Ua Ou Vaai i le Atalii o le Tagata O Tu i le Itu Taumatau o le Atua, saunia e Walter Rane

23–29 Aokuso

Mataupu Faavae ma Feagaiga 93

“Maua Lona Atoatoaga”

Ua aoao mai le Mataupu Faavae ma Feagaiga 93 “o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai” (fuaiupu 24). Ao e suesue i le vaega lenei, vaavaai mo upumoni ma tusifaamaumau mea e te aoaoina. O le a se mea ua e naunau e fai ia maua ai le upumoni? (tagai fuaiupu 27–28).

Tusifaamaumau Ou Lagona Uunai

“Pe a e a’e i se apefai,” na aoao mai Iosefa Samita,” e tatau ona e amata atu i le pito i lalo, ma agai atu i luga mai lea sitepu i lea sitepu, seia e taunuu i le tumutumu; ma e faapena i mataupu faavae o le talalelei—e tatau ona e amata i le muamua, ma faasolo atu ai seia e aoao i mataupu faavae uma o le faaeaga” (Aoaoga a Peresitene o le Ekalesia: Iosefa Samita [2007], 268).

O nisi taimi o lena apefai o le faaeaga e foliga mai e matuai maualuga tele, ae sa tatou fananau mai e feaei i le tumutumu. Po o a lava tapulaa e mafai ona tatou vaaia ia i tatou lava, ae o loo silasila mai le Tama Faalelagi ma Lona Alo i se mea matagofie lava i totonu o i tatou, o se mea e faaleatua. E pei lava “ao i ai [Iesu Keriso] i le amataga faatasi ma le Tamā,” sa “outou i ai foi” (Mataupu Faavae ma Feagaiga 93:21, 23). E pei lava ona Ia “alualu pea mai lea alofa tunoa i lea alofa tunoa, seia oo ina maua e ia le atoatoaga,” e faapena foi “o le a outou maua le alofa tunoa mo le alofa tunoa” (fuaiupu 13, 20). O le talalelei toefuataiina ua tatou aoao ai e uiga i le natura moni o le Atua, ma ua faapea foi ona aoao mai i tatou e uiga ia i tatou lava ma le tagata e mafai ona avea ai i tatou. E ui lava i taumafaiga a le “amioleaga e toatasi” (fuaiupu 39)—ma e ui foi i se mea ua e manatu e te le o atoatoa ai—o oe lava o se atalii moni o le Atua faatasi ma le gafatia e “maua lona atoatoaga i le taimi e tatau ai” (fuaiupu 19).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 93

Tatou te tapuai i le Atua le Tama ma Lona Alo, o Iesu Keriso.

O le fetalai ai e uiga i le faaaliga i le Mataupu Faavae ma Feagaiga 93, na faamalamalama mai ai e le Alii, ”Ou te tuu atu ia te outou nei upu, ina ia outou malamalama ma iloa ai le ala e tapuai ai, ma iloa ai le mea tou te tapuai i ai, ina ia mafai ona outou o mai i le Tamā i loʼu igoa, ma maua lona atoatoaga i le taimi e tatau ai” (fuaiupu 19). A o e suesue i lenei faaaliga, faailoga upumoni e te maua e uiga i Tagata tatou te tapuai i ai: o le Atua le Tama ma Lona Alo, o Iesu Keriso. O le a se mea ua e aoaoina e uiga i le “ala e tapuai ai” ia i Laua? e uiga i le ala e “o mai [ai] i le Tama”?

Sa aoao mai le Perofeta o Iosefa Samita, “Afai e le malamalama tagata i uiga o le Atua, latou te le malamalama ia i latou lava” (Aoaoga: Iosefa Samita, 40). A o e aoao e uiga i le Faaola e ala i le suesueina o le Mataupu Faavae ma Feagaiga 93, vaavaai foi mo mea ua e aoaoina e uiga ia te oe lava. Mo se faataitaiga, o le a se mea ua e aoaoina e uiga ia te Ia mai i fuaiupu 3, 12, 21, ma le 26? O a ni upumoni talitutusa e te maua e uiga ia te oe lava i fuaiupu 20, 23, ma le 28–29? (Tagai foi 1 Ioane 3:2; 3 Nifae 27:27; Dean M. Davies, “O Faamanuiaga o le Tapuai,” Ensign po o le Liahona, Nov. 2016, 93–95.)

Mataupu Faavae ma Feagaiga 93:1–39

O le mamalu o le Atua o le malamalama ma le upumoni.

Atonu e te maitauina o le mamalu, malamalama, ma le upumoni e oso soo mai i le faaaliga lenei. A o e suesue faapitoa tonu lava i fuaiupu 21–39 fatu se lisi o upumoni e te aoaoina e uiga i le mamalu, malamalama, ma le upumoni. E faapefea ona musuia oe e nei upumoni ia saili le malamalama ma upumoni sili atu? E mafai faapefea e nei upumoni ona aafia ai le ala e te ola ai i lou olaga i aso uma?

Tatou te maua le malamalama ma le upumoni pe a tatou tausia poloaiga a le Atua.

Mataupu Faavae ma Feagaiga 93:40–50

“Faatulaga tatau lou lava fale.”

Pe tusa o le fuaiupu 40, e foliga mai ua sui ai le Mataupu Faavae ma Feagaiga 93 mai aoaoga e uiga i le mamalu o le Atua ma lo tatou gafatia faalelagi i faatonuga e uiga i matua ma le faatulagaina o o tatou fale. E faapefea ona fesoasoani aoaoga a le Alii e uiga i le malamalama, upumoni, ma le mamalu o loo i fuaiupu 1–39 e te malamalama ai ma mulimuli i le fautuaga i fuaiupu 40–50?

Tagai foi David A. Bednar, “Ia Matua Maelega ma Mafaufau i le Aiga,” Ensign po o le Liahona, Nov. 2009, 17–20.

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 93:2.Ua faapefea ona avea Iesu Keriso ma se “malamalama moni” i o tatou olaga? O faapefea ona tatou vaaia Lona malamalama i isi tagata e siomia i tatou?

Mataupu Faavae ma Feagaiga 93:3–29.Ina ia fesoasoani i lou aiga e talanoa i mea ua latou aoaoina i le vaega 93 e uiga i le Faaola ma i latou lava, e mafai ona outou taaalo i se taaloga faafetaui. Mo se faataitaiga, e mafai ona e saunia se seti se tasi o kata faatasi ma fuaiupu mai le vaega 93 o loo aoao mai e uiga i upumoni e uiga i le Faaola (tagai fuaiupu 3,12, 21, 26) ma se isi seti e aoao ai se isi mea talitutusa e uiga ia i tatou lava (tagai fuaiupu 20, 23, 28–29). E mafai ona auauai tagata o le aiga e ilo se kata mai seti taitasi, faitau ia fuaiupu, ma taumafai e su’e upumoni e fetaui. E faapefea ona faatosina e nei upumoni le ala tatou te manatu ai e uiga i le Faaola ma e uiga ia i tatou lava?

Mataupu Faavae ma Feagaiga 93:12–13, 20.O le a le uiga o le maua o le “alofa tunoa mo le alofa tunoa” ma ia faaauau “mai lea alofa tunoa i lea alofa tunoa”? (fuaiupu 12–13). O a mea o fautuaina mai e nei fuaiupu e uiga i le ala tatou te tuputupu ae ma aoao ai? E faapefea e le iloaina o lenei mea ona aafia ai le ala tatou te taulima ai isi—ma i tatou lava?

Mataupu Faavae ma Feagaiga 93:24.Faitau le uiga o le upumoni o loo maua i le fuaiupu lenei, ma valaaulia tagata o le aiga e faasoa mai se mea mai le vaega 93 latou te manatu o se upumoni taua. O a isi faauigaga o le upumoni tatou te maua i le Ioane 14:6; Iakopo 4:13; po o se viiga e uiga i le upumoni, e pei o le “Upumoni o A?” (Viiga, nu. 170).

Mataupu Faavae ma Feagaiga 93:40.Atonu a e faitau i le fuaiupu lenei, e mafai e lou aiga ona usu se pese e uiga i le aoao i le aiga, e pei o le “Aoao Mai Ia Ou Savali I Le Malamalama” (Tusipese a Tamaiti, 70). Atonu o le a fiafia tamaiti laiti e fai ni taga e ogatasi ma upu. O le a le mea ua musuia oe e fai e valaaulia atili ai le “malamalama ma le upumoni” i totonu o lou aiga?

Mataupu Faavae ma Feagaiga 93:41–50.Fefautuaai faatasi o se aiga e uiga i le mea atonu ua le “saʼo i lou fale.” O le a se mea e mafai ona tatou faia e “faatulaga tatau ai [lo tatou] fale”? (fuaiupu 43–44).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Au o se Atalii o le Atua,” Tusipese a Tamaiti, 2–3.

Faaleleia o Lo Tatou Aoao Atu

Faitau ia sili atu ma le faatasi. Atonu e te filifili e faitau le Mataupu Faavae ma Feagaiga 93 ia sili atu ma le faatasi i le aluga o le vaiaso. O taimi taitasi e te faitau ai, atonu e te maitauina ai ni upumoni eseese e lagona e taua ia te oe pe musuia ai oe i se ala fou. O le faitau faafia o le a tuuina atu ai foi ni avanoa e te mafaufau loloto atili ai.

Malamalama ma le Upumoni, saunia e Simon Dewey