Tatala Lau Tusi a Mamona

Eduard Mayer, Auseteria i Luga, Auseteria

I le avea ai ma se tasi o le aufono a fautua maualuga a le Siteki o Vienna Auseteria, ou te auai i se uarota i Viena e faatasi i le masina. Talu ai ou te nofo e 120 maila (190 km) mai Viena, e masani ona ou tietie i le nofoaafi e oo atu iina.

I se tasi Aso Sa, ina ua ou foi mai i le fale mai le asiasiga i le uarota, sa ou iloaina ma lou faanoanoa e le o ia te a’u la’u atotupe. Sa ou popole aua sa ou le mautinoa pe ua leiloa la’u atotupe pe ua gaoia. I la’u ato tupe sa i ai se vaegatupe laitiiti, o la’u pepa faataga o le malumalu, se kata fai faatau, ma isi kata taua.

O le aso na sosoo ai sa faigata ona ou taulai atu i le galuega. Sa ou fesili pea lava pea ia te a’u lava, “O le a le taimi mulimuli sa ou faaaogaina ai lena atotupe? Na ou tuua I se mea?” Sa ou telefoni i leoleo, le nofoaga o nofoaafi, ma le epikopo o le uarota sa ou auai. Sa leai se tasi na mauaina. Sa ou tatalo foi, ma o a’u tatalo sa faateleina i le faasologa o le aso. Sa ou le moe lelei i lena po.

Ao faia a’u talosaga o le taeao i le aso na soso’o ai, sa ou lagonaina se uunaiga malosi faaleagaga e tatala la’u Tusi a Mamona ina ia mafai ona maua ai le tali i lo’u faafitauli. Sa vave ona ou le amanaiaina le lagona ona e leai ni tusitusiga paia o le Tusi a Mamona e i ai se mea e fai i la’u atotupe na leiloa.

Sa faamalosia au e le lagona: “Aisea e te masalosalo ai? O le faatuatua e tupu ai vavega! Tau lava ina tatala le tusi. O le mau muamua e te faitauina o le a e mauaina ai le tali i lou faafitauli.”

Sa ou le ano i lenei uunaiga aua na ou mafaufau e le mafaia. Ae sa tauina se taua faigata o le lagona i lo’u loto ma manumalo ai. Sa ou tu i luga, alu i la’u kesi, ma piki i luga la’u Tusi a Mamona.Sa tatavale lou fatu i le tulimatai atu. Ou te lei susueina se itulau i luma po o tua. Sa na ona ou susueina lava o le tusi ma faitau le Iakopo 3:1: “Tepa taulai atu i le Atua ma le mausali o le mafaufau, ma tatalo atu ia te ia ma le faatuatua tele, ma o le a ia faamafanafanaina outou i o outou puapuaga, ma o le a ia aioia a outou tagi.” Sa lofituina a’u ma sa le mafai ona toe faitau.

O le a aioi atu le Alii mo loʼu faamoemoe! Sa ou alu i le galuega ua lagona lelei ma faamafanafanaina. I le ta o le 11 i le taeao, sa ou maua ai se valaau mai le leoleo o tulaga nofoaafi na logoina mai a’u na aveina atu i totonu la’u atotupe. I se aso mulimuli ane, sa ou maua ai la’u atotupe. E leai se mea na aveina.

Sa faamafanafanaina au e le Alii i oʼu puapuaga. Sa ia lagolagoina loʼu faamoemoe. E ala i le Tusi a Mamona na taliina ai e lo’u Tama Faalelagi a’u tatalo i se auala tuusao, faaletagata lava ia. Ou te fiafia lava i le Tusi a Mamona, ma ina ua mavae lenei aafiaga, ua avea ma mea ua sili atu ona taua ia te au.

Ao faia a’u tatalo i le taeao, sa ou lagonaina se uunaiga malosi faaleagaga e tatala la’u Tusi a Mamona ina ia mafai ona maua ai le tali i lo’u faafitauli.