revelation manuscript book in display case

21–27 Iuni

Mataupu Faavae ma Feagaiga 67–70

“Taua … o Faamanuiaga i le Lalolagi”

E ui o le tele o faaaliga i le Mataupu Faavae ma Feagaiga sa faatatau atu i tagata na fitoitonu i ai i ni tulaga patino, ae “ua aoga mo tagata uma” (“O Le Molimau a le Au Aposetolo e Toasefululua i le Moni o le Tusi o Mataupu Faavae ma Feagaiga,” faatomuaga i le Mataupu Faavae ma Feagaiga). A o e suesue, vaavaai mo upumoni ma mataupu faavae e aoga mo oe.

Tusifaamaumau Ou Lagona Uunaia

Mai i le 1828 e oo i le 1831, na maua ai e le Perofeta o Iosefa Samita le tele o faaaliga mai le Alii, e aofia ai fautuaga faalelagi mo tagata taitoatasi, faatonuga i le puleaina o le Ekalesia, ma faaaliga vaaia musuia o aso e gata ai. Peitai o le toatele o le Au Paia latou te le’i faitauina. Sa le’i lomiaina faaaliga i lena taimi, ma e itiiti ni kopi sa maua sa tusilimaina i itulau taitasitasi ia na feaveai faataamilo i tagata o le ekalesia ma feaveai e faifeautalai.

Ona oo lea ia Novema 1831, sa valaauina e Iosefa se aufono o taitai o le Ekalesia e soalaupule le lolomiina o faaaliga. Ina ua uma ona tāpā le finagalo o le Alii, sa faia loa e nei taitai ni fuafuaga ia lolomiina le Tusi a Mamona. O le a vave ae mafai e tagata uma ona faitau mo i latou lava le afioga a le Atua na faaali mai e ala mai i se perofeta soifua, o ni faamaoniga manino, “o ki o mealilo o le malo o lo tatou Faaola ua toe faatuatuaina mai i tagata.” Mo nei ma le tele o isi mafuaaga, ua manatu ai le Au Paia i le taimi lena ma le taimi lenei, o nei faaaliga ua “tusa le tau … ma oa o le Lalolagi atoa” (Mataupu Faavae ma Feagaiga 70, ulutala o le vaega).

Tagai foi i le Au Paia, 1:140–43.

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 67:1–9; 68: 3–6

E lagolago e le Atua Ana auauna ma upu latou te saunoa ai i Lona suafa.

O le faaiuga e lolomi ia faaaliga lea na maua e Iosefa Samita, e foliga mai o se mea faigofie, ae sa le’i mautinoa e nisi o taitai o le Ekalesia anamua, o se manatu lelei lea. O se tasi o atugaluga sa faatatau lea i faaletonu i le gagana na faaaogaina e Iosefa Samita e tusi ai faaaliga. O le faaaliga i le vaega e 67 na oo mai e tali ai lena atugaluga. O le a se mea ua e aoao i ai e uiga i perofeta ma faaaliga mai fuaiupu 1–9? O a ni malamalamaaga faaopoopo e te maua mai i le 68:3–6?

A o le’i lomiaina le Tusi o Poloaiga, e i ai nisi o taitai o le Ekalesia na sainia se molimau tusitusia e faapea, ua moni faaaliga o loo i le tusi. Ina ia vaai i se kopi o la latou molimau, tagai i le “Testimony, circa 2 November 1831,” Revelation Book 1, 121, josephsmithpapers.org.

Mataupu Faavae ma Feagaiga 68:1–8

O musumusuga mai le Agaga Paia e atagia mai ai le finagalo o le Alii.

O upu o loo i nei fuaiupu sa fofogaina i le valaauina o Orson Hyde ma isi “e folafola atu le talalelei tumau-faavavau, e ala i le Agaga o le Atua soifua, mai lea nuu i lea nuu, ma mai lea laueleele i lea laueleele” (fuaiupu 1). E ono mafai faapefea e le folafolaga i le fuaiupu e 4 ona fesoasoani i se tagata ua auina atu e talai atu le talalelei? E faapefea ona faatatau nei upu ia te oe? Mafaufau i se taimi na “uunaia ai [oe] e le Agaga Paia” (fuaiupu 3) e fai atu pe faia se mea. O a ni mea ua e maua i nei fuaiupu e mafai ona tuu atu ai ia te oe le to’a e mulimuli i uunaiga faaleagaga?

Mataupu Faavae ma Feagaiga 68:25–28

O matua e nafa ma le aoaoina o a latou fanau.

Na aoao mai Sister Joy D. Jones, “O [se] ki i le fesoasoani i fanau ia mafai ona tetee atu i le agasala o le amata aoao atu ma le alofa i latou i aoaoga faavae ma mataupu faavae autu o le talalelei ao laiti lava—mai tusitusiga paia, le Mataupu o le Faatuatua, le tamaitusi Mo le Malosi o le Autalavou , pese Peraimeri, viiga, ma a tatou lava molimau—lea o le a taitaiina atu fanau i le Faaola” (“O Se Tupulaga e mafai ona Tetee Atu i le Agasala,” Ensign po o le Liahona, Me 2017, 88).

E tusa ai ma le Mataupu Faavae ma Feagaiga 68:25–28, o a nisi o “mataupu faavae autu” na ta’ua e Sister Jones e tatau i matua ona aoao ai a latou fanau? Aisea ua tuuina atu ai lenei tiutetauave taua i matua? O le a sau tala e fai atu i matua ua le lagonaina le agavaa e aoao atu nei mea i lana fanau?

Tagai foi Tad R. Callister, “O Matua: O Uluai Faiaoga o le Talalelei mo a Latou Fanau,” Ensign po o le Liahona, Nov. 2014, 32–34.

o le aiga o loo suesue

O le aiga o le nofoaga sili lea mo fanau e aoao ai le talalelei.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 67:10–14.E mafai faapefea e le lotovale, fefe, ma le faamaualuga ona taofia i tatou mai le latalata atili atu i le Alii? Aisea e le mafai ai e se “tagata natura” ona i ai i le afioaga o le Alii? (fuaiupu 12; tagai foi i le Mosaea 3:19). O le a se mea tatou te maua i nei fuaiupu ua musuia ai i tatou ia “faaauau pea i le onosai seia faaatoatoaina [tatou]”? (fuaiupu 13).

I le avea o se aiga, e mafai foi ona outou toe faamanatuina le savali a Elder Jeffrey R. Holland “Ia Atoatoa Ona Lelei o La Outou Amio—I Le Iuga” (Ensign po o le Liahona, Nov. 2017, 40–42).

Mataupu Faavae ma Feagaiga 68:3–4.E mafai e tagata o le aiga ona faasoa mai ni aafiaga ua faamalosia ai o latou faatuatua o saunoaga a auauna a le Alii “o le finagalo lea o le Alii,” “o le mafaufau lea o le Alii,” ma “o le mana lea a le Atua mo le olataga” (fuaiupu 4). Pe e mafai ona latou vaavaai mo savali o le konafesi aoao aupito lata mai, e faatatau i se luitau atonu o loo feagai ma lou aiga.

Mataupu Faavae ma Feagaiga 68:25–35.O fuaiupu nei o loo i ai se fautuaga taua i “e nonofo i Siona” (fuaiupu 26). O le a se mea ua musuia i tatou e faaleleia atili i le uma ai o le faitauina o nei fuaiupu? E ono malie le fatu o ni ata e faaalia ai nisi o mataupu faavae i nei fuaiupu ona nana lea i totonu o le tou fale. Ona, oo lea i aso a sau pe a maua e se tasi se ata, e mafai ona outou faaaogaina lena o se avanoa e aoao atu ai e uiga i lena mataupu faavae. Aisea ua avea ai le aiga ma nofoaga sili ona lelei mo tamaiti e aoao ai nei mea?

Mataupu Faavae ma Feagaiga 69:1–2.Sa auina atu Oliva Kaotui i Misuri faatasi ma ni kopi tusitusia o faaaliga a le Perofeta ina ia lomiaina, faatasi ai ma se tupe e fesoasoani e atinae ai le Ekalesia iina. O le a le fautuaga na tuuina mai e le Alii i le fuaiupu e 1 e uiga i le malaga a Oliva? Aisea e taua ai le i ai faatasi ma tagata “o le a tonu ma faamaoni”? (fuaiupu 1). O le a se taimi na faatosinaina ai e ni uo i tatou e faia ni faaiuga lelei pe leaga? E mafai faapefea ona avea i tatou ma se faatosinaga lelei i isi?

Mataupu Faavae ma Feagaiga 70:1–4.Na tuuina atu e le Alii i nisi o le au toeaina le tiutetauave o le vaaia o le lolomiga o faaaliga. E ui ina e le o i ai ia i tatou lena tiutetauave faapitoa, ae o le a se tulaga e mafai ona taua ai i tatou o ni “tausimea o faaaliga ma poloaiga”? (fuaiupu 3).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Se Lagi se Aiga,” Viiga, nu. 179.

Faaleleia o Lo Tatou Aoao Atu

Faaaoga mau i o tatou olaga. A uma ona faitau se mau, valaaulia tagata o le aiga e faaaoga i o latou olaga. Mo se faataitaiga, e mafai ona e valaaulia i latou e mafaufau i ni tulaga talitutusa faapena latou te ono fetaiai, e faapea ona aofia ai ia lava mataupu faavae o le talalelei.

masini lomitusi a Grandin

O le Tusi o Poloaiga, na muamua mai i le Mataupu Faavae ma Feagaiga, sa lomiaina i se masini lomitusi e pei o lenei.