O Alii ma Tamaitai ma le Mana o le Perisitua

Saunia e Elder M. Russell Ballard

O Le Korama a Aposetolo e Toasefululua

Mai se lauga sa faia i se faigalotu i le Iunivesite o Polika Iaga i le aso 20 o Aokuso, 2013. Mo le tusiga atoa i le gagana Peretania, alu i le speeches.byu.edu.

Aua lava nei o tatou faagaloina o i tatou o atalii ma afafine o le Atua, e tutusa i Lana silafaga ma tiutetauave eseese ma gafatia e tofia i ai e Ia ma tuuina atu aia e faaaogaina ai i Lona mana o le perisitua.

Sa i ai lo’u tamamatua o Elder Melvin J. Ballard (1873–1939), o se tasi o le Korama a Aposetolo e Toasefululua, i le falemai o mafatia i le tulaga faaiuiu o le lukimia i le 1939. O lo’u tama, o lē sa nofo i autafa o le moega o Tamamatua, na fai mai o ia sa tuleia e Tamamatua o ia lava i luga o le moega, ma tilotilo solo i lona potu i le falemai e pei o loo ia lauga atu i se faapotopotoga, ma fai mai manino lava, “Ma i le faatumutumuga o mea uma lava, uso e, ia tatou mafaufau manino ma sa’o.”

I mea ou te fai atu ai, faamolemole ia manatua ma mafaufau sao e uiga i aoaoga faavae autu o Keriso lea e aofia ai le alofa o lo tatou Tama oi le Lagi mo Ona afafine, o e pele ma taua i Le Ekalesia a Iesu Keriso o le Au Paia o Aso e Gata Ai. Ou te talitonu ua i ai sina mea moni e manaomia ona malamalama uma i ai tamaitai ma alii e uiga i le matafaioi taua o loo i ai i tamaitai i le faamalosia ma le fausiaina o le malo o le Atua i luga o le fogaeleele.

O i tatou o ni atalii ma afafine agaga faapelepele a lo tatou Tama Faalelagi. Sa tatou nonofo faatasi ma Ia i le muai olaga. Ina ia faataunuuina le misiona o le aumaia “o le tino ola pea ma le ola faavavau o le tagata” (Mose 1:39), ua foafoaina e le Tama Faalelagi se fuafuaga e fesoasoani ai i Lana fanau ina ia ausia o latou faamoemoega tupito ma le sili.

O loo i ai i latou o e fesiligia le tulaga o tamaitai i le fuafuaga a le Atua ma i le Ekalesia. Ua lava le faatalanoaina o au e ala i faasalalauga faaleatunuu ma faavaomalo e tau atu ai ia te outou o le tele o le au tusitala ua leva ona faia ni manatu e uiga i lenei autu. I le aluga o tausaga o le toatele na tuuina atu ni fesili e atagia mai ai o tamaitai o ni tagatanuu lona lua i le Ekalesia. E leai se mea e mafai ona aveesea mai le upumoni.

Sei ou fautua atu ni manatu autu se lima e mafaufau loloto i ai ma le manatu sa’o e uiga i lenei mataupu taua.

1. O le Tama ma le Alo e finagalo ina ia tatou faaeaina.

Na foafoaina e lo tatou Tama Faalelagi ia alii ma tamaitai, o Ona afafine ma atalii agaga. O lona uiga e faavavau le itupa. Ua i ai Sana fuafuaga ua mamanuina e fesoasoani ia i tatou uma o e filifili e mulimuli ia te Ia ma Lona Alo, o Iesu Keriso, e ausia lo latou taunuuga o ni suli o le ola e faavavau.

O le Tama Faalelagi ma Lona Alo e atoatoa. E silafia e i Laua mea uma ma malamalama i mea uma. Ma le isi, o lo Laua faamoemoega mo i tatou e atoatoa. O la Laua galuega ma lo Laua mamalu, o le vaai iā Laua fanau ua faaeaina.

Afai o lo tatou faaeaga mulimuli o lo Laua sini taua ma le faamoemoega lea, ma afai La te silafia mea uma ma atoatoa, e pei ona tatou iloaina i Laua, ona sili atu lea o lo Laua malamalama i le auala e saunia ai, aoao atu, ma taitai atu ai i tatou ina ia tatou maua le avanoa sili e agavaa ai mo le faaeaga. E silafia e lo Tatou Tama oi le Lagi mea uma, muai vaaia mea uma, ma malamalama i mea uma. E atoatoa Lona malamalama, o Lona poto, ma Lona alofa mo i tatou. E mautinoa lava e tatau ona tatou malilie o lo tatou Tama Faalelagi ma Lona Alo e silafia po o a avanoa e moomia e atalii ma afafine o le Atua e sili ma tatau e saunia ai le aiga o tagata mo le ola e faavavau.

E tofu i tatou taitoatasi ma le avanoa e filifili ai pe o le a tatou talitonu o le Atua o lo tatou Tama, o Iesu o le Keriso, ma e i ai se La fuafuaga ua mamanuina e fesoasoani ia i tatou e toe foi atu ai ia i Laua. O lenei mea, e moni, e manaomia ai le faatuatua. O a tatou molimau ma filemu o tatou mafaufau ma lo tatou soifua laulelei e amata i le naunautai ina ia talitonu faapea e moni ua sili lava le silafia o lo tatou Tama o i le Lagi.

2. E taitaiina le Ekalesia e ala i Ki o le Perisitua.

O Le Ekalesia a Iesu Keriso o le Au Paia o Aso e Gata Ai o le Ekalesia lea a le Alii, ma o Lana Ekalesia e taitaiina e ala i le pule ma ki o le perisitua. “O ki o le perisitua o le pule lea ua tuuina mai e le Atua i taitai perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele.” O le faaaogaina o le pule o le perisitua ua pulea e i latou o e umia ona ki (tagai i le MF&F 65:2; 81:2; 124:123) … [ma] e ua i ai le aia tatau e pulefaamalumalu ai ma taitaia le Ekalesia i totonu o se puleaga.”¹

O i latou e i ai ki o le perisitua ua mafai ai e i latou uma o e auauna atu po o le galulue ma le faamaoni i lalo o la latou taitaiga e faaaoga le pule o le perisitua ma mafai ai ona maua mana o le perisitua. E galulue alii ma tamaitai uma o le Ekalesia i lalo o le taitaiga a i latou o e ua i ai ki.²

Sei ou toe faamatalaina se mea sa ou ta’ua i le konafesi aoao ia Aperila 2013: “I le fuafuaga faaeaina o le perisitua sili a lo tatou Tama Faalelagi ua i ai i alii le tiutetauave tupito e taitai ai lana perisitua, ae e le o latou o le perisitua. O Alii ma tamaitai e eseese ae tutusa le taua o matafaioi. E pei lava ona le mafai i se tamaitai ona fanauina se tamaitiiti e aunoa ma se alii, e faapena foi, e le mafai i se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. … I se vaaiga e faavavau, o le mana foafoa atoa ai ma le mana o le perisitua e faaaogaina uma e se tane ma se ava.”³

Aisea o alii—ae le o tamaitai—e faauuina i tofi o le perisitua? Sa faamalamalama mai e Peresitene Gordon B. Hinckley (1910–2008) e faapea o le Alii, ae le o le tagata, “na filifili o alii i Lana Ekalesia e tatau ona umiaina le perisitua” ma o le Alii foi na faaee maia i tamaitai ia ni “gafatia e faalautele ai lenei faalapotopotoga maoae ma le ofoofogia, le Ekalesia ma le malo o le Atua.”⁴ E lei faaalia mai e le Alii le mafuaaga na Ia faatulagaina ai Lana Ekalesia e pei ona Ia faia.

O lenei mataupu, e pei o le tele o isi, e oo mai ona o lo tatou faatuatua. Pe tatou te talitonu o le Ekalesia lenei a le Alii? Pe tatou te talitonu ua Ia faatulagaina ai e tusa ma Lona faamoemoega ma le poto? Pe tatou te talitonu o Lona poto e sili mamao nai lo tatou? Pe tatou te talitonu ua Ia faatulagaina Lana Ekalesia i se auala o le a silisili faamanuiaga o le a mauaina e Ana fanau uma, o Ona atalii ma Ona afafine?

Ou te molimau atu ua moni nei mea. Ou te molimau atu o le Ekalesia lenei a le Alii. O tamaitai e taua i le puleaina ma le galuega a le Ekalesia e ala i auaunaga i le avea ai ma taitai i le Aualofa, Tamaitai Talavou, ma le Peraimeri; e ala i auaunaga o ni faiaoga, faifeautalai faamisiona, ma tagata faigaluega fai sauniga o le malumalu; ma i le aiga, lea e tupu ai ia aoaoga sili ona taua i le Ekalesia.

Aua nei galo ia i tatou e tusa o le afa o aoaoga uma o loo faia i le Ekalesia o loo faia lea e tuafafine. O le tele o taitaiga o loo saunia e mai o tatou tuafafine. O le tele o avanoa faaleauaunaga ma gaoioiga ua fuafuaina ma taitaia e tamaitai. O fautuaga ma le auai o isi tamaitai i aufono a uarota ma siteki ma i le aufono aoao i le laumua o le Ekalesia e maua mai ai se malamalamaaga manaomia, poto, ma le paleni.

Mo le silia ma le 20 tausaga sa ou aoaoina le taua o aufono, e aofia ai le taua o le auai o uso taitai tamaitai. Ou te faailoa atu o nisi o alii, e aofia ai nisi o taitai perisitua, ua le vaaia lava le malamalama ma le faaaofiaina lava o tatou uso taitai tamaitai i se faigapaaga atoatoa i aufono a uarota ma siteki. Ou te faailoa atu foi o nisi alii e tuua lava i lalo tamaitai ma i nisi tulaga e seasea tupu e tausalaina i le faaaogaina o tamaitai. O lenei aganuu e matuā inosia lava i le silafaga a le Atua. Ou te mautinoa o alii o tuualaloina tamaitai i soo se itu o le a tali atu i le Atua mo a latou amioga. Ma o soo se taitai perisitua o e e le fa’aofiaina ona tuafafine a taitai i le faaaloalo atoa ma fa’aaogaina ua ia le faamamaluina ma faalauteleina ki ua tuuina atu i ai. O lona mana ma uunaiga o le a faaitiitia seia oo ina ia aoaoina le ala o le Alii.

O lenei, tuafafine, e ui e taua tele ou manatu ma taliaina i le fonotaga aoga, e tatau ona faaeteete ia aua le taliaina po o le faatino o se matafaioi e le a oe. O fonotaga sili ona faamanuiaina a uarota ma siteki o latou ia na faatuatuaina ai e taitai perisitua a latou taitai tuafafine ma uunaia i latou ia saofaga i le talanoaga ma sa i na tuafafine taitai le faaaloalo atoatoa ma lagolagoina faaiuga a le aufono na faia i lalo o le taitaiga a taitai perisitua o loo umia ki.

3. O alii ma tamaitai e tutusa uma i fofoga o le Atua.

E tutusa alii ma tamaitai i fofoga o le Atua ma i le silafaga o le Ekalesia, ae e le faapea ua tutusa ona tasi ai lea. O tiutetauave ma meaalofa paia a alii ma tamaitai e eseese i lo latou natura ae le o lo latou taua po o uunaiga. E le manatu le Atua e sili atu le lelei pe sili atu le taua o le isi itupa nai lo le isi. Na folafola atu e Peresitene Hinckley i tamaitai faapea “o lo tatou Tama Faavavau … e lei fuafuaina lava faapea e itiiti ifo outou nai le mamalu faapaleina o Ana foafoaga.”⁵

O nisi ua fenumia’i ma le mafai ona mafaufau sa’o pe a faatusatusa ia tofiga o alii ia i latou o tamaitai ma tofiga o tamaitai ia i latou o alii.

Sa siomia a’u e tamaitai i lo’u olaga atoa. E toatolu o’u tuafafine. (E nao a’u lava le tama.) E toa 5 o’u afafine, 24 fanau teine a fanau, ma le 19 fanau teine a fanau a fanau. Ma, ioe, ua faamanuiaina a’u e ala i le 63 tausaga o le faaipoipoga i lo’u toalua, o Barbara. Sa ou aoaoina i aso ua leva e faalogo atu ia te ia. Sa ou aoaoina a faapea ua ia fai mai sa ia mafaufau e uiga i se mea po o le i ai o se lagona malosi e uiga i se mataupu e faatatau i le aiga, e sili loa ona ou gauai atu aua e toetoe lava o soo se tulaga sa musuia o ia. Ou te iloa e a’u lava ia ia lagona o tuafafine talavou matutua ma tina talavou i nisi taimi ma o nisi taimi e fesiligia ai lo latou taua faaletagata lava ia ma lo latou tomai e faasoa atu. Ae o a’u o se molimau pe a liliu atu o latou manatu ma tatalo i le lagi, o le a faamanuiaina i latou e ala i se malosi ma le talitonuga maumaututu e malamalama le Tama ma le Alo i o latou lagona.

E o mai tamaitai i le lalolagi ma meaalofa faaleagaga tulaga ese ma gafatia faalenatura. E faapitoa lava le moni o lenei mea pe a oo i fanau ma aiga ma le soifua lelei ma le faafaileleina o isi.

O alii ma tamaitai e eseese meaalofa, eseese malosiaga, ma eseese vaaiga po o manatu ma lagona. O se tasi lea o mafuaaga autu tatou te manaomia ai le tasi ma le isi. E manaomia se alii ma se tamaitai e fausia se aiga, ma e manaomia le alii ma le tamaitai e faataunuuina le galuega a le Alii. O le tane ma le ava o loo galulue faatasi i le amiotonu e faaatoatoaina e le tasi le isi. Ia tatou faaeteete e aua nei o tatou taumafai e faaleaga le fuafuaga ma faamoemoega a lo tatou Tama Faalelagi i o tatou olaga.

4. E maua e fanau uma a le Atua faamanuiaga o le perisitua.

Pe a malaga atu alii ma tamaitai i le malumalu, ua faaeeina ia i laua uma le mana lava lea e tasi, pe a faauigaina o le mana o le perisitua. Ona o le pule o le perisitua e taitaiina e ala i ki o le perisitua, ma o ki o le perisitua e na o alii agavaa e umiaina, o le mauaina o le mana ma faamanuiaga o le perisitua ua avanoa mo fanau uma a le Atua.

Na faamalamalama mai e Peresitene Iosefa Filitia Samita (1876–1972): “O faamanuiaga o le perisitua e le faapea e gata ai i na o alii. O nei faamanuiaga ua liligiina mai foi i luga o … tamaitai faamaoni uma o le Ekalesia. … O lo’o ofoina mai e le Alii i ona afafine meaalofa faaleagaga uma e mafai ona maua e ona atalii.’⁶

O i latou o e na ulu atu i le vai o le papatisoga, ma sa maua o latou faaeega paia i le maota o le Alii e agavaa mo faamanuiaga o le tamaoaiga ma le matagofie. … O le faaeega paia o se meaalofa moni lava o le mana.” O i latou uma o e ulu atu i le maota o le Alii e galulue i sauniga o le perisitua.

E agalelei lo tatou Tama o i le Lagi i Lona mana. E maua e alii ma tamaitai uma lenei mana e fesoasoani ai i o latou olaga. O i latou uma o e osia feagaiga paia ma le Alii ma e faamamaluina na feagaiga o le a agavaa e maua faaaliga faaletagata lava ia, ia faamanuiaina e ala i auaunaga a agelu, e fagatua ma le Atua, e maua le atoaga o le talalelei, ma mulimuli ane, ia avea ma suli faatasi ma Iesu Keriso i mea uma o i ai a lo tatou Tama.

5. E manaomia e le Ekalesia ia le siufofoga ma le faatuatua o tamaitai.

Tatou te manaomia le tele o le uunaiga tulaga ese ma le faatuatua o tamaitai. Matou te manaomia i latou e aoao le aoaoga faavae ma malamalama i mea matou te talitonu i ai ina ia mafai ona tuuina atu a latou molimau e uiga i le moni o mea uma—pe o le tuuina atu o na molimau i se tolauapiga a Tamaitai Talavou, i se sauniga molimau, i se lautusi tusitusi, po o le Facebook. Ua na o tamaitai faatuatua o le Au Paia o Aso e Gata Ai e mafai ona faaalia i le lalolagi pe faapei ia foliga ma talitonuga o tamaitai a le Atua ua osia feagaiga.

E le mafai e se tasi o i tatou ona tu i tafatafa ma matamata i faamoemoega o le Atua o faaitiitia lona taua ma tuleieseina. Ou te valaaulia faapitoa lava tuafafine o le Ekalesia e saili le taitaiga a le lagi i le iloaina po o le a se mea e mafai ona latou faia ina ia lagonaina ai o latou leo o le faatuatua ma molimau. E le mafai e le Au Pulega Aoao ma tuafafine o e o taitai aoao ona faia nao i latou. E le mafai e faifeautalai faamisiona ona latou faia na o latou. E le mafai e taitai perisitua ma taitai o ausilali ona faia na o i latou. E tatau i tagata uma ona puipuia lo tatou Tama oi le Lagi ma Lana fuafuaga. E tatau ia i tatou uma ona puipuia lo tatou Faaola ma molimau atu o Ia o le Keriso, o Lana Ekalesia ua toefuatai mai i le lalolagi, ma o loo i ai se mea faapea o le sa’o ma le sese.

Afai tatou te maua le lototele e tautatala atu ma puipuia le Ekalesia, e ao ona muai saunia i tatou lava e ala i suesuega o le upumoni o le talalelei. E tatau ona faamautuina a tatou lava molimau e ala i suesuega ma le filiga, i aso taitasi o tusitusiga paia ma e ala i le saunoa ai i le folafolaga a Moronae faapea e mafai ona tatou “iloa le moni o mea uma” (Moronae 10:5) pe afai tatou te saili atu i ai e ala i le tatalo ma le lotomaulalo ma suesuega.

Aua le faaaluina taimi e taumafai ai e toe mamanu pe fetuunai fuafuaga a le Atua. E leai so tatou taimi mo na mea. O se gaoioiga e leai se uiga le taumafai e sue se auala e faatulaga ai le Ekalesia a le Alii i seisi faatulagaga. O le Alii o loo i le ulu o lenei Ekalesia, ma tatou te mulimuli i Lana taitaiga. O alii uma ma tamaitai e manaomia le faatuatua faateleina ma molimau e uiga i le olaga ma le Togiola a lo tatou Alii o Iesu Keriso ma le malamalama faateleina o Ana aoaoga ma mataupu faavae. Tatou te manaomia mafaufau manino ina ia mafai ona aoaoina e le Agaga Paia i tatou i mea e fai ma mea e tautala atu ai. E tatau ona tatou manatu sa’o i lenei lalolagi o le le mautonu ma le lē amanaiaina o mea a le Atua.

Tuafafine, o le lio o au uunaiga o se lio tulaga ese—o se lio e le mafai ona ausia i se auala e tasi. E leai se tasi e mafai ona puipuia lo tatou Faaola mai ni isi faatauanau po o le mana nai lo oe, o afafine o le Atua,—o oe o loo i ai se malosiaga i totonu ma se talitonuga. O le mana o le siufofoga o se tamaitai liliu mai e le mafuatiaina, ma o le Ekalesia e manaomia lou leo ua sili atu nei nai lo se isi lava taimi.

Ou te tuua outou ma la’u molimau ma la’u tautinoga ua tatou i ai i se aso ma se taimi ua tatau ai ona tatou tutu i le lotogatasi—alii ma tamaitai, alii talavou ma tamaitai talavou, tama ma teine. E tatau ona tatou tutu atu mo le fuafuaga a lo tatou Tama Faalelagi. E tatau ona tatou puipuia o Ia. O loo ua tuleiesea o Ia. E le tatau ona tatou tutu vale o ni tagata o Le Ekalesia a Iesu Keriso o le Au Paia o Aso e Gata Ai ma faataga lena mea e faaauauina e tupu e aunoa ma le lototele uma e tuuina atu o tatou leo ia lagonaina.

Ia faamanuia tatou e le Atua ina ia maua le lototele e suesue ai ia upumoni faigofie o le talalelei ona faasoa atu lea i soo se avanoa e te mauaina.