O Se Mea Na Ta’u Mai Ia te Au Ou Te Tu
Ronald D. Colby, Iuta, ISA
Ata na tusia e Bradley Clark
Na uma ona fuafuaina se tolauapiga faasoloatoa ma le po faatasi ai ma soo se ituaiga o gaoioiga e fai i fafo mo le Aso Faraile ma le Aso Toonai, ma sa ou naunau lava e o faatasi ma lo’u atalii. O Carl sa i ai sana galuega le tumau, ma sa galue i le Aso Faraile, o lea na ou fai atu ai e mafai ona ou pikiina o ia i le Aso Faraile i le afiafi pe a maea le galuega. Sa ma fuafua e paka i se auala laupapa i luga a’e o le nofoaga e tolauapi ai ona ma sopo ai lea i lalo.
Ina ua ma taunuu atu i le auala laupapa, sa pogisa, ma e na o se vaega laititi o le masina ma ni nai fetu o loo susulu i le lagi. O le ala agai i le tolauapiga sa vaiti ma sa vaneina i luga o se pupū i luga o se mati’e i tafatafa o le vaitafe. Sa ma i ai pe tusa ma le 300 iata (275 m) i luga a’e o le vaitafe ina ua amataina la ma savaliga sopo.
E lei mamao i lalo o le auala ae amata ona faaitiitia le malamalama a le ma moliuila, ma na foliga mai ua mou ese atu le auala i taimi o le motusia o le malamalama. Na faafuasei lava ona pei e faimai se mea ia te au e tu. Sa ou tu faafuasei, ae toe la’aina ni laa se lua agai i luma. O le lagona po o leo na toe fai mai e, “Tu.”
Sa ou toe tu. O Carl, o loo latalata mai lava i tua, toetoe lava tamoe sao mai ia te a’u.
“O le a le mea o tupu, Tama?” sa ia fesili mai.
Sa ou tau atu ia te ia e uiga i le uunaiga, ma faaopoopo i ai ua tatau ona ma ō i le fale, ma o le a ma toe foi mai i le taeao.
“Tama, ua mafai ona ou iloa atu le afi o le tolauapiga, o lana tali mai lea. “Ailoga e silia ma se maila (1.6 km) le mamao.”
O le iloaina o le uunaiga na oo mai mai le Agaga Paia, sa ou tumau ai ia aua nei o ma faia se isi laa. Ua pe le moliuila, o lea sa ma toe sopo atu ai ma le faaeteete i luga o le ala sopo. Sa le fiafia Carl ma sa le tele sana talanoa i le ma agai atu i lo matou fale.
O le taeao na sosoo ai na ma toe foi atu i le auala laupapa ma amata ona toe sopo. O le mea sili o le a mafai ona auai Carl i gaoioiga o le Aso Toonai. Na ma faanatinati atu, ae faafuasei lava, ona mou le ala sopo! Ona poia lea o māua. Ua ma taunuu i le mea tonu lea sa ma tutu ai i le po muamua atu.
“Tama, e le itiiti ifo ma le 100 iata (91 m) sa’o i lalo tau i le vaitafe, o le tala lea a Carl. “Semanu ta te feoti ai!”
O le pupū sa loloto lava le faaloaloa i lalo ifo o maua agai atu i lalo i le vaitafe. I luma atu o i maua sa i ai se āva i le auala pe a ma le 12 futu (3.6 m) le lautele, na faaleagaina i se afā na faatoa mavae atu.
Sa ma feopoai ma Carl ao tafe ifo o ma loimata. Ona ma fea’ei lea i se isi ala sopo ma o atu ai i le nofoaga o le tolauapiga. Na ma taunuu tonu lava i le taimi mo le aiga o le taeao.
Sa tatau ona i ai se faailo o le lapataiga i le auala sopo muamua, ae leai. O le mea e faafetai ai, o le faailo o le lapataiga na oo mai ia i maua mai le Agaga Paia.
E lei mamao i lalo o le auala ae amata ona faaitiitia le malamalama a le ma moliuila, ma na foliga mai ua mou ese atu le auala i taimi o le motusia o le malamalama.