E faapefea ona ou faaali atu le alofa i tagata o e ua agaleaga mai ia te au?

“Na aoao mai le Faaola: “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44). O lenei poloaiga e le faigofie le mulimuli ai, ona e tetee i lo tatou natura—o lona uiga, i le tagata o le lalolagi (tagai i le Mosaea 3:19). O fea la tatou te amata atu ai? O nisi nei o nai manatu.

• Taumafai e vaai atu i tagata uma o fanau a le Tama Faalelagi. E le na o se manatu manaia; o se mea moni. Ia tuu atu e tuia ai lou loto, ma e mafai ona suia ai au fegalegaleaiga.

• Ia iloa o le ituaiga o alofa ua poloaiina ai i tatou e le Faaola ia maua o se meaalofa moni mai le Atua, o lea e tatau ai ona e “tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso” (Moronae 7:48).

• Saili ni auala laiti e auauna atu ai ia i latou o e agaleaga mai. E te le iloa pe o le a fesoasoani ia i latou e suia, ae e tusa lava pe leai, o le a e lelei sili atu ona o lou agalelei.

• Faasoa atu le talalelei ma i latou, e tusa lava pe na o le ta’u mai o se molimau tuusao ma le mausali o se upumoni faigofie—e pei o le, “O i tatou uma o fanau a le Atua.”