Savali a le Au Peresitene Sili
Ua Tatou Saunia Ea?
I le eria lea sa ou nofo ma auauna ai, sa faia ai le fagaga moa a le Ekalesia, na vaaia e volenitia mai le uarota i le lotoifale. O le tele o taimi sa avea ai o se galuega uelefea sa faagaoioia lelei, e sapalai ai faleteuoloa a epikopo i le afe ma afe o fuamoa fou ma le faitau fiaselau o pauna moa ua faamamaina. E ui i lea, o nisi aso, o le aafiaga o le avea ma tagata fai lafumanu volenitia mai le taulaga sa le gata ina papa ai lima, ae sa atuatuvale ai foi le loto ma le mafaufau.
Mo se faataitaiga, ou te manatua pea le taimi na matou faapotopotoina ai le Perisitua Arona o alii talavou e tuuina atu i le faatoaga moa se faamamaina maeaea i le faaiuga o le taumalulu. Sa faapotopoto mai la matou vaega maelega ma malolosi i le galuega, ma i se faiga faatopetope na matou tase’i ai i luga, ma faaputuputu ma susunu vao e tele ma lapisi. O le malamalama o se afi tafu sa matou aai ai ni sosisi ma taufai faamalo ia i matou lava mo se galuega sa lelei ona fai.
Peitai, sa na o le tasi lava le faafitauli matautia. O le pisapisao ma afi sa tafu na faate’ia ai le 5,000 o matuamoa mu’amu’a ma le auvaivai sa tautuufua, ma o le tele o i latou na faafuasei ona va’iva’ia ma le toe tuufua ai. Ona matou toe tuua ai lea o nisi vao, ina ia mafai ai ona toe maua nisi fuamoa.
E leai se tagata o le Ekalesia o e na fesoasoani ia i latou e le tagolima na faagaloina pe sa’i i le mea na tupu. O le galue malosi, taugofie, faalagolago, ma faasoa atu i isi e le fou ia i tatou.
E tatau ona tatou manatua o le polokalama o le fale teuoloa sili ona lelei o le i ai lea mo aiga uma o le Ekalesia o se sapalai o meaai, lavalava, ma, pe a talafeagai ai, isi mea e manaomia o le olaga. E moni lava e ono i ai taimi o le a manaomia ai e o tatou tagata le fesoasoani mai le Ekalesia. O le faleteuoloa a le Alii e aofia ai le taimi, taleni, tomai, agaalofa, anomea faapaiaina, ma mea tautupe a tagata faamaoni o le Ekalesia. O nei punaoa o loo maua i le epikopo e fesoasoani ai ia i latou o manaomia le fesoasoani.
Matou te uunaia uma le Au Paia o Aso e Gata Ai ina ia faaeteete i a latou fuafuaga, ia faautauta i o latou ola, ma aloese mai aitalafu soona fai pe le manaomia. “E toatele atu nisi tagata e mafai ona sao mai peau faigata o tamaoaiga i o latou olaga pe afai e i ai ni a latou … sapalai o meaai … ma leai ni aitalafu. O aso nei ua tatou iloa ai ua toatele ua mulimuli i le faafeagai o lenei fautuaga: e tusa ma se tausaga a latou sapalai o aitalafu ma leai ni meaai.”
Ou te toe tau atu le mea na folafola mai e le Au Peresitene Sili i ni nai tausaga ua mavae:
“Ua tele tausaga o fautuaina le Au Paia o Aso e Gata Ai ina ia saunia mo faigata e ala lea i le faataatia ese o sina tupe itiiti. O le faia o lena mea e matuai tele se faaopoopoga i le saogalemu ma le soifua sololelei.Ua i ai i aiga taitasi se matafaioi e saunia ai mea e manaomia mo latou lava i le mea e gata mai ai le mafai.
“Matou te fautuaina outou pe o fea lava o outou nonofo ai i le lalolagi ina ia saunia mo faigata e ala i le tagatagai i le tulaga o a outou mea tau tupe. Matou te uunaia outou ina ia faautauta i a outou tupe faaalu; ia pulea lelei outou lava i a outou faatauga ina ia aloese ai mai le aitalafu. Ia vave totogi uma aitalafu i le mea tou te mafaia, ma faasaoloto mai outou lava mai lenei pologa. Teu sina tupe e le aunoa, e faifai malie ai lava ona fausia se tupe faaleoleo.”1
Ua tatou saunia mo mea tutupu faafuasei i o tatou olaga? O faaatoatoaina o tatou tomai? Pe ua tatou ola fuafua lelei? Pe ua i ai a tatou sapalai faaleoleo? O tatou usiusitai i poloaiga a le Atua? O tatou tali atu i aoaoga a perofeta? Ua tatou saunia e tuuina atu a tatou mea i e matitiva, e lē tagolima? O lelei lo tatou va ma le Alii?
Ua tatou ola i taimi faigata. E masani ona le mailoa le lumanai; o le mea lea, e tatau ai ona tatou saunia mo mea lē mautonu. Pe a oo mai le taimi mo faaiuga, o le taimi mo sauniuniga ua tuanai.
Aoao Atu mai Lenei Savali
Mafaufau i manaoga o i latou o loo e asia, mafaufau i ni auala e mafai ona e fesoasoani ia i latou ia sili atu ona faalagolago le tagata ia te ia lava i mea tau galuega, mea tau tupe, teuina o meaai, po o sauniuniga mo faalavelave faafuasei. Mafaufau i se tomai e mafai ona e faasoa atu ia i latou, e pei o le totoina o togalaau po o le puleaina o tupe, e faamalosia ai i latou ia mulimuli i fautuaga a Peresitene Monson.
Mo ni manatu i le aoaoina atu o lenei savali i le autalavou ma tamaiti, tagai i le itulau e 6.