Vaitafe o Misuri

Afi o le Tolauapiga i luga o Misuri na saunia e Bryan Mark Taylor

31 Me--6 Iuni

Mataupu Faavae ma Feagaiga 60-62

“Ua I Ai Tagata Uma i Loʼu Lima”

Na aoao mai Peresitene Ezra Taft Benson e faapea, pe a tatou suesue i tusitusiga paia, “o le a faateleina molimau. O le a faamalosia tautinoga. O le a faamalosiauina aiga. O le a tafe mai faaaliga patino” (“The Power of the Word,” Ensign, Me 1986, 81).

Tusifaamaumau Ou Lagona Uunaia

Ia Iuni 1831, sa faataunuu ai e Iosefa Samita se konafesi ma le au toeaina o le Ekalesia i Katelani. O iina, na faatulagaina ai e le Alii nisi o toeaina i ni soa ma auina atu i latou i le Itumalo o Siakisone, Misuri, faatasi ai ma le faatuatuaga lenei: “E talai atu i le ala” (Mataupu Faavae ma Feagaiga 52:10). E toatele le au toeaina sa faia ma le maelega, ae sa le’i faia e isi. Ina ua oo la i le taimi e toe foi atu ai i Katelani, sa fetalai mai le Alii, “Ae ua Ou lē fiafia i nisi [toeaina], ona ua latou lē tatalaina o latou gutu, ae ua latou natia taleni ua Ou tuu atu ia te i latou, ona o le fefefe i tagata” (Mataupu Faavae ma Feagaiga 60:2). O le toatele o i tatou e mafai ona lagona le faanoanoa alofa mo nei toeaina—tatou te lagona foi le faatautū e tatala o tatou gutu ma faasoa atu le talalelei. Atonu tatou te faatuai ona o le “fefefe i tagata.” Atonu foi tatou te masalosalo i o tatou agavaa po o gafatia. Po o a lava a tatou mafuaaga, o le Alii “ua silafia vaivaiga o le tagata ma le ala e fesoasoani ai ia i [tatou]” (Mataupu Faavae ma Feagaiga 62:1). O loo taape solo i nei faaaliga i uluai faifeautalai ia faamautinoaga e mafai ona fesoasoani e faatoilalo ai lo tatou fefefe e faasoa atu le talalelei—po o isi mea tatou te fefefe ai tatou te ono fetaiai: “o Aʼu, o le Alii, ua pule i le lagi i lugā.” “E mafai ona Ou faia outou ia paia.” “Ua i ai tagata uma i loʼu lima.” Ma le “ia fiafia, le fanau iti e; ona ua Ou i ai i lo outou lotolotoi.” (Mataupu Faavae ma Feagaiga 60:4, 7; 61:6, 36.)

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 60; 62

E fiafia le Alii pe a tatala lo’u gutu e faasoa atu le talalelei.

Ua tofu lava i tatou ma aafiaga i taimi na mafai ona tatou faasoaina atu ai le talalelei i se tasi, ae ona o nisi o mafuaaga, sa tatou le faia ai. A o e faitau i afioga a le Alii i uluai faifeautalai o e sa le’i “tatala o latou gutu,” mafaufau i a oe lava avanoa e faasoa atu ai le talalelei. E faapefea ona pei lau molimau o le talalelei o se “taleni,” po o se oa taua mai le Atua? O a ni auala tatou te “natia [ai a tatou] taleni”? (Mataupu Faavae ma Feagaiga 60:2; tagai foi i le Mataio 25:14–30).

Sa faasa’oina e le Alii ia nei uluai faifeautalai, ae sa Ia taumafai foi e musuia i latou. O a ni savali faamalosiau mai ia te Ia e te maua i le vaega e 60 ma le 62? E faapefea ona atinae e nei savali lou talitonu ia te oe lava i le faasoaina atu o le talalelei? I aso o lumanai, vaavaai mo ni avanoa e tatala ai lou gutu ma faasoa atu mea ua faatuatuaina mai e le Atua ia te oe.

Tagai foi i le Mataupu Faavae ma Feagaiga 33:8–10; 103:9–10; Dieter F. Uchtdorf, “Galuega Faafaifeautalai: Faasoaina Atu o Mea o Loo i totonu o Lou Loto,” Ensign po o le Liahona, Me 2019, 15–18.

faifeautalai i totonu o se pasi

E finagalo le Atua ou te faasoa atu le talalelei i isi.

Mataupu Faavae ma Feagaiga 61:5–6, 14–18

Pe ua fetuuina vai uma e le Alii?

O le lapataiga a le Alii o loo i le Mataupu Faavae ma Feagaiga 61 , i se vaega, o se lapataiga e uiga i mea matautia o le a fetaiai ma Lona nuu a o malaga atu i Siona i luga o le Vaitafe o Misuri, lea sa lauiloa i lena vaitaimi i le matautia. O lenei lapataiga e le tatau ona faaliliuina ia uiga e faapea, e tatau ona tatou aloese mai le faimalaga i luga o vai. O loo i ai i le Alii “mana uma,” e aofia ai le mana i luga o vai (fuaiupu 1).

Mataupu Faavae ma Feagaiga 61–62

O le Alii e mamana ma e mafai ona faasaoina a’u.

I le ala toe foi atu i Katelani, sa oo ai Iosefa Samita ma isi taitai o le Ekalesia i se aafiaga sa lamatia ai o latou ola i luga o le Vaitafe o Misuri (tagai i le Au Paia, 1:133–34). Sa faaaoga e le Alii lenei avanoa e lapatai ma aoao ai Ana auauna. O a ni mea e te maua i le Mataupu Faavae ma Feagaiga 61 e faamalosiau ai oe e tuu atu lou faatuatuaga i le Alii a o e feagai ma a oe lava luitau? Mo se faataitaiga, aisea e taua ai le iloa o le Atua e “mai le faavavau-tumau i le faavavau-tumau”? (fuaiupu 1).

O loo i ai foi ni malamalamaga faapena i le vaega e 62. O a ni mea o loo aoao mai e le Alii ia te oe i lenei faaaliga e uiga ia te Ia Lava ma Lona mana?

Mafaufau loloto i aafiaga faatupu faatuatua na e maua i taimi na fesoasoani ai le Alii ia te oe e faatoilalo faigata faaleagaga pe faaletino.

Mataupu Faavae ma Feagaiga 62

E finagalo le Alii ia ou faia ni faaiuga “e pei ona lelei ia te [a’u].”

O nisi o taimi e aumai ai e le Alii ia i tatou ni taitaiga e fitoitonu, ae o isi mea, e tuu e Ia tatou te faia le tonu. E faapefea ona e vaai i lenei mataupu faavae o loo faaalia i le Mataupu Faavae ma Feagaiga 62? (tagai foi i le Mataupu Faavae ma Feagaiga 60:5; 61:22). O faapefea ona e vaaia lenei mataupu faavae i lou olaga? Aisea e lelei ai mo i tatou ona faia nisi o faaiuga e aunoa ma se taitaiga fitoitonu mai le Atua?

Tagai foi i le Eteru 2:18–25; Mataupu Faavae ma Feagaiga 58:27–28.

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 60:2–3.Aisea na mumusu ai nisi o uluai faifeautalai e faasoa atu le talalelei? Aisea tatou te mumusu ai i nisi o taimi? Mafaufau e faatino ni auala e mafai ai e tagata o le aiga ona faasoa atu le talalelei i ni tulaga eseese.

Mataupu Faavae ma Feagaiga 61:36–39.O ni mafuaaga o loo tatou vaaia i nei fuaiupu “ia fiafia” ai? (tagai foi i le Ioane 16:33). Atonu e mafai e lou aiga ona tusi pe tusi ni ata o ni mea e aumaia ia i latou le olioli ona ao lea ma tuu i totonu o se fagu “fiafia”. (Ia mautinoa ia aofia ai ata o le Faaola ma mea e faamanatu mai ai Lona alofa mo i tatou.) I le aluga o le vaiaso pe a manaomia e tagata o le aiga se faamanatu mo mafuaaga ia fiafia ai, e mafai ona latou filifili mai se mea mai le fagu.

Mataupu Faavae ma Feagaiga 61:36.E mafai faapefea ona e fesoasoani i lou aiga ia manatua e i ai le Faaola “i lo [tatou] lotolotoi”? E mafai ona outou filifili faatasi po o fea e faaali matilatila mai ai se ata o Ia i totonu o le tou fale. E mafai faapefea ona tatou valaaulia le Faaola i totonu o o tatou olaga i aso taitasi?

Mataupu Faavae ma Feagaiga 62:3.Atonu e mafai ona outou faia se lotu molimau a le aiga pe a uma ona faitau le fuaiupu lenei. Ina ia faamalamalama po o le a le molimau, e mafai ona e faasoa atu ni vaega o le savali a Peresitene M. Russell Ballard “Molimau Mama Atoatoa” (Ensign po o le Liahona, Nov. 2004, 40–43). Aisea e lelei ai ona tusifaamaumau a tatou molimau?

Mataupu Faavae ma Feagaiga 62:5, 8.Aisea e le tuuina mai ai e le Alii ni poloaiga e faatatau i vaega uma o o tatou olaga? E tusa ai ma le fuaiupu e 8, e faapefea ona tatou faia ni faaiuga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Molimau,” Viiga, nu. 74.

Faaleleia o Suesuega Faaletagata Lava ia

Tuu atu i le Agaga e taitaia au suesuega. Tuu atu i le Agaga Paia e taialaina oe. Ia nofouta i Ana musumusuga ao Ia taitai atu oe i mea e manaomia ona e aoaoina i aso taitasi, e tusa lava pe o Ana musumusuga e fautua mai ai e te faitau pe suesue i se autu e ese mai nai lo o mea e masani ona e faia po o se auala e ese mai.

Iesu o loo siiina se mamoe

O le Leoleo Mamoe Lelei, na saunia e Del Parson