Pe a Mananao Au Uo ia Iloa pe Aisea
O le lelei o lou malamalama i isi, o le lelei foi lea ona e fesoasoani ia i latou ia malamalama i ou tulaga faatonuina.
I le avea ai ma se talavou e 17-tausaga i Arisona, ISA, e masani ona faamatala e Kathy R. i tagata o lona aiga lautele ni mea faapitoa e faia e le Au Paia o Aso e Gata Ai—pe le faia foi.
“Ou te manatua le talanoa atu i le uso o lo’u tina i se tasi taimi,” o le tala lea a Kathy. “Sa ia fai mai, ‘E le faatagaina e la outou ekalesia outou e ulaula pe inupia, e sa’o lea?’ Sa ou tau atu ia te ia o loo aoaoina e le Ekalesia o le inupia ma le ulaula e le lelei ae ua tuuina mai ia te au e le Tama Faalelagi le saolotoga e filifili ai, ma o le iloaina o mea ua ou iloa, ua ou filifili ai e aua nei ulaula pe inupia.”
Na fai mai Kathy faapea i lona tulaga o se tali lelei atu lea nai lo le faapea atu, “O le ulaula ma le inupia e tetee atu i ou tulaga faatonuina,” e ui o nisi taimi atonu o se tali talafeagai lelei lava lea.
“E manatu le uso o lo’u tina o le lotu e faamalosia tagata ina ia usiusitai, o lea ina ua ou faamalamalama atu faapea e i ai le tatou faitalia, sa matua fiafia tele i mea na ou fai atu ai,” o le tala lea a Kathy. “Ina ua ou faamatala atu sa ou faatuina ni sini patino mo au lava ia e lē ulaula pe inupia po o le ava malosi, sa ia naunau e lagolagoina a’u.”
O Le Avea o le Tausiga ma se Vaega o le Faasoa Atu
Pei ona faaalia i le aafiaga o Kathy, atonu o le a faigofie atu mo oe le faamalamalamaina o tulaga faatonuina o le Ekalesia i isi pe afai e te amata i le fesili ifo ia te oe pe o le a se mea ua e iloa e uiga i tagata o loo e talanoa faatasi i ai. O le a se mea o uunaia ai a latou fesili? Pe na o na latou fia iloa lava e uiga i mea ua e talitonu i ai? O latou faia ni fesili tuusao ma le sailia o se tali tuusa’o, pe o latou le mautonu, ma faamoemoe o le a e malamalama i le latou vaaiga ae le o i ai se naunauga e faatuatuaina au fautuaga? O a ni mea latou te fiafia e faalogo i ai?
Atonu e mauaina se manatu po o lagona mai le Agaga e uiga i mea e ono fesoasoani ai ia i latou. Afai e i ai, mulimuli i le uunaiga. E te le tau faalauiloa atu i se lauga i le sauniga o le faamanatuga po o le auai i se finauga faale-aoaoga faavae. Ia talatalanoa faasamasamanoa. Na ona faamalamalama atu o sini faaleagaga o loo i ai mo oe lava ma pe na faapefea ona e atinaeina i latou.
Ia manatua, e matua talafeagai lelei le faailoa atu ia te i latou atonu o le a le maua atu ia te oe tali uma, ae e mafai ona e folasia atu latou i isi, e pei o faifeautalai, e mafai ona fesoasoani ia i latou e maua ai le mea o loo latou sailia.
Ia manatua, e le o faatatau i mea e te manao e tau atu; e faatatau i mea ua latou saunia e faalogo i ai. Ia faatagaina se avanoa mo oulua uma e faailoa atu ai ou lagona ma na ona faasoa atu mea e te talitonu ai. I aofia ai lau molimau pe a talafeagai ma faatagaina le Agaga Paia e molimau e uiga i le upumoni. O le auala sili lena e fesoasoani ai i isi ia malamalama o a tulaga faatonuina ma pe aisea e te mulimuli ai ia i latou. (Tagai 1 Nifae 10:17–19.)
O Le Faataitaiga o le Ola ai i le Talalelei
O Laurent B. o Farani na manatua le lagona o le avea ai ma tagata o le na faia ni fesili. Ao avea ai ma se talavou 15 tausaga le matua o auai i sauniga a le Ekalesia mo le taimi muamua, sa faagaeetia o ia i le fiafia o tagata o le ekalesia, ae maise lava le autalavou.
“Sa tele lava a’u fesili,” o lana tala lea. “E le pei o tamaiti aoga i la’u aoga, latou te lei ulaula pe inupia ma sa faaalia e alii talavou ma tamaitai talavou le faaaloalo tele o le tasi mo le isi. Na foliga mai o tagata uma na i ai se lagona o le taitaiga ma le faamoemoega, ma na matuai manaia lava lena mea ia te au.”
Na ia faauo ma Jean-Michel L., e 16, ma lona tuafafine, o Eva, e 14. “Sa la faamalamalama mai faapea o le Upu o le Poto e maua ai mataupu faavae mo le ola soifua maloloina,” o le tala lea a Laurent. “Na la faasoa mai o laua lagona e uiga i le ola mama ma faamalamalama mai o se poloaiga mai le Tama Faalelagi, lea e finagalo ia i tatou ina ia avea ma tane ma ava faamaoni mo le faavavau.
“E le gata ina sa laua faamatalaina o laua tulaga faatonuina ia te au, ae sa ou muai vaaia lo la ola ai i mea na la talitonu i ai,” o le tala lea a Laurent. “Pe a e tausia poloaiga e te fiafia, ma o lou fiafia o le a fesoasoani i tagata e mananao e fia iloa pe aisea e te ola ai i lena auala.”
O aafiaga o Laurent na aoaoina ai o ia faapea o le taulotoina o se vaega o tali masani, e le o le auala sili lea e faasoa atu ai mea ua e iloa. O le auala sili lava o le ola i mea ua e talitonu ai. Ona e pei ona fai mai tusitusiga paia, “ia saunia pea lava outou e tali atu ma le agamalu ma le matau ia i latou uma o e fesili mai ia te outou i le uiga o le faamoemoe o loo ia te outou” (1 Peteru 3:15).
Lesona i Aso Sa
O Le Autu o le Masina Lenei: O Poloaiga