Susume!
“Aga i luma ma le faatuatua” o se fasifuaitau lea e tatau ona taialaina ai o tatou olaga.
Ata na tusia e Julia Yellow
O le faaliliuga faaIapani o le viiga “Tofia e Auauna” (Viiga, nu. 156 ), o le upu faa-Peretania agai i luma ma i luma o loo faaliliuina o le susume. Ua i ai i lena upu se uiga taua mo au ona o se mea na tupu i ni nai tausaga ua mavae, ina ua avea au ma se peresitene o le siteki i Fukuoka, Iapani.
Sa asiasi atu le Peresitene o le Ekalesia, o Gordon B. Hinckley (1910–2008), ma sa talosagaina a’u ma te o faatasi. I le faagasologa o se tasi fonotaga, e 300 faifeautalai faamisiona sa faapotopoto e faalogo i le perofeta. Na faatumulia le falesa i le Agaga Paia, ma o le toatele o i matou na maligi loimata o le olioli. Sa matou usuina le viiga “Tofia e Auauna” i le FaaIapani, toe faia pea lava pea le upu susume, susume. Na fesili atu Peresitene Hinckley i le peresitene o le misiona, na nofo i autafa o ia, “O le a le uiga o le susume?”
“O lona uiga ‘ia agai i luma,’” o le tali lea a le peresitene o le misiona.
Sa matagofie le sauniga. Sa faamalosiau atu ma uunaia e Peresitene Hinckley ia faifeautalai. Mulimuli ane, sa ia talotalo atu ia te i latou i le faatofa ma tuua le fale. A o ia ulu mai i lau taavale e toe malaga atu ai i le faletalimalo, sa ia fai mai se upu se tasi ia te au, i le faaIapani: “Susume!”
O Se Savali Matagofie
Sa avea lena upu ma se mautauave mo au: “Ia agai i luma! Ia lelei! Faasaga atu ma le faatuatua i le lumanai!” O le savali lava lea e tasi o loo tuuina atu i le autalavou a le Ekalesia i le vaega faaiu o Mo le Malosi o le Autalavou. Ina ua uma ona toe iloiloina faamanuiaga e oo mai i le usiusitai i tulaga faatonuina a le Alii, i se vaega ua faaautuina “Ia Agai i Luma ma le Faatuatua,” o loo faapea mai: “A o e faia nei mea, o le a anoanoai mea e faia e le Alii i lou olaga nai lo mea e te mafaia na o oe lava. O le a ia faateleina ou avanoa, faalautele lau vaai mamao, ma faamalosia oe. O le a Ia tuuina atu ia te oe le fesoasoani e te manaomia e faafetaiaia ai ou tofotofoga ma luitau. O le a e maua se molimau malosi atu ma maua le olioli moni a o faasolo ina e iloaina lou Tama o i le Lagi ma Lona Alo o Iesu Keriso, ma lagonaina lo Laua alolofa mo oe” ([2011], 43).
Ua aoao mai e le talalelei ia i tatou ia agai i luma i le faatuatua. “Saili, ona outou maua ai lea; tuitui atu, ona toina ai lea ia te outou” (Mataio 7:7). Ia te au, o lona uiga o le susume.
O Se Tala Lauiloa
O samurai o tamalii faamiliteli ia anamua ma ona po nei a Iapani. O loo talanoa pea tagata Iapani e uiga i se tasi o i latou, o Ryoma Sakamoto, o le na maliu i le 1867. O se tasi o mafuaaga o loo ia lauiloa ai pea ona sa ia tausia e le aunoa se uiga faaalia lelei. Sa ia le fefefe i soo se tasi po o soo se mea. Sa alu o ia i soo se mea e manaomia ai o ia. O le musuia e ala i le manatu taua e faapea ua foafoaina tutusa tagata uma, sa ia faia ai taumafaiga uma e faatuina se malo fou. Ae sa tagatavaleina o ia, ma e ui ina sa tuiina faatele i le pelu a le isi samurai, na te lei faavaivai ai. Sa ia taumafai e tu i luga ma savali i luma. O se tala e sili lea ona lauiloa i Iapani.
Ou te malamalama ua tofu i tatou uma lava ma luitau ma mafatiaga, ma o nisi taimi tatou te lagonaina ai le osofaia o i tatou e o tatou fili. O le a faaosoosoina i tatou e Satani ina ia lē lelei o tatou mafaufauga ma lafoaia le faamoemoe.
Ae ou te molimau atu ia te outou o le talalelei tatou te maua ai le malosi e te fai atu ai susume ma agai i luma. O le talalelei na te le tuuina mai ni savali le lelei. E tatau ona tatou tutu i luga ma savavali i luma ma le faatuatua, aua ua tatou maua le folafolaga a le Alii faapea o le a le faatoilaloina i tatou. “O le Alii foi, o ia na te savali i ou luma; lua te faatasi ma ia, na te le tuuina oe, na te le lafoai ia te oe: aua e te fefe,aua foi e te mata’u” (Teuteronome 31:8).
O Le Punavai o le Fiafia
Au uo pele, ou te manao ia outou fiafia. O le fiafia moni e tatau ona faavae i luga o le malamalama o loo soifua lo tatou Tama Faalelagi. E alofa o Ia ma silafia i tatou uma taitoatasi. Na te silafia mea uma e uiga ia i tatou—tatou vaivaiga, malosiaga, manatu lelei, manatu leaga, luitau, ma mafatiaga. Ona o Lona alofa mo i tatou, na Ia auina mai Lona Alo e laveai i tatou. O Iesu Keriso o lo’u Faaola. O ia o le Faaola o lo’u aiga. O ia o lou Faaola. Na te taialaina i tatou. Na te taitaia i tatou. Ou te iloa o lenei Ekalesia o Lana Ekalesia, ma ou te iloa o Peresitene Thomas S. Monson o lo tatou perofeta soifua.
Ou te folafola atu afai e i ai sou uiga faaalia lelei ma sailia ia mea lelei, o le a e maua le Agaga Paia e faatasi ma oe. Afai e te manatu i le Atua ma mea lelei, o le Agaga Paia o le a taialaina oe. O le a mafai ona e uunaia ai oe lava ia e “ia agai i luma,” ma e ui lava i ou tofotofoga, o le faatuatua o le a e agai ai i luma.
Malosi e ala i Tulaga Faatonuina
Aoao atili e ala i le asiasi i le itulau o le Mo le Malosi o le Autalavou i le standards.lds.org.