Tatalo Faapei o Alema mo La’u Uo
E alala le tusitala i le Itumalo Feterale, Pasila.
“Ma sa faia lenei mea ona sa tatalo o ia i le faatuatua” (Alema 31:38).
Na ma o ma la’u uo mamae i le lotu i le lua vaiaso ua tuanai. Ae ina ua ou toe valaauliaina o ia, sa ia fai mai ma te le toe o. Sa fia manao ia ina ia maua se faaiuga fiafia o le vaiaso e ala i le moe umi ma auai atu i ni mea faafiafia. Sa ou taliaina lana tali, ae o totonu sa ou faanoanoa ona sa ou manao lava ia te ia e sau ma lagonaina le Agaga ma aoao mai le Atua. Ina ua ou taunuu i le fale, sa ou alu i lo’u potu ma tatalo ai, ta’u atu i le Tama Faalelagi o o’u faanoanoaga, ma ole atu mo Lana faamafanafanaga ma le taitaiga.
Ina ua uma la’u tatalo, sa ou alu atu i le umukuka e fufulu ipu. Na fai mai lo’u tama pe ma te toe o ma lau uo i le lotu i le aso na sosoo ai. Ina ua ou ta’u atu ia te ia mea na fai mai ai la’u uo, sa iloa e lo’u tama sa ou popole ma faanoanoa. Pau lava lana tala na fai mai, “Ua e faia lau vaega. Ua i ai i le tagata lo latou faitalia. Ua e totoina se fatu.” O upu o le faatuatua a lo’u tamā na aumaia ai le filemu i lo’u loto.
I le sauniuniga mo le Aoga Sa, sa ou faitau ai le Alema 30–32. I le mataupu e 31, na tatalo ai Alema i le Alii ma lona loto atoa mo ona uso sa Soramā, o e na teenaina ala o le Alii, ma amata ona pauu atu i mea sese. A o ou faitauina ana upu, na pai mai le Agaga ia te au, ma sa musuia a’u ia tatalo foi.
Na ou tootuli ma ofoina atu se tatalo e pei o Alema mo la’u uo mamae. E pei o Alema, sa ou ole atu i le Tama Faalelagi “ua pele lava [lona agaga], ma [o ia o lo’u uso]; o lea, ia tuu mai ia te [au], Le Alii e, le mana ma le poto ina ia mafai ona [ou] toe aumai [o ia, o lo’u uso], ia te oe” (Alema 31:35).
O le aso na sosoo ai sa ou sauni i le lotu, ma le iloa o le a ma le o ma la’u uo. E ui i lea, sa ou maua le filemu i lo’u loto ona, faapei o Alema, sa ou tatalo i le faatuatua. A o ou tuua le fale mo le lotu, sa ou maua se valaau mai la’u uo. Sa ia fesili mai pe ua ou tuua le fale, ma pe mafai ona ou tu atu e piki mai o ia. Na matou maua se sauniga matagofie i lena Aso Sa, ma ou te iloa sa molimau atu le Agaga o le upumoni ia te ia.
Ou te iloa e le na o la’u uo le tagata na faamanuiaina ai i lena aso ona o le Tusi a Mamona ma le tatalo o le faatuatua. O la’u lava molimau e uiga i le Alii ma lenei tusi sa faamalosia, ma o lena molimau na taitai atu ai au e auauna atu i se misiona ma ua mafai ai ona ou molimau atu i le moni. Ou te iloa o le Tusi a Mamona e aumaia ai i tatou e latalata atili atu ai i le Atua, o loo aoao mai ia i tatou ia o mai ia Keriso, ma o Ia o le a faasaoina ai o tatou agaga.