O Uso o le Feagaiga
I le avea ai ma soo o Iesu Keriso, e tofu uma i tatou ma tuafafine o e alolofa ma lagolagoina i tatou—e tusa lava po o le a o tatou tulaga faaleaiga.
O lo’u aso Sa muamua o se tamaitiiti aoga i Pale, Farani, sa ou maofa i le eseese o la’u uarota fou. O le na taitaia le Aualofa o se tamaitai lalelei mai Europa i Sasae. O nisi uso mai Aferika i Sisifo na ofoina mai ia te au la latou tusipese. O si tamaitai Asia o le sa faaliliuina ma le faaeteete lana lesona i le gagana Farani sa taitaiina se tasi o lesona sili ona faamaoni na ou faalogo i ai. E ui lava o a’u o se talavou Amerika o loo nofo i le 5,000 maila (8,045 km) le mamao mai lo’u nuu, sa ou lagonaina le mafanafana pei o loo i lo’u aiga i le lotolotoi ai ma tamaitai lelei o le Ekalesia. Sa matou o mai mai Farani, Kemupotia, Ivory Coast, Iukureini, ma le Iunaite Setete—ae e lei i ai se afaina o le eseese o tausaga ma aganuu. Ua tuufaatasia i matou e se agaga o le usoga a tamaitai.
I le taimi o le popofou o o’u tausaga i le kolisi, sa ou iloaina ai mo le taimi muamua le ofoofogia o se upegafesootai o tamaitai sa ou auai i lo’u olaga atoa. Sa ou ola ae e aunoa ma se uso moi, o lea o nisi taimi sa le mafai ai ona fausia se manatu manino poo a mea e aafia i usoga a tamaitai. E ui ou te matua faafetai mo o’u matua lelei ma tuagane, sa ou moomoo mo ni uso e faasoa atu i ai, talie, ma fetaiai ma le olaga. Nai lo lena, sa ou aoao e faalagolago i uso ua ou maua i totonu o le “lotogatasi i la le faatuatua” (Efeso 4:13). E tele aafiaga na aoaoina ai au e mafai ona ou faalagolago i nei uso faamaoni-ona o le talalelei a Iesu Keriso, e i ai o’u uso!
Ua aoaoina i tatou e le lalolagi faapea o eseesega i totonu o aiga, auga tupulaga, aganuu, po o uiga e taofiaina tatou mai le galulue faatasi. O le mea moni, ua tuufaatasia le usoga a tamaitai e ala i le alofa, auaunaga, ma lo tatou tofi paia o le avea ma fanau a le Tama Faalelagi. O lenei tuufaatasiga e fesoasoani ia i tatou e faataunuu ai a tatou feagaiga o le papatisoga. “O lenei foi, ua outou fia o mai i le lafu mamoe a le Atua, ma ia ta’ua o lona nuu, ma ua loto ina fesui ia outou avega e ave ina ia mama ai;
“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma” (Mosaea 18:8–9).
O mai i le Lafu a le Atua
E fesoasoani uso i le tasi ma le isi e tausia na feagaiga o le papatisoga i le tele o auala. O Ting Chang o Taiuani “na [oo] mai i le lafu a le Atua” ao i ai i le aoga tulagalua. Talu ai o lona aiga sa i ai i se tulaga faigata tautupe, o lea e le ‘ai ai Ting i le malologa ina ia sefeina tupe faaalu a le aiga seia oo ina maitau e Jina, o se tasi o lana vasega. Sa amata ona saunia e le tina o Jina se meaai faasili i aso uma mo le malologa e faasoa atu ia Ting. E lei umi ae valaaulia e Jina lana uo e auai i le lotu faatasi ma ia. O le tina o Jina e le i leva ona auai i le Ekalesia, ma o loo faia lesona a Jina ma faifeautalai. Mo Ting, o faataitaiga o le alofa mama na tuuina mai e nei tamaitai sa mamana, ma sa ia amata foi ona feiloai ma faifeautalai.
Sa faitauina faatasi e Ting ma Jina tusitusiga paia ma tausia se api o talaaga o o la aafiaga paia. Na tuputupu a’e lo la noataga o le usoga a tamaitai ina ua papatisoina uma nei tamaitai talavou i le aso lava e tasi. I le taimi nei, o loo la auauna atu o ni faifeautalai faamisiona e faasalalau atu le olioli o le talalelei a Iesu Keriso. Ua avea nei Jina, o lona tina, ma Ting o ni uso e ala i le ola ai i tulaga faatonuina a le Alii ma i le tauaveina o Lona suafa.
Fesoasoani le Tasi i le Isi i le Tauaveina o Avega
O auaunaga alofa o se isi elemene taua lea o le usoga a tamaitai moni. O auaunaga alofa, ma faiaoga asiasi o taavale ia a le Ekalesia mo lena auaunaga. O Jacqueline Soares Ribeiro Lima o Pasila na ia faamatalaina le auala na faamanuiaina ai e faiaoga asiasi e toalua lona olaga ma le aiga ina ua uma ona iloa ua maua o ia i le gasegase o fesuiaiga o lagona e tele ai le faanoanoa ma lagonaina ai e le mafai ona auai soo i le lotu: “O lo’u toalua, o Vladimir, sa ia faia mea uma sa ia mafai e fesoasoani ai ia te au i le vaega sili ona leaga o le ma’i. Na ia feagai ma taimi sili ona leaga na o ia—seia oo ina valaauina ni tamaitai e toalua lelei e avea ma o’u faiaoga asiasi.”
O na tamaitai e toalua, o Rita ma Fátima, na faaalia lo la alofa e ala i le aoao atili e uiga i le mai ma lagolagoina le aiga o Jacqueline. Sa ia lagonaina pea lava pea le moni o lo la naunau atu ia te ia. O le la auaunaga na aofia ai le talimalo i se pati laititi mo Jacqueline ma le su’iina o se ofu mo lana tama teine. O lona iuga, o le popole faamaoni o loto o Rita ma Fátima na fesoasoani ia Jacqueline faaleagaga, ma sa ia toe faaauau ai e alu i le lotu, lagolagoina e lo la malosi.
Pe o avega a o tatou uso e faaletino, faalelagona, po o le faaleagaga, o se mea matagofie pe a tatou aapa atu i le alofa i le tina talavou ua vaivai, o le Ofagapi matamuli fou, o le tina matua ua tuua toatasi, o le peresitene o le Aualofa o loo taumafai malosi e faataunuuina uma ona tiute. O tamaitai o le feagaiga e “fiafia i le auauna atu ma galuega lelei”1 ma sa faapea ona saili atu ma siitia o latou uso o e o loo lelavava po o vaivai.
Faanoanoa Faatasi ma i Latou o E Faanoanoa
O tamaitai o le faatuatua e mulimuli i le faataitaiga a le Faaola pe a latou aapa atu i le agamalu. Atonu e leai se isi faataitaiga e sili ona lelei i tusitusiga paia o le alofa lē manatu faapito nai lo Naomi o Peteleema ma lona tama teine faaletulafono o Ruta o Moapi. Sa filifili Ruta e auauna atu i le tinā o lona toalua ina ua mavae ona maliu le tane a Naomi ma ana fanau tama. I le faanoanoa, na filifili ai Naomi e toe foi atu i lona lava atunuu. E ui lava o nei tamaitai na o mai mai aganuu ma faatuatuaga eseese, na avea ma uo a o lagolagoina e le tasi le isi i le ola amiotonu ma galueaina tofotofoga faatasi.
O Ruta ma lana fa’ataitaiga ma auaunaga sa matua maoae lava, lea o le auega a Naomi na liua i le olioli i lona manuia lelei ona o lenei tama teine faaletulafono matagofie ma se uso i le talalelei. O lo la sootaga sa matua malosi lava o lea ina ua vaai ai isi tamaitai, i le fesootai o lo la alofa, sa faapea mai, “Faafetai i le Alii ina … [ua foai atu ia te oe] lou afafine faaletulafono, lea e alofa ia te oe, ua lelei o ia ia te oe e sili i tamatane e toafitu (Ruta 4:14–15).
“Faamafanafana I E Ua Manaomia le Faamafanafanaga
Na faamafanafanaina e se tusi mai se tasi o uso i lana uarota ia Raihau Gariki o Tahiti, lea na valaauina o se faiaoga o le Aualofa tusa pe tasi le masina talu ona atoa lona 18. Sa popole o ia e aoao atu “tina ma tina matutua, o tamaitai o e ua uma ona iloa ni mea se tele, na feagai ma le tele o tofotofoga, ma maua ni aafiaga i le tele o mea.” Ina ua uma lana lesona muamua, sa ia maua “se tusi na faatumulia i le alofa” mai se tamaitai i le vasega. O lenei tusi na faamalosia ai lona talitonuga, ma sa ia faapipiiina ai i lana api o talaaga e fesoasoani ia te ia ina ia tumau ai i taimi faigata.
O uso i le talalelei e fefaamafanafanaai ma lagolagoina e le tasi le isi i taimi o puapuaga. O J. Scott Featherstone, o se peresitene o le siteki i Iuta, na ia manatua le la o ai ma lona toalua e asiasi i se tamaitai i lo latou siteki faatoa maliu lona toalua. “Sa opoina e lo’u toalua o ia, fetagisi faatasi ma ia faamafanafanaina o ia seia oo ina ia lagona le alofaina.” O nisi taimi o usoga a tamaitai e faapena lona faigofie.
Laulaututu e Fai ma Molimau a le Atua
O loo i ai se mana tele pe a tutufaatasia tamaitai o vaitausaga uma e “tu atu mo le upumoni ma le amiotonu.”2 O la tatou usoga a tamaitai i le talalelei a Iesu Keriso e mafai ona faamalolosia i tatou, e tusa lava po o a tulaga tatou te feagai ai i se lalolagi ua faateteleina le amioleaga. E oo lava i se aupito itiiti e mafai ona tutu o ni molimau: O Jessica Vosaniyaqona o Kalefonia, ISA, sa aoaoina le talalelei mai teineiti tai ono tausaga le matutua i lana vasega Peraimeri, o e na faamanatu atu ia te ia ma molimau atu ia te ia i le taua o aiga.
O uso matutua o ni faataitaiga taua foi. O Kimm Frost mai Iuta na manatua le toatele o tamaitai o e na uunaia o ia e tumau malosi i le talalelei, e aofia ai Ursula Squires. Sa tusia e Kimm: “O Tuafafine Squires na avea ma o’u soa faiaoga asiasi a o i ai i lona vaitausaga o le 90. Sa le lelei lana vaai po o le faalogo foi, ae sa matua tuuto i le talalelei. Na te lei misia lava se lotu ma faataunuuina ana asiasiga ma le faamaoni. … O ia o se faamalosiauga ia te au.” A le ala mai i faataitaiga po o le faasoaina atu o molimau, e mafai e uso ona avea ma soo lotogatasi o le Matai.
Uso i le Ekalesia a le Atua
Ua ou iloa moni lava tuafafine ao o’u vaavaai atu i tamaitai o “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9). Sa ou maua le avanoa e auauna atu i se misiona talai. Ina ua oo mai lo’u valaauga i le Misiona i le lotoa o le Malumalu o le Aai o Sate Leki Iuta—na pau lea o le misiona i le Ekalesia e na o tamaitai—ou te tautino atu le lagona popole e uiga i le siomiaina e le toatele o tamaitai. Sa le tatau ona ou popole. Sa matuā fa’amalosia la’u molimau i le usoga a tamaitai a o ou fegalegaleai ai ma le anoanoai o tamaitai na molimauina taitasi e uiga i le Faaola i a latou faatinoga o aso uma.
O lo’u afiafi muamua o le Kerisimasi i le galuega faamisiona, sa faapotopoto mai ai e lo’u peresitene o le misiona uso uma e matamata i se tifaga faagaeetia. I se tasi taimi, na faaalia mai ai e le ata tifaga ni uso se toalua o fesoasoani atu le tasi i le isi e faatoilalo ni tulaga taufaafefe. Sa ou lagona le ootia e ala i lo la lotogatasi. A o ou vaavaai atu i le ata tifaga ma tilotilo solo i le susulu o uso faifeautalai, sa malosi lava le molimau mai le Agaga ia te au o lena usoga a tamaitai o se sootaga e faavavau na tuuina mai e lo tatou Tama Faalelagi, ma o a’u foi o se tasi o lena vaega. Maeu lea upumoni matagofie: e le tuua lava na o tatou, aua ua tuuina mai e le Alii ia i tatou uma ia uso a tamaitai.
E nofo le tusitala i Iuta, ISA.
Ata na pueina o tamaitai i le Ripapelika Temokarasi o Congo e Howard Collett