alii ma le tamaitai o loo faia se meaai

16--22 Aokuso

Mataupu Faavae ma Feagaiga 89--92

“O Se Mataupu Autu faatasi ma se Folafolaga”

Ia suesue ma le agaga tatalo le Mataupu Faavae ma Feagaiga 89-92, ma tusifaamaumau soo se lagona uunaia e te maua. Ia e nofouta i auala e “[faaali mai ai] e le Agaga le mea moni” ia te oe a o e suesue i le (Mataupu Faavae ma Feagaiga 91:4).

Tusifaamaumau Ou Lagona Uunaia

I le Aoga a Perofeta, na aoao atu e le Perofeta o Iosefa Samita le au toeaina o Isaraelu e uiga i le fausiaina o le malo o le Atua i le lalolagi. Sa latou talanoaina upu moni faaleagaga, tatalo faatasi, anapopogi, ma saunia e talai atu le talalelei. Peitai sa i ai se mea i le siosiomaga lea sa foliga mai e ese lava ia i tatou i aso nei, ma sa le’i foliga sa’o foi ia Ema Samita ia. I taimi o fonotaga, sa ula ma lamu ai e alii ia tapaa, lea sa le o se mea faapea sa le masani ai i lena vaitaimi, ae sa pisipisia uliuli ai fola laupapa ma tuua ai se manogi malosi i le ea. Sa faasoa atu e Ema ona atugaluga ia Iosefa, ma sa fesili atu Iosefa i le Alii. O le taunuuga o se faaaliga lea sa oo mamao i tua atu o asu ma pisipisia o tapaa. Sa tuuina mai ai i le Au Paia, mo augatupulaga i le lumanai, “se mataupu autu faatasi ma se folafolaga”—o folafolaga o le soifua maloloina faaletino, “poto,” ma “oa silisili o le malamalama” (Mataupu Faavae ma Feagaiga 89:3, 19).

Tagai foi Au Paia, 1:166–68.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 89

O le Upu o le Poto o “se mataupu autu faatasi ma se folafolaga.”

I le taimi muamua na faalogo ai le au toeaina i le Aoga a Perofeta i le faitauga e Iosefa Samita o le Upu o le Poto, o le taimi lava lea na latou “togiina ai a latou paipa ma pepa o tapaa lamu i le afi” (Au Paia, 1:168). I le taimi lena, o le Upu o le Poto sa tele lava ina manatu i ai o se lapataiga nai lo o se poloaiga, ae sa latou mananao e faaali atu lo latou naunau e usitai. Atonu ua uma ona e “togiina” ese mai lou olaga ia vailaau ua lapatai mai le Upu o le Poto e tetee i ai, ae o le a se isi mea e mafai ona e aoaoina mai i lenei faaaliga? Mafaufau i manatu nei:

• Vaavaai mo fuaitau atonu e te le’i maitauina—pe mafaufau tele i ai—muamua. O a ni mea ua tatou aoao mai ai?

• O le Mataupu Faavae ma Feagaiga 89 o loo aofia ai ni nai folafolaga (tagai i fuaiupu 18–21). O le a sou manatu i le uiga o nei folafolaga?

• O le a se mea ua aoao atu e lenei faaaliga ia te oe e uiga i le Alii?

• O a ni faataitaiga ua e vaaia o “mea leaga ma fuafuaga … i loto o tagata faufau leaga”? (fuaiupu e 4).

• Mafaufau i le faaaliga o “se mataupu autu faatasi ma se folafolaga” (fuaiupu 3)—o upumoni tumau e taiala ai le faiga o faaiuga—ae e le na’o se lisi o mea e fai ma mea e aua le faia. O a ni mataupu faavae e te maua ai e mafai ona taiala ai au faaiuga?

Ua lapataiina foi perofeta i ona po nei i vailaau leaga ma amioga e i tua atu o mea na ta’ua i le Upu o le Poto (tagai i le “Soifua Maloloina Faaletino ma Faalelagona,” Mo le Malosi o le Autalavou, 25–27). O le a se mea ua musuia oe e fai e tausi faalelei ai lou mafaufau ma lou tino?

Tagai foi i le Tanielu 1; 1 Korinito 6:19–20; Autu o le Talalelei, “Upu o le Poto,” topics.ChurchofJesusChrist.org; “O Le Upu o le Poto,” Revelations in Context, 183–91; addictionrecovery.ChurchofJesusChrist.org.

tama o loo tamomoe i luga o se matafaga

O le Upu o le Poto o loo aoao ai i tatou e tausi faalelei o tatou tino.

Mataupu Faavae ma Feagaiga 90:1–17

O Le Au Peresitene Sili o loo umia “ki o le malo.”

I le vaega e 90, na tuuina mai ai e le Alii ia faatonuga e uiga i “le auaunaga ma le au peresitene” (fuaiupu 12) o Iosefa Samita, Sini Rikitone, ma Feterika G. Viliamu—o le mea ua tatou ta’ua nei o le Au Peresitene Sili. O le a le mea ua e aoaoina e uiga i le Au Peresitene Sili mai i fuaiupu e 1–17? Toe faamanatu ni savali lata mai nei mai sui o le Au Peresitene Sili. O faapefea e a latou saunoaga ona “tatala atu ai mealilo o le malo” ia te oe? (fuaiupu 14). O faapefea ona latou “faatulaga tatau mataupu uma o lenei ekalesia ma le malo”? (fuaiupu 16).

Tagai foi Henry B. Eyring, “O Le Mana o le Faatuatua Lagolago,” Ensign po o le Liahona, Me 2019, 58–60.

Mataupu Faavae ma Feagaiga 90:24

“O le a galulue faatasi mea uma mo [lo’u] lelei.”

Mafaufau loloto i soo se aafiaga sa e maua ua faapea ona molimau mai e uiga i le folafolaga a le Alii i le Mataupu Faavae ma Feagaiga 90:24. Mafaufau e tusifaamaumau ou aafiaga ma faasoa atu i se tagata o le aiga po o se pele—atonu o se tasi o manaomia se faamautinoaga po o se faamalosiauga. Afai e i ai ni faamanuiaga o loo e faatalitali pea i ai, mafaufau loloto i ni mea e mafai ona e faia ia tumau ai le faamaoni a o e faatalitali e vaavaai i auala “o le a galulue faatasi mea uma mo lo outou lelei.”

Mataupu Faavae ma Feagaiga 90:28–31

O ai Vienna Jaques?

Sa fanau Vienna Jaques i le aso 10 o Iuni, 1787, i Massachusetts. O se tamaitai o le faatuatua o le sa matuai tele lava ni ana mea tautupe na i ai, o Vienna sa feiloai muamua lava i faifeautalai i le 1831. Ina ua uma se molimau faaleagaga e faapea, e sa’o la latou savali, sa malaga atu o ia e feiloai i le Perofeta i Katelani, Ohaio, lea sa papatisoina ai o ia.

Sa usitai Vienna i le fautuaga a le Alii ia te ia i le Mataupu Faavae ma Feagaiga 90:28–31. O lana faapaiaga i le Alii, e aofia ai foai sa ia faia muamua atu i Katelani, na oo mai i se taimi sili ona taua mo le Ekalesia, i le taimi sa taumafai ai taitai e faatau mai le fanua lea o le a fausia ai le Malumalu o Katelani. O Viena sa “faamaoni …, ma lē faapaiē” i lona olaga atoa ma sa iu lava ina mafai ona “mau … i lalo i le filemu” (fuaiupu 31) i le Vanu o Sate Leki, lea na maliu ai o ia i le 96 o ona tausaga.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 89.E ono fiafia tagata o lou aiga e tusi pe sue ni ata o meaai ma vailaau na ta’ua i le Mataupu Faavae ma Feagaiga 89. Ona outou taaalo lea i se taaloga—e mafai ona auauai tagata o le aiga i le filifilia o soo se ata, tuu mea e le tatau ona tatou faaaogaina i totonu o le lapisi, ae tuu mea e tatau ona tatou faaaogaina i se ipumafolafola. Na faapefea ona faataunuuina folafolaga i le fuaiupu e 18–21 i o tatou olaga?

O le faitau o le “Soifua Maloloina Faaletino ma Faalelagona” i le Mo le Malosi o le Autalavou (25–27) e mafai ona faaosofia ai se talanoaga e uiga i isi auala e tausi ai o tatou soifua maloloina ma e uiga i faamanuiaga ua folafola mai e le Atua.

Mataupu Faavae ma Feagaiga 90:5.Talanoa pe faapefea ona e “mauaina faaaliga [faaaliga po o perofeta] a le Atua.” E mafai faapefea ona tatou faʻaali atu e le o ni “mea māmā” ia i tatou?

Mataupu Faavae ma Feagaiga 91.Atonu tou te talanoaina auala ua faatatau ai le fautuaga a le Alii e uiga i le Apokalifa (tagai i le fuaiupu 1–2) i ala o faasalalauga o loo fetaiai ma lou aiga i aso nei (tagai foi i le Taiala i Tusitusiga Paia, “Apokalifa,” scriptures.ChurchofJesusChrist.org). E mafai foi ona e faasoa atu ni aafiaga patino i se taimi na fesoasoani ai ia te oe le “faapupulaina e le Agaga” (fuaiupu 5) e te iloatino ai le va o le mea moni ma le mea sese.

Mataupu Faavae ma Feagaiga 92:2.O le a le uiga o le ia avea “ma se uso toaga” o le Ekalesia?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Tuu Mai e le Alii se Malumalu,” Tusipese a Tamaiti, 73.

Faaleleia o Lo Tatou Aoao Atu

Faaaoga auala eseese. Vaavaai mo ni auala eseese e faaauai ai lou aiga i suesuega faaleaiga o tusitusiga paia. Mo se faataitaiga, e mafai e tagata o le aiga ona usuina ni viiga po o ni pese a tamaiti e faatatau i se fuaiupu, tusi ni ata o mea latou te faitau i ai, pe aotele se fuaiupu i a latou lava upu.

fualaau aina ma fualaau fai sua

“Ma o le au paia uma o e e … faia nei upu, ma savavali i le usiusitai i poloaiga, o le a latou maua le maloloina i o latou pute ma le su i o latou ivi” (Mataupu Faavae ma Feagaiga 89:18).