Ua vaai Setefano i le Atua ma Iesu Keriso

Ua Ou Vaai i le Atalii o le Tagata O Tu i le Itu Taumatau o le Atua, saunia e Walter Rane

23–29 Aokuso

Mataupu Faavae ma Feagaiga 93

“Maua Lona Atoatoaga”

O tamaiti o loo e aoaoina o ni atalii ma ni afafine agaga faapelepele a ni Matua Faalelagi, ma na nonofo ma i Laua ao le’i omai i le lalolagi. Pe a uma ona e suesueina le Mataupu Faavae ma Feagaiga 93, o le a se mea ua musuia ai oe e fai ina ia fesoasoani i nei tamaiti e ola “i le malamalama ma le upumoni”? (fuaiupu 40).

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Faaali atu ata o le Faaola (e pei o ata i totonu o le Tusi Ata o le Talalelei, po o mekasini o le Ekalesia), ma fai i tamaiti e faasoa mai mea latou te iloa e uiga ia te Ia. O tamaiti matutua atonu e mafai ona faasoa mai se mau mai le Mataupu Faavae ma Feagaiga 93 na fesoasoani ia i latou e aoao e uiga ia Iesu Keriso.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 93:2–21

O Iesu Keriso o le Alo o le Atua.

E taua le aoao e tamaiti o loo e aoaoina po o ai Iesu Keriso ma le mafuaaga e tatau ai ona latou mulimuli ia te Ia. O upumoni e faatatau ia Iesu Keriso o loo maua i le vaega 93 e mafai ona fesoasoani.

faamalama tioata

Tatou te maua le malamalama o Iesu Keriso pe a tatou tausia Ana poloaiga.

Gaoioiga e Mafai Ona Fai

• Filifili ni nai upumoni na e aoaoina e uiga i le Faaola i le vaega 93 e musuia ia te oe. Mo upumoni uma e te filifilia, faitau atu i tamaiti le fuaiupu e maua ai, ma tuu atu ia i latou se upu autu latou te faalogologo ai mo lena upu ao e faitauina. Faasoa atu sau molimau puupuu o le Faaola, ma tuu i tamaiti e faasoa mai a latou molimau. O le lisi nei o upumoni e mafai ona tuʻuina atu ia te oe ni manatu:

  Na faia e Iesu Keriso galuega a le Tama (fuaiupu 5).

  O Iesu Keriso o le Malamalama o le Lalolagi (fuaiupu 9).

  O Iesu Keriso o le na Faia le lalolagi (fuaiupu 10).

  Na maua e Iesu Keriso le mana uma, i le lagi ma le lalolagi (fuaiupu 17).

  Na i ai Iesu Keriso faatasi ma le Atua i le amataga (fuaiupu 21).

• Fai atu i tamaiti e faalogologo mo se mea na latou aoaoina e uiga i le Faaola ao e aoteleina i au lava upu nisi o upumoni o loo aoaoina mai i le vaega 93. (E mafai foi ona e faaaogaina le “Mataupu 33: O se Faaaliga e faatatau ia lesu Keriso” [Tala o le Mataupu Faavae ma Feagaiga, 126–27].)

Mataupu Faavae ma Feagaiga 93:23, 29

Sa ou ola faatasi ma le Tama Faalelagi ae ou te lei sau i le lalolagi.

Aisea e taua ai ona e fesoasoani i tamaiti o loo e aoaoina ia malamalama na latou mau faatasi ma le Tama Faalelagi ao le’i fananau mai? Na faapefea ona faamanuiaina oe i le iloa ai o lenei upumoni?

Gaoioiga e Mafai Ona Fai

• Fai faatasi ma tamaiti upu nei “Sa outou i ai foi i le amataga faatasi ma le Tamā” (Mataupu Faavae ma Feagaiga 93:23). Faamalamalama atu ae tatou te leʻi fananau mai i le lalolagi, sa tatou nonofo faatasi ma le Tama Faalelagi i le lagi. Usu faatasi le “O A’u o se Atalii o le Atua” po o le “I Lived in Heaven” (Tusipese a Tamaiti, 2–3).

• Valaaulia tamaiti e valivali le itulau o gaoioiga ma tusi ni ata o i latou lava ma le Tama Faalelagi ma Iesu Keriso i le muai olaga. Tuu atu lau molimau e alofa le Atua ia i tatou uma ma o i tatou uma lava o Ana fanau.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 93:2–21

O Iesu Keriso o le Alo o le Atua.

O le tele o lo tatou malamalama e uiga ia Iesu Keriso, o le tele foi lena o le loloto ma le faamaoni tatou te mananao e tapuai ia te Ia ma o mai i le Tama e ala mai ia te Ia (tagai Mataupu Faavae ma Feagaiga 93:19).

Gaoioiga e Mafai Ona Fai

• Faaali atu se ata o le Faaola, ma fesili i tamaiti pe aisea e taua ai lo tatou iloa e uiga ia Iesu Keriso. Valaaulia i latou e saili tali faaopoopo i le Mataupu Faavae ma Feagaiga 93:19. Valaaulia i latou e mafaufau i se tasi o auala e mafai ona latou aoao atili ai e uiga ia Iesu i le vaiaso a sau, ma tuu atu ia i latou se avanoa e faasoa mai ai o latou manatu.

• Mafaufau i se auala fatufatuaʻi e uunaia ai tamaiti e faitau e uiga i le Faaola i le vaega 93. E mafai ona e tusi i luga o fasipepa nisi o mau faasino i fuaiupu mai le vaega 93 o loo aoao mai ai upumoni e uiga ia Iesu Keriso (mo se faataitaiga, tagai fuaiupu 5, 9–10, 17, 21). Tuu fasipepa i totonu o se koneteina, ma fai atu i tamaiti e feauauai i le filifilia o se fasipepa ma faitau le mau i le vasega. O ni a mea ua tatou aoaoina e uiga ia Iesu Keriso mai nei fuaitau?

Mataupu Faavae ma Feagaiga 93:23, 29, 38

Sa ou ola faatasi ma le Tama Faalelagi ae ou te lei sau i le lalolagi.

Na faatolu ona faamamafaina e le Faaola i le vaega 93 e faapea sa tatou nonofo ma le Atua “i le amataga” (fuaiupu 23, 29, 38). Aisea e finagalo ai o Ia tatou te iloa lenei mea? E faapefea e le iloaina o lenei upumoni ona faamanuiaina ai tamaiti o loo e aoaoina?

Gaoioiga e Mafai Ona Fai

• Faitau faatasi le Mataupu Faavae ma Feagaiga 93:23, 29, 38 ma valaaulia tamaiti e vaai mo se upumoni e uiga ia i latou o loo ta’ua soo i nei fuaiupu. Fai atu i tamaiti e faasoa mai soo se mea latou te iloa e uiga i lo tatou olaga ma le Tama Faalelagi ae tatou te leʻi fananau mai. Tuu atu i tamaiti taitoatasi se tasi o mau nei, ma fesoasoani ia i latou e saili se mea o loo aoao mai e nei mau e uiga i le olaga ae tatou te lei o mai i le lalolagi: Ieremia 1:5; Mataupu Faavae ma Feagaiga 138:53–56; Mose 3:5; Aperaamo 3:22–26.

• Usu faatasi le “O A’u o se Atalii o le Atua” po o le “I Lived in Heaven” (Tusipese a Tamaiti, 2–3). O a upumoni tatou te aoaoina mai lenei pese e uiga i lo tatou faamoemoega mo le o mai i le lalolagi?

Mataupu Faavae ma Feagaiga 93:24

O le upumoni o le malamalama lea i mea i aso ua tuanai, taimi nei, ma le lumanaʻi.

E tele manatu eseese o le lalolagi e uiga i le upumoni ma le auala e maua ai. E mafai faapefea ona e fesoasoani i tamaiti o loo e aoaoina ina ia malamalama o le upumoni e moni e tusa lava po o a mea e ono fai mai ai isi ma e silafia e le Tama Faalelagi upumoni uma?

Gaoioiga e Mafai Ona Fai

• Tusi le upu upumoni i luga o le laupapa, ma fai atu i tamaiti e tusi ai se faauigaga i autafa. Faitau faatasi le auala na faauigaina ai e le Alii le upumoni i totonu o le Mataupu Faavae ma Feagaiga 93:24. Usu se viiga e faatatau i le upumoni, e pei o le “Upu Moni o A?” (Viiga, nu. 170), ma valaaulia tamaiti e saili i le viiga isi auala e faamatala ai le upumoni.

• Ina ia fesoasoani i tamaiti e faaaoga upumoni i le Mataupu Faavae ma Feagaiga 93, tusi ni nai mau faasino mai lenei vaega i luga o ni fasipepa. I luga o isi fasipepa, tusi ai upumoni o loo aoao mai e fuaiupu taitasi. Valaaulia tamaiti e galulue faatasi e faitau le fuaiupu ma faafetaui le upumoni i le fuaiupu o loo latou faitauina. Aisea tatou te faafetai ai i le i ai o se malamalama o le upu moni?

aikona o le aoaoina

Uunaia le Aoaoina i le Aiga

Valaaulia tamaiti e faamaumau i lalo pe tusi se ata o se mea na latou aoaoina i le vasega e faasoa atu i o latou aiga pe a latou taunuu i le fale.

Faaleleia o Lo Tatou Aoao Atu

Fesoasoani i tamaiti ia iloa le Agaga. Ao e maua ni aafiaga faaleagaga ma tamaiti (mo se faataitaiga, ao faitauina faatasi ma i latou tusitusiga paia, faalogologo ia latou molimau, pe pepese faatasi), fesoasoani ia latou iloa le uunaiga a le Agaga Paia.

itulau o gaoioiga: O Iesu Keriso o le Malamalama ma le Ola o le lalolagi