Sa Ou Iloaina Le Mea e Tatau Ona Ou Faia
E alala le tusitala i le Itulagi Tutotonu, Uganda.
Afai ou te le faafitia le Ekalesia, e tatau ona ou tuua la’u aoga.
Ata na tusia e David Habben
Ou te alu i se aoga e pulea e se tasi o ekalesia i lo’u atunuu. I se taimi e lei mamao tele atu sa filifilia ai a’u e tamaiti o la’u vasega e avea ma fesoasoani i le vasega. I se tasi aso a o ou fuafuaina mea e aoao atu, sa ou tau ai i se tamaitusi o le Ekalesia e uiga i le tulafono o le ola mama. Sa ou filifili loa e aoao ai tamaiti o la’u vasega e uiga i le ola mama ma fesili atu i faifeautalai faamisiona mo tamaitusi, lea na ou tufaina i le taimi o le lesona.
Ina ua uma la’u lesona, na mananao le toatele o tamaiti e fiailoa atili e uiga i le Ekalesia, lea sa ou aoaoina ai i latou ma tuuina atu ia te i latou isi risosi a le Ekalesia, e aofia ai le Tusi a Mamona. Sa ou le iloaina e lei faatagaina lenei mea e le faiaoga sinia.
I se tasi aso sa ia valaauina au i lona ofisa ma fesili mai pe o le a le lotu ou te alu i ai. Ina ua ou tau atu ia te ia, sa ia fesili pe aisea ua ou tufaina atu ai le “Tusi Paia” a le Ekalesia i tamaiti aoga. Sa ou fai atu na ou tuuina atu na o ē na fesili atu i ai.
Ina ua mavae se saunoaga umi e uiga i le Ekalesia, lea sa ia faamanino mai ai na ia talitonu e le o le Ekalesia a le Atua, sa ia fai mai ai, “ou te iloa ua leai ni ou matua, ae ou te matua faamalie atu—e tatau ona e tuua la’u aoga aua o le a e faaliliuina le toatele o au tamaiti aoga lelei i lena ekalesia a oe.” Sa ia fai mai ia te au e filifili i le va o le Ekalesia ma la’u aoga.
Sa ia valaauina se tuufaatasiga ma ta’u atu i le aoga e le o toe faatagaina au i le aoga aua sa ou auai i le Ekalesia Mamona ma soo se tamaititi lava e mulimuli ia te au ua tatau ona alu ese.
Ina ua mavae le tuufaatasiga, sa ia fesili mai pe o le a la’u filifiliga: o laʼu ekalesia po o la’u aoga. Sa ou lagona le tau mai e le Agaga ia te au e tu atu mo mea ua ou iloa: ua toefuatai mai e le Alii Lana Ekalesia moni. Sa ou faasoaina atu la’u molimau ia te ia a o ou aluese. Sa ia fai mai ia te au e toe foi atu i le vaiaso na sosoo e piki mai se tusi e faaalia ai ua ou le toe auai i le aoga.
Ina ua ou sau i le vaiaso e sosoo ai, ua suia lona mafaufau! Ua na le toe tuliina a’u ma le aoga. Sa ou fiafia tele, aemaise lava ona sa ou tu mo le mea sa ou iloa e moni.
O lenei aafiaga na aoao mai ia te au ina ia tu i taimi uma mo mea ua tatou iloa e moni. O le a i ai lava pea le Alii iina mo i tatou. Pe ana faapea sa ou faafitia le Ekalesia, semanu e fai mai tamaiti aoga e le moni mea sa ou aoaoina, ae ua latou iloa i le taimi nei ou te iloa le mea moni.