mamoe o loo mulimuli ia Iesu

Alu i le Fale, saunia e Yongsung Kim

12–18 Iulai

Mataupu Faavae ma Feagaiga 77-80

“O Le A Ou Taitaia Outou i le Ala”

Na ta’u atu e le Alii ia Iosefa Samita, o le a Ia ”tautala atu i [ona] taliga upu o le poto” (Mataupu Faavae ma Feagaiga 78:2). O a ni upu o le poto e te maua a o e suesue i le Mataupu Faavae ma Feagaiga 77-80?

Tusifaamaumau Ou Lagona Uunaia

E le’i atoa le lua o tausaga talu ona toefuatai mai le Ekalesia a Iesu Keriso, ae ua oo i le silia ma le 2,000 tagata auai ma sa vave ona salalau atu. Ia Mati 1832, sa feiloai ai Iosefa Samita ma taitai o le Ekalesia “e soalaupule i pisinisi faaleEkalesia”: o le manaomia ona lolomi o faaaliga, faatauga mai o le fanua e faapotopoto i ai, ma le tausiga mo e matitiva (tagai i le Mataupu Faavae ma Feagaiga 78, ulutala o le vaega). Ina ia ausia nei manaoga, na valaau ai le Alii i se vaega toaitiiti o taitai o le Ekalesia e faatulaga le Kamupani Aufaatasi, o se vaega o le a tuufaatasia a latou taumafaiga e “ave i luma le faamoemoe” o le Alii (fuaiupu 4) i nei eria. Ae e ui lava i mataupu faaletaitai faapena, sa taulai lava le Alii i mea o le faavavau. Mulimuli ane, o le faamoemoega o se masini lolomitusi po o se faleteuoloa—e pei o isi mea uma i le malo o le Atua—ua mo le saunia o Lana fanau ia maua “se nofoaga i le lalolagi selesitila” ma “ʼoa o le faavavau” (fuaiupu 7, 18). Ma afai o na faamanuiaga e faigata ona malamalama i ai i le taimi nei, i le lotolotoi o le pisi o le olaga i aso taitasi, ua Ia faamautinoa mai ia i tatou, “Ia fiafia, ona o le a Ou taitaia outou i le ala” (fuaiupu 18).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 77

E faaali mai e le Atua Ana mealilo ia i latou o e saili ia iloa i latou.

O le sefululua o tausaga talu ona mavae le Uluai Faaaliga, o le valaaulia o loo i le Iakopo 1:5 ia “ole atu i le Atua” sa faaauau pea ona taiala ai Iosefa Samita i taimi na te le maua ai le poto. Ina ua i ai ni a la fesili ma Sini Rikitone e uiga i le tusi o Faaaliga a o la galulue i le faaliliuga musuia o le Tusi Paia, sa o se mea masani le sailia e Iosefa o le poto mai le Atua. A o e faitau i le Mataupu Faavae ma Feagaiga 77, mafaufau e tusifaamaumau ou malamalamaaga i mataupu talafeagai o loo i le tusi o Faaaliga.

E le gata i lea, ia mafaufau loloto i auala e mafai ona e mulimuli ai i le faataitaiga a le Perofeta i taimi e te suesue ai i tusitusiga paia. Atonu e te fesili atu i le Tama Faalelagi, “O le a se mea e tatau ona ou malamalama i ai?”

Iosefa Samita ma Sini Rikitone o loo faitau

Faaliliuga o le Tusi Paia, saunia e Liz Lemon Swindle

Mataupu Faavae ma Feagaiga 78

O le a le Kamupani Soofaatasi?

Sa amataina le Kamupani Soofaatasi e pulea lelei ai pisinisi lolomitusi ma mataupu faapisinisi a le Ekalesia i Ohaio ma Misuri. Sa i ai Iosefa Samita, Newel K. Whitney, ma isi taitai o le Ekalesia o e sa tuufaatasi a latou punaoa ia ausia ai manaoga faaletino o le Ekalesia ua faatupulaia. O le mea e faanoanoa ai, sa pau atu le Kamupani Aufaatasi i aitalafu ma sa faamaapeina ai i le 1834 ina ua le mafai ona taulimaina ia aitalafu.

Tagai foi i le “Newel K. Whitney and the United Firm,” Revelations in Context, 142–47; “Kamupani Aufaatasi,” Church History Topics, ChurchofJesusChrist.org/study/church-history.

Mataupu Faavae ma Feagaiga 78:1–7

E mafai ona ou fesoasoani e “ave i luma le faamoemoe” o le Ekalesia.

Sa ta’u atu e le Alii ia Iosefa Samita ma isi taitai o le Ekalesia, o le puleaina o se faleteuoloa ma se falelomitusi o le a fesoasoani e “ave i luma le faamoemoe, lea ua outou tautino i ai” (Mataupu Faavae ma Feagaiga 78:4). O le a sau tala o le a le “faamoemoe” o le Ekalesia? Mafaufau loloto i lenei mea a o e faitau i le Mataupu Faavae ma Feagaiga 78:1-7. Atonu o le mafaufau i nei fuaiupu e mafai ona faatosina ai le ala e te faataunuu ai lou valaauga i le Ekalesia pe tautua ai lou aiga. E mafai faapefea e lau tautua ona “ave i luma le faamoemoe” o le Alii? O faapefea ona saunia ai oe mo “se nofoaga i le lalolagi selesitila”? (fuaiupu 7).

Mataupu Faavae ma Feagaiga 78:17-22

O le a taitaia a’u e le Alii i le ala.

Pe e te lagonaina ea le pei o oe o se tamaitiiti laitiiti, atonu ona o se mea e te “lei malamalama” [i ai] pe “le mafai ona … gafatia”? (Mataupu Faavae ma Feagaiga 78:17–18). Vaavaai mo le fautuaga i nei fuaiupu e mafai ona fesoasoani ia te oe “ia fiafia” (fuaiupu 18) i taimi faapena. Aisea e te manatu e ta’u ai e le Alii i nisi o taimi ia Ona soo o “fanau iti”? (fuaiupu 17). E mafai foi ona e mafaufau loloto i le ala o ono “taitaia [ai oe e le Alii] i le ala” (fuaiupu 18).

Mataupu Faavae ma Feagaiga 79–80

E sili atu le taua o le valaau a le Atua e auauna atu nai lo o le nofoaga ou te auauna atu ai.

E faatatau i le Mataupu Faavae ma Feagaiga 80, na aoao mai ai Elder David A. Bednar, “Atonu o se tasi o lesona o loo aoao mai e le Faaola ia i tatou i lenei faaaliga e faapea, o se tofiga e galue i se nofoaga faapitoa e tatau ma taua ae e lona lua i le valaauga e auauna atu” (“Valaauina i le Galuega,” Ensign po o le Liahona, Me 2017, 68). Mafaufau i ou valaauga faaleEkalesia o loo i ai nei ma taimi ua tuanai. O a ni aafiaga ua fesoasoani ia te oe e te iloa ai ua moni upu a Elder Bednar? O a ni lesona faaopoopo e mafai ona e maua i le Mataupu Faavae ma Feagaiga 79--80 e mafai ona fesoasoani ai i se tagata ua faatoa mauaina se valaauga fou?

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 77:2.A uma ona faitau le fuaiupu lenei, e mafai e tagata o le aiga ona tusi ni ata o “manu, … mea fetolofi, … [po o] manu felelei o le ‘ea” e sili ona latou fiafia i ai na foafoaina e le Atua. O a ni mea tatou te aoaoina e uiga i foafoaga a le Atua mai i lenei fuaiupu? (tagai foi i le Mataupu Faavae ma Feagaiga 59:16-20). E mafai foi ona outou usuina se pese e uiga i foafoaga a le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16), ma faaali atu le ata vali o loo avatu ai i le otootoga lenei.

Mataupu Faavae ma Feagaiga 77:14.O le fuaiupu lenei o loo faamalamalama mai ai na ai e Ioane se tusi lea na faatusa i lana misiona ia faapotopoto mai Isaraelu. O le a se mea ua fautuaina mai e le faailoga o le ai e uiga i auala e tatau ona tatou taulima muamua ai a tatou matafaioi i le faapotopotoina o Isaraelu po o le faia o isi mea e finagalo le Alii tatou te faia? O nai isi mau nei o loo faapea ona faaaoga ai le ai e aoao mai ai se upumoni faaleagaga: Ioane 6:48–51; 2 Nifae 32:3; Moronae 4. Atonu e mafai ona e faia se kuka e fiafia i ai le aiga e aai faatasi ai i le taimi o le talanoaga lenei.

Mataupu Faavae ma Feagaiga 78:17–19.E mafai e tagata o le aiga ona tusi ni ata o faamanuiaga mai le Atua ua latou faafetai ai. O le a se mea o tatou faia e faailoa atu ai lo tatou loto faafetai mo nei faamanuiaga? E mafai foi ona outou talanoaina le ala o loo mulimuli ai lou aiga i le fautuaga e talia “mea uma ma le faafetai” (fuaiupu 19). O le a le mea na folafola mai e le Alii ia i latou o e faia?

Mataupu Faavae ma Feagaiga 79:1.Faasoa atu lau molimau e uiga “i le mana” ua e mauaina i le taimi na faauuina pe vaetofia ai oe i valaauga o le Ekalesia. O a ni meaalofa ma ni musumusuga faapitoa na faamanuia ai oe e le Alii a o e auauna atu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faitau Ou Manuia,” Viiga, nu. 151.

Faaleleia o Lo Tatou Aoao Atu

Tusi se ata. I le avea ai o se aiga, atonu tou te faitauina ni nai fuaiupu ona tuu lea o se taimi i tagata o le aiga e tusi ai se ata o se mea e fesootai ma mea sa latou faitauina. Faapipii solo ata i le tou fale e faamanatu ai i lou aiga ia mataupu faavae na outou aoaoina.

faatoaga ma manuvaefa

Faatoaga a le Atua, saunia e Sam Lawlor