O Le Mafuaaga Ou Te Fiafia ai i le Tusi a Mamona
Steve Rahawi, Kalefonia, ISA
Ua toeitiiti 30 tausaga talu ai sa ou tietie ai i Iuta mo le taimi muamua.Sa ou ola i se olaga matuai le kerisiano lava ae ua manao e sui. Ou te matuā le iloa pe faapefea.
O le afiafi o lo’u aso lona lua i Iuta, sa ou tu ai i se faletalimalo i se tamai taulaga i Iuta i saute. A o tuuina mai e le tamaitai i le ofisa ia te au le ki o le potu, sa ou fesili atu pe o ia o se Au Paia o Aso e Gata Ai. Sa ia tali fiafia mai, “Ioe, o lea lava.” Sa ataata fiafia ma ia faaopoopo mai, “Ua e faitau i le matou tusi matagofie, le Tusi a Mamona?” I lo’u te’i ma le faatosinaina, sa ou fai atu ou te lei faitauina.
“O loo i ai se kopi i lou potu, sa ia faaauau ai. “E leai se mea matagofie mo oe iinei i le taulaga, o lea e lelei ona e faamasani loa i lenei tusi matagofie.”
Sa ou faafetai ia te ia ma ave la’u atopau i lo’u potu. Ina ua ou taunuu atu na ou vaaia se faavaa vaivai mumu paauli ua faaulutalaina o le Tusi a Mamona i luga o le laulau.
Na ou susueina le tusi e lata ane i le ogatotonu ma faitau ni nai fuaiupu, ae sa matuai nimo i lo’u mafaufau. Ou te lei malamalama i se mea. I lo’u le fiafia, sa ou tuu i lalo le tusi ma tuua lo’u potu, lagonaina o le leai o se faamoemoe. Sa ou tietie solo seia o’o ina ou maua se pa pia—o se nofoaga pogisa, ma le auleaga. Sa ou alu i totonu ma lagonaina i lena lava taimi le faanoanoa, tuua toatasi, ma leai se faamoemoe. Sa ou tu ai iina mo ni nai minute ona faliu lea ma savali atu i fafo, ma se faanaunauga e le toe faamaumauina lava sina taimi o lo’u olaga i soo se pa pia.
O le toefaafouina, sa ou toe foi atu i lo’u potu o le faletalimalo ma piki i luga le Tusi a Mamona. Sa ou tootuli i luma o le Alii, na laititi sou iloa e uiga i ai, ma aioi atu ia te Ia ina ia alofa mutimutivale ia te au. Sa ou aioi atu ia te Ia e faamagalo mai au i le gaogaosa uma na ou faia i lo’u olaga ma fesoasoani mai ia te au ia malamalama i mea na ou faitauina i le Tusi a Mamona, ia iloa po o Iosefa Samita o se perofeta moni, ma ia iloa pe o le Ekalesia Mamona e mo a’u.
Sa ou susueina ma le migao le tusi ma faitauina le fuaiupu muamua sa ou vaaia: “Ou te olioli i le manino; ou te olioli i le upumoni; ou te olioli i lo’u Iesu, ona ua togiola e ia loʼu agaga mai seoli” (2 Nifae 33:6). Na mu lo’u loto ma tafe ifo o’u loimata. Na tu matilatila mai upu ma se malamalama matagofie o le faamoemoe—o se malamalama o Iesu Keriso o loo faailo mai ia te au e sau ia te Ia.
I lou tagi lotulotu, sa ou toe tootuli i le tatalo, aioi atu i le Alii e taitai atu a’u. Ona ou toe tatala lea o le tusi ma amata ona faitauina le mataupu muamua o le 1 Nifae. Na faatumulia au i le maofa i le mana le mafaatusalia, mama aiai, ma le moni o upu ma le molimau a Nifae. Sa ou faitau seia oo i le 2:00 i le taeao na sosoo ai, na tatalaina e le Alii lo’u malamalama a o ou faitau.
E ono masina mulimuli ane ua ou papatiso o se tagata o lenei Ekalesia matagofie ma le moni. Ou te iloa na faamanuiaina a’u e le Alii e saili ma faitau le Tusi a Mamona—o le tusi lea na faatuina lo’u faatuatua ma la’u molimau ia Iesu Keriso.
I lo’u potu o le faletalimalo na ou vaaia se faavaa vaivai mumu paauli ua faaulutalaina o le Tusi a Mamona.