Toefuataiga, saunia e Liz Lemon Swindle

26 Iulai–1 Aokuso

Mataupu Faavae ma Feagaiga 84

“O Le Mana o le Faale-Atua”

A o e faitau i le Mataupu Faavae ma Feagaiga 84, mafaufau loloto i le fautuaga ia “ola i afioga uma e tulei mai le fofoga o le Atua” (fuaiupu 44). O le a faapefea ona e ola i upu o lenei faaaliga?

Tusifaamaumau Ou Lagona Uunaia

Talu mai lava ona toefuatai mai le perisitua i le 1829, ua faamanuiaina lava le Au Paia o Aso e Gata Ai e ala i lena mana paia. Sa papatisoina, faamauina ma valaauina i latou e auauna atu e ala i le pule o le perisitua, e pei uma lava o i tatou i aso nei. Peitai o le maua o le mana o le perisitua e le tutusa ma le malamalama atoatoa i ai, ma sa i ai i le Atua ni mea se tele sa finagalo o Ia ia malamalama i ai Lana Au Paia—ae maise lava i le oo mai o le toefuataiga o sauniga o le malumalu. O le faaaliga i le 1832 e uiga i le perisitua, o lenei ua avea ma Mataupu Faavae ma Feagaiga 84, na faalauteleina ai le vaaiga mamao a le Au Paia e uiga i le mea moni e ta’u o le perisitua. Ma e mafai ona faia foi lea lava mea mo i tatou i le aso. O le mea sili ona taua, e tele mea e tatau ona aoao i ai e uiga i le mana faalelagi lea e umia “le ki lava lea o le malamalama e uiga i le Atua,” e faapea ona faaali mai ai “le mana o le faale-atua,” ma faapea ona saunia ai i tatou e “vaai i fofoga o le Atua, le Tamā lava, ma ola” (fuaiupu e 19–22).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 84:1–5, 17–28

E mafai ona ou maua le mana ma faamanuiaga o le perisitua a le Atua.

Pe a e mafaufau i le upu perisitua, o le a se mea e oo mai i lou mafaufau? E faafia ona e mafaufau e uiga i le perisitua ma lona faatosinaga i lou olaga i aso uma? A uma ona mafaufau loloto i nei fesili, suesue i le Mataupu Faavae ma Feagaiga 84:1–5, 17–28, ma mafaufau i le mea ua finagalo le Alii e te iloa e uiga i Lona mana o le perisitua. E faapefea ona e faaaogaina nei fuaiupu e faamatala atu ai le perisitua i se tasi ma faamalamalama atu ona faamoemoega?

E ono mafai foi ona e mafaufau loloto i sauniga o le perisitua ua e auai ai. Na faapefea ona e vaaia le faaalia ai o “le mana o le faale-atua?” (fuaiupu 20) Mafaufau i mea ua finagalo le Alii e te faia ia maua atili ai Lona mana i lou olaga.

Tagai foi i le M. Russell Ballard, “Alii ma Tamaitai ma le Mana o le Perisitua,” Ensign, Set. 2014, 28–33; Autu o le Talalelei, “Perisitua,” topics.ChurchofJesusChrist.org.

Mataupu Faavae ma Feagaiga 84:31-42

Afai ou te talia le Alii ma Ana auauna, o le a ou maua mea uma o loo i ai i le Tamā.

Na aoao mai Elder Paul B. Pieper: “E mataina ona i le tautoga ma le feagaiga o le perisitua [Mataupu Faavae ma Feagaiga 84:31–42], o loo faaaoga ai e le Alii ia veape o le mauaina ma le talia. Na te le o faaaogaina le veape faauu. O totonu o le malumalu e maua ai—faatasi—e alii ma tamaitai ia faamanuiaga ma le mana o le Perisitua Arona ma le Mekisateko” (“Revealed Realities of Mortality,” Ensign, Ian. 2016, 21).

A o e suesue i le Mataupu Faavae ma Feagaiga 84:31–42, vaavaai mo upu “mauaina” ma le “talia.” Mafaufau loloto pe mata o le a lo latou uiga i le anotusi lenei. O faapefea ona e “talia[ina]” le Alii ma Ana auauna?

E mafai foi ona e maitaua folafolaga o loo i nei fuaiupu e o faatasi ma le tautoga ma le feagaiga o le perisitua, lea “e le mafai ona soli” e le Atua (fuaiupu 40). O a ni mea e te maua e musuia ai oe ia faamaoni atili i le taliaina o le Tamā, Ana auauna, ma le mana o Lana perisitua?

Tagai foi i le Taiala i Tusitusiga Paia, “Feagaiga,” “Tautoga,” scriptures.ChurchofJesusChrist.org.

Mataupu Faavae ma Feagaiga 84:43--58

Ou te sau ia Keriso a o ou gauai atu i Ana upu ma faalogo i Lona Agaga.

O le suesue e le aunoa i tusitusiga paia ma saunoaga a perofeta e matuai sili atu lava nai lo o se aitema e kolosi ese i se lisi o mea faaleagaga e fai. O a ni upumoni e te maua i le Mataupu Faavae ma Feagaiga 84:43–58 e fesoasoani e te malamalama ai i le pogai e tatau ai ona faaauau pea ona e suesue i le afioga a le Atua? Ia maitau le faatusatusaga i le va o le malamalama ma le pouliuli o loo i nei fuaiupu; o faapefea ona aumaia e lou “gauaʼi ma le filiga i upu o le ola e faavavau” le malamalama, upumoni, ma “le Agaga o Iesu Keriso” i lou olaga? (fuaiupu 43, 45).

Tagai foi i le 2 Nifae 32:3; “O Le Tusi a Mamona—O Le Maa’auau o le Tatou Tapuaiga,” Aoaoga a Peresitene o le Ekalesia: Ezra Taft Benson (2014), 125–35.

O le suesue i tusitusiga paia e fesoasoani ou te lagona ai le faatosinaga a le Agaga.

Mataupu Faavae ma Feagaiga 84:62–91

O le a faatasi le Alii ma a’u pe a ou i ai i Lana galuega.

A o e faitauina nei fuaiupu, e mafai ona e faailoa ai auala ua fetalai mai le Alii o le a Ia lagolago ai Ana Aposetolo ma faifeautalai. E ono mafai faapefea ona faatatau nei folafolaga i le galuega ua finagalo o Ia e te faia? Mo se faataitaiga, ua faapefea ona faataunuuina folafolaga o loo i le fuaiupu e 88 i lou olaga?

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 84:6–18.A uma ona faitau e uiga i le auala na maua ai e Mose lona pule o le perisitua, e mafai e se tasi o lou aiga o loo umia le perisitua po o se uso o auaunaga ona faasoa atu ona aafiaga o le faauuina ai i se tofi o le perisitua. Afai e mafai, e mafai ona ia faasoa atu ma talanoaina lona laina o le pule o le perisitua. Aisea e taua ai le mafai ona iloa o le pule o le perisitua i le Ekalesia i aso nei e tau i tua i le pule a Iesu Keriso? Ina ia talosaga se laina o le pule o le perisitua, auina mai se imeli i le [e-mail].

Mataupu Faavae ma Feagaiga 84:20-21.O le a se taimi na maua ai e lou aiga se aafiaga o le faaalia mai “o le mana o le faale-atua” e ala i se sauniga e pei o le papatisoga po o le faamanatuga? Atonu e mafai ona e talanoa e uiga i le auala e aumaia ai e nei sauniga le mana o le Atua i o tatou olaga. E mafai foi ona e faaali atu se ata o se malumalu ma talanoa i auala e aumai ai ia i tatou e sauniga o le malumalu le mana faaopoopo ia avea ai e faapei o le Faaola. Atonu e te manao foi e usu se pese e faatatau i le perisitua, e pei o le “Ua Toe Fuatai Mai Le Perisitua” (Tusipese a Tamaiti, 60), ma talanoa i mea o loo aoao mai e lenei pese e uiga i le perisitua.

Mataupu Faavae ma Feagaiga 84:43–44.E mafai ona outou faia faatasi se taumafataga po o se meaai suamalie ma faailoga ia mea fai meaai taitasi i se upu po o se fuaitau mai le fuaiupu e 44. Aisea e taua ai ona tatou tuuina uma i ai ia mea fai meaai? Aisea e taua ai le ola i afioga uma a le Atua?

Mataupu Faavae ma Feagaiga 84:98–102.O a ni mea tatou te aoaoina e uiga ia Iesu Keriso mai le “pese fou” (fuaiupu 98) o loo i nei fuaiupu? O le a se mea e mafai ona tatou faia i o tatou nei vaitaimi e aumaia ai tuutuuga ua faamatalaina i lenei pese?

Mataupu Faavae ma Feagaiga 84:106--10.E faapefea ona “faagaeetia uma faatasi” lo tatou aiga e ala i meaalofa ma taumafaiga a “itutino taitasi uma”? (fuaiupu 110).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Toe Fuatai Mai Le Perisitua,” Tusipese a Tamaiti, 60; tagai foi i le “Manatu e Faaleleia ai le Suesuega Faaleaiga o Tusitusiga Paia.”

Faaleleia o Lo Tatou Aoao Atu

Tuu atu ma tulitatao ia valaaulia e faatino. A e valaaulia ia lou aiga e faatino ia mea ua latou aoaoina, e te faaali atu ia i latou, o le talalelei o se mea e tatau ona ola ai, ae le na’o le talanoa lava e uiga i ai. O le a se mea e mafai ona e valaaulia i latou e faatino mai le tou suesuega o le Mataupu Faavae ma Feagaiga 84?

Malumalu o Roma Italia