Pele i le Fatu o le Leoleo Mamoe, saunia e Simon Dewey

28 Iuni–4 Iulai

Mataupu Faavae ma Feagaiga 71–75

“E Leai Se ʼAuupega Ua Faia E Faasaga Ia Te Oulua E Manumalo”

Na aoao mai Elder Quentin L. Cook, “O le faatosinaga a le Agaga Paia e tele lava ina i ai i le suesueina o tusitusiga paia ma tatalo a le tagata lava ia i le aiga” (“Liuaina Loloto ma Tumau i le Tama Faalelagi ma le Alii o Iesu Keriso,” Ensign po o le Liahona, Nov. 2018, 10).

Tusifaamaumau Ou Lagona Uunaia

Talu mai lava lona taulealea, sa feagai lava Iosefa Samita ma tagata faitio—faapea foi ma fili—ao taumafai o ia e fai le galuega a le Atua. Ae atonu na faapitoa lava le faanoanoa tele i le faaiuga o le 1831 ina ua amata ona faitioina faalauaitele ma le ita e Ezra Booth le Ekalesia, ona o lenei tulaga, o le tagata faitio o sē sa avea muamua ma tagata talitonu. Na vaai Ezra o faaaoga e Iosefa le mana o le Atua e faamalolo ai se tamaitai. Sa valaaulia o ia e o faatasi ma Iosefa i le sailiiliga muamua lava o le fanua o Siona i Misuri. Peitai, talu mai lena taimi sa aluese ai lona faatuatua ma, i se taumafaiga e faaleaga le Perofeta, sa ia lolomiina ai ni faasologa o tusi i se nusipepa a Ohaio. Ma sa foliga mai sa manuia ana taumafaiga: o “lagona ita na tutupu mai e faasaga i le Ekalesia” i le eria (Mataupu Faaave ma Feagaiga 71, ulutala o le vaega). O a ni mea e tatau ona fai e tagata talitonu i se tulaga faapena? E ui ina e le’o i ai se tali sa’o se tasi mo tulaga uma lava, e foliga mai e masani lava—e aofia ai le tulaga lenei i le 1831—o se vaega o le tali a le Alii o le, ia puipui le upumoni ma faasa’o faamatalaga pepelo e ala i le “folafolaina atu [o le] talalelei” (fuaiupu 1). Ioe, o le a i ai e le aunoa tagata e faitio i le galuega a le Alii, ae i le iuga, “e leai se ʼauupega ua faia e faasaga [i ai] e manumalo” (fuaiupu 9).

Tagai i le “Ezra Booth ma Isaac Morley,” Revelations in Context, 134.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 71

O le a faafememea’i e le Alii ia tagata faitio o Lana galuega i Lana lava taimi.

Atonu tatou te popole pe a tatou faalogo i tagata e faitioina pe ulagia le Ekalesia po o ona taitai, ae maise lava pe a tatou popole, o le a faatosinaina e na faitioga ia tagata tatou te iloa ma alolofa i ai. Ina ua tupu se mea faapena i Ohaio i le 1831 (tagai i le ulutala o le vaega o le Mataupu Faavae ma Feagaiga 71), o le savali a le Alii ia Iosefa Samita ma Sini Rikitone, sa o se savali o le faatuatua, ae le o le mata’u. A o e suesue i le Mataupu Faavae ma Feagaiga 71, o a ni mea e te maua e atinae ai lou faatuatua i le Alii ma Lana galuega? O le a se vaega ua faagaeetia ai oe e uiga i le faatonuga na tuuina atu e le Alii i Ana auauna i lenei tulaga?

Tagai foi i le Robert D. Hales, “Lototele Faakerisiano: O Le Tulaga Manaomia o se Soo,” Ensign po o le Liahona, Nov. 2008, 72–75; Jörg Klebingat, “Defending the Faith,” Ensign, Set. 2017, 49–53.

Mataupu Faavae ma Feagaiga 72

O epikopo o tausimea i mataupu faaleagaga ma faaletino o le malo o le Atua.

Ina ua valaauina Newel K. Whitney e avea ma epikopo lona lua o le Ekalesia, sa fai si eseese o ona tiute mai i tiute o epikopo i aso nei. Mo se faataitaiga, sa vaai e Epikopo Whitney le faapaiaga o le fanua ma le faatagaga e nofofo ai i Misuri, i le laueleele o Siona. Ae a o e faitau e uiga i lenei valaauga ma tiute i le Mataupu Faavae ma Feagaiga 72, atonu e ono maitauina ai nisi o sootaga i mea o loo faia e epikopo i aso nei—o le mea e sili ai i le agaga, pe afai e le o mea fitoitonu, o o latou tiute. Mo se faataitaiga, o a ni auala e te “tuu atu [ai] … se tala” i lou epikopo? (fuaiupu 5). I le a le agaga e “tausi [ai e lou epikopo] le faleteuoloa o le Alii” ma faafoe [mea ua foai] faapaiaina e tagata o le uarota? (tagai i fuaiupu 10, 12). Na faapefea ona fesoasoani se epikopo ia te oe?

Tagai foi i Autu o le Talalelei, “Epikopo,” topics.ChurchofJesusChrist.org.

Na faafoe e Newel K. Whitney le faleteuoloa a epikopo.

Mataupu Faavae ma Feagaiga 73

E mafai ona ou sailia ni avanoa e faasoa atu ai le talalelei.

Ina ua toe foi mai Iosefa Samita ma Sini Rikitone mai le la misiona talai puupuu e toe faalelei nisi o faaletonu sa faia e Ezra Booth (tagai i le Mataupu Faavae ma Feagaiga 71), sa ta’u atu e le Alii ia i laua e toe foi i le galuega o le faaliliuga o le Tusi Paia (tagai i le Bible Dictionary, “Joseph Smith Translation”). Ae sa finagalo lava o Ia ia faaauau pea ona laua talai atu le talalelei. A o e faitau i le Mataupu Faavae ma Feagaiga 73, mafaufau pe mafai faapefea ona e faia le talaiga o le talalelei o se mea e faifaipea, “e oo i ai le mafai” (fuaiupu 4)—po o le talafeagai—o se vaega o lou olaga faapea ai ma isi ou tiutetauave.

Mataupu Faavae ma Feagaiga 75:1–12

E faamanuia e le Alii i latou o e folafola atu ma le faamaoni Lana talalelei.

O le tali atu i le poloai ia “outou o atu i le lalolagi atoa” e talai atu le talalelei (Mataupu Faavae ma Feagaiga 68:8), e toatele toeaina faamaoni na sailia ni faamatalaga faaopoopo e uiga i le ala na finagalo le Alii latou te faataunuu ai lenei poloai. O a ni upu ma fuaitau e te maua i le Mataupu Faavae ma Feagaiga 75:1–12 e fesoasoani e te malamalama ai i le ala e talai atu ai le talalelei ma le mataalia? O a faamanuiaga ua folafola atu e le Alii i faifeautalai faamaoni? Mafaufau pe faapefea ona faatatau nei faatonuga ma faamanuiaga ia te oe, a o e faasoa atu le talalelei.

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 71.O a mea na fai atu ia Iosefa Samita ma Sini Rikitone e fai ina ua faitioina e isi le Ekalesia ma ona taitai? E faapefea ona tatou “saunia le ala” mo tagata ia maua ai faaaliga a le Atua? (Mataupu Faavae ma Feagaiga 71:4).

Mataupu Faavae ma Feagaiga 72:2.Ua faapefea ona faamanuiaina e epikopo lo tatou aiga? O le a se mea ua saunoa mai lo tatou epikopo tatou te faia, ma e mafai faapefea ona tatou lagolago atu ia te ia? Atonu e mafai ona faia e lo outou aiga se kata e faafetaia lo outou epikopo mo lana auaunaga.

Mataupu Faavae ma Feagaiga 73:3–4.Mata o le a manuia lou aiga mai le aoao e uiga i le Faaliliuga e Iosefa Samita o le Tusi Paia? (tagai Bible Dictionary, “Joseph Smith Translation”). E mafai ona e suesueina ni nai fuaitau ia sa toefaasa’oina i le Faaliliuga a Iosefa Samita ma talanoa i upumoni taua na faaali mai e le Alii e ala mai i le Perofeta. Mo nisi o faamatalaga, tagai i le Faaliliiuga a Iosefa Samita o le Kenese 14:25–40 ma le Kenese 50:24–38 i le Faaopoopoga i le Tusi Paia; vaefaamatalaga eseese i le Mataio 4:1–11; ma le Luka 2:46, vaefaamatalaga i.

Mataupu Faavae ma Feagaiga 74:7.O le a le mea ua aoao mai e lenei fuaiupu ia i tatou e uiga ia Iesu Keriso ma tamaiti laiti?

Mataupu Faavae ma Feagaiga 75:3–5, 13, 16.E mafai ona e fesoasoani i lou aiga ia malamalama i le ala ua finagalo le Alii tatou te auauna atu ai ia te Ia e ala i le talanoa e uiga i le eseesega i le va o le “paie” ma le “galue ma o [tatou] malosi atoa.” Atonu e mafai ona outou filifilia nisi o feau i le fale ma valaaulia tagata o le aiga e faataitai ona fai o na feau ma le faapaie, ona toe faataitai lea ona fai ma o latou malosi atoa. E mafai faapefea ona tatou auauna atu i le Atua ma o tatou malosi atoa? E tusa ai ma le Mataupu Faavae ma Feagaiga 75:3–5, 13, 16., o le a le mea ua Ia folafola mai i Ana auauna faamaoni?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faamalosi ia i le Galuega Nei,” Viiga, nu. 152.

Faaleleia o Suesuega Faaletagata Lava Ia

Tagai mo ni upu ma fasifuaitau musuia. A o e faitau, e ono aumai e le Agaga ni upu ma ni fuaitau faapitoa i lou mafaufau. Mafaufau e tusifaamaumau ia upu po o fuaitau mai le Mataupu Faavae ma Feagaiga 71–75 e musuia ai oe.

Ata o se alii talavou ma se taitai perisitua na saunia e D. Keith Larson