Faamaloloina o Manua o loo Natia
Toetoe o le autalavou uma o aso nei o le a fesootai ma ponokalafi i le taimi latou te 18 ai. Matua, o nisi nei o faatinoga e fai.
I le taua tele mo le aai o Kumenae, o loo faamatala mai ai e Helamana ana autau e 2,060 o talavou o e “sa matuai tau e aunoa ma se manatu i le oti” ma o latou fili (Alema 57:19). E ui ona “sa leai se tagata e toatasi o i latou na fano” i lena taua, “sa leai foi se tagata e toatasi o i latou e le’i o’o i ai se manua tele” (Alema 57:25). O le toatele o nei fitafita talavou na matuai manunua lava ma na latou matapogia ona o le tele o le toto masaa.
O nei tagata talavou sa tauina se taua na le mafai e o latou matua ona tau mo i latou, ma sa latou tauina aua ua osofaia lo latou nuu. O se taua matautia faapena foi o loo osofaia totonu o talavou i ona po nei, mo mafuaaga talitutusa. O matua o aso nei ua le mafai ona toe tauina le taua faaleagaga mo o latou talavou nai lo le mea na mafai e le nuu o Amona. Ae e mafai ona latou aoao ia iloa manu’a faaleagaga e tuuina atu e lenei taua ma faaauupegaina ai a latou fanau i le malamalama ma punaoa e tatau ona latou maua ina ia ola e manumalo ai faaleagaga.
Sei Tatou Faafesagai Ma Mea Moni
Na faaalia e nisi suesuega faapea e latalata atu i le selau pasene o tupulaga talavou o le taimi nei e oo atu i le taimi e faauu ai i aoga maualuluga ua latou vaaia pe faaalia foi i ai ponokalafi, ma o le tele o na vaaiga e tutupu i luga o le Initoneti ao faia meaaoga a le tamaitiiti.1 I le 2008, na lipotia mai ai se fua faatusa o le 9 mai le 10 alii talavou ma le toeitiiti tasi vae tolu o tamaitai talavou e faaaogaina ponokalafi.2 O le averesi o le matutua o e ua iloaina ma ua faia ma vaisu e tutusa lava: 11 tausaga le matutua. Matou te faamoemoe o nei fuainumera o le a faaitiitia ona o le aafiaga o le talalelei, ae ua faaalia mai i suesuega faapea “e leai lava se eseesega” o le Au Paia O Aso e Gata Ai “pe a oo mai i le tulaga faifaipea po o le tulaga o le feusuaiga faavaisu.”3 Ae paga lea, o le fesili e foliga mai e le o toe afai o le a faaalia i a tatou fanau ponokalafi ae o afea—ma pe faapefea ona latou taulimaina. E moni lava, tatou te manatu o le toatele o tatou talavou o le a manunua i lenei taua. Ae e le faapea la o le a fano ai i latou.
I se taumafaiga e puipuia a latou fanau, e mafai ona manatu tele matua i mea e fai ma mea e le tatau ona fai mo le saogalemu i luga o le Initoneti. Na faailoa mai e Mark Butler, polofesa o le olaga faaleaiga i le Iunivesite o Polika Iaga, le taua o le malupuipuia o tatou aiga ma auaiga a o faaopoopo atu o nei “vaifofo faatekinolosi ua na o le amataga o le tali. O le talipupuni aupito sili ona taua o le tasi lea tatou te tuuina i luga o tatou loto, ma o lenei talipupuni faaleagaga e faatulaga ma faafetaui i totonu o le aiga.”4 E ui e taua ma fesoasoani tele poloka o le Initoneti ma tulafono o le komepiuta a le aiga, e masani ona atiina ae le vaisu o ponokalafi i fafo atu o le aiga i faletusi lautele, aiga o uo, po o nofoaga e mafai ona maua ai le initoneti e le faaaogaina ai ni uaea po o telefoni feaveai foi, e le tele ai ni mea faalavefau i le initoneti.
Na aoao mai Elder D. Todd Christofferson o le Korama a Aposetolo e Toasefululua: “O uiga Faaalia ua taulai atu i le faateleina ma le pasiaina o tulafono ma taiala sili atu ma malolosi. Atonu e mafai ona upuesea ai nisi mai le auai i le faia o amioga le talafeagai, ae o isi o le a na ona sili atu ai ona fatufatuai a latou auala e aloese ai. E le mafai ona lava tulafono lea ua mamanuina ma le faaeteete tele ina ia mafai ona taulimaina ai tulaga uma. … I le iuga, na o se tapasa o le lelei i totonu o tagata taitoatasi e mafai ona taulimaina ma le mataalia le mafuaaga autu faapea faailoga o le nuu ua pala.”5 I le iuga, o le puipuiga sili e mafai ona e uunaia i o outou talavou o le manao mo se olaga mama.
O Faailoga o Vaisu
O le a le mafai lava ona tatou faaaoga sese o tatou tino faaletino e aunoa ma le faamanualia foi o tatou agaga, ma o lena ituaiga o manu’a o le a tuua ai lava se ma’ila faaleagaga.
O matua mataala atonu o le a mafai ona iloa vaisu o ponokalafi e ala i le mataituina o faailoga nei. O se upu lapatai: o faailoga nei e le tau ta’u mai ai se mausa o ponokalafi. Afai o lau tama talavou o loo faaalia nisi o nei amioga, ua latou faailoa mai se faafitauli e loloto atu atonu e mafai ona aofia ai le faaaogaina o fualaau faasaina, vaisu o ponokalafi, saua, po o se isi mea. E tusa lava po o le a le mafuaaga, o le a mafai ona e faaaogaina nei faailoga e te iloa ai ua tatau ona e amatalia ni talanoaga tuusao o le alofa, faatasi ma lau fanau.
Faaitiitia le Faatauaina o Oe Lava
O autalavou o loo tauivi ma ponokalafi e tele lava ina i ai aafiaga o se maasiasi loloto e faavaivaia ai lona faatauaina o ia lava. O nisi o faailoga mo le leai o se naunautai mo ia lava e aofia ai le le lelei o togi i le aoga, leai o se uunaiga mo gaoioiga, ma le faaalia o le leai o se amio pulea mo le tausia o le soifua maloloina lelei po o le le tausia o taimi e tatau ona moe ai.
Le Fiafia i Tulaga Faaleagafesootai
O vaisu o ponokalafi e fatupulaia i mea lilo, ma e mafai ona e vaai i lau tama talavou ua alu ese atu mai le taimi o le aiga ma gaoioiga faafiafia. O le faailoga sili lea ona taatele o se faafitauli i ponokalafi. O talavou e faaalu se tele o latou taimi i o latou potu ma le faitotoa e loka ma e vavaeeseina i latou lava mai isi atonu e le na o na matamuli. E tusa lava pe o loo aofia i mafutaga faamasani, o nei talavou i le tele o taimi e faigata ona fegalegaleai ma isi. O le a manino le tuuatoatasi ao faalolotoina le fai ma vaisu, ma o le a matele ina faaalia e tupulaga talavou le ita pe a osofaia lo latou lava siosiomaga patino. O i latou o loo tauivi ma ponokalafi ua atiaeina ni vaaiga faapito o lo latou lava taua ma le mama o isi, ma ua latou aveesea i latou mai tagata latou te vaai faalemafaufau i ai ua sili atu ona mama ona ua latou lagonaina le lē agavaa, le maasiasi, ma le taufaasese fo’i.
Atuatuvale
O le atuatuvale o se lau e faataumaai itu e lua aua e mafai ona e auauna atu o se faatusa ma se mafuaaga mo se vaisu. O le faaalia faifai pea o le leai o se faamoemoe, faia pea o amioga le lelei ma tautau soo o le le gafatiaina o mea uma o ni faailoga lea o le atuatuvale. O talavou o e ula e uiga i le pule i le ola o loo faaali mai ai le atuatuvale. O isi faailoga o le atuatuvale e aofia ai le aitele po o le laitiiti foi nai le mea e masani ai, tau le moe, po o le ova moe, vaivai faaletino—o soo se mea lava e mafai ona mafaufauina o ni amioga ogaoga.
O isi faailoga o le aafia ai i ponokalafi e aofia ai le faateleina o le ita, lē faamaoni, faamaualuga, ma le le lagona lelei po o le le fiafia i faatulagaga faaleagaga.
E le mafai ona tatou lisiina uma faailoga o vaisu o ponokalafi. E mafai e matua ona sili atu ona fuaina pe ua lava puipuia a latou tupulaga talavou e tetee atu i ponokalafi pe a tausia le tatalaina o talanoaga tuusao ma i latou e uiga i tulaga tau feusuaiga ma o latou soifua maloloina faalelagona ma faaleagaga.
O Lo’u Atalii ua Fai ma Ana Vaisu. O Le A Nei La?
Na saunoa Elder M. Russell Ballard o le Korama a Aposetolo e Toasefululua, “Tusa lava po o a ni taamilosaga ua fai ma vaisu o se tasi ua maua ai, o loo i ai pea lava le faamoemoe” ona o le Togiola a Iesu Keriso.6
I lo latou amataga, “o vaisu uma o fuafuaga le talafeagai e taulimaina ai faafitauli o le olaga,” o le tala lea a Polofesa Butler. O fanau o e ua le iloa le ala e taulima ai le tausalaina, maasiasi, faanoanoa, po o tiga, o le a matele ina liliu atu e faia amioga ua fai ma vaisu ia lē lagonaina ai o latou lagona le lelei. E oo lava i lagona itiiti matuia e pei o le popole, le fiafia, po o le tuua toatasi e mafai ona taitai atu ai i amioga faavaisu pe afai e le malamalama le tamaitiiti i le auala e taulimaina a.
E mafai ona fesoasoani matua i a latou fanau e atiina ae metotia faalesoifua maloloina o le taulimaina e ala i le faataitaia o na amioga e i latou lava. E ono fesoasoani fesili nei e te iloiloina ai au lava metotia o le taulimaina: Pe a e atuatuvale, vaivai, pe faanoanoa, mata e te vavaeesea mai oe na o oe lava? E te faalagolago i faafiafiaga e alo ese mai i ou faafitauli nai lo le taulimaina o i latou? E te faaali atu o le ala sili e foia ai faafitauli o le faalagolago i le Tama Faalelagi, le Faaola, ma au sootaga ma isi?
E tatau ona aoao fanau ia iloa faailoga o manu’a faaleagaga e pei o le faanoanoa, tausalaina, ma le tiga, ina ia mafai ona latou liliuina o latou tiga i aafiaga e aoao mai ai. E le leaga le tiga faalelagona. Na faamatalaina e Alema le itiiti o tiga o ana agasala ua “silisili ona logolelei” ma “oona” (Alema 36:21); Na “tagi lotulotu” Peteru ina ua uma ona ia faafitia le Faaola (Luka 22:62); ma sa puapuagatia Seseroma “ona o lona amioleaga” (Alema 15:3). E mafai ona e fesoasoani i lau fanau e aoao ia faatatau i le tiga e le o se lagona matautia e tatau ona aloese mai ai, ae o se faiaoga e mafai ona taitai atu ai i le tuputupu ae maoae. Na faaaoga uma e Alema, Peteru ma Seseroma tiga o a latou agasala e faaosofia ai i latou i le salamo, ma sa avea i latou ma amepasa tuuto o le talalelei. O au faataitaiga ma taitaiga e mafai ona fesoasoani i lau fanau e aoao ai i le tulaga faatauaina o le salamo nai lo le avea ma vaisu.
Na aoao mai Peresitene Dieter F. Uchtdorf, Fesoasoani Lua i le Au Peresitene Sili: “E i ai se eseesega taua i le va o le faanoanoa mo agasala e tau atu i le salamo ma le faanoanoa e tau atu i le faavauvau.
“Na aoao mai e le Aposetolo o Paulo e faapea ‘o le faanoanoa faaleatua e tupu ai le salamo i le faaolataga … ae o le faanoanoa o le lalolagi e tupu ai le oti’ [2 Korinito 7:10; faaopoopo le faamamafa]. O le faanoanoa faaleatua e musuia ai le suiga ma le faamoemoe e ala i le Togiola a Iesu Keriso. O le faanoanoa faalelalolagi e toso i tatou i lalo, aveesea ai le faamoemoe, ma faatosinaina i tatou ia lolo atu atili i faaosoosoga. …
“O le salamo moni e faatatau i le suiga, ae le o tiga ma mafatiaga. Ioe, o le faanoanoa faamaoni ma le loto momomo moni mo le le usiusitai e tele lava ina tiga ma o ni laasaga taua ia i le faagasologa paia o le salamo. Ae a oo atu le tausalaina i le musuā o le tagata lava ia po o le taofia o i tatou mai le toe tutulai ae i luga, o le a faatuai ai nai lo le uunaia o lo tatou salamo.”7
O le a mafai e a outou fanau ona onosaia o latou manu’a faaleagaga pe a latou maua le vaaiga ma le faamoemoega mo se olaga mama. O le a fausiaina lenei vaaiga e ala i le tatalo faatauanau ma le suesue faamaoni o tusitusiga paia i aso taitasi.8 Ua fautuaina e Polofesa Butler matua: “O le mana o a outou faataitaiga, o le a fatu ai se vaaiga malosi o le olioli, filemu, ma le fiafia o se olaga mama. O loo i ai se malaga umi i le va o le manao mo se olaga mama ma lona ausiaina, ae o le manao o le fatu lea mo le sitepu muamua.” Atonu e manaomia se taimi mo le manao mo le mama ia tuputupu ae ai. “O le tagata o le natura o se tagata matua anagata ma o le tele o taimi e manaomia ai se taimi umi e aveesea ai le tagata o le natura,” o le tala lea a Polofesa Butler. Ma a o le upu vaisu e le aveesea ai le tiutetauave mo filifiliga, o lona uiga o uiga masani e sili atu le faatiga e masani ona manaomia ai le onosai ma faatauanau (e pei o le Polokalama a le Ekalesia o le toe faaleleia o vaisu) ina ia mafai ona faatoilaloina.
Faamoemoega o i Luma Atu
E pei o au tau a Helamana, e masani ona faaalia e a tatou tupulaga talavou “le lototetele tele” pe a fetaiai ma le leaga (Alema 56:45). E pei lava ona faalagolago i ai na autau o le Tusi a Mamona i le faatuatua o a latou matua, e tatau ai foi ona fesootai atu a tatou molimau e uiga i le ma le tuuto atu i le talalelei ina ia mafai ona e faapea atu i a tatou talavou, “Matou te le masalosalo na iloa e o matou tina [ma tama]” (Alema 56:48). Ua folafola mai e le Alii, “O le a ou tauina a outou taua” (MF&F 105:14). A o faatinoina e le au talavou le faatuatua i le Togiola a Iesu Keriso, o le a “faamalolosi tele ai i latou e oo lava i le mana e laveaiina ai” (1 Nifae 1:20).
E taua tele tulafono o le komepiuta faaleaiga, ae e le faapea o le a taofiofia ai i tatou i lalo i ioe ma leai o le saogalemu o le Initoneti.
E tatau ona tatou fesootai atu a tatou molimau e uiga i ma le tuuto i le talalelei i a tatou autalavou.
A o faatinoina e le au talavou le faatuatua i le Togiola a Iesu Keriso, o le a mafai ona faamaloloina i latou mai o latou manu’a faaleagaga.
Ata na tusia e diawka/iStock/Thinkstock
Faamatalaga mai le Keriso ma le Taulealea Mauoa, na saunia e Heinrich Hofmann, faaaloaloga a le C. Harrison Conroy Co.