia e Al Rounds

30 Aokuso–5 Setema

Mataupu Faavae ma Feagaiga 94-97

“Mo le Faaolataga o Siona”

O a ni mataupu faavae ma ni aoaoga faavae e tulaga ese ia te oe a o e suesue i le Mataupu Faavae ma Feagaiga 94-97? Ia mautinoa e tusifaamaumau ou lagona uunai.

Tusifaamaumau Ou Lagona Uunai

Ina ua poloaiina e le Alii ia Mose e fau se fale fetafai, sa Ia fetalai atu ia Mose ia “faia mea uma lava e pei o le mamanu sa faaali atu ia te [ia] i le mauga” (Eperu 8:5; tagai foi Esoto 25:8–9). O le fale fetafai o le a avea ma totonugalemu o le tolauapiga i le vao a Siona (tagai Numera 2:1–2). Mulimuli ane, na poloaiina ai e le Atua ia Solomona ma lona nuu e fau se malumalu e tusa ma le mamanu sa Ia faaalia mai (tagai 1 Nofoaiga a Tupu 28:12, 19).

Ina ua toefuataiina mai e le Alii le atoatoaga o le talalelei, sa Ia poloaiina Iosefa Samita e fau ni malumalu e tusa ma se faatusa na faaalia mai. “Ia fausia le fale, e lē tusa ma le ala a le lalolagi, aua Ou te lē tuu atu ia te outou ia outou ola e tusa ma le ala a le lalolagi,” na fetalai mai ai le Alii. “Ia fausia e tusa ma le ala lea o le a Ou faaali atu” (Mataupu Faavae ma Feagaiga 95:13–14; tagai foi 97:10). E pei o le fale fetafai i le vao, o le malumalu sa faamoemoe e avea o se vaaiga tutotonu i Katelani (tagai Mataupu Faavae ma Feagaiga 94:1).

O aso nei ua i ai maota o le Alii i le lalolagi atoa. E tusa lava pe le o i ai i le ogatotonu o o tatou aai, e mafai lava ona faaogatotonu i latou i o tatou olaga. E ui ina esesese malumalu taitasi i foliga vaaia, ae e tutusa lava mamanu paia tatou te aoao ai i totonu—o se fuafuaga faalelagi e toe aumai ai i tatou i le afioaga o le Atua. O sauniga paia, faavavau e fesoasoani tatou te atinae ai o tatou olaga ma faamalosia ai o tatou aiga “e lē tusa ma le ala a le lalolagi” ae e ala i le mamanu e faaali mai e le Atua ia i tatou.

Tagai Au Paia, 1:169–70; “O Se Maota mo lo Tatou Atua,” Revelations in Context, 165–73.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 94; 97:15–17

E mafai ona faatasi le Alii ma a’u i lo’u olaga i aso uma.

O faatonuga o loo i le Mataupu Faavae ma Feagaiga 94 ma le 97 sa tuuina mai i le aso lava e tasi—2 o Aokuso, 1833. O le vaega 97 e faatatau se vaega i se malumalu na fuafuaina mo le Itumalo o Siakisone, Misuri, ae o le vaega 94 e faatatau i fale o le au taitai i Katelani, Ohaio. Atonu e te maitauina ni vaega e tutusa ai i mea na fetalai mai ai le Alii e uiga i nei ituaiga o fale eseese (tagai Mataupu Faavae ma Feagaiga 94:2–12; 97:10–17). A o e mafaufau loloto i nei faatonuga, mafaufau i mea e mafai ona e faia e te lagona soo ai le mamalu ma le mafuta mai o le Alii, i totonu o fale o le Ekalesia ma i lou olaga i aso uma.

Mataupu Faavae ma Feagaiga 95

E aoai e le Alii i latou e alofa i ai o Ia.

Sa tusa ma le lima masina ua mavae ai talu mai Ianuari 1833, lea na poloaiina ai e le Alii le Au Paia i Katelani e fausia se maota o le Atua ma faia se alofi sa (tagai Mataupu Faavae ma Feagaiga 88:117-19). Ina ua maua mai le faaaliga ua tusifaamaumauina i le vaega 95 ia Iuni 1833, latou te le’i gaoioi lava i lena poloaiga. O le a se mea ua e aoao mai i le ala na aoai ai e le Alii le Au Paia i lenei faaaliga? O i ai ni poloaiga po o ni upu o fautuaga e te le’i faatinoina lava? O le a se mea ua musuia oe e fai?

Tagai foi D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Ensign po o le Liahona, Me 2011, 97–100.

Mataupu Faavae ma Feagaiga 95:8, 11–17; 97:10–17

E faamanuia e le Atua Lona nuu i totonu o le malumalu.

Ina ua uma ona aoaiina mo le le fausiaina o se maota o le Alii i Katelani, sa filifilia loa e taitai o le Ekalesia se tulaga i totonu o se toga saito o le a latou fausia ai. Sa momo’e loa lava Ailama Samita, le uso o le Perofeta, e aumai se taivai ma amata ona ta le fanua. Sa ia faapea mai, “O loo tatou sauniuni e fausia se maota mo le Alii, ma ua ou naunau ia avea ma tagata e muamua i le galuega” (i le Aoaoga a Peresitene o le Ekalesia: Iosefa Samita [2007], 271, 273). Mafaufau i le naunautai o Ailama ao e faitau i le Mataupu Faavae ma Feagaiga 95:8, 11–17; 97:10–17. O le a se mea ua e maua e musuia ai se naunautai faapena ia te oe ia maua faamanuiaga o le malumalu?

Ailama Samita o loo uuina le taivai

Ailama Samita o loo Tāina le Fanua, saunia e Joseph Brickey

Mataupu Faavae ma Feagaiga 97:18–28

O Siona o “e loto mamā.”

Na aoao mai le Perofeta o Iosefa Samita, “E tatau ona tatou avea le faatuina o Siona ma o tatou faamoemoega silisili” (Aoaoga: Iosefa Samita, 186). I le Au Paia i le vaitaimi o le 1830, o Siona sa o se nofoaga, o le “aai [moni] o lo tatou Atua” (Mataupu Faavae ma Feagaiga 97:19). Ae i le faaaliga ua tusifaamaumauina i le vaega 97, na faalautele mai ai e le Alii lena manatu. O Siona foi ua faamatalaina ai ni tagata—“o e ua loto mamā” (fuaiupu 21). A e faitau i fuaiupu 18–28, mafaufau i le faauigaga lenei pe a e faitau i le upu “Siona.” O le a le uiga ia te oe o le ia loto mama? E faapefea ona fesoasoani le malumalu ia ausia “le faaolataga o Siona”? (fuaiupu 12).

Tagai foi Mose 7:18; Autu o le Talalelei, “Siona,” topics.ChurchofJesusChrist.org.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 95:8.E faapefea e le osia ma le tausia o feagaiga o le malumalu ona aumaia le “mana mai lugā” i totonu o o tatou olaga? Atonu e mafai e tagata o le aiga ona faasoa mai i o latou lagona e uiga i le malumalu pe faasoa mai ni aafiaga i se taimi na latou lagonaina ai le faamanuiaina i le “mana mai luga” e ala i tapuaiga i totonu o le malumalu.

Ina ia fesoasoani ia i latou o loo sauniuni e ulufale i le malumalu, e mafai ona tou iloiloina vitio, ata, ma faatonuga o loo maua i le temples.ChurchofJesusChrist.org. Ina ia fesoasoani i tamaiti ia aoao e uiga i le malumalu, e mafai ona outou faaaogaina le “O Lou Auala i le Malumalu” (i le O Malumalu o le Ekalesia a Iesu Keriso o le Au Paia o Aso e Gata Ai [lomiga faapitoa o le Ensign po o le Liahona, Oke. 2010], 72–75).

Mataupu Faavae ma Feagaiga 95:1–11.O le a se mea ua tatou aoaoina e uiga i aoaiga mai i nei fuaiupu? O le a se mea ua tatou aoaoina e uiga i le Alii? E mafai faapefea e nei malamalamaaga loloto ona aafia ai le ala tatou te maua ai le aoaiga pe aoai ai isi?

Mataupu Faavae ma Feagaiga 97:8.E tusa ai ma le fuaiupu lenei, e faapefea ona “taliaina [tatou] e” le Alii? E ese faapefea lena mai le taliaina e le lalolagi? O le a le uiga o le a ia “tausia a [tatou] feagaiga e ala i le taulaga”? O faapefea ona tatou faia lenei mea?

Mataupu Faavae ma Feagaiga 97:10–21.Na aoao mai le Perofeta o Iosefa Samita, “O soo se nofoaga lava e faapotopoto ai le Au Paia o Siona lea, o le a faapea ona atina’e e alii [po o tamaitai] amiotonu uma mo se nofoaga o le saogalemu mo lana fanau” (Aoaoga: Iosefa Samita, 186). E mafai faapefea ona tatou fausia Siona i totonu o o tatou aiga? O a ni mataupu faavae tatou te maua i le Mataupu Faavae ma Feagaiga 97:10–21? I le avea ai o se aiga, filifili se mataupu faavae e taulai atu i ai i lenei vaiaso.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou Te Fia Vaai i le Malumalu,” Tusipese a Tamaiti,99.

Faaleleia o Suesuega Faaletagata Lava Ia

Tusifaamaumau ou lagona uunai. Tusifaamaumau ou aafiaga na maua faapea ma mataupu faavae ma aoaoga faavae o loo e aoao e uiga i ai. O nei aafiaga e mafai ona avea o se vaega o se talaaga patino o le a manuia ai tupulaga i le lumanai.

fauga o le Malumalu o Katelani

Fausiaina o le Malumalu o Katelani, saunia e Walter Rane.