O Keriso ma le taulealea mauoa

Keriso ma le Taulealea Mauoa,, saunia e Heinrich Hofmann

19--25 Iulai

Mataupu Faavae ma Feagaiga 81-83

I Mea e “Tele Mea Ua Tuu Atu I Ai, E Tele Foi Mea Ua Manaomia Mai Ai”

A o e suesueina le Mataupu Faavae ma Feagaiga 81-83, tusi ni faamatalaga o mataupu faavae e mafai ona fesoasoani ia te oe e fai ai ni mea lelei i lou aiga, au uo, ma isi.

Tusifaamaumau Ou Lagona Uunaia

Ia Mati 1832, na valaauina ai e le Alii ia Jesse Gause e avea ma se fesoasoani ia Iosefa Samita i le Au Peresitene o le Perisitua Maualuga (lea ua ta’ua nei o le Au Peresitene Sili). O le Mataupu Faavae ma Feagaiga 81 o se faaaliga ia Uso Gause, na aoaoina ai o ia i lona valaauga fou ma folafola atu ai ia te ia ni faamanuiaga mo le auauna faamaoni. Peitai sa le’i auauna faamaoni ia Jesse Gause. O lea na valaauina ai Feterika G. Viliamu e suitulaga ia te ia, ma o le igoa o Uso Gause sa suitulagaina i le igoa o Uso Viliamu i le faaaliga.

O lena mea e foliga mai o se faamatalaga laitiiti, ae o loo fautuaina mai ai se upumoni taua: O le tele o faaaliga i le Mataupu Faavae ma Feagaiga na talanoa mai i tagata na fitoitonu i ai, ae e mafai foi ona tatou sailia ni auala e faatatau ai ia i tatou lava (tagai i le 1 Nifae 19:23). O le fautuaga a le Alii ia Feterika G. Viliamu e “faamalosi tulivae ua vaivai” e mafai ona liliu atu ai o tatou mafaufau i tagata e ono mafai ona tatou faamalolosia (Mataupu Faavae ma Feagaiga 81:5). O le fautuaga a le Alii i tagata o le Kamupani Aufaatasi ia “fusia outou lava i lenei feagaiga” ina ia mafai ona ausia ai manaoga faaletino o le Ekalesia, e mafai ona liliu atu ai o tatou mafaufau i a tatou lava feagaiga. Ma o le folafolaga a le Alii o le a Ia “noatia pe a outou faia mea Ou te fai atu ai” e mafai ona faamanatu mai ai ia i tatou Ana folafolaga ia i tatou pe a tatou usiusitai (Mataupu Faavae ma Feagaiga 82:10, 15). O le mea lena e tatau ona i ai, ona na tautino mai foi e le Alii, “O lea, o le mea Ou te fai atu ai i le toatasi Ou te fai atu ai i tagata uma” (fuaiupu 5).

Tagai i le “Newel K. Whitney and the United Firm,” “Jesse Gause: Counselor to the Prophet,” Revelations in Context, 142–47, 155–57.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 81

E mafai ona ou faamaoni i le faia o mea ua fetalai mai ai le Alii ia te a’u.

E i ai ea ni taimi e te tau mafaufau ai i ni auala e mafai ona faataunuu ai tiutetauave taua i lou olaga? I le avea ai o se fesoasoani i le Perofeta o Iosefa Samita, na mautinoa lava na i ai ni tiutetauave taua se tele o Feterika G. Viliamu. I le vaega e 81, na tuuina atu ai e le Alii ia te ia ni fautuaga i le ala e faataunuu ai. O a ni mea ua e maua i lenei vaega lea e fesoasoani ia te oe i le faataunuuina o tiutetauave ua tuuina atu e le Alii ia te oe?

O nisi nei o fesili e fesoasoani e te mafaufau loloto ai i le fuaiupu e 5:

• O a ni auala e mafai ona “vaivai” ai se tagata? O le a le uiga o le, ia “fesoasoani” ia i latou e vaivai?

• O le a se mea e ono mafua ai ona pei e “tautau i lalo” lima o se tagata? E mafai faapefea ona tatou “sii i luga” na lima?

• Mata o le a le uiga o le fasifuaitau “tulivae ua vaivai”? E mafai faapefea ona tatou “faamalosi” i latou ua vaivai tulivae?

Atonu o le suesueina o lenei fuaiupu ua manatua ai se tasi e mafai ona e “fesoasoani,” “sii i luga,” pe “faamalosi” i ai. O le a se mea o le a e faia e auauna atu ai i lena tagata?

Sini Rikitone, Iosefa Samita, Feterika G. Viliamu

O Le Au Peresitene Sili: Sini Rikitone, Iosefa Samita, Feterika G. Viliamu

Mataupu Faavae ma Feagaiga 82:1–7

Ua valaaulia au e le Alii ia ou salamo ma lafoai a’u agasala.

A o e faitau i le Mataupu Faavae ma Feagaiga 82:1–7, mafaufau e fai ni lisi se lua o mea e te aoaoina: o lapataiga e uiga i le agasala ma upumoni e uiga i le faamagaloga. E mafai faapefea ona fesoasoani nei upumoni e te tetee atu ai faaosoosoga a le fili?

Mataupu Faavae ma Feagaiga 82:8–10

O poloaiga e mo lo’u faaolataga ma le puipuiga.

Afai na e—po o se tasi e te iloa—mafaufau pe aisea ua tuuina mai ai e le Alii le tele o poloaiga, e mafai ona fesoasoani le Mataupu Faavae ma Feagaiga 82:8–10. O a ni malamalamaaga loloto o i nei fuaiupu, e mafai ona fesoasoani ia te oe e faamalamalama atu ai i se tasi le pogai ua e filifili ai e mulimuli i poloaiga a le Alii? Atonu foi e te manatu i le ala ua suia ai e Ana poloaiga lou olaga. O le a se mea e te aoaoina e uiga i le Alii a o e faitau i le fuaiupu e 10?

Tagai foi i le Mataupu Faavae ma Feagaiga 130:20–21; Carole M. Stephens, “Afai Tou te Alofa Mai ia te Au, Ia Outou Tausi i Au Poloaiga,” Ensign po o le Liahona, Nov. 2015, 118–20.

Mataupu Faavae ma Feagaiga 83

“Ia tausia fafine ua oti tane ma fanau mātua-oti.”

Ia Aperila 1832, e pei ona sa faatonuina ai e le Alii, na toeitiiti atoa le 800 o maila na malaga ai Iosefa Samita e asiasi i le Au Paia o e sa faapotopoto i Misuri (tagai i le Mataupu Faavae ma Feagaiga 78:9). O se tasi o nuu sa ia asiaina na i ai ni tina ua oti a latou tane o e sa tausia na’o i latou a latou fanau. O nisi o i latou o Phebe Peck ma Ana Rogers, o e sa silafia patino e le Perofeta. I Misuri i le vaitaimi o le 1830, o tulafono faalesetete na faatapulaaina ai ni aia tatau na tuuina atu i fafine ua oti a latou tane, e faatatau i meatotino a a latou tane ua maliliu. O le a se mea ua e aoaoina mai i le vaega e 83 e uiga i le finagalo o le Alii e uiga i fafine ua oti a latou tane ma tamaiti ua matua oti? E te iloaina soo se tasi ua i ai i lenei tulaga, o lē o le a faamanuiaina mai lou alofa po o lau tausiga?

Tagai foi i le Isaia 1:17; Iakopo 1:27.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 81:3.E mafai ona e tuuina atu ni fatu pepa i tagata o le aiga ma valaaulia i latou e tusi ai se ata pe tusi ai se mea latou te fia tatalo e uiga i ai. Talanoa i le uiga o le, ia tatalo “e lē aunoa, i le leo ma i lou loto.”

Mataupu Faavae ma Feagaiga 81:5.Ina ia aoao e uiga i mataupu faavae o loo i lenei fuaiupu, atonu e mafai e tagata o le aiga ona faasoa mai ni faataitaiga o se taimi na latou lagonaina ai le “vaivai” po o le “auvaivai” ae na fesoasoani pe faamalosia i latou e se tasi. E mafai foi ona outou matamata i vitio e uiga i le auauna atu i isi, e pei o le “O Galuega a le Atua” po o le “O Le Vavega o le Taualuga” (ChurchofJesusChrist.org). Talanoa i auala e mafai ai e lou aiga ona auauna atu i taimi uma i ni auala faigofie i le tasi ma le isi.

Mataupu Faavae ma Feagaiga 82:8–10.Atonu o le a fesoasoani se taaloga faigofie i lou aiga e lagona ai le faafetai mo poloaiga a le Atua. E mafai e se tagata se toatasi o le aiga ona tuuina atu ni faatonuga i se tagata o le aiga ua nonoa mata, ina ia faia se sanuisi pe uia se auala felavasa’i. Mafaufau i se mea malie ma fatufatuai! Ona talanoa lea i auala ua faapei ai poloaiga a le Atua o faatonuga i lenei taaloga.

Mataupu Faavae ma Feagaiga 82:18–19.O le a se mea e mafai e tagata taitoatasi o le aiga ona fai e “faalelei atili [ai] ana taleni” ma “maua nisi taleni”? E ono malie le faia o se faaaliga taleni a le aiga. Mafaufau i ni auala e faaaofia ai taleni ia e le faigofie ona faaalia (e pei o meaalofa faaleagaga; tagai i le Mataupu Faavae ma Feagaiga 46:11–26). E mafai faapefea ona tatou faaaogaina a tatou taleni ma faasoa atu mea ua tatou maua ia manuia ai o tatou aiga ma tuaoi? O le a le uiga o le, ia faaaoga a tatou taleni “ma le manatu tasi i le mamalu o le Atua”?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina “Ua Ou Faia ‘Ea Se Lelei?” Viiga, nu. 136; tagai foi i le “Ideas to Improve Your Family Scripture Study.”

Faaleleia o Lo Tatou Aoao Atu

Fai atu fesili e taitai atu ai i le faatinoga. Mafaufau i fesili e musuia ai tagata o le aiga e mafaufau pe mafai faapefea ona latou ola atoatoa i le talalelei. “O fesili nei e masani lava e le o ni fesili mo talanoaga; e mo le manatunatu i ai faaletagata lava ia” (Aoao Atu i le Ala a le Faaola, 31).

O loo faamalolo e Iesu Keriso se alii

Ata o Iesu o loo faamalolo se alii na saunia e Dan Burr