O Anomea a le Ekalesia — i le Lolomi po o le Faaeletonika?

Ata

A man with a smartphone.

Sa tilotilo ifo i lalo le tamaloa i ona lima. Sa ia faagaoioia ona tamatamailima. O na lima e mafai ona faia mea e tele. Toe lipea se paipa ua pa. Fausia se laulau. Taitai atu ai lona faletua i le isi itu o le fola siva i le pao ma le sitaili.

Ona ia vaai atu lea i le telefoni poto na ia faatauina talu ai nei. E mafai e ona lima ona faia le tele o mea. Ae e mafai ona faia e ona limamatua … lena mea?

Sa taatitia ana tusi lesona o le Aoga Sa ma tusitusiga paia ua loa ona faaaoga i autafa o le telefoni. Oka sona fiafia i na tusitusiga paia! Na te fiafia i le pai atu o le pepa i lona lima. O faamatalaga tusilima uma. O le tulaga faigofie o ia faamatalaga.

Ae sa ia manatua le aoao mai o Elder Richard G. Scott faapea o le i ai o tekinolosi ua mafai ai ona e aveina ia tusitusiga faavae ma isi mea e sili atu i lau taga.¹ Sa ia pai atu i tusitusiga paia ua matafi le pa’u. Sa ia tautino atu na te lei aveina soo ia tusitusiga paia i le vaiaso atoa.

Ae o le isi aso sa faaaoga ai e le atalii o lona atalii lana telefoni e faasoa mai se laina mai se tasi o saunoaga mai le konafesi e fiafia i ai. I lena taimi, sa latou o i ai i se tietiega i le po o le Aso Faraile.

E le tele ni taimi o lenei tamalii i le aso e suesue ai. Ae peitai, e mafai lava ona ia faaofiina i totonu se 5 minute i i, 10 minute iina. Sa manao foi o ia ia maua mea uma sa ofoina atu e le Ekalesia faaeletonika.

Sa tuitui mai le faitotoa i luma. “Ei, Tamamatua!” fai mai le atalii o lona atalii. “Ua e sauni e amata?”

Sa uu mai e le tamā lana telefoni poto. Atonu o le a le felelei ona limamatua e pei o limamatua o lana fanau ma fanau a fanau. Ae atonu e le manaomia.

“E te iloa a,” na fai mai ai le tamaloa. “Aoao mai au!”

A o faaauau le vaiaso, sa tele mea na iloa e le tamaloa e uiga i mea sa aoao ai o ia e le atalii a lona atalii: e faapea o le lalolagi faatekinolosi e …

Aoga. “E i ai nisi mea, e pei o le vitio ma otio, lea e le mafai ona e maua i tusiga. E maua faaeletonika mea uma i se nofoaga e tasi. E mafai foi ona e aveina ma faasaoina faamatalaga i le ala.”
Auiliili. “E pei o se potutusi tele. E mafai ona e aveina lomiga a le Ekalesia i le lima e tasi ma suesue i ai i soo se mea.”
E Mafai ona Sailia. “E mafai ona fesoasoani vaega e saili ai ina ia vave ona maua mea o loo e sailia.”
E Mafai ona Faasoaina. “Afai e te fiafia i se mea, e mafai ona e faasoa atua. O se auala faigofie e faasoa atu ai le talalelei.”
Vave. “E te le tau manaomia ona faatali mo le utaina. Ma e le manaomia ona e sailia se nofoaga e tuu i ai mea uma.”
Taugofie. “E leai se tupe e te totogia ia maua ai anomea faaeletonika a le Ekalesia; ma o le toatele o tagata ua filifilia tekinolosi, o le tele foi lea o tupe sefe a le Ekalesia i le lolomiina, meli, ma suegaoloa.”

O le a la le mea a lenei tala e faatatau ai ia te oe?

Ua toeitiiti lava o anomea o loo lolomiina mai le Ekalesia o loo maua foi i le LDS.org po o le polokalama feaveai o le Potutusi a le Talalelei. O le faaaogaina o tekinolosi e le faapea o le a le matua faaaoga ai au tusi ua uma ona lolomiina—e i ai lava taimi ma nofoaga o mea uma i lou olaga, ae ao e sauniuni mo le mataupu aoaoina o le tausaga a sau, mafaufau e iloilo po o fea punaoa faatekinolosi e talafeagai mo oe.

I mea uma lava, aua e te fefe e faia se oso maualuga i le tulaga faatekinolosi. O le a i ai pea se tasi e faasino atu ia te oe le auala.