tagata o loo fono i talaane o le vaituloto

O le Fonotaga a le Tolauapiga, saunia e Worthington Whittredge

3–9 Me

Mataupu Faavae ma Feagaiga 46–48

“Ia Outou Saili ma le Faamaoni Meaalofa Silisili Ona Lelei”

A o e faitauina le Mataupu Faavae ma Feagaiga 46-48, tusi i lalo lagona uunai e te maua. E mafai ona e fesili, e pei ona fautuaina ai e Elder Richard G. Scott, “Po o i ai nisi mea e tatau ona ou iloa?” (“Ia Maua le Taitaiga Faaleagaga” Ensign po o le Liahona, Nov. 2009, 8).

Tusifaamaumau Ou Lagona Uunaia

A o tuua e Parley P. Pratt, Oliva Kaotui, Ziba Peterson, ma Pita Uitimera le Itiiti, ia Katelani ma me’i atu i isi nuu e galulue ai, sa latou tuua le silia ma le selau o tagata liliu mai o e sa i ai le tele o le maelega, ae itiiti le poto masani po o le taitaiga. Sa le’i i ai ni tusitaulima o faatonuga, leai ni fonotaga o aoaoga faaleautaitai, leai ni faasalalauga o konafesi aoao—o le mea moni, sa le’i tele foi ni kopi o le Tusi a Mamona e tufa atu. O le toatele o nei tagata talitonu fou na tosina mai i le talalelei toefuataiina e ala i le folafolaga o faaaliga ofoofogia a le Agaga, ae maise lava o mea na latou iloa e uiga i ai mai le suesuega o le Feagaiga Fou (tagai i le, mo se faataitaiga, 1 Korinito 12:1–11). E le’i leva, ae faalauiloa atu i totonu o a latou fonotaga faaleEkalesia ia nisi o faaaliga o tapuaiga sa le’i masani ai—e aofia ai le pauu i le eleele po o le gai’o e pei o se gata. E toatele sa faigata ona iloatino po o le fea o faaaliga sa mai i le Agaga ae o le fea sa le’i [mai le Agaga]. O le vaaia ai o le fenumiai, sa tatalo ai Iosefa Samita mo se fesoasoani. Ua tutusa lava le taua i aso nei o le tali a le Alii, i taimi e masani ona teena pe le amanaia ai e tagata ia mea a le Agaga. Na faaali mai e le Alii e faapea, o faaaliga faaleagaga e moni ma sa faamanino mai ia mea—o meaalofa mai i se Tama Faalelagi agaalofa, “ua tuuina mai … mo le lelei o i latou o e e alolofa mai ia te [Ia] ma tausi i [Ana] poloaiga uma” (Mataupu Faavae ma Feagaiga 46:9).

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 46:1–6

O tagata sailiili faamaoni uma ua talia e tapuai i le Ekalesia a le Alii.

O sauniga a Le Ekalesia a Iesu Keriso o le Au Paia o Aso e Gata Ai, e tatau ona avea o se tasi o faapotopotoga aupito sili ona faafeiloai ma musuia i le lalolagi. O faapefea ona fautuaina i tatou e le Alii i le Mataupu Faavae ma Feagaiga 46:1–6 e talia i latou o e auai mai i a tatou sauniga? Pe e lagona e au uo po o tagata o le tou pitonuu le taliaina i sauniga lotu a le tou uarota? O le a se mea o e faia ina ia avea ai a outou nofoaga o sauniga faaleEkalesia ia mananao tagata e toe foi mai i ai? Mafaufau loloto pe mafai faapefea e au taumafaiga e mulimuli i le Agaga Paia i sauniga faaleEkalesia ona aafia ai ou aafiaga.

Tagai foi i le 3 Nifae 18:22–23; Moronae 6:5–9; vitio “Faafeiloai,” ComeUntoChrist.org; “Religious Enthusiasm among Early Ohio Converts,” Revelations in Context, 105–11.

Mataupu Faavae ma Feagaiga 46:7-33

Ua tuuina mai e le Alii ia meaalofa faaleagaga e faamanuia ai Lana fanau.

Sa talitonu le Au Paia anamua i meaalofa faaleagaga ae sa manaomia le taitaiga e faatatau i lo latou faamoemoega. A o e suesue e uiga i meaalofa o le Agaga e faaaoga ai le Mataupu Faavae ma Feagaiga 46:7–33, mafaufau loloto pe aisea e taua ai ona e “manatua pea le pogai ua tuuina mai ai” (fuaiupu 8). Mafaufau pe faapefea ona faatatau nei fuaiupu i le saunoaga lenei mai ia Elder Robert D. Hales: “Ua tuuina mai nei meaalofa ia i latou o e faatuatua ia Keriso. O le a latou fesoasoani tatou te iloa ma aoao atu ai upumoni o le talalelei. O le a latou fesoasoani ia i tatou e faamanuia ai isi. O le a latou taitai atu i tatou e foi atu i lo tatou Tama Faalelagi” (“Gifts of the Spirit,” Ensign, Feb. 2002, 16). O le a se isi mea ua e aoao mai i nei fuaiupu e uiga i faaaliga faaleagaga? E mafai faapefea ona fesoasoani nei upumoni ia te oe ia “le faaseseina” ai? (fuaiupu 8).

Mafaufau loloto po o a au meaalofa faaleagaga—ma pe mafai faapefea ona e faaaogaina “mo le manuia o fanau a le Atua” (fuaiupu 26). Afai o i ai sou faamanuiaga faapeteriaka, atonu o loo ta’ua ai meaalofa ua tuuina atu ia te oe.

Tagai foi i Autu o le Talalelei, “Meaalofa Faaleagaga,” topics.ChurchofJesusChrist.org.

Mataupu Faavae ma Feagaiga 47

E finagalo le Alii i Lana Ekalesia e tausi se talafaasolopito.

O le valaauga o Ioane Uitimera e tausia se talafaasolopito o le Ekalesia, ua faaauauina ai se aganuu umi o le au tusitalafaamaumau i tagata o le Atua (tagai i le 2 Nifae 29:11–12; Mose 6:5; Aperaamo 1:28, 31). O le mea moni, o loo i ai lava i aso nei le tofi o le Tausi Talafaasolopito ma le Tusitalafaamaumau a le Ekalesia. Aisea e te manatu ai o le tausia o se talafaasolopito e matuai taua i le Alii? Mafaufau loloto i lenei mea a o e faitau i Ana faatonuga ia Ioane Uitimera e faatatau i lenei tofiga i le vaega e 47. Ia mafaufau foi po o a ni aafiaga patino e tatau ona e tusifaamaumauina. Mo se faataitaiga, o a ni mea ua aoao mai e le Alii ia te oe e te manao e faasaoina.

A o e mafaufau i nei fesili, mafaufau i le malamalamaaga lenei mai ia Elder Marlin K. Jensen o le Fitugafulu, o le sa avea ma Tausi Talafaasolopito ma Tusitalafaamaumau a le Ekalesia mai le 2005 i le 2012:

“Tatou te tausia faamaumauga e fesoasoani tatou te manatua ai. … Tatou te mananao e fesoasoani i tagata o le Ekalesia e manatua mea tetele na faia e le Atua mo Ana fanau. … O lesona mai le taimi ua tuanai e fesoasoani tatou te taulima ai lo tatou taimi nei, ma aumaia ia i tatou le faamoemoe mo lo tatou lumanai” (“There Shall Be a Record Kept among You,” Ensign, Dec. 2007, 28, 33).

Ina ia aoao atili e uiga i le galuega o loo faia i le taimi nei i lalo o le taitaiga a le Tausi Talafaasolopito a le Ekalesia, asiasi i le history.ChurchofJesusChrist.org.

Ioane Uitimera

Sa tofia Ioane Uitimera e tausia se talafaasolopito o le Ekalesia.

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 46:2–6.O le a se mea e mafai ona tatou faia o se aiga ia mautinoa ai e lagona e isi le taliaina i sauniga a le Ekalesia? (tagai foi i le 3 Nifae 18:22–23). E mafai ona faaopoopo le ata o loo avatu faatasi ma lenei otootoga i lenei talanoaga.

Mataupu Faavae ma Feagaiga 46:7–26.O a ni meaalofa faaleagaga o loo tatou vaaia i le tasi ma le isi? E mafai faapefea ona faamanuiaina lo tatou aiga i na meaalofa?

Mataupu Faavae ma Feagaiga 47.E mafai faapefea ona e faamalosiauina lou aiga e tusifaamaumau o latou talafaasolopito patino i le aluga o le vaiaso? E mafai ona e faasoa atu nisi o tusiga mai lau apitalaaga patino pe faasoa atu se tala e uiga i se tuaa (tagai i le FamilySearch.org). O nisi o aiga e faatulaga ese ni nai minute i vaiaso taitasi mo tagata uma e tusitusi ai i a latou apitalaaga. Atonu e te tuuina atu nisi o uunaiga mo apitalaaga,e pei o le “O le a se mea na tupu i le vaiaso lenei e te manao i fanau a lau fanau ia iloa e uiga i ai?” po o le “Na faapefea ona e vaaia le aao o le Alii i lou olaga i lenei vaiaso?” E mafai e tamaiti laiti ona tusi ni ata o o latou aafiaga, pe e mafai ona e puea o latou [ata po o leo] a o faamatala a latou tala. O a ni faamanuiaga e oo mai mai le tausia o se “talafaasolopito faifai pea”? (fuaiupu 1).

Mataupu Faavae ma Feagaiga 48.Sa poloaiina le Au Paia i Ohaio e faasoa atu o latou fanua ma i latou o e sa me’i atu i Ohaio mai i le Iunaite Setete i sasae. O a ni mea e mafai ona tatou faasoa atu e taulima ai manaoga o isi?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Ou Faia Ea Se Lelei?” (Viiga, nu. 136).

Faaleleia o Lo Tatou Aoao Atu

Faaaoga tala ma faataitaiga. Sa masani ona faaaoga e le Faaola ia tala ma faataoto e aoao atu ai mataupu faavae o le talalelei. Mafaufau i faataitaiga ma tala mai lou lava olaga e mafai ona faaolaola ai se mataupu faavae mo lou aiga (tagai i le Aoao Atu i Ala o le Faaola, 22).

tagata i le lotu

Ua tuuina mai e le Tama Faalelagi i Lana fanau ni meaalofa faaleagaga e faamanuia ai olaga o isi.