Sa ou Tausia Fanau po o Fugalaau?
Paula Schulte, Misuri, ISA
A o laiti le ma fanau, sa matou siitia atu i se tamai fale ma se fanua matagofie. I itu uma o le faitotoa i luma sa i ai avanoa e lua mo le totoina ai o se togalaau, ma e ui ina sa faatapulaa lou malamalama i le faiga o togalaau, sa ou fiafia lava e toto ai fugalaau iina. Sa ou faatauina se tusi i le faiga o togalaau ma sa faatonuina tusiata o laau ma fatulaau ma suesue i ai ma le faaeteete.
I nai masina na sosoo ai sa ou fuafuaina ai la’u togalaau, saunia le eleele, ma totoina le sili atu ma le 200 fatu. Sa ou iloaina o ni nai masina o le a ou faatoa vaaia ai soo se taunuuga, ae sa ou siakiina lava le togalaau mo le tuputupu ae. I le amataga o le tautotogo sa amata ai ona fotu ae fugalaau, amata i tamai alise lanu viole ma sosoo ai ma daffodils. E oo atu i le ogatotonu o le tautotogo ua faatumulia a’u pusa fugalaau i se faaaliga ofoofogia o tulipe. Sa ou fiafia i la’u togalaau, ma e masani lava ona ou nofo ai i le faasitepu pito i luma tau lava ina ou vaai atu i fugalaau.
I se tasi aoauli sa sau ai se uo a le ma afafine e fa tausaga o Emily la te taaalo. A o lei sau lona tina e piki atu, sa tauivi teineiti e o atu i le faitotoa o le umukuka, o la lima ua tumu i faupuega tulipe. “Vaai i mea ua ma aumaia mo oe, sa la faimai ai ma le fiafia. Ua la tauina toetoe lava o fua uma.
O tulipe e na o le faa tasi i le tausaga ona fotu ae. Sa nutimomoia lo’u fatu—le tele o galuega, o le faatalitaliga umi. Sa matou faatumuina a’u meatuuteu i fugalaau ae alu le uo a Emily i le fale ma le vaega na totoe. Mulimuli ane, ina ua ou faasea atu i lo’u tina e uiga i le faalavelave, sa ia fai mai, “Ia, o le mea e lelei ai o loo e tausia fanau ae le o fugalaau.”
Sa ou iloaina e tatau ona ou suia la’u vaaiga mamao. Sa ou manatuaina le pese Peraimeri sa ou pesepese ai ma a’u teineiti e uiga i le aoina mai o fugalaau:
Tina pele, o fugalaau uma e faamanatu mai ia te au oe.
E, tina, ou te tuu atu lo’u alofa ma fugalaau taitasi.1
Sa ou vaai i le faaleagaina o la’u togalaau, ae o teineiti e toalua e tai fa tausaga le matutua sa vaai i se gaoioiga o le alofa.
O le totoina o se togalaau o fugalaau na manaomia ai le onosai, ma o le laa i tua ma vaai atu i lenei mea na tupu e ala i mata o la’u tama na manaomia ai le onosai sili atu. Ae o le aoaoina o le onosai o se tina na tataiina atu a’u e latalata atili ai i le Alii.
Sa tauivi teineiti e o mai i le faitotoa o le umukuka, o o la lima sa tumu i faupuega tulipe. “Vaai i mea ua ma aumaia ma oe,” sa la fai mai ma le fiafia.