9–15 Aokuso

Mataupu Faavae ma Feagaiga 88

“Faatu … se Fale o le Atua”

Na saunoa mai Peresitene Russell M. Nelson, “Ou te folafola atu, pe a e galue filiga e toe faafou lou fale e avea ma se nofoaga autu e aoaoina ai le talalelei, … o le a faaitiitia le faatosinaga a le fili i lou olaga ma i lou aiga” (“Avea ma Faataitaiga Lelei o le Au Paia o Aso e Gata Ai,” Ensign po o le Liahona, Nov. 2018, 113).

Tusifaamaumau Ou Lagona Uunaia

E masani lava, ona tuu mai ia i tatou e le Alii sina vaaiga itiiti o le le gata mai o Lona “mamalu ma [Lona] mana” (Mataupu Faavae ma Feagaiga 88:47) e ala i faaaliga eseese e tele i Ana perofeta. O leMataupu Faavae ma Feagaiga 88 o se tasi o faaaliga faapena—o se faaaliga e faatatau i le malamalama ma le mamalu ma malo, lea e foliga mai ai mea faalelalolagi ua tatou popole i ai e le taua, pe a faatusatusa i ai. E tusa lava pe le mafai ona tatou malamalama i mea uma ua aoao mai e le Alii ia i tatou, ae o le mea taua, ia mafai ona tatou lagonaina e anoanoai le tele o mea e faatatau i le faavavau nai lo o mea ua tatou iloaina i le taimi nei. Ioe, sa le’i fetalai le Alii e uiga i nei mealilo maoae ina ia faafefe ai i tatou pe ina ia tatou manatu tatou te matua faatauvaa lava. O le mea moni, sa Ia folafola mai, “E oo mai le aso o le a outou malamalama ai i le Atua lava” (fuaiupu 49; na faaopoopo i ai le faatusilima). Atonu o lena iuga maualuga na faapea ai ona uunaia e le Alii ia Lana Au Paia i Katelani ia faia se Aoga a Perofeta. Sa fetalai mai o Ia, “Ia outou faatulaga tatau outou lava.” “Ia saunia mea manaomia uma; ma faatu … se fale o le Atua” (fuaiupu 119). Aua o totonu o le maota paia o le Atua—ma totonu o o tatou fale—e sili atu nai lo i se isi lava nofoaga, e mafai ai ona Ia siia’e ai la tatou vaaiga i tua atu o le lalolagi faaletino, “afe ese e ia le veli mai ona fofoga ia te [i tatou],” ma saunia i tatou ia “gafatia se mamalu selesitila” (fuaiupu 68, 22).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 88

Ua ofo mai e le Faaola mo i tatou le faamoemoe ma le manuia.

I na o ni nai aso talu ona uma ona lapataia e faapea o le a “sasaʼa mai ai taua i luga o atunuu uma” (Mataupu Faavae ma Feagaiga 87:2), sa tuu mai ai e le Alii se faaaliga lea na taua e Iosefa Samita o se “‘lau olive’ … na tau mai i le Laau o le Parataiso, o le savali o le filemu a le Alii ia te i tatou” (Mataupu Faavae ma Feagaiga 88, ulutala o le vaega). E faapefea ona pei lenei faaaliga o se lau olive, o se faailoga masani o le filemu? (tagai foi i le Kenese 8:11). O a ni upumoni o i lenei vaega e fesoasoani e te lagona ai le faamoemoe ma le filemu ia Keriso?

Mataupu Faavae ma Feagaiga 88:6–67

O le malamalama ma le tulafono e sau mai ia Iesu Keriso.

O upu malamalama ma le tulafono ua ta’ua faafia i le tele o taimi i le vaega e 88. O nei upu ua faaaogaina i isi mau e faamatala ai Iesu Keriso ma Lana talalelei (mo se faataitaiga, tagai i le Isaia 60:19; Ioane 1:1–9; 3 Nifae 15:9). Ia maka pe faailoga fuaiupu e te maua ai nei upu i le Mataupu Faavae ma Feagaiga 88:6–67, ma tusi i lalo mea e te aoaoina e uiga i le Faaola, malamalama, ma le tulafono. E ono mafai e nei fuaiupu ona musuia oe e fai ni suiga i lou olaga ia maua ma le faatuatua sili atu le malamalama ma ola i le “tulafono a Keriso” (fuaiupu 21).

Tagai foi i le Sharon Eubank, “O Keriso: O Le Malamalama e Susulu i le Pogisa,” Ensign po o le Liahona, Me 2019, 73–76.

O loo i ai i tusitusiga paia le tulafono a Keriso.

Mataupu Faavae ma Feagaiga 88:62–126

Ia saunia mea manaomia uma.

I nisi o itu, o loo tatou ola i le taimi na faamatalaina e le Alii “o le a vāvāō mea uma; ma e moni lava, o le a pepē fatu o tagata” (Mataupu Faavae ma Feagaiga 88:91). A o e faitau i fuaiupu e 62–126, mafaufau pe mafai faapefea ona fesoasoani le fautuaga a le Alii e te saunia ai mo le Afio Mai Faalua o le Faaola. O ni nai fesili nei e mafaufau i ai:

Fuaiupu e 62–76.A o e mafaufau loloto i nei fuaiupu, o le a le mea ua musuia oe e “faalatalata” atu ai i le Atua? (fuaiupu 63). Mafaufau pe mata o le a le uiga ia te oe o le poloai a le Alii ia “faapaia outou lava” (fuaiupu 68).

Fuaiupu e 77–80, 118–26.Aisea e ono “tatau [ai] mo outou ona malamalama” i mataupu uma faaleaoaoga faavae ma faalelalolagi? (fuaiupu 78). O faapefea ona e mulimuli i le fautuaga e “saili i le aoaoina”? (fuaiupu 118). O le a sou manatu i le uiga o le aoao “i le suesue ma le faatuatua foi”?

Fuaiupu e 81–116.Mafaufau e faailoga valoaga e uiga i le Afio Mai Faalua o le Faaola o loo i nei fuaiupu. Aisea e te manatu ai, e finagalo le Alii ia e iloa e uiga i nei mea?

Fuaiupu e 117–26.Mafaufau e faitau fuaiupu nei ma mafaufau i le malumalu; o a ni mea e te maua iinei e mafai ona fesoasoani e te saunia ai e ulu atu i le maota o le Alii?

Tagai foi D. Todd Christofferson, “Saunia mo le Toe Afio Mai o le Alii,” Ensign po o le Liahona, Me 2019, 81–84; David A. Bednar, “Saili le Aoaoina e ala i le Faatuatua,” Ensign, Set. 2007, 61–68; Au Paia, 1:164–66; “O Se Aoga ma se Faaeega Paia,” Revelations in Context, 174–82.

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 88:14–33, 95–101.O le a se mea ua tatou aoaoina e uiga i le Toetu mai nei fuaiupu? E mafai faapefea e nei upumoni ona faatosina ai filifiliga latou te faia?

Mataupu Faavae ma Feagaiga 88:33.E mafai ona e amataina se talanoaga e uiga i nei fuaiupu e ala i le fai atu i tagata o le aiga e talanoa e uiga i meaalofa ua tuuina mai ia i latou—i meaalofa uma na latou taliaina ma le fiafia ma isi latou te le’i fiafia i ai. E mafai faapefea ona tatou faaali atu i le Alii ua tatou fiafia i le meaalofa o le mamalu selesitila ua Ia ofoina mai ia i tatou? E faapefea ona tatou fiafia i “lē na tuuina mai le meaalofa”?

Mataupu Faavae ma Feagaiga 88:63, 68.O nei fuaiupu ua i ai nisi o upu galue e ono mafai ona musuia ai oe e mafaufau i ni auala fatufatuai e aoao atu ai savali o loo i fuaiupu i lau fanau. Mo se faataitaiga, tou te ono faia se taaloga o le nānā e talanoa ai le fuaitau “saili mai ia te a’u ma le filiga ma o le a outou maua ai a’u” (fuaiupu 63; faaopoopoina faatusilima).

Mataupu Faavae ma Feagaiga 88:81.I le avea ai o se aiga, ia faailoa mai nisi o faailoga o lapataiga i totonu ma faataamilo i le tou fale, e pei o faailoga o lapataiga o vai a le falemai po o faailoga mo taavale feoai mo avetaavale. E faapefea ona fesoasoani nei lapataiga ia i tatou? O le a se mea o finagalo le Tama Faalelagi tatou te “lapatai atu [o tatou] tuaoi” e uiga i ai?

Mataupu Faavae ma Feagaiga 88:119.Ina ia musuia lou aiga ia faia le tou fale e pei o le faamatalaga o loo i le fuaiupu e 119, faataitai se mea pei o lenei: Tusi ni fuaitau mai le fuaiupu lenei i ni fasipepa, ma faaaoga e ufiufi ai se ata o le malumalu. Faitau faatasi le Mataupu Faavae ma Feagaiga 88:119 , ma tuu atu i tagata o le aiga e aveese ia fasipepa taitasi pe a latou faalogo i fuaitau e talitutusa ma le fuaiupu. O le a se mea e mafai ona tatou faia ia faia ai lo tatou fale ma se “fale o le Atua”? (fuaiupu 119).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Nearer, My God, to Thee,” Hymns, nu. 100.

Faaleleia o Lo Tatou Aoao Atu

Tuu le avanoa i tamaiti e faailoa ai lo latou fatufatuai. A e valaaulia lau fanau e fatu se mea e faatatau i se mataupu faavae o le talalelei, e le gata ina e fesoasoani ia latou malamalama lelei i le mataupu faavae, ae ua e tuu atu foi ia i latou se faamanatu faitino o le mea na latou aoaoina (tagai i le Aoao Atu i le Ala a le Faaola, 25).

Ua ofo mai e Iesu Keriso ia i tatou le manuia. Ou Te Tuuina Atu Ia Te Outou Le Manuia, saunia e Walter Rane