Keriso ma le Taulealea Mauoa, saunia e Heinrich Hoffmann

19–25 Iulai

Mataupu Faavae ma Feagaiga 81–83

I Mea e “Tele Mea Ua Tuu Atu I Ai, E Tele Foi Mea Ua Manaomia Mai Ai”

E mafai faapefea ona fesoasoani faaaliga o loo i le Mataupu Faavae ma Feagaiga 81–83 i tamaiti o loo e aoaoina ina ia faia le lelei i o latou aiga ma uo?

Tusi Faamaumau Ou Lagona Uunai

Valaaulia le Fefaasoaai

Valaaulia tamaiti e faasoa mai se mea na latou faia e fesoasoani ai i se tasi i lenei vaiaso. E mafai faapefea e le auauna atu i isi ona fesoasoani ia i tatou e avea faapei o le tatou Faaola?

Aoao atu le Aoaoga Faavae: Tamaiti Laiti

Mataupu Faavae ma Feagaiga 81:3

E tatau ona ou tatalo e le aunoa.

Ina ua valaauina e le Alii ia Frederick G. Williams e avea ma se fesoasoani i le Perofeta o Iosefa Samita, na Ia fautuaina Frederick ia “faamaoni … i le tatalo e le aunoa.”

Gaoioiga e Mafai Ona Fai

• Faitau atu i tamaiti le fautuaga a le Alii ia “faamaoni … i le tatalo e le aunoa, i le leo ma i lou loto, i luma o tagata ma i le nao oe” (Mataupu Faavae ma Feagaiga 81:3). Faamatala po o le a le uiga o le tatalo i o tatou loto, ma faasoa atu se faataitaiga patino. Fesoasoani i tamaiti e mafaufau i ni taimi e mafai ai ona latou tatalo “i luma o tagata ma i le nao oe.”

• Aoao tamaiti i le auala e tatalo ai. Faamamafa atu e mafai ona latou faafetai i le Tama Faalelagi mo a latou faamanuiaga ma ole atu ia te Ia mo mea latou te manaomia. O se pese e faatatau i le tatalo, e pei o le “Ou Te Faafetai Ia Te Oe, Le Tama e” (Tusipese a Tamaiti, 9), e mafai ona fesoasoani i tamaiti ia iloa mea e fai i a latou tatalo. Tuu atu i tamaiti taitoatasi se avanoa e fai ai se tatalo puupuu.

• Fai atu i tamaiti e mafaufau i mea atonu latou te faafetai atu ai i le Tama Faalelagi pe ole atu ai ia te Ia. Tuu atu latou te tusia ni ata o nei mea ma faasoa atu i le vasega.

Mataupu Faavae ma Feagaiga 81:5; 82:19

E mafai ona ou auauna atu i tagata o loo siomia au.

E silafia e le Tama Faalelagi manaoga a Ana fanau taitasi, ma e masani ona Ia faaaogaina isi tagata—e pei o tamaiti o loo e aoaoina—e fesoasoani e ausia na manaoga. E mafai faapefea ona e fesoasoani i tamaiti ia iloa manaoga o isi ma auauna atu ia i latou?

Gaoioiga e Mafai Ona Fai

• Faitau le Mataupu Faavae ma Feagaiga 81:5 i tamaiti, ma fesoasoani ia i latou ia malamalama i fuaitau e pei o le “fesoasoani i e vaivai” ma “sii i luga lima ua tautau i lalo.” Tuu atu ia i latou e faatino auala e mafai ai ona tatou faia mea ua fai mai ai le Alii i lenei fuaiupu. Faaaoga ata po o vitio e faamatala ai ni tala faigofie o Iesu Keriso o loo auauna atu i isi (tagai Tusi Ata o le Talalelei, nu. 41, 42, 46, 47, 55; biblevideos.ChurchofJesusChrist.org). E mafai faapefea ona tatou mulimuli i le faataitaiga a le Faaola o le fesoasoani i isi?

• Usu le fuaiupu lona fa o le “Le Alofa o Lou Faaola” (Tusipese a Tamaiti, 42–43) po o se isi pese e faatatau i le auaunaga. Faamatala e uiga i se taimi na fesoasoani ai se tasi ia e lagona le alofa o le Faaola e ala i le auauna atu ia te oe.

• Faitau atu le Mataupu Faavae ma Feagaiga 82:19 i tamaiti, ma faamamafa atu le fuaitau “saili ai e tagata taitoatasi le lelei o lē la te tuaoi.” Faamalamalama atu o le uiga o lenei mea o le faia lea o mea e fesoasoani ai i o tatou tuaoi—e aofia ai ma o tatou aiga. Fesoasoani i tamaiti e mafaufau i auala e mafai ai ona latou auauna atu i se tasi i lenei vaiaso.

  

  Ua fetalai mai le Atua ia tatou auauna atu i isi e faaalia ai lo tatou alolofa mo Ia.

Mataupu Faavae ma Feagaiga 82:10

Ua folafola mai e le Atua faamanuiaga pe a ou usitai ia te Ia.

Ao latou tuputupu ae, atonu e mafaufau tamaiti pe aisea ua tuuina mai ai e le Atua ia i tatou poloaiga e tele. E mafai ona e fesoasoani i tamaiti ia malamalama ua Ia tuuina mai ia i tatou poloaiga e faamanuia ai i tatou.

Gaoioiga e Mafai Ona Fai

• Fesoasoani i tamaiti e mafaufau i poloaiga ua tuuina mai e le Atua ia i tatou (tagai, mo se faataitaiga, Esoto 20:4–17; Mataio 22:37–39; Mataupu Faavae ma Feagaiga 89:5–17). Tusi ata i luga o le laupapa e fesoasoani ai i tamaiti ia malamalama ma manatua nei poloaiga. Tuu atu ni faataitaiga o auala e mafai ai e poloaiga a le Atua ona faamanuia ma puipui i tatou.

• Faitau atu i tamaiti, “O Aʼu, o le Alii, e noatia aʼu pe a outou faia mea Ou te fai atu ai” (Mataupu Faavae ma Feagaiga 82:10). Fai atu i tamaiti e toe fai le fuaitau lenei mo ni nai taimi faatasi ma oe, ma mafaufau i auala e fesoasoani latou te manatua ai, e pei o le fai atu ia i latou e patipati i le pao o le fuaitau. Molimau atu a tatou usitaia poloaiga a le Atua, Na te tausia Ana folafolaga ia i tatou.

Aoao atu le Aoaoga Faavae: Tamaiti Matutua

Mataupu Faavae ma Feagaiga 81:3

E mafai ona ou tatalo “i le leo ma i [lo’u] loto.”

E mafai faapefea ona e musuia tamaiti e faasaga atu i le Alii “i le tatalo e le aunoa” pe a latou manaomia se fesoasoani?

Gaoioiga e Mafai Ona Fai

• Valaaulia se tagata e faitau le Mataupu Faavae ma Feagaiga 81:3, ma fesili atu i tamaiti mo le uiga o le tatalo “i [lou] loto.” Faasoa atu se aafiaga na e tatalo leotele ai po o totonu o lou loto ma na fesoasoani mai le Alii ia te oe. Ia fai atu foi i tamaiti e faasoa mai o latou lava aafiaga. E mafai faapefea e le tatalo ona tatou latalata atili atu ai i le Tama Faalelagi?

• Faitau pe usu faatasi ma tamaiti se viiga e faatatau i le tatalo, e pei “Pe na Faia Sau Tatalo?” po o “Le Itula o Talosaga” (Viiga, nu. 75, 77). Valaaulia ia tamaiti e faasoa mai se fuaitau mai le viiga e fesoasoani ia i latou e malamalama ai i se mea e uiga i le tatalo. Tuu atu se taimi ia i latou e mafaufau loloto ai po o a mea e mafai ona latou faia e faaleleia atili ai a latou tatalo ona tusi lea o o latou manatu.

Mataupu Faavae ma Feagaiga 81:5

E finagalo le Atua ou te auauna atu ma faamalosia i latou o loo manaomia le fesoasoani.

Fesoasoani ia malamalama tamaiti e tele auala e mafai ai ona latou auauna atu i o latou aiga, uo, ma tuaoi i aso uma.

Gaoioiga e Mafai Ona Fai

• Tusi i luga o le laupapa se ata o lima ma tulivae. Fai atu i tamaiti e faitau le Mataupu Faavae ma Feagaiga 81:5 e aoao ai i fetalaiga a le Alii e faatatau i nei vaega o le tino. Matamata le vitio “Pass It On” (ChurchofJesusChrist.org), pe faasoa atu auala na tou vaai ai ma tamaiti i isi tagata o auauna atu le tasi i le isi. E mafai faapefea ona tatou nofouta atili i tagata e manaomia le fesoasoani o loo siomia i tatou? Valaaulia tamaiti e auauna atu i se tagata se toatasi i lenei vaiaso. Mo manatu i auala e auauna atu ai i isi, usu se pese e faatatau i le auaunaga, e pei o le “Ua Ou Faia Ea Se Lelei?” (Viiga, nu. 136).

• Valaaulia tamaiti e auauaʻi e faatulaga tomino (po o ni mea faitino tai faapena) ao faalau ni auala e mafai ona latou auauna atu ai i isi tagata. Fai atu i se tamaitiiti e tulei i lalo se tomino ma vaai i le aafiaga i isi tomino. E mafai faapefea e a tatou auaunaga ona i ai se aafiaga tai faapena i tagata o loo siomia i tatou? (Tagai foi i le vitio “Dominoes,” ChurchofJesusChrist.org.) Faamatala e uiga i le auala na uunaia ai oe e auauna atu i se isi tagata ona o le auaunaga alofa a se isi.

Mataupu Faavae ma Feagaiga 84:8–10

Ua folafola mai e le Atua faamanuiaga pe a ou usitai ia te Ia.

Ao atia’e le talitonu a tamaiti i folafolaga a le Atua, o le a tuputupu a’e foi le latou naunautaiga e usitai i Ana poloaiga.

Gaoioiga e Mafai Ona Fai

• Valaaulia tamaiti e vaai faalemafaufau e i ai so latou uo e mafaufau faapea ua anoanoai tele poloaiga ua tuuina mai e le Atua. Fai atu ia i latou e saili le Mataupu Faavae ma Feagaiga 82:8–10 mo se mea e mafai ona fesoasoani i le latou uo ia malamalama i le pogai e tuuina mai ai e le Atua poloaiga. Faasoa atu pe ua faapefea ona faamanuiaina oe ona o poloaiga a le Atua, ma valaaulia tamaiti e faasoa mai foi o latou manatu.

• Ina ia fesoasoani i tamaiti ia malamalama i folafolaga a le Tama Faalelagi ia i tatou, vaevae le vasega i ni vaega se tolu, ma tuu atu i vaega taitasi se tasi o mau nei e faitau: Mataupu Faavae ma Feagaiga 1:37–38; 82:10; 130:20–21. Valaaulia i latou e faasoa mai se mea ua latou aoaoina e uiga i folafolaga a le Tama Faalelagi. E faapefea e lo tatou usiusitai ona aafia ai faamanuiaga e mafai ona tatou mauaina? Fesoasoani i tamaiti e mafaufau i faataitaiga mai i o latou olaga pe mai i tusitusiga paia na oo mai ai faamanuiaga mai le Atua ona o le usitai.

• Faasoa atu se aafiaga patino e molimau i mataupu faavae o loo aoao mai i le Mataupu Faavae ma Feagaiga 82:8–10. O a ni auala ua e faalagolago ai i le Alii ma Ana folafolaga?

Fautuaina le Aoaoina i le Aiga

Valaaulia tamaiti e mafaufau i auala latou te mananao e auauna atu ai i se tasi o le latou aiga i lenei vaiaso. I le taimi o le lesona i le vaiaso a sau, tuu atu ia i latou e faasoa mai mea sa latou faia.

Faaleleia o Lo Tatou Aoao Atu

Fesoasoani i tamaiti ia avea ma tamaiti aoao sili atu. O le aoao atu e sili atu i le na ona tuu atu o le upumoni. O lona uiga o le fesoasoani lea i isi e atia’e le ola tutoatasi faaleagaga. Nai loo le tau atu i tamaiti o le auala e mafai ona latou auauna atu ai i isi, mo se faataitaiga, uunai i latou e mafaufau i ni o latou lava auala.