Sulufaiga, saunia e Shaelynn Abel

5–11 Iulai

Mataupu Faavae ma Feagaiga 76

“O Le a Tele Lava lo Latou Taui ma O Le a Faavavau Lo Latou Mamalu”

A o e suesue i le Mataupu Faavae ma Feagaiga 76, mafaufau loloto i mea e finagalo le Tama Faalelagi ia iloa e tamaiti o lau vasega e uiga ia te Ia, le Faaola, i latou lava, ma le latou taunuuga e faavavau.

Tusi Faamaumau Ou Lagona Uunai

Valaaulia le Fefaasoaai

Faaali atu i tamaiti ata po o itulau o gaoioiga mai le otootoga o lenei vaiaso po o otootoga talu ai. Tuu atu i tamaiti e taʻu atu ia te oe mea latou te vaaia i nei ata ma mea latou te manatua na latou aoaoina mai ai.

Aoao atu le Aoaoga Faavae: Tamaiti Laiti

Mataupu Faavae ma Feagaiga 76:24

O i tatou uma lava o fanau a le Atua.

Na saunoa Peresitene Dallin H. Oaks e faapea, afai tatou te aoao atu “i se tagata talavou le manatu mamana o ia o se atalii/afafine o le Atua,” e mafai ona tatou tuu atu ia te ia le “faaaloalo ia te ia lava ma le uunaiga e feosofai ai e feagai ma faafitauli o le olaga” (“Manatu Mamana,” Liahona, Ian. 1996,).

Gaoioiga e Mafai Ona Fai

• Ina ia fesoasoani i tamaiti ia malamalama i lo latou gafatia e avea ai faapei o le Atua, saili ni auala e faaali atu ai ia i latou, o manuvaefa laiti e tuputupu ae e avea e pei o o latou matua—atonu e mafai ona faafetaui e tamaiti ata o manuvaefa ma ata o manuvaefa laiti. Susue tusitusiga paia i le Mataupu Faavae ma Feagaiga 76:24, ma fai atu i tamaiti o i tatou uma o “atalii ma afafine fanauina mo le Atua.” Molimau atu o le Atua o le tatou Tama ma e mafai ona tatou tuputupu ae e avea faapei o o tatou Matua Faalelagi.

• Usu faatasi le “O A’u se Atalii o le Atua” (Tusipese a Tamaiti, 2-3), ma fai i tamaiti e faasino ia i latou lava pe a latou usuina le “A’u.” Fai atu ia i latou e toe usu le pese, suitulaga le “O A’u” i le “O oe” ma faasino atu i se isi tagata o le vasega.

Mataupu Faavae ma Feagaiga 76:40–42

O Iesu Keriso o le Faaola o le lalolagi.

O le upu talalelei o lona uiga o tala e lelei. O le tala lelei e aumaia e le talalelei o le “na afio mai [Iesu Keriso] i le lalolagi … [e] faamamā mai amioletonu uma” (fuaiupu 41).

Gaoioiga e Mafai Ona Fai

• Tau atu i tamaiti e uiga i ni tala lelei na e faalogo i ai lata mai nei. Fai i ai e faasoa mai se tala lelei na latou faalogo i ai. Ona faasoa atu lea ia i latou le tala fiafia o le talalelei i le faitauina o le Mataupu Faavae ma Feagaiga 76:41–42. Fai atu i tamaiti po o a ni o latou lagona i lenei tala lelei. Faasoa atu ma i latou le fiafia ua aumaia e lenei tala lelei ia te oe.

• Faaali atu se ata o Iesu Keriso. Fesili atu i tamaiti pe latou te iloa le mea na faia e Iesu Keriso mo i tatou. Faaali atu i tamaiti se mea palapala ma se mea mama (e pei o se solosolo paepae po o se pepa), ma faamalamalama atu o le agasala e pei o palapala i luga o o tatou agaga, ae o Iesu Keriso na afio mai e fesoasoani e toe faamama i tatou.

  

  Tuu Mai Tamaiti, saunia e J. Kirk Richards

Mataupu Faavae ma Feagaiga 76:62

E finagalo le Tama Faalelagi ia ou toe foi atu e mau faatasi ma Ia e faavavau.

O le faaaliga a Iosefa Samita ma Sini Rikitone o le malo selesitila na faaalia mai ai faamanuiaga maoae ua saunia e le Atua mo Lana fanau, faapea foi ma mea e tatau ona tatou faia e maua ai na faamanuiaga.

Gaoioiga e Mafai Ona Fai

• Faamatala atu i tamaiti e uiga i malo o mamalu e tolu lea na vaai i ai Iosefa ma Sini i le la faaaliga. (Atonu e te faitauina i tamaiti se vaega po o le mataupu atoa o le “Mataupu 26: O Malo e Tolu o le Lagi” [Tala o le Mataupu Faavae ma Feagaiga, 97–103] pe faaali le vitio talafeagai i luga o le ChurchofJesusChrist.org.) Fesili i tamaiti pe o le a le mea latou te fiafia i ai e uiga i le faaaliga. Taulai faapitoa i le faamatalaina o le malo o selesitila, ma molimau atu o i le nofoaga e finagalo le Tama Faalelagi ia i ai uma i tatou taitoatasi.

• Faitau i tamaiti le Mataupu Faavae ma Feagaiga 76:62, ma valaaulia tamaiti e tusi o latou lava ata faapea ma le Tama Faalelagi ma Iesu Keriso i totonu o le malo selesitila.

Aoao atu le Aoaoga Faavae: Tamaiti Matutua

Mataupu Faavae ma Feagaiga 76:5, 41–42, 69

O Iesu Keriso o lo’u Faaola.

Fesoasoani i tamaiti ia malamalama o faamanuiaga matagofie ua folafola mai e le Atua i e faamaoni i le isi olaga ua mafai ona o le Faaola o Iesu Keriso.

Gaoioiga e Mafai Ona Fai

• Tusi i luga o le laupapa O le a le mea ua faia e Iesu Keriso mo a’u? Fai atu i tamaiti taitoatasi e faitau leleoa le fuaiupu 5, fuaiupu 41–42, po o le fuaiupu 69 i le vaega 76, e vaavaai ai mo tali talafeagai i le fesili o loo i luga o le laupapa. Tuu atu ia i latou e faasoa a latou tali (tagai foi “Na Ia Auina Mai Lona Alo,” Tusipese a Tamaiti, 20–21). E mafai faapefea ona tatou faaalia lo tatou loto faafetai mo mea na faia e le Faaola mo i tatou?

• Tusi le mataupu faavae o le faatuatua lona tolu i luga o le laupapa, tuu ni avanoa mo upu autu. Tuu atu i tamaiti nei upu o loo misi [ua tusia] i ni fasipepa, ma valaaulia i latou e tuu a latou upu i le tulaga sao i luga o le laupapa. O le a le mea o loo aoao mai e lenei mataupu faavae o le faatuatua e uiga i le mafuaaga tatou te manaomia ai Iesu Keriso? (tagai foi i le vitio “Why We Need a Savior,” ChurchofJesusChrist.org).

Mataupu Faavae ma Feagaiga 76:12, 15–19, 114–16

O le suesueina o tusitusiga paia e mafai ona fesoasoani ia te a’u e “malamalama i mea a le Atua.”

Na maua e Iosefa Samita ma Sini Rikitone le Mataupu Faavae ma Feagaiga 76 a o la manatunatu loloto i tusitusiga paia. Fesoasoani i tamaiti ia iloa le auala e mafai ai e le suesueina o tusitusiga paia ona valaaulia faaaliga e ala mai i le Agaga Paia.

Gaoioiga e Mafai Ona Fai

• Fesili atu i tamaiti pe o latou iloa le mea na fai e Iosefa Samita ma Sini Rikitone i le taimi na la maua ai le faaaliga i le Mataupu Faavae ma Feagaiga 76. Valaaulia i latou e faitau fuaiupu 15–19 e sue ai. Faasoa atu se taimi na e maua ai se musumusuga ao faitauina tusitusiga paia, ma fai atu i tamaiti e talanoa e uiga i o latou lagona faaleagaga e i ai pe a faitau tusitusiga paia.

• Valaaulia tamaiti e moeiini ma taumafai e fai se galuega faigofie, e pei o le valiina o se ata po o le susueina o tusitusiga paia i se fuaiupu patino. O a nisi mea e faigata ona fai pe a o moeiini o tatou mata faaleagaga? Faitau faatasi le Mataupu Faavae ma Feagaiga 76:12, 15–19, 114–116 e saili ai mea e tatau ona tatou faia ia pupula faaleagaga ai o tatou mata.

Mataupu Faavae ma Feagaiga 76:50–70

Ua saunia e le Tama Faalelagi se mamalu o le malo o selesitila mo au.

O le iloa e uiga i le mamalu o le malo selesitila lea ua saunia e le Atua, e mafai ona musuia ai tamaiti ia “manumalo e ala i le faatuatua” (fuaiupu 53) i tofotofoga ma faaosoosoga e feagai ma i latou.

Gaoioiga e Mafai Ona Fai

• Afai e fesili mai se tasi ia i tatou, “Aisea e tatau ai ona ou mulimuli ia Iesu Keriso ma tausi Ana poloaiga?” o le a sa tatou tala? Valaaulia tamaiti e saili mo tali i le Mataupu Faavae ma Feagaiga 76:50–70, lea o loo faamatala ai i latou e mauaina le ola e faavavau i le malo selesitila. Tuu atu i tamaiti e faatino le taliina o le fesili. Tuu atu lau molimau i faamanuiaga maoae ua sauniaina e le Tama Faalelagi mo i tatou pe a tatou mulimuli ia Iesu Keriso.

• Tusi se ata tele o le la i luga o se fasipepa, ma otioti i ni fasi paso. Tu’u atu i tamaiti taitoatasi se fasi paso, ma se fuaitau o mau nei e faitau: Mataupu Faavae ma Feagaiga 76:51; 76:52; 76:53; 131:1–2. Fai atu i tamaiti e saili i totonu o latou fuaiupu se mea e tatau ona tatou faia e maua ai le ola e faavavau i le malo selesitila (o nisi fuaiupu e ova atu ma le tasi le tali), ma tusi i luga o latou fasi pepa o le la. Ao latou galulue faatasi e faatulaga le paso, faailoa atu lou talitonuga ia i latou faatasi ai ma le fesoasoani a le Faaola, e mafai ona latou agavaa ai mo le malo selesitila.

Fautuaina le Aoaoina i le Aiga

Valaaulia tamaiti e faaaoga le itulau o gaoioiga o le vaiaso lenei e aoao ai o latou aiga i mea ua latou aoaoina e uiga i le faaaliga na maua e Iosefa Samita ma Sini Rikitone.

Faaleleia o Lo Tatou Aoao Atu

Faaaoga tusitusiga paia. Tusa lava pe o tamaiti o loo e aoaoina e le mafai ona faitau, ia faaaoga soo tusitusiga paia a o e aoaoina i latou. Tuu atu ia latou vaai mai o upumoni o loo e faasoaina atu e mai tusitusiga paia.