21–27 Iuni

Mataupu Faavae ma Feagaiga 67–70

“Taua … o Faamanuiaga i le Lalolagi”

Ae e te lei faitauina manatu fautuaina i lenei otootoga, suesue le Mataupu Faavae ma Feagaiga 67–70, ma tusifaamaumau uunaiga faaleagaga e te maua. O nei uunaiga o le a fesoasoani ia te oe e fatufatu ai se fuafuaga musuia e aoao atu. Ona faaopoopo atu lea o lena fuafuaga i manatu mai le otootoga lenei, mai le Sau, Mulimuli Mai ia te A’u—Mo Tagata Taitoatasi ma Aiga, pe mai mekasini o le Ekalesia.

Tusi Faamaumau Ou Lagona Uunai

Valaaulia le Fefaasoaai

Valaaulia tamaiti e tusi se ata o se mea na latou aoaoina mai a latou suesuega o tusitusiga paia i le fale po o le Peraimeri. Afai o faigata ia i latou ona mafaufau i se mea e tusi, e mafai ona e faamanatu atu ia i latou nisi o autu i le Mataupu Faavae ma Feagaiga 67–70, e pei o le papatisoga, mauaina o se molimau o tusitusiga paia, po o matua o loo aoaoina a latou fanau i le talalelei.

Aoao atu le Aoaoga Faavae: Tamaiti Laiti

Mataupu Faavae ma Feagaiga 67

O le Mataupu Faavae ma Feagaiga o loo i ai faaaliga mai le Atua.

Ia Novema, 1831, na filifili ai taitai o le Ekalesia e tuu faaaliga a Iosefa Samita i se tusi ia faitau i ai tagata uma. I aso nei o na faaaliga ua lolomiina i le Mataupu Faavae ma Feagaiga.

Gaoioiga e Mafai Ona Fai

• Tau atu i tamaiti e uiga i le auala na lolomiina ai faaaliga a Iosefa Samita i se tusi (tagai “Mataupu 23: O Le Mataupu Faavae ma Feagaiga,” Tala o le Mataupu Faavae ma Feagaiga. 90-92, po o le vitio talafeagai i luga o le ChurchofJesusChrist.org). Faasoa atu lau molimau o le Mataupu Faavae ma Feagaiga o loo i ai faaaliga e mafai ona fesoasoani ia i tatou i aso nei. Faasoa atu se tasi o mau e te fiafia i ai mai le Mataupu Faavae ma Feagaiga.

• Faaali atu i tamaiti tusitusiga faavae ia tai tasi i le taimi, ma ao e uuina i luga ia tusi taitasi, faasoa atu sina vaega e faatatau i le auala na tatou mauaina ai (tagai i faamatalaga o tusi taitasi i le Taiala i Tusitusiga Paia). Pe a e uuina i luga le Mataupu Faavae ma Feagaiga, faasoa atu i tamaiti le mea e tulagaese ai lenei tusitusiga paia (mo se faataitaiga, o loo i ai faaaliga na tuuina mai i o tatou aso).

Mataupu Faavae ma Feagaiga 68:25–28

E mafai ona ou papatiso pe a valu o’u tausaga.

I le Mataupu Faavae ma Feagaiga 68:25–28, na fetalai atu ai le Alii ia Iosefa Samita e tatau i tamaiti ona aoao ia latou faatuatua ia Iesu Keriso, salamo, ma paptisoina pe a valu o latou tausaga. Sa ia saunoa mai foi, e tatau ona latou aoao e tatalo ma tausi poloaiga a le Atua.

Gaoioiga e Mafai Ona Fai

• Valaaulia tamaiti e faaaoga o latou tamatamailima e faitau ai e tau i le valu. O le a se mea taua e faatatau i le atoaga o le valu tausaga? Fesoasoani i tamaiti ia iloa a atoa le valu o o latou tausaga, e mafai ona papatisoina i latou. Faaaoga upu ma fuaitau mai le Mataupu Faavae ma Feagaiga 68:25–28, faasoa ma i latou nisi o mea e finagalo le Alii latou te aoaoina ae le’i atoa le valu o o latou tausaga (tagai foi Mataupu Faavae o le Faatuatua 1:4). Fesoasoani ia latou malamalama i mataupu atonu latou te le masani i ai.

• Usu faatasi ma tamaiti se pese e faatatau i le papatisoga, e pei o le “Papatisoga” po o le “Pe A Ou Papatiso” (Tusipese a Tamaiti, 54, 53). Fai atu i tamaiti e faasoa mai o latou lagona e uiga i le papatisoina ma mea e mafai ona latou faia e saunia ai.

Aoao atu le Aoaoga Faavae: Tamaiti Matutua

Mataupu Faavae ma Feagaiga 67:4, 9

O faaaliga na auala mai ia Iosefa Samita e moni.

O le tele o faatonuga i le Mataupu Faavae ma Feagaiga 67–70 e faatatau i taumafaiga a le Au Paia e lolomi faaaliga a Iosefa Samita. E mafai ona avea lenei mea ma se avanoa e fesoasoani ai i tamaiti ia iloa, o totonu o nei faaaliga, lea ua lolomiina i le Mataupu Faavae ma Feagaiga, e mafai ona tatou maua ai le siufofoga o le Alii.

Ao e sauni e aoao atu, atonu e te iloiloina le Au Paia, 1:140–43 po o le “Mataupu 23: O Le Mataupu Faavae ma Feagaiga” (Tala o le Mataupu Faavae ma Feagaiga, 90–92).

Gaoioiga e Mafai Ona Fai

• Faaali atu i tamaiti le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele. Fesoasoani i tamaiti e fai se lisi i luga o le laupapa o mea e eseese ma tutusa ai nei tusitusiga paia. A latou manaomia le fesoasoani, faasoa atu ia i latou faamatalaga o nei tusi mai le Taiala i Tusitusiga Paia. Fesili atu i tamaiti pe mafai faapefea ona tatou iloa e moni tusitusiga paia. O le a se mea e mafai ona tatou aoao mai i le Mataupu Faavae ma Feagaiga 67:4, 9 e uiga i faaaliga na tuuina mai e le Alii ia Iosefa Samita?

• Faasoa atu se fuaiupu mai le Mataupu Faavae ma Feagaiga e faamalosia ai lau “molimau o le moni o nei poloaiga” (fuaiupu 4). Tuu atu i tamaiti ni avanoa e faasoa mai ai ni a latou lava fuaiupu e fiafia i ai. Faamalamalama atu i tamaiti o taitai o le Ekalesia i lea taimi na filifili e lolomi a latou molimau e uiga i faaaliga na mauaina e Iosefa Samita. Ina ua latou faia, o se tasi o taitai, o Levi Hancock, na tusia lenei faamatalaga i autafa o lona igoa, “Ia le tapeeseina lava” (tagai “Testimony, circa 2 November 1831,” Revelation Book 1, 121, josephsmithpapers.org). Mata aisea na manao ai Levi Hancock i lona igoa ia “le tapeeseina lava” mai le molimau lolomiina? Tuu atu i tamaiti se avanoa e tusi ai a latou molimau e uiga i mea ua latou aoaoina i le Mataupu Faavae ma Feagaiga.

  

  Ua faapea mai le Atua ia i tatou e suesue tusitusiga paia.

Mataupu Faavae ma Feagaiga 68:3–4

Pe a saunoa mai o tatou taitai e ala i musumusuga, ua latou saunoa mai “le afioga a le Alii.”

A saunoa mai auauna a le Alii e ala i le mana o le Agaga Paia, o a latou upu o le finagalo, mafaufau, afioga ma le siufofoga o le Alii (tagai fuaiupu 4). O le iloaina o lenei upumoni e mafai ona fesoasoani i tamaiti ia mananao ai e faalogo ma mulimuli i a latou aoaoga.

Gaoioiga e Mafai Ona Fai

• Valaaulia tamaiti e faitau le Mataupu Faavae ma Feagaiga 68:3–4 i ni vaega laiti ma faasoa i le tasi ma le isi mea ua latou aoaoina mai nei fuaiupu. Valaaulia tamaiti e tusi se mea na latou aoaoina i luga o le laupapa. Aisea e taua ai ona iloa lenei upumoni?

• A mavae le faitauga faatasi o le Mataupu Faavae ma Feagaiga 68:3–4 , tuu atu i tamaiti ni kopi o savali talu ai nei mai le konafesi aoao. Valaaulia i latou e saili i savali ni upumoni na aoao mai e le Alii ia i tatou e ala mai i Ana auauna.

Mataupu Faavae ma Feagaiga 69:1–2

E mafai ona ou “[amio]tonu ma faamaoni.”

Ina ua manaomia ona malaga atu Oliva Kaotui i Misuri, na valaauina e le Alii ia Ioane Uitimera, o se tasi sa “tonu ma faamaoni” (fuaiupu 1), e malaga ma ia. E mafai faapefea e tamaiti ona tonu ma faamaoni e pei o Ioane Uitimera?

Gaoioiga e Mafai Ona Fai

• Tau atu i tamaiti ina ua auina atu e le Alii ia Oliva Kaotui i Misuri, na Ia fetalai mai e tatau ona la o ma se tasi e “tonu ma faamaoni” (fuaiupu 1) , o lea na Ia auina atu ai Ioane Uitimera. O le a le uiga o le ia tonu ma faamaoni? E mafai faapefea ona faamautinoa o i tatou o ni tagata tonu ma faamaoni ina ia mafai ona faaaogaina i tatou e le Alii e faamanuia ai isi?

• Valaaulia ni nai tamaiti e faamatala e uiga i se tasi latou te iloa ma manatu o se tagata “tonu ma faamaoni.” E faapefea ona latou iloa o lena tagata e tonu ma faamaoni? Fesoasoani ia latou iloa na talitonuina e le Alii ia Ioane Uitimera ona o ia, i lena taimi, sa tonu ma faamaoni (tagai Mataupu Faavae ma Feagaiga 69:1–2). Usu faatasi se pese e faamalosia ai tamaiti ia tonu ma faamaoni e pei o le Faaola, e pei o le “Ou te Taumafai e Avea e Pei o Iesu” (Tusipese a Tamaiti, 40–41).

Fautuaina le Aoaoina i le Aiga

Valaaulia tamaiti e faamalamalama atu i se tasi i le fale po o le a le Mataupu Faavae ma Feagaiga, le mea na maua mai ai, ma pe aisea e taua ai ia i latou.

Faaleleia o Lo Tatou Aoao Atu

Fetuunai gaoioiga mo le matutua o tamaiti e te faiaoga ai. O tamaiti laiti atonu e manaomia le taitaiga tele pe a valaaulia e faasoa. O tamaiti matutua atu ua tele atu o latou aafiaga ma atonu ua lelei i le faasoaina o a latou manatu. Ia manatua eseesega faapenei a o e fuafuaina gaoioiga.