9–15 Aokuso

Mataupu Faavae ma Feagaiga 88

“Faatu … se Fale o le Atua”

O loo fautua mai le Mataupu Faavae ma Feagaiga 88:118, “Aoao i le tasi upu o le poto.” O a “upu o le poto” o loo i le Mataupu Faavae ma Feagaiga 88 e foliga mai e sili ona talafeagai i tamaiti o loo e aoaoina.

Tusi Faamaumau Ou Lagona Uunai

Valaaulia le Fefaasoaai

Taʻu atu i tamaiti e finagalo le Tama Faalelagi ma Iesu Keriso ia faaauau pea ona tatou aoao i o tatou olaga atoa. Ona fai atu lea ia i latou e faasoa mai se mea o loo latou aoao e uiga i ai i le fale, i le aʻoga, po o i le lotu.

Aoao atu le Aoaoga Faavae: Tamaiti Laiti

Mataupu Faavae ma Feagaiga 88:63

E finagalo le Atua ia ou latalata atu ia te Ia.

O le a se mea e mafai ona e faia e fesoasoani ai i tamaiti o loo e aoaoina ia lagona ai le mafuta mai o le Atua i o latou olaga?

Gaoioiga e Mafai Ona Fai

• Ao e faitauina le Mataupu Faavae ma Feagaiga 88:63, valaaulia tamaiti e faatino nisi o upu latou te faalogoina. Mo se faataitaiga, e mafai ona latou faafoliga o latou sailia se mea pe tu’itu’i.

• Fai atu i se tamaitiiti e u’u se ata o Iesu i luma o le potu ao tutu isi tamaiti i tua o le potu. Valaaulia tamaiti e laa i luma i taimi taitasi e te ta’u atu ai se mea e mafai ona tatou faia e latalata atu ai i le Faaola, ae laa i tua i taimi taitasi e te ta’u atu ai se mea tatou te taumamao ai mai le Faaola. Tuu atu lau molimau afai tatou te taumafai e faalatalata atu i le Alii, o le a Ia latalata mai ia i tatou

Mataupu Faavae ma Feagaiga 88:118

E finagalo le Tama Faalelagi ia ou aoao.

“O aoaoga o se vaega taua o le fuafuaga a le Tama Faalelagi e fesoasoani ia te oe ia avea atili e faapei o Ia. … O aʻoaʻoga e te maua o le a aoga ia te oe i le taimi o le olaga faitino ma le olaga a sau” (Mo le Malosi o le Autalavou, 9).

Gaoioiga e Mafai Ona Fai

• Faaali atu se ata o se a’oga, pe tusi se ata i luga o le laupapa, ma valaaulia tamaiti e faamatala mai po o le a le aoga ma o le a le mea e tupu iina. Faamatala atu e uiga i le a’oga na amataina e Iosefa Samita (tagai i le “Mataupu 31: O le Upu o le Poto” Tala o le Mataupu Faavae ma Feagaiga, 119–22). Faaali atu i tamaiti ni ata o se fale, o se falelotu, ma se malumalu, ma fesili ia i latou pe faapefea ona pei nei nofoaga o ni a’oga.

• Usu se pese e faatatau i le aoaoina, e pei o le “Saili, Mafaufau Loloto, ma Tatalo” (Tusipese a Tamaiti, 66). Fesili i tamaiti po o le a se mea na latou fiafia e aoao e uiga i ai.

• Faitau le Mataupu Faavae ma Feagaiga 88:118, ma faamamafa le fuaitau “aoao i le tasi.” Faasoa atu nisi o atamai ua e aoaoina mai tamaiti taitasi o lau vasega, ma valaaulia i latou e faasoa mai le atamai ua latou aoaoina.

  

  E tatau ona tatou sailia le poto ma le atamai.

Mataupu Faavae ma Feagaiga 88:119

O le malumalu o le maota o le Atua.

Mafaufau pe o le a faapefea ona e fesoasoani i tamaiti ia lagona le alofa mo le malumalu ma se manao e tapuai i le Alii iina pe a latou sauni.

Gaoioiga e Mafai Ona Fai

• Faaali atu i tamaiti le auala e faia ai se “tumutumu” o le malumalu e ala i le sii i luga o o latou lima ma faapapaʻi faatasi o latou tamatamailima. Faitau le Mataupu Faavae ma Feagaiga 88:119, ma fai atu i tamaiti e fai se tumutumu o le malumalu i taimi uma e te fai atu ai le upu “fale.” Faamalamalama atu, na finagalo le Tama Faalelagi ia Iosefa Samita ma le Au Paia e fausia se malumalu, po o se “fale o le Atua.” Faaali atu se ata o se malumalu lata ane ao e talanoa e uiga i eseesega i le va o se malumalu ma se falelotu a le Ekalesia.

• Faasoa atu lau molimau o le malumalu, ma usu faatasi se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti, 99). Valaaulia tamaiti e tusi se ata o i latou lava o loo o atu i le malumalu.

Aoao atu le Aoaoga Faavae: Tamaiti Matutua

Mataupu Faavae ma Feagaiga 88:68, 74

E mafai e Iesu Keriso ona faamamā a’u mai agasala.

O le faapaiaina o lona uiga ia faamama ma lē ponā. E mafai faapefea ona e fesoasoani i tamaiti o loo e aoaoina ia malamalama e mafai ona faapaiaina i latou pe a latou mulimuli ia Iesu Keriso?

Gaoioiga e Mafai Ona Fai

• Valaaulia se tasi o tamaitiiti e faitau leotele le Mataupu Faavae ma Feagaiga 88:68 ma se isi e faitau le fuaiupu 74. Fai atu i tamaiti e faalogo mo se fasifuaitau o loo i ai i nei fuaiupu e lua. E faapefea ona tatou “faapaiaina” i tatou lava? (Pe a manaomia, fesoasoani i tamaiti e saili le upu “Faapaiaga” i le Taiala i Tusitusiga Paia.) Tusi se ata o se fatu, se lima, ma se vae i luga o le laupapa. Fesoasoani i tamaiti e mafaufau pe o le a le uiga o le “faamamaina” ma “faamama” o tatou loto, lima, ma vae. E faapefea ona fesoasoani le Faaola ia i tatou ia faia lenei mea? E faʻapefea ona tatou faʻaogaina o tatou loto, lima, ma vae ina ia avea faapei o Iesu?

• Faamatala atu na finagalo le Alii ina ia faapaiaina Ona tagata ao lei mafai ona latou o atu i totonu o le malumalu. Mafaufau e valaaulia se alii talavou po o se tamaitai talavou o loo i ai se pepa faataga o le malumalu e asiasi mai i le vasega. Valaaulia o ia e faaali i tamaiti le foliga o se pepa faataga, talanoaina mea latou te faia e ola agavaa ai, ma faasoa atu pe aisea e taua ai le i ai o se pepa faataga o le malumalu e tusa lava pe tatou te le o latalata i se malumalu.

Mataupu Faavae ma Feagaiga 88:77–80, 118

E finagalo le Tama Faalelagi ia ou aoao.

E mafai ona e fesoasoani i tamaiti ia malamalama o le aoao e uiga i mea faaleagaga ma faaletino e mafai ona saunia ai i latou e auauna atu i le Alii.

Gaoioiga e Mafai Ona Fai

• Tusi i luga o le laupapa O le a, Aisea, ma le Faapefea. Valaaulia tamaiti e faitau taitoalua le Mataupu Faavae ma Feagaiga 88:77–79 ma fai se lisi o le o le a le mea o finagalo le Alii tatou te aoao i ai. Ona fai atu lea ia i latou e suesue le fuaiupu e 80 e saili ai pe aisea e finagalo ai o Ia ia tatou aʻoaʻo. Ona latou saili lea o le fuaiupu 118 e saili ai pe faapefea ona tatou aoao. O le a se mea tatou te aʻoaʻoina mai i nei fuaiupu e uiga i le auala e silasila ai le Alii i aʻoga ma aʻoaʻoga?

• Faaali atu se faafanua o le lalolagi, ma faitau faatasi le Mataupu Faavae ma Feagaiga 88:79. Aisea e taua ai mo i tatou le aoao e uiga i isi atunuu ma latou aganuu? Afai o oe po o tamaiti o loʻo e aoaoina sa asiasi pe nonofo i se isi atunuu, faʻaali atu ni aitema e faatusa i le aganuu, ma faasoa atu ua e aoaoina.

Mataupu Faavae ma Feagaiga 88:119–26

“Faatu … se Fale o le Atua”

O faatonuga a le Alii e uiga i le “fale o le Atua” e mafai ona avea ma taiala aoga mo i tatou a o tatou fausia o tatou olaga ma o tatou aiga.

Gaoioiga e Mafai Ona Fai

• Valaaulia tamaiti e filifili ni upu se fitu e faamatala ai lo latou aiga po o se isi fale sa latou asiasi i ai. Ona fai atu lea ia i latou e faitau le Mataupu Faavae ma Feagaiga 88:119 ma saili upu e fitu o loo faaaoga e le Alii e faamatala ai Lona Maota. Fesoasoani i tamaiti e mafaufau i auala e mafai ona latou faia ai o latou fale o se “fale o le Atua.”

• Tuu atu i tamaiti taitoatasi se fuaitau mai le Mataupu Faavae ma Feagaiga 88:119–26 e tusi ai ni ata. A latou faaali atu a latou ata i le tasi ma le isi, ia tuu atu i tamaiti e suʻe ia fuaiupu e mate ai le fuaitau o loo suitulaga ai ata taitasi.

• Tusi i luga o le laupapa Ia Faia ma le Aua le Faia. Valaaulia tamaiti e faitau le Mataupu Faavae ma Feagaiga 88:118–26 ma lisi mea na finagalo le Alii e faia pe aua le faia e le Au Paia e sauni ai e aoao i totonu o le malumalu. E mafai ona latou sueina ni upu e le masani ai i se lolomifefiloi. Valaaulia tamaiti e filifili se mea o le a amata ona latou faia po o se mea o le a latou le toe faia.

Fautuaina le Aoaoina i le Aiga

Valaaulia tamaiti e tusi [se faamatalaga] pe tusi se ata o se mea se tasi na latou aoaoina latou te mananao e faasoa atu i o latou aiga.

Faaleleia o Lo Tatou Aoao Atu

Fesoasoani i tamaiti laiti ia auai i talanoaga faaletalalelei. Atonu e manaomia ona e mafaufau i ni auala fatufatuai e faia ai ni talanoaga faaletalalelei ma tamaiti. Mo se faʻataʻitaʻiga, atonu e te aumaia i le vasega se mea e mafai ona uu e tamaiti pe a oo i lo latou taimi e tautala ai.