Itumalo o Tavesi, Misuri

14–20 Iuni

Mataupu Faavae ma Feagaiga 64–66

“E Manaomia e le Alii le Loto ma le Mafaufau Malie”

Na saunoa Peresitene Henry B. Eyring: “E masani ona ou alu i tusitusiga paia ma ni fesili ‘O le a se mea ua finagalo le Atua ou te faia?’ po o le ‘O le a se mea ua finagalo o Ia ia ou lagonaina?’ O taimi uma lava ou te maua ai ni manatu ma ni mafaufauga fou ou te le’i mauaina lava muamua” (“How God Speaks to Me through the Scriptures,” Fep. 6, 2019, blog.ChurchofJesusChrist.org).

Tusifaamaumau Ou Lagona Uunai

I le aasa o le vevela ia Aokuso 1831, na malaga ai nisi o le au toeaiina e toe foi atu i Katelani i le uma ai o le fuaina o le fanua o Siona i Misuri e pei ona faatonuina ai e le Alii. Sa le o se malaga manaia. O le au malaga o—Iosefa Samita, Oliva Kaotui, Sini Rikitone, Ezra Booth, ma isi—sa vevela ma vaivai, ma sa le’i umi ae liua popolega i ni finauga. Atonu sa foliga mai o le fausiaina o Siona, o se nuu o le alofa, lotogatasi, ma le filemu, o le a umi se taimi e faia ai.

O le mea na lelei ai, o le fausiaina o Siona—i Misuri i le 1831 po o totonu o o tatou loto ma uarota i aso nei—e le manaomia ai ona tatou atoatoa. Nai lo o lena, na fetalai mai le Alii, “o outou ua poloaiina ia faamagalo atu.” (Mataupu Faavae ma Feagaiga 64:10). E manaomia e Ia “le loto ma le mafaufau malie” (fuaiupu 34). Ma e manaomia e Ia le onosai ma le maelega, aua o Siona e fausia i luga o le faavae o “mea iti,” e ausia e i latou o e e le “faavaivai i le faia o mea lelei” (fuaiupu 33).

Tagai foi i le Au Paia, 1:133–34, 136–37.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 64:1–11

E manaomia ona ou faamagalo atu i tagata uma.

A o e faitau i le Mataupu Faavae ma Feagaiga 64:1–11, mafaufau i se taimi na faamagalo ai oe e le Alii. Atonu foi e te mafaufau i se tasi e manaomia ona e faamagalo i ai. E faapefea e le agaalofa o le Faaola ona aafia ai ou lagona e uiga ia te oe lava ma e uiga i isi? Aisea e te manatu ua poloaiina ai i tatou e le Alii “ia faamagalo atu i tagata uma”? (fuaiupu 10). Afai e faigata ona e faamagalo atu, mafaufau i mea ua aoao mai e punaoa nei e uiga i auala e mafai ona fesoasoani mai ai le Faaola: Jeffrey R. Holland, “O Le Galuega o le Faaleleiga,” Ensign po o le Liahona, Nov. 2018, 77–79; Taiala i Tusitusiga Paia, “Faamagalo Atu,” scriptures.ChurchofJesusChrist.org.

Mataupu Faavae ma Feagaiga 64:31–34

E manaomia e le Alii lo’u loto ma se mafaufau malie.

Na i ai ea se taimi na e lagonaina ai le “faavaivai” i le “faia o mea lelei” uma o loo e taumafai ia ausia? Vaavaai mo le savali a le Alii ia te oe i le Mataupu Faavae ma Feagaiga 64:31–34. O le a le uiga o le avatu o lou “loto ma le mafaufau malie” i le Atua? (fuaiupu 34).

Mataupu Faavae ma Feagaiga 64:41–43

O Siona o le a avea “o se tagavai i le nuu.”

O se tagavai o “se fu‘a po o se anavatau e faapotopoto ai tagata i se lotogatasi i se faamoemoe po o se faasinomaga” (Taiala i Tusitusiga Paia, “Tagavai,” scriptures.ChurchofJesusChrist.org). Ua faapefea ona avea Siona—po o le Ekalesia a le Alii—o se tagavai ia te oe? Mafaufau i isi faataitaiga nei o mea e sisi i luga, e pei o se tagavai, e faamanuia ai tagata: Numera 21:6–9; Mataio 5:14–16; Alema 46:11–20. O a ni mea ua aoao mai e nei fuaiupu ia te oe e uiga i auala e mafai ona e fesoasoani ai i le Ekalesia ia avea ma se tagavai i le mea o loo e nofo ai? Vaavaai mo nisi auala o loo faamatala mai ai e le Alii ia Siona i le Mataupu Faavae ma Feagaiga 64:41-43.

O le Taitaiau Moronae o loo Tauaveina le Tagavai o le Saolotoga, saunia e Gary E. Smith

Mataupu Faavae ma Feagaiga 65

“Ia Outou Teuteu le Ala o le Alii.”

Na faamatala mai e Mataio o Ioane le Papatiso o ia lea o le na alaga, “Ina teuteu ia outou le ala o le Alii” (Mataio 3:3; tagai foi i le Isaia 40:3). I le Mataupu Faavae ma Feagaiga 65, o loo faaaoga ai e le Alii gagana talitutusa e faamatala ai Lana galuega i aso e gata ai. O a ni mea talitutusa ua e vaaia i le va o le mea na faia e Ioane le Papatiso (tagai i le Mataio 3:1–12) ma mea ua finagalo le Alii tatou te faia i aso nei? O a ni mea ua e maua i lenei faaaliga ua musuia ai oe ia fesoasoani e faataunuu ai valoaga o loo i ai? Mafaufau loloto i auala e mafai ai ona e “faailoa atu galuega ofoofogia [a le Atua] i totonu o tagata” (fuaiupu 4).

Mataupu Faavae ma Feagaiga 66

E silafia e le Alii manatu o lo’u loto.

I se taimi e le’i leva talu ona auai i le Ekalesia, sa talosaga atu ai Viliamu E. McLellin ia Iosefa Samita e faaali mai le finagalo o le Alii mo ia. Sa le’i iloa e Iosefa, ae sa i ai ni fesili patino se lima a Viliamu lea sa ia faamoemoe o le a tali mai e le Alii e ala i Lana Perofeta. Tatou te le iloa po o a fesili a Viliamu, ae ua tatou iloa, o le faaaliga lea na faatatau atu ia te ia, lea ua avea nei ma Mataupu Faavae ma Feagaiga 66, na taliina “uma ai ma le faamalieina atoatoa” ia fesili taitasi a Viliamu” (“William McLellin’s Five Questions,” Revelations in Context, 138).

A o e faitau i le vaega e 66, mafaufau i mea na silafia e le Alii e uiga ia Viliamu McLellin ma atugaluga ma faamoemoega o lona loto. O faapefea ona faaalia mai e le Alii ua Ia silafia oe? A o i ai sou faamanuiaga faapeteriaka, mafaufau e suesue i ai. A o e faia, o le a se mea e fesoasoani le Agaga Paia ia e malamalama ai e uiga i le finagalo o le Atua mo oe?

Tagai foi i le Au Paia, 1:138–40; Autu o le Talalelei, “Faamanuiaga Faapeteriaka,” topics.ChurchofJesusChrist.org.

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 64:8–10.O mafutaga faaleaiga e tele avanoa e aoao ai le faamagalo atu. Atonu e mafai e tagata o le aiga ona talanoa e uiga i auala ua faamanuiaina ai lou aiga ona o le faamagalo atu o le tasi i le isi. Ua faapefea ona fesoasoani le Faaola ia i tatou, e faamagalo atu i le tasi ma le isi? O faapefea ona tatou “faapuapuagatia” (fuaiupu 8) i tatou pe a tatou le faamagalo atu i isi?

Mataupu Faavae ma Feagaiga 64:33.O le a le mea ua finagalo le Tama Faalelagi e faia e lou aiga ia faataunuu ai Lana “galuega tele”? Atonu o le o atu i le malumalu, faasoa atu le talalelei i se tuaoi, po o le faatoilaloina o finauga. Atonu e mafai e tagata taitoatasi o le aiga ona ao mai ni meafaitino laiti, e pei o maamaa po o faamau po o ni fasipaso, ma faaaoga e fai ma faatusa o “mea iti” e mafai ona tatou faia i aso uma e “faataatiaina [ai] le faavae” mo le galuega tele a le Atua. I le avea ai o se aiga, filifili se tasi o nei mea iti e galulue i ai i lenei vaiaso.

Mataupu Faavae ma Feagaiga 66:3.O le a faapefea ona e aoao atu le taua o le salamo? E mafai ona e laulauina atu ni meaai i luga o se ipu mafolafola e le mama atoa ma faitau le fetalaiga a le Alii ia Viliamu McLellin: “Ua e mamā, ae ua lē mamā atoa.” Ona e faamamaina lea o le ipu mafolafola ma faasoa atu le meaai a o talanoa i auala ua mafai ai e Iesu Keriso ona faamamaina i tatou faaleagaga.

Mataupu Faavae ma Feagaiga 66:10.E mafai faapefea e lou aiga ona mulimuli i le fautuaga a le Alii ia “aua le saili e faalavelavea oe,” po o le faamamafaina i mea e tele e fai? E mafai ona outou talanoa e uiga i le tala ia Maria ma Mareta (tagai i le Luka 10:38–42), ma talanoa i auala e mafai ai e lou aiga ona aloese mai le faalavelaveaina i mea e leai se taua e faavavau.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fesoasoani Mai Ia Te A’u Tama Pele,” Tusipese a Tamaiti, 52.

Faaleleia o Lo Tatou Aoao Atu

Ia avanoa ma maua gofie. O nisi o avanoa aupito lelei o le aoao atu e amata i fesili po o atugaluga i loto o tagata o le aiga. Ia faailoa atu i tagata o le aiga e ala i au upu ma faatinoga o loo e naunau e faalogo atu ia i latou. (Tagai i le Aoao Atu i le Ala a le Faaola, 16.)

Faamagaloina, saunia e Greg K. Olsen. Used with permission. www.GregOlsen.com