Savali a Faiaoga Asiasi
O Le Misiona Paia a Iesu Keriso: Faamafanafana
Ia suesue ma le agaga tatalo lenei anomea ma saili ia iloa mea e faasoa atu. E faapefea e le malamalama ai i le soifuaga ma matafaioi a le Faaola ona faateleina ai lou faatuatua ia te Ia ma faamanuiaina ai i latou o loo e leoleoina e ala i faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
Ata na tusia e Sarah Carabine Jenson
Na folafola mai e Iesu Keriso “Ou te le tuua outou o matuaoti; ou te sau ia te outou” (Ioane 14:18). O le a ia tuuina mai ia i tatou le “matagofie e sui a’i le lefulefu, o le uu o le olioli e sui ai le faanoanoa” (Isaia 61:3). Talu ai ona o Keriso na tigaina i le Togiola mo i tatou taitoatasi, o le a Ia le faagaloina lava i tatou. “Ua tauaveina e lo tatou Faaola i ona Lava luga … e faapefea ona faamafanafanaina i tatou, o le tala lea a Linda S. Reeves, fesoasoani lua i le au peresitene aoao o le Aualofa.1
O le iloaina o le a faamafanafanaina i tatou e Keriso o le a mafai ona aumaia ia i tatou le filemu ma musuia ai i tatou e mulimuli i Ana faataitaiga e ala i le auauna atu i isi. Na saunoa mai Peresitene Thomas S. Monson: “O lo tatou iloa o le talalelei ma lo tatou alofa i lo tatou Tama Faalelagi ma lo tatou Faaola o le a faamafanafanaina ma lagolagoina ai i tatou ma aumaia le olioli i o tatou loto a o tatou savavali ma le amiosao ma tausi i poloaiga. O le a leai se mea o lenei lalolagi e mafai ona manumalo ia i tatou.”2
Mai Tusitusiga Paia
Ioane 14:18, 23; Alema 7:11–13; Mataupu Faavae ma Feagaiga 101:14–16
Mai lo Tatou Talafaasolopito
Na faapea mai Elaine L. Jack, o le peresitene aoao lona 12 o le Aualofa: “O le faia o faiaoga asiasi tatou te aapa atu i isi. E masani ona talanoa atu e lima mea e le mafai e le leo. E anoanoai mea e faaalia e ala i se opo mafanafana. O le talie faatasi e tuufaatasia ai i tatou. O se taimi o fefaasoaa’iga o lagona e maua ai le faafouina o agaga. E le mafai i taimi uma ona tatou si’iina ese le avega a se tasi o lē mautonu, ae e mafai ona tatou sii a’e ia ina ia mafai ona ia taulimaina lelei.”3
O o tatou uso a Aualofa paionia “na latou maua le malosi faaleagaga i le alofa ma le agalelei o le tasi i le isi. … A o latou mafatia i tofotofoga o ma’i ma le oti, sa latou tatalo i le faatuatua mo le tasi i le isi ma fefaamafanafanaa’i. ‘Sa tafe mai le alofa o le Atua mai le loto i le loto,’ na tusia ai e Helen Mar Whitney, ‘seia faavaivaia le amioleaga i ana taumafaiga e oo mai i lo tatou va ma le Alii, ma o ana u fanafana mataga, i nisi taimi, ua leai se tiga o latou tui.’”4