Seia Tatou Toe Feiloai
Tama e Tulaga Ese
Mai “Stories from the General Authorities: An Uncommon People,” New Era, Feb. 1974, 28–29.
“Aisea na e faamanuia ai mo au i se ipu susu?”
Sa ou maua se tusi mai se faifeautalai i Kalefonia. Sa ia fai mai o se tasi o kalapu a tamaitai sa faatulagaina se taumafataga o le aoauli i le faletalimalo. O le tamaitai pule na ia tuuina se ipu faaopoopo i le laulau, ma sa ia fai mai, “A sau le fitafita e sosoo ai, o le a tatou valaaulia o ia na te faaaogaina le nofoaga lea i le laulau.” Ia, o ia o se tama Mamona.
Ina ua latou pasia solo le kofe, na te lei pa’i i le kofe. Ma faigofie mo le tama ona fai atu, “Oi, e le o iinei Tina. E le o iinei Tama. E le o iinei lo’u epikopo. Ua nao a’u le tama mai nei tamaitai uma. O sina ipu kofe laitiiti o le a le afaina ai au.”
Peitai e tatau ona ia faaali atu ia viiga o le Alii o le na valaauina o ia mai le pouliuli i le malamalama ofoofogia, ma na te lei pa’i atu i ai. Na latou ofoina atu e aumai le lauti, ma sa le’i manao o ia i ai. Ona latou mananao lea e fiailoa mea uma e uiga ia te ia. O lena na tatalaina ai le faitotoa ina ia mafai ona ia ta’u atu ia te i latou e uiga i le auala sa tausia a’e ai o ia. Ma ina ua uma le latou taumafataga sa tutuina a latou sikaleti ma pasi faataamilo. O le mea moni, na teena e le fitafita talavou. Ia, i le taimi lava lena iina na i ai se tasi o tamaitai na ia filifili, “Afai lava e asiasi atu faifeautalai Mamona i lo’u fale, o le a ou aumaia i totonu. Ou te fia iloa atili e uiga i se tagata o e e mafai ona tausi ae se tamaitiiti faapei o le tamaitiiti lea sa nofo i le tatou laulau ananei.”
O seisi tamaitiiti Mamona sa auina atu i sasae i se aoga o aoaoga faamiliteli. Na oo mai se taitai fou i le tolauapiga, ma sa latou faatulagaina se ‘aiga e faamamaluina ai o ia. Sa i ai, i talaane o ipu ai uma, se ipu malamalama mo meainu malolosi. Ina ua oo mai le taimi e tatau ai, na tutulai tagata taitoatasi uma o na taitai faamoemoeina ma a latou ipu o le faamasaniga e faia se faamanuia mo lena taitai malaga mai. O tagata uma vagana ai se tasi tamaitiiti, ma sa ia sii i luga se ipu susu.
Ia, na vaaia e le taitai. Na ia alu atu sa’o i lena tamaitiiti ina ua mavae le faafiafiaga, ma sa ia fai atu, “Aisea na e faamanuia mai ai ia te au i se ipu susu?”
“Ia, taitai, na ia fai atu ai, “ou te le’i tagofia lava se meainu malosi i lo’u olaga. Ou te le manao e pa’i atu i ai; o o’u matua e le mananao ia te au e pa’i atu i ai; ma ou te le’i manatu o le a e manao ai foi ia te au. Ma sa ou manao e faamanuia oe, o lea sa ou mafaufau e faamalieina oe pe a ou faia la’u faamanuia i le meainu e masani ona ou inuina.”
Na fai atu le taitai, “ia e lipoti atu i le nofoaga autu i le taeao,” ma tau atu ia te ia le taimi.
Ou te manatu o le tamaitiiti na alu le po e le moe, ae ina ua ia alu atu i le potu o le taitai i le taeao na sosoo ai, ua tofia o ia e le taitai i se avanoa i luga o lana matagaluega faatasi ma lenei faamatalaga: “ou te manao e siosiomia a’u e alii e i ai le lototele e fai le mea latou te manatu ua sa’o tusa lava po o a manatu o isi o i ai.”
E le matagofie ea lena mea! O ia o se tamaitiiti e tulaga ese, a ea? Ou te faamoemoe o outou uma e tulaga ese. Ou te faamoemoe pe afai lava e te i ai i se isi lava taimi i se tulaga faapena, o le a e faia le faaiuga tatau.
Ata o ipu uaina na pueina e Ziviani/iStock/Thinkstock; ata o le ipu susu na pueina e denphumi/iStock/Thinkstock