E Faapefea ona Aoao Moni
Ia aoaoina nai lo le na ona uma o le aoga.
Ata na tusia e Alex Westgate
“Ia maua se aoaoga lelei.” Atonu o le fautuaga sili ona taatele lea o loo i ai mo le autalavou.
Ae e oo lava i totonu o i latou o e gauai atu i lenei fautuaga, o nisi e foliga mai e tele mea o loo latou mauaina mai i a latou aoga nai lo isi—ma tatou te le o talanoa e uiga i togi po o tikeri po o galuega. O le a la le eseesega i le va o le tagata e moni lava “lona a’otauina” ma le tagata faatoa “faauma ana aoga”?
E le tele se faia ma le tomai masani nai lo le faatasi ai ma ni mea e ave i ai le faamuamua, uiga faaalia, ma le tomai, e pei o mea nei.
Mea e faamuamua
1. Saili le aoaoina faaleagaga. Ina ia mautinoa ai lo outou manuia silisili, mulimuli i fautuaga a Peresitene Henry B. Eyring, Fesoasoani Muamua i le Au Peresitene Sili:
“O lo tatou uluai faamuamua e tatau ona alu i aoaoga faaleagaga. …
“… O le faamuamua o le aoaoina faaleagaga e le faapea o le a tuu ese ai tatou i le aoaoina o mea faaletino.” I le isi itu, e tuuina mai e lo tatou aoaoina i le faaletino le faamoemoe ma uunaia i tatou e galulue malosi atu i ai.
“Ina ia tuuina le aoaoina faaleagaga i lona tulaga talafeagai, o le a manaomia ona tatou faia o ni filifiliga faigata i le auala tatou te faaaogaina ai o tatou taimi. Ae e le tatau lava ona i ai se filifiliga e faia ma le iloa e tuu ai le faaleagaga e avea ma lona lua. E lei faia lava. O le a taitai atu ai i faalavelave.”1
2. Saili le paleni. O le paleni o lona uiga e manino lava le iloa o au mea e faamuamua. O le faia o le paleni lava ia o se mea e faamuamua e mafai ona fesoasoani ia te oe e tausia mea ia sa’o. Na saunoa mai Elder M. Russell Ballard o le Korama a Aposetolo e Toasefululua: “Ia manatua, o le tele lava o soo se mea i le olaga e mafai ona aafia ai lo tatou olaga paleni. O ia lava taimi, o le itiiti tele o mea taua e mafai ona faia ai le mea lava lea e tasi.”2
3. Ia lava lau moe. Atonu e foliga pei o se mea itiiti, ae o le lava o lau moe o le a faia ai se eseesega tele—ma e mautinoa ai lou le taumafai e tau aumai ni auala e ala ai i le vasega. E tele suesuega ua faamautuina ai le taua o le lava o le moe mo le aoaoina, ae e toatele tagata e ositaulagaina mo le tele o isi mea (e masani lava o faafiafiaga). Ia mautinoa o loo i luga o lau lisi o mea e faamuamua. (Ae ia aua nei soona faia; tagai i le numera 2 o loo i luga ma le Mataupu Faavae ma Feagaiga 88: 124.)
Uiga Faaalia
1. E te nafa ma lau aoaoga (e aofia ai lou toilalo). Ua e iloa ni talavou o loo faalagolago lava i le fesoasoani a a latou matua ia latou meaaoga ma galuega faatino uma? po ai na te faamalamalamaina atu ni togi lē lelei i le faapea mai, “E ita le faiaoga ia te au”? pe e ala i le tuuaia o isi tulaga? Ia e nafa ma au aoaoga. O le a e maofa i mea o le a e aoaoina ma o le a tele atu lou fiafia .
2. O le maua ai o togi lelei e le tutusa ma le aoaoina. Aua nei e faaluafesasiina le faailoga (togi) faatasi ma le mea e faatatau i ai (aoao ma taumafaiga). E ui o togi o ni faavasegaga e taua, manatua o le malamalama ma le tomai e te maua e sili atu ona taua nai lo soo se togi, pe maualuga pe maualalo. Faatasi ai ma lenei uiga, o le a sili atu ona faamalieina oe i au togi.
3. O lou taua faaletagata lava ia e le tatau ona fesootai atu i mea mai fafo e pei o taui, togi, ma tikeri. Afai e te malamalama i faavae o lou taua faaletagata lava ia o se atalii/afafine o le Tama Faalelagi, o le a mafai ai ona e fiafia pe oo mai pe leai ni taui mai fafo i au taumafaiga. Taumafai ia faia lelei ma ia ausia au sini faaleaoaoga, ae aua nei faatagaina ni taui e faauigaina oe.
4. O le galue malosi e sili atu ona taua nai lo “le atamai.” E tusa lava pe e te manatu o ou tomai faalenatura e faafaigofie atili ai le aoga mo oe nai lo mo isi, ae e tatau ona e vaai i ou faamanuiaga o se taunuuga o le galue malosi nai lo nisi o meaalofa sa e fanau mai ma oe. Ma afai e le faigofie ona oo mai mea ia te oe, aua le fiu—o le galue o le a faia ai le eseesega. O lenei uiga faaalia o le a auauna lelei ia te oe i eria uma o le olaga, aemaise lava a o e agai ese atu mai le aoga i le lalolagi o galuega. E leai ni auala pupuu i le aoaoina moni—e le mafai ona e faafoligaina lou ala i le olaga.
5. Ua tele mea ua uma ona e iloa, ae e te le iloa mea uma. Faafesootai mea eseese uma o loo e aoaoina. Ae aua e te alu i soo se tulaga ma le manatu ua e iloa mea uma—e leai se tasi e mafaia. O lena uiga faaalia o se pa pupuni i le aoaoina.
6. O le aoaoina o lona lava lea taui. E toatele tagata e talanoa e uiga i le aoga o se auala e oo i se iuga—o se auala e o’o ai i luma i le olaga, maua se galuega lelei, ma isi mea faapena. E ui atonu e moni, e moni foi o le a e fiafia atu ma aoao atili ai pe afai e te tagai i le aoaoina o se sini ia te ia lava. Aua nei avea ma se tasi e na o le fesili faapea, “Mata e i ai lenei mea i le suega?” po o le “O afea ea o le a toe faaaoga ai lenei mea?”
7. Aua nei matamumuli mai luitau ona e pei o loo i ai se avanoa o le toilalo. O le tele o lou naunau e faia mea faigata i le taimi nei, o lou saunia sili foi lea e fetaiai ma mea e oo mai i se taimi mulimuli ane. Mo se faataitaiga, o tagata o e filifili a latou vasega uma e fua i le pe e faigofie ua le faaaogaina atoa ona gafatia ma atonu o le a natia ai a latou taleni.
8. Ia i ai le fiailoa. O le a tele mea e te aoaoina pe afai e ia te oe le fiailoa ma faia ni fesili. E le gata i lea, o le fiafia i mea o le a avea ai oe ma se tasi e sili ona fiafia i ai tagata. Manatua, o le aoaoina e tupu i taimi uma, i soo se mea, e le na o le aoga.
9. E mafai ona e faia. O loo i ai se eseesega i le va o le faigata ma le le mafaia. O lou ala i le aoaoina atonu e faigata, ae e mafai ona e faia. O le aoaoina o se tasi o mea ua e i ai iinei i le lalolagi e fai.
Tomai
1. Aoaoina mea e te fiafia i ai; fiafia i mea ua e aoaoina. Vaavaai mo mea moni e faafiafia ai ma e te fiafia i ai, ma tulimatai atu i ai. Ae ia aoao foi i le auala e iloa ai le taua i mea uma o loo aoaoina ai oe.
2. Faitau e fiafia ai. I aso uma, faitau i se mea e lelei: o tusi, o mekasini, o uepi saite, o soo se mea e aoaoina pe musuia ai. O i latou e faitau i mea lelei sili e masani ona lelei i le aoga ma ola i ni olaga faatamaoaigaina.
3. Gauai atu i le ala e te taulimaina ai le atuatuvale. O le nofouta i vaega e te atuatuvale ai, ma le iloaina o metotia e faaitiitia ai le atuatuvale e sili ona lelei mo oe o ni tomai taua nei o le olaga.
4. Fesili atu mo se fesoasoani pe a e manaomia—ma fesili atu i tagata e mafai moni ona fesoasoani. Pe talitonu i ai pe leai o le fesili atu mo se fesoasoani, o se tomai. O le iloaina pe a o e paulia ma le mauaina o le fesoasoani lelei a o lei tuai e mafai ona faia ai se eseesega tele.
5. Pulea lou taimi. O le puleaina o le taimi o lona uiga ia faamautinoa o mea e te tautala ai o au faamuamua moni o au faamuamua ia. Saili se faiga e talafeagai ma oe ma o le a fesoasoani ia te oe e ausia au sini.