16–22 Aokuso

Mataupu Faavae ma Feagaiga 89–92

“O Se Mataupu Autu Faatasi ma se Folafolaga”

Ao e suesueina upumoni i totonu o le Mataupu Faavae ma Feagaiga 89–92, mafaufau loloto i auala fou ma fatufatuaʻi e mafai ona e fesoasoani ai i tamaiti ia malamalama i ai.

Tusi Faamaumau Ou Lagona Uunai

Valaaulia le Fefaasoaai

Valaaulia tamaiti e tusi ni ata ma talanoa e uiga i mea lelei sa latou faia i lenei vaiaso e tausia ai o latou tino ma agaga.

Aoao atu le Aoaoga Faavae: Tamaiti Laiti

Mataupu Faavae ma Feagaiga 89

O le a faamanuiaina a’u a’o o’u tausia le Upu o le Poto.

Aoao atu i tamaiti o o tatou tino o ni meaalofa mai le Tama Faalelagi ma e finagalo o Ia ia tatou tausia faalelei i latou.

O o tatou tino o ni meaalofa mai le Atua.

Gaoioiga e Mafai Ona Fai

• Ina ia fesoasoani i tamaiti ia malamalama i poloaiga a le Atua i totonu o le Mataupu Faavae ma Feagaiga 89:10–17, tusi se ata pe faʻaali ni ata o mea lelei e mafai ona tatou ‘aai ai poʻo mea lelei e mafai ona tatou faia e tausia ai o tatou tino ina ia maloloina (tagai foi i le itulau o gaoioiga o lenei vaiaso). Fesoasoani foi i tamaiti ia malamalama o le ava malosi, tapaa, ti, kofe, ma isi fualaau faasaina e afaina ai o tatou tino ma ua lapataia i tatou e le Alii ia aua neʻi faaaogaina. Valaaulia tamaiti e filifili se mea e mafai ona latou faia i lenei vaiaso e tausia ai o latou tino ina ia maloloina.

• Valaaulia tamaiti e auaua’i e tusi se ata i luga o le laupapa e faatusa i ai se mea o loo aoao mai i le Upu o le Poto. Tuu atu i tamaiti e mate mai le mea o loo tusia e tamaiti taitoatasi. Talanoa e uiga i poloaiga a le Alii i le vaega 89 e fesootai i le ata.

• Faaaoga le faataitaiga lenei, po o isi foi e te mafaufau i ai, e faaali atu ai pe faapefea ona faamanuiaina i tatou i le usiusitai i le Upu o le Poto (tagai Mataupu Faavae ma Feagaiga 89:18–21). Fai faatasi le gaoioiga faigofie lea, e pei o le savali po o le tamoe i le tulaga o loo e tu ai, ona faafoliga lea ua [e] “vaivai” pe “matapogia” (fuaiupu 20). Molimau atu e uiga i folafolaga a le Alii.

• Faaali atu se ata o le malumalu, ma fai i tamaiti e faamatala mai le mea o loo latou vaai i ai. Faaaoga se pese e faatatau i le soifua maloloina faaletino, e pei o le “Ia Tuu Mai E Le Alii Se Malumalu” (Tusipese a Tamaiti, 73), e aoao ai tamaiti o o tatou tino ua pei o malumalu mo o tatou agaga ma e finagalo le Atua tatou te tausia o tatou tino ia maloloina. Fesoasoani i tamaiti e mafaufau i ni auala e mafai ona tatou tausia ai o tatou tino, ma tuu atu i tamaiti latou te faatinoina.

Mataupu Faavae ma Feagaiga 90:5

Ua tuuina mai e le Atua perofeta e taitaia ma puipuia i tatou.

Fesoasoani i tamaiti ia malamalama pe mafai faapefea e perofeta a le Alii ona fesoasoani ia i tatou ia maua le saogalemu mai afa o le olaga.

Gaoioiga e Mafai Ona Fai

• Faaali atu i tamaiti ata o perofeta anamua, ma taʻu atu ia i latou auala na lapataia ai e nei perofeta tagata i o latou vaitaimi. (Mo nisi manatu, tagai “Mulimuli i le Perofeta,” Tusipese a Tamaiti, 58–59.)

• Aisea e tatau ai ona tatou faalogo i perofeta a le Atua? Faaali atu se ata o le perofeta o loo i ai nei, ma faasoa atu ni mea ua ia aoaoina mai pe lapataia ai i tatou talu ai nei. Fesoasoani i tamaiti e mafaufau i ni auala e mafai ona tatou mulimuli ai i le perofeta. Faasoa atu lau molimau e uiga i upumoni o loo aoaoina i le Mataupu Faavae ma Feagaiga 90:5. (Manatua o “e e mauaina faaaliga” o lona uiga o faaaliga po o perofeta o e mauaina.)

Aoao atu le Aoaoga Faavae: Tamaiti Matutua

Mataupu Faavae ma Feagaiga 89

O le Upu o le Poto e fesoasoani ia ou ola maloloina ai i le tino ma le agaga.

Na fautuaina e Elder Gary E. Stevenson tagata talavou e fuafua muamua po o le a se mea o le a latou faia pe a faaosoosoina i latou i le ava malosi po o fualaau faasaina. Ona ia aoao mai lea, “O le a e iloa ai o le faaosoosoga e itiiti lona pule i luga o oe. Ua uma ona e faia le faaiuga pe o le a faapefea ona e tali atu ma po o a mea o le a e faia. E te lē tau manaomia ona faia se faaiuga i taimi uma” (“O Lau Tusi Metotia o le Perisitua,” Ensign po o le Liahona, Me 2019, 48). Uunai tamaiti o loo e aoaoina ia filifili nei––mo o latou olaga atoa—ia ola i le Upu o le Poto.

Gaoioiga e Mafai Ona Fai

• Vaelua le vasega i ni vaega se lua, ma fai atu i le tasi vaega e faitau le Mataupu Faavae ma Feagaiga 89:1–4 ma le isi vaega e faitau le fuaiupu 18–21. Fai atu ia i latou e mafaufau loloto i fesili e pei o nei: Aisea na tuuina mai ai e le Alii ia i tatou le Upu o le Poto? E faapefea ona faamanuiaina a’u faaletino ma le faaleagaga i le ola ai i le tulafono o le Upu o le Poto?

• Fatu ni faamatalaga e faatumu avanoa e faaaoga ai fuaitau mai le Mataupu Faavae ma Feagaiga 89, e pei o le “ faauuina mo le faaaogaina e le tagata atoa ma manu” po o le “Ma o le a ae le vaivai” (fuaiupu 14, 20). Valaaulia tamaiti e galulue taitoalua e saili tali i totonu o le vaega 89. E mafai e tamaiti ona vavae ia faʻamatalaga i vaega nei: mea lelei mo o tatou tino, mea leaga mo o tatou tino, ma faʻamanuiaga.

• Valaaulia se tamaitiiti e faitau le Mataupu Faavae ma Feagaiga 89:4 ma le isi e faitau le saunoaga mai ia Elder Stevenson o loo i luga. Aisea e tatau ai ona tatou filifili nei e usiusitai i le Upu o le Poto nai lo le faatalitali seia oo i le taimi o faaosoosoga? Fesoasoani i tamaiti e faatino pe faapefea ona latou tali atu pe afai o se tasi, e oo lava i se uo, ua ofoina mai ia i latou se mea e tetee i le Upu o le Poto. E faapefea ona puipuia i tatou i le usitaia o le Upu o le Poto?

Mataupu Faavae ma Feagaiga 90:2, 5, 14–16

Ua umia e le Au Peresitene Sili “ki o le malo.”

O faatonuga a le Alii e uiga i le Au Peresitene Sili i le 1833 (Iosefa Samita, Sini Rikitone, ma Frederick G. Williams) e mafai ona fesoasoani i tamaiti e faamalosia ai a latou molimau i le Au Peresitene Sili o aso nei.

Gaoioiga e Mafai Ona Fai

• Valaaulia tamaiti e suesue le Mataupu Faavae ma Feagaiga 90: 14–16 ma tusi i lalo nisi o mea na talosagaina e le Alii le Au Peresitene Sili e fai. Faaali atu i tamaiti se ata o le Au Peresitene Sili o i ai nei, ma faasoa atu se mea e uiga ia i latou. (E mafai ona e faitauina o latou talaaga i lalo o le “Living Prophets and Church Leaders” i le ChurchofJesusChrist.org.) Faasoa atu lau molimau e uiga i o latou valaauga paia ma faamanuiaga ua e mauaina mai le mulimuli ia latou fautuaga.

• Iloilo faatasi ma tamaiti se mea na aoao mai e se tasi o le Au Peresitene Sili. Faitau faatasi le Mataupu Faavae ma Feagaiga 90:5. Ia faailoa atu o “e e mauaina faaaliga” o faaaliga po o perofeta o e mauaina. O le a le uiga o le “e mauaina faaaliga … o se mea māmā”? E faʻapefea ona tatou faʻaalia o perofeta ma mea latou te aʻoaʻoina mai e taua ia i tatou?

Mataupu Faavae ma Feagaiga 91

E mafai e le Agaga ona fesoasoani ia ou iloa le mea moni.

Ao e faitau i le mea na tauina atu e le Alii ia Iosefa Samita e uiga i le Apokarifa, mafaufau pe mafai faapefea e lenei fautuaga ona fesoasoani i tamaiti ia iloatino le eseesega o le mea moni ma mea sese o le a latou fetaiaʻi i o latou olaga atoa.

Gaoioiga e Mafai Ona Fai

• Faitau faatasi le ulutala o le Mataupu Faavae ma Feagaiga 91 e fesoasoani ai i tamaiti ia malamalama po o le a le Apokarifa (tagai foi i le Taiala i Tusitusiga Paia, “Apokarifa,” scriptures.ChurchofJesusChrist.org). Fesoasoani i tamaiti e mafaufau i isi nofoaga, e pei o ala o faasalalauga, lea atonu tatou te maua ai “e tele mea … e moni” ma “e tele mea … e le moni” (fuaiupu 1–2). Ona valaaulia lea o tamaiti e suesue i le vaega e 91 e aoao ai po o le a le mea na fetalai le Alii e mafai ona tatou faia e iloatino ai le va o le mea moni ma le mea sese.

• Faitau faatasi le Mataupu Faavae ma Feagaiga 91:4–6, ma fesili atu i tamaiti po o a mea o loo aoao mai e nei fuaiupu e faatatau i le Agaga Paia. Ia valaaulia tamaiti e faasoa mai se aafiaga patino i se taimi na “faaalia [e le Agaga] le upumoni” ia i latou. Faasoa atu foi ou lava aafiaga. O a nisi auala e mafai e le Agaga ona fesoasoani ia i tatou?

Fautuaina le Aoaoina i le Aiga

Valaaulia tamaiti e faasoa atu i o latou aiga mea na latou aoaoina i le asō e uiga i le tausiga o o latou tino ma agaga, po o a latou sini mo le usiusitai i le Upu o le Poto.

Faaleleia o Lo Tatou Aoao Atu

Sailia au lava musumusuga. O nei otootoga e le o ni faatonuga e tatau lava ona e mulimuli ai aʻo e aʻoaʻo atu. Ae, e faaaoga e faaosofia ai au lava musumusuga ao e manatunatu loloto i manaoga o tamaiti e te aoaoina. (Tagai Aoao Atu i le Ala a le Faaola, 7.)