20–26 Setema

Mataupu Faavae ma Feagaiga 106–108

“E Tatala Mai Ai le Lagi”

Na aoao mai Elder Ulisses Soares, “E manaomia ona tatou mafuta ma [le Faaola], faatofu i tatou lava i tusitusiga paia, olioli i ai, aoao Lana aoaoga faavae, ma taumafai ia ola i le ala na Ia soifua ai” (“E Mafai Faapefea Ona Ou Malamalama?” Ensign po o le Liahona, Me 2019, 7). A o e faatofu oe lava i le Mataupu Faavae ma Feagaiga 106–8, tusifaamaumau auala e mafai ona e taumafai ai e ola i upumoni e te maua.

Tusifaamaumau Ou Lagona Uunaia

I le taimi muamua e te vaai i ai, o le Mataupu Faavae ma Feagaiga 107 e foliga mai e na ona faatatau i le faatulagaga o tofi o le perisitua i se faatulagaga faaleautaitai mo le Ekalesia a le Alii. Ioe, i le taimi na lomiaina ai lenei faaaliga, ua sili atu le toatele o tagata auai o le Ekalesia i le toatele o nai taitai sa faatulagaina. O lea o le faataatitiaina o matafaioi ma tiutetauave o le Au Peresitene Sili, le Korama a Aposetolo e Toasefululua, le Au Fitugafulu, epikopo, ma au peresitene o korama, sa mautinoa lava le manaomia ma le aoga. Ae e matuai tele lava mea o loo i faatonuga faalelagi i le vaega 107 nai lo na’o le ala e faatulaga ai tofi ma korama o le perisitua. O i o loo aoao mai ai e le Alii i tatou e uiga i se faatulagaga anamua o le perisitua lea sa “faatuina i aso o Atamu” (fuaiupu 41). O lona faamoemoega mai lava i le amataga ia mafai ai lea e fanau a le Atua—e aofia ai ma oe—ona maua sauniga faaola o le talalelei ma olioli i “faamanuiaga uma faaleagaga o le ekalesia—mauaina o le avanoa e maua ai mealilo o le malo o le lagi, [ma] e tatala mai ai le lagi ia te i latou” (fuaiupu 18–19).

Tagai “Restoring the Ancient Order,” Revelations in Context, 208–12.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 106; 108

E faatonu, faamalosiau, ma lagolago e le Alii i latou Na te valaauina e auauna atu.

I le Mataupu Faavae ma Feagaiga 106 ma le 108, na tuuina mai ai e le Alii le fautuaga ma folafolaga i ni tagata se toalua o le ekalesia o e na valaauina e auauna i le Ekalesia. O a ni fuaitau i nei faaaliga o ofo mai ai ni faamalosiauga ma ni malamalamaaga loloto e uiga i lau lava auaunaga i le malo o le Atua? O le lua lenei e mafaufau i ai:

• Na faapefea ona e maua le “alofa tunoa ma le faamautinoaga” ia mafai ai ona “tu”? (Mataupu Faavae ma Feagaiga 106:8).

• E mafai faapefea ona e “faaeteete atili atu mai lenei taimi i le tausiga o au tautoga,” po o feagaiga? (Mataupu Faavae ma Feagaiga 108:3).

O a isi fuaitau mai vaega 106 ma le 108 e anoa ia te oe?

Tagai foi Russell M. Nelson, “Auauna Atu i le Mana ma le Pule a le Atua,” Ensign po o le Liahona, Me 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28.

Mataupu Faavae ma Feagaiga 107

E taitai e le Alii Lana Ekalesia e ala i le pule o le perisitua.

E pei ona e suesueina le Toefuataiga o le talalelei, atonu na e maitauina ai, e le masani ona faamalamalama atoa mai e le Alii se aoaoga faavae i se faaaliga e tasi. Nai lo o lena, Na te faaali mai ia mea i “lea fasifuaitau ma lea fasifuaitau” (Mataupu Faavae ma Feagaiga 98:12) pe a i ai ni tulaga e manaomia ai. E ui sa tuuina mai muamua e le Alii ni faatonuga e uiga i le perisitua i le amataga o le 1829 (tagai, mo se faataitaiga, vaega 20 ma le 84), Sa Ia tuuina mai ni faatonuga faaopoopo i le Au Paia i le 1835 e fitoitonu i tofi o le perisitua na manaomia e pulea ma taiala ai Lana lafu ua faatoateleina.

A o e faitau e uiga i tofi o le perisitua nei, mafaufau i auala e mafai ona e lagolagoina ai i latou o loo auauna i nei valaauga e ala i lou “talitonuga, faatuatua, ma tatalo” (Mataupu Faavae ma Feagaiga 107:22).

• O le Au Peresitene Sili ma le Peresitene o le Ekalesia (fuaiupu 9, 21–22, 65–66, 91–92)

• O Aposetolo e Toasefululua (fuaiupu 23–24, 33–35, 38, 58)

• O Le Toafitugafulu (fuaiupu 25–26, 34, 93–97)

• Epikopo (fuaiupu 13–17, 68–76, 87–88)

Mataupu Faavae ma Feagaiga 107:1–20

O sauniga o le Perisitua e tuuina mai ai faamanuiaga faaleagaga ma faaletino i fanau uma a le Tama Faalelagi.

Na aoao mai Elder Neil L. Andersen: “O le perisitua o le mana ma le pule a le Atua ua tuuina mai mo le olataga ma faamanuiaga o tagata uma—alii, tamaitai, ma tamaiti. … A tatou agavaa, o le a faaoaina e sauniga o le perisitua o tatou olaga i luga o le lalolagi ma saunia i tatou mo folafolaga matagofie o le lalolagi o i luma” (“Mana o le Perisitua,” Ensign po o le Liahona, Nov. 2013, 92). A o e faitau i le Mataupu Faavae ma Feagaiga 107:1–20 (ia tagai faapitoa i fuaiupu 18–20) ma le vaega o totoe o le savali a Elder Andersen, mafaufau e tusifaamaumau ni uunaiga e te maua e uiga i le ala e faaoaina ai e le mana o le Atua lou olaga i le lalolagi ma saunia ai oe mo le faavavau. O le a se mea o e faia e maua atili atoatoa ai—ma fesoasoani ai i isi ia maua—na faamanuiaga?

Tagai foi Mataupu Faavae ma Feagaiga 84:19–27; Dallin H. Oaks, “O Le Perisitua Mekisateko Ma Ki,” Ensign po o le Liahona, Me 2020, 69–72.

Mataupu Faavae ma Feagaiga 107:41–57

O le perisitua e faamanuia ai aiga.

Na manao Atamu ia faamanuiaina ana fanau i le perisitua. O a folafolaga sa ia maua? (tagai fuaiupu 42, 55). A o e faitau e uiga i le mea na fai e Atamu, mafaufau i au oe lava manaoga mo lou aiga ia olioli i faamanuiaga o le perisitua. O le a le mea ua musuia oe e fai e fesoasoani ai i lou aiga ia maua nei faamanuiaga?

Atamu o Loo Faamanuia Lana Fanau, saunia e Clark Kelley Price

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 106:6.O le a se mea e mafai ona fai e lo tatou aiga e faaoso ai le “olioli i le lagi”?

Mataupu Faavae ma Feagaiga 107:22.O a ni mea o tatou faia e lagolago ai o tatou taitai “e le talitonuga, faatuatua, ma tatalo”?

Mataupu Faavae ma Feagaiga 107:27–31, 85.O mataupu faavae e taiala ai aufono a le Ekalesia e mafai foi ona fesoasoani tatou te fefautuaai faatasi ai o se aiga. O a ni mataupu faavae o i nei fuaiupu e mafai ona tatou faaaogaina i a tatou aufono faaleaiga? (Tagai M. Russell Ballard, “Aufono Faaleaiga,” Ensign po o le Liahona, Me 2016, 63–65.)

Mataupu Faavae ma Feagaiga 107:99-100.Tuu atu i se tagata o le aiga ni faatonuga tusitusia mo se galuega i le fale, ma valaaulia o ia e filifili pe faapefea ona fai le galuega: filiga, paie, pe aunoa ma le faitauina o faatonuga. Tuu atu i isi tagata uma o le aiga e tilotilo atu ia te ia o faia le galuega ma mate po o le fea o faiga na filifilia e le tagata o le aiga. Ona tuu atu lea o ni avanoa i isi tagata o le aiga. Aisea e finagalo ai le Alii ia tatou aoao o tatou tiute ma fai i le filiga atoa? (Tagai i le Becky Craven, “Faaeteete faasaga i le Faasamasamanoa,” Ensign po o le Liahona, Me 2019, 9–11.)

Mataupu Faavae ma Feagaiga 108:7.E mafai faapefea ona tatou faamalosia le tasi ma le isi i a tatou talanoaga? i a tatou tatalo? i a tatou apoapoaiga, po o faamalosiauga? i mea uma tatou te faia? Atonu tou te filifilia se tasi o nei mea e galulue i ai o se aiga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Mai Faalogo i le Perofeta,” Viiga, nu. 13.

Faaleleia o Suesuega Faaletagata Lava ia

Tusifaamaumau lagona uunaia. A oo atu ni musumusuga po o ni malamalamaaga loloto ia te oe, ia tusifaamaumau i latou. A e faia,ua e faaali atu i le Alii e te faatauaina Lana taitaiga. (Tagai Aoao Atu i le Ala a le Faaola, 12,30.)

Ua Faamanuia e Mekisateko ia Aperamo saunia e Walter Rane