Magaala i Initipene Misuri

Initipene, Misuri, saunia e Al Rounds

24–30 Me

Mataupu Faavae ma Feagaiga 58–59

“Auai ma le Naunautai i se Faamoemoega Lelei”

Na aoao mai Peresitene Dallin H. Oaks, “O le a fesoasoani tusitusiga paia tatou te maua ai tali uma o a tatou fesili patino, aua e ala i le faitauina o [tusitusiga paia] tatou te valaaulia ma faaagavaa ai i tatou lava mo le musumusuga a le Agaga Paia, lea o le a taitai atu ai i tatou i le upumoni atoa” (i le David A. Edwards, “Are My Answers in There?” New Era, Me 2016, 42).

Tusifaamaumau Ou Lagona Uunaia

O le taimi muamua lava na vaai ai le au toeaiina o le Ekalesia i le nofoaga o le aai o Siona—o Initipene, Misuri—sa le’o le mea lea na latou faamoemoeina. Sa mafaufau nisi, o le a latou tau atu i se nuu manuia, maelega faapea ma se vaega malolosi o le Au Paia. Nai lo o lena, sa latou tau atu i se nuu maotua sa tau leai ma nisi na nofoiaina, sa le maua i ai le ituaiga olaga na latou masani ai ma na ainaina e tagata faatupu vevesi na nofoia faatausiusiuga o le tuaoi nai lo o ni tagata o le Au Paia. O le mea na aliae mai ai, sa le’i fetalai mai le Alii ia i latou ia tau lava o le o mai i Siona—Sa finagalo o Ia latou te fausia [Siona].

Pe a le tutusa o tatou faamoemoega ma le mea moni, e mafai ona tatou manatua le mea na ta’u mai e le Alii i le Au Paia i le 1831: “E lē mafai ona outou vaaia i o outou mata faalenatura, i le taimi nei, le fuafuaga a lo outou Atua … ma le mamalu e mulimuli mai pe a mavae puapuaga e tele” (Mataupu Faavae ma Feagaiga 58:3). Ioe, ua tumu le olaga i puapuaga, e faapena foi i le amioleaga, ae e mafai ona tatou “aumai le amiotonu tele; aua ua i totonu ia te i [tatou] le mana” (fuaiupu 27–28).

Tagai foi Au Paia, 1:127–33.

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 58:1–5, 26–33, 44; 59:23

E oo mai vavega e tusa ai ma le taimi a le Atua ma lo tatou maelega.

Sa faataatia e le Au Paia le faavae o Siona i le Itumalo o Siakisone, Misuri, lea sa faapea ona latou onosaia ai le tele o tofotofoga. Sa mautinoa lava lo latou faamoemoe e faapea, i le aluga o o latou olaga, o le a faapea ona faatupulaia lenei eria e avea o se nofoaga o le a mafai ona faapotopoto mai i ai le Au Paia uma. Peitai ane, sa tutuliesea le Au Paia mai le Itumalo o Siakisone i totonu o ni nai tausaga, ma sa faaali mai e le Alii, o le a tatau i Lona nuu ona “faatali … mo se vaitau itiiti mo le laveaiina o Siona” (Mataupu Faavae ma Feagaiga 105:9).

A o e suesue i fuaitau nei, vaavaai mo mafuaaga e ono taofia ai faamanuiaga mo se taimi. E mafai ona fesoasoani fesili o loo i lalo e te mafaufau loloto ai.

Mataupu Faavae ma Feagaiga 58:1–5; 59:23. O a ni savali o loo i nei fuaiupu ua faamalosia ai lou gafatia e tauave ai puapuaga ma le onosai faateleina? O a ni faamanuiaga ua e mauaina i le mavae ai o puapuaga? Aisea e te manatu ai e faatoa oo mai nisi o faamanuiaga i le mavae ai o puapuaga?

Mataupu Faavae ma Feagaiga 58:26–33. O le a se matafaioi e faia e le “auai ma le naunautai i se faamoemoega lelei” i le faataunuuga o folafolaga a le Atua? O le a le matafaioi e faia e lou usiusitai?

Mataupu Faavae ma Feagaiga 58:44. O le a le sootaga i le va o le “tatalo o le faatuatua” ma le finagalo o le Alii mo i tatou?

Mataupu Faavae ma Feagaiga 59, ulutala o le vaega

O ai Polly Knight?

O Polly Knight ma lana tane o Iosefa Knight Sr., o nisi ia o uluai tagata talitonu i le valaauga faaperofeta o Iosefa Samita. Sa tuuina atu e Polly ma Iosefa le lagolago taua tele i le Perofeta i le galuega o le faaliliuga o le Tusi a Mamona. Sa tuua e le aiga o le au Knight ia Colesville, Niu Ioka, ina ia faapotopoto atu ma le Au Paia i Ohaio, ma mulimuli ane, na poloaiina ai i latou e me’i atu i le Itumalo o Siakisone, Misuri. A o latou malaga atu, sa amata ona mou atu le ola maloloina o Polly, ae sa naunau lava o ia ia vaai i Siona a’o le’i maliu. Sa na’o ni nai aso na i ai o ia i Misuri, ae maliu loa (tagai i le Au Paia, 1:127–28, 132–33). O le Mataupu Faavae ma Feagaiga 59 sa maua i le aso na maliu ai o ia, ma o le fuaiupu 1 ma le 2 e foliga mai ua faatatau tonu lava ia te ia.

Mataupu Faavae ma Feagaiga 59:9-19

O le tausia o le Sapati ia paia, e aumaia ai faamanuiaga faaletino ma faaleagaga.

Ina ua uma ona folafola mai e faamanuia le Au Paia i Siona “ma poloaiga e lē itiiti,” sa tuuina mai e le Alii le faamamafa faapitoa i se poloaiga faapitoa e tasi:o le poloai ia faamamalu Lona “aso paia” (Mataupu Faavae ma Feagaiga 59:4, 9). A o e suesue i le Mataupu Faavae ma Feagaiga 59:9–19, mafaufau loloto pe aisea na matuai taua ai le faamamaluina o le Sapati i nei Au Paia a o latou taumafai e fausia Siona.

E mafai foi ona e mafaufau loloto i fesili e pei o nei: Pe o o’u faaaogaina le aso Sapati i le ala na faamoemoeina ai e le Alii? E faapefea e le tausia o le aso Sapati ia paia ona fesoasoani ia ou tumau i le “le pisia mai le lalolagi”? (fuaiupu 9). O le a se mea e mafai ona ou faia e avatu ai a’u “tapuaiga i le Silisili Ese”? (fuaiupu 10).

A uma ona faitau ia fuaiupu nei, o le a se mea ua musuia oe e fai ina ia atili tausia atoatoa ai le aso Sapati ia paia? Kenese 2:2–3; Esoto 20:8–11; 31:13, 16; Teuteronome 5:12–15; Isaia 58:13–14; Mareko 2:27; Ioane 20:1–19; Galuega 20:7.

Atonu foi e faamanuiaina oe mai se tasi o vitio e tele po o isi punaoa e uiga i le Sapati o loo maua i le sabbath.ChurchofJesusChrist.org.

Tagai foi Russell M. Nelson, “O Le Sapati o se Aso Fiafia,” Ensign po o le Liahona, Me 2015, 129–32; Bible Dictionary, “Sabbath.”

falaoa ma ipu o le faamanatuga

O le ‘ai ma inu i le faamanatuga o se vaega lea o le tausia o le aso Sapati ia paia.

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 58:26–29.Atonu e mafai e tagata o le aiga ona faia se lisi o nisi o mea ua latou “auai ma le naunautai” i ai. Pe o ia mea uma o ni “faamoemoega lelei”? Aisea e finagalo ai le Alii ia tatou faia “mea e tele i lo [tatou] lava loto malie”? Fai atu i tagata taitoatasi o le aiga e mafaufau i se mea e mafai ona latou faia i lenei vaiaso e “aumai [ai] le amiotonu tele.” E mafai ona latou lipoti atu i se taimi mulimuli ane i mea na latou faia.

Mataupu Faavae ma Feagaiga 58:42–43.O a ni lagona o tagata o le aiga i taimi latou te faitaua ai nei fuaiupu? E mafai faapefea ona fesoasoani nei fuiaupu i se tagata o loo manaomia ona salamo?

Mataupu Faavae ma Feagaiga 59:3–19.Mata o le a le uiga o le ia “faapaleina … i poloaiga”? (fuaiupu 4). A o outou faitau i poloaiga o loo i fuaiupu e 5–19, ia talanoa i faamanuiaga ua outou maua e ala i le usitaia o nei poloaiga taitasi.

E mafai ona e maitaua le ala o loo faaaogaina ai ia upu e pei o le “olioli,” “faaolioli,” “mata fiafia,” ma le “faafiafia” e faamatala ai le poloaiga ia faamamalu le aso Sapati. E mafai faapefea ona e faia au Sapati ia sili atu ona faaolioliina? Atonu e mafai e lou aiga ona faia se taaloga faafetaui i kata e faaalia ai mea e mafai ona outou faia e tausia ai le paia o le aso Sapati.

Mataupu Faavae ma Feagaiga 59:18–21.O a ni mea e mafai ona tatou faia e “tautinoina … [le] aao o le [Atua] i mea uma”? (fuaiupu 21). Mafaufau e o mo se savaliga pe matamata i ata, ma maitau mea e “faafiafia ai mata ma faaolioli ai le loto” (fuaiupu 18). E mafai ona e puea pe tusia ni ata o mea e te maua, ona talanoa lea i auala e mafai ona e faaali atu ai le loto faafetai mo nei mea. O faapefea ona tatou vaaia le aao o le Atua i o tatou olaga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Filifili Tau o Mea Tonu,” Viiga, nu. 149.

Faaleleia o Lo Tatou Aoao Atu

Faasoa atu ni mau. Tuu atu i tagata o le aiga se taimi e faasoa mai ni fuaitau o mau na latou maua i a latou suesuega faaletagata lava ia e anoa ia i latou.

o se teineitiiti o loo tatalo i le taimi o le faamanatuga

Ata na tusia e Marti Major