fanua i Misuri

Springhill, Itumalo o Daviess County, Misuri, saunia e Garth Robinson Oborn

7–13 Iuni

Mataupu Faavae ma Feagaiga 63

“O Le Mea e Sau Mai Luga Ua Paia”

O upumoni o loo aoaoina i le Mataupu Faavae ma Feagaiga 63 e mafai ona fesoasoani i tamaiti o loo e aoaoina e atinae ai lo latou faatuatua i le Tama Faalelagi ma Iesu Keriso. Ona e tapulaa lou taimi ma i latou, mafaufau po o a upumoni o le a sili ona anoa ia i latou, e faavae i o latou manaoga.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Mafaufau i ni auala faigofie, fatufatuai e avatu ai i tamaiti ni avanoa e faasoa mai ai mea o loo latou aoaoina. Mo se faataitaiga, sauni ni fasipepa e eseese le tetelē, ma tuu atu i tamaiti taitoatasi e filifili soo se fasipepa se tasi. Valaaulia le tamaitiiti o loo i ai le fasipepa e pito sili ona umi e faasoa muamua.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 63:23

E finagalo le Tama Faalelagi ia ou aoao i le talalelei.

O tamaiti e aoao i taimi uma. Fesoasoani ia latou iloa o le a fesoasoani le Tama Faalelagi ia i latou e aoao e uiga ia te Ia pe afai latou te usitai i Ana poloaiga.

Gaoioiga e Mafai Ona Fai

• Faitau le Mataupu Faavae ma Feagaiga 63:23 i tamaiti, ma fai atu i tamaiti e faalogologo mo mea o le a tuuina mai e le Atua ia i tatou pe afai tatou te tausia poloaiga. Fesoasoani ia i latou ia malamalama o “mea lilo” o mea e mafai e le Atua ona aoao atili mai ia i tatou, e pei o le pe faapefea ona tatou avea atili e pei o Iesu Keriso.

• Aumai ni ata i le vasega e suitulaga i autu o le talalelei e mafai e tamaiti ona aoao atili i ai, e pei o le papatisoga, le Faaola, malumalu, ma isi. Faafao i lalo ata i luga o le foloa, ma tuu atu i tamaiti e auauai e fuli i luga se ata se tasi. Fai atu ia i latou e faasoa mai mea ua latou iloa ma soo se latou fesili o i ai e uiga i autu taitasi.

Mataupu Faavae ma Feagaiga 63:49

O le a ou toetu.

Pe o le taimi nei po o le lumanai, o le a faamafanafanaina tamaiti o loo e aoaoina ona o le Togiola a le Faaola, o i latou uma ua maliliu o le a toetutu i se aso.

Gaoioiga e Mafai Ona Fai

• Faaali atu i tamaiti se ata o se tasi e pele ia te oe ua maliu, ma faasoa atu se tala e uiga i lena tagata. Faitau le Mataupu Faavae ma Feagaiga 63:49 i tamaiti, ma molimau atu e i ai se aso o le a “toetu mai lena tagata mai le oti” ma e le toe oti. Fai atu i tamaiti pe latou te iloa se tagata ua maliu. Molimau atu o le a tatou toetutu uma ona o Iesu Keriso.

• Faaali atu ni ata o le falelauasiga ma le Toetu o le Faaola (tagai Tusi Ata o le Talalelei, nu. 58, 59). Valaaulia i latou e talatalanoa e uiga i mea o loo tutupu i ata. Fai atu i tamaiti e taooto ao e faamatala atu e uiga i le falelauasiga o Iesu ma ia tutu i luga ao e faamatala atu e uiga i Lona Toetu. Faitau le Mataupu Faavae ma Feagaiga 63:49, ma tuuina atu lau molimau o le a tatou toetutu uma i se aso mai le oti e pei o Iesu.

  Iesu o loo faaali atu ia Maria

  Tuugamau Togalaau, na saunia e Jon McNaughton

Mataupu Faavae ma Feagaiga 63:64

E tatau ona ou taulimaina ma le migao ia mea paia.

Ua tatou ola i se vaitaimi e masani ona le amanaiaina pe ulagia ai foi mea paia. E mafai ona e fesoasoani i tamaiti e atiina ae se lagona o le migao mo mea paia.

Gaoioiga e Mafai Ona Fai

• Faitau atu i tamaiti mai le Mataupu Faavae ma Feagaiga 63:64: “O le mea e sau mai luga ua paia.” Fai atu ia i latou e mafaufau i se mea e taua ia i latou, e pei o se meataalo e sili ona fiafia i ai po o se tusi. E faapefea ona latou tausia pe puipuia? Fesoasoani ia i latou e mafaufau i ni mea e taua—pe paia—i le Tama Faalelagi. E faapefea ona tatou talanoa i nei mea? E faapefea ona tatou taulimaina i latou?

• Usu faatasi ma tamaiti se pese e faatatau i le migao, e pei o le “Ia Migao Filemu” (Tusipese a Tamaiti, 11). Fesoasoani ia i latou e mafaufau i auala e mafai ona latou faaalia ai le miga mo mea paia.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 63:9–10

E oo mai faailoga e ala i le faatuatua, ma le finagalo o le Atua.

Na liliu Ezra Booth i le Ekalesia ina ua uma ona vaai o faamalolo e Iosefa Samita le lima o Elsa Johnson. Ae na mulimuli ane leai sona faatuatua, ma sa faapea ona ia faitio i le Perofeta. O le Mataupu Faavae ma Feagaiga 63 o loo i ai lapataiga e faasaga i taumafaiga e atia’e o tatou faatuatua i luga o faailoga, e pei o faamalologa faavavega, nai lo o le faamaoniga faaleagaga o upumoni.

Gaoioiga e Mafai Ona Fai

• Faaali atu le ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma tau atu i tamaiti na faaaoga e Iosefa Samita le perisitua e faamalolo ai le lima o Elsa Johnson, lea na le mafai ona ia faaaogaina atoa mo le lua tausaga. Valaaulia tamaiti e faitau le Mataupu Faavae ma Feagaiga 63:9-10, ma fai atu ia i latou e faasoa mai se mea na fetalai mai ai le Alii e uiga i le faatuatua ma faailoga (po o vavega).

• Valaaulia tamaiti e tusi se fale o loo nofo i luga o se tafafā laumiumi ma se isi fale o loo tu i luga o le tumutumu o se tafatolu. Fai i tamaiti o fale e suitulaga i o tatou faatuatua ma molimau. Fai atu ia i latou e faitau le Mataupu Faavae ma Feagaiga 63:9–10 ma le Helamana 5:12. Ona tuu atu lea ia i latou e tusi i totonu o le tafafā mea e tatau ona tatou atinae ai i luga o tatou faatuatua, ae o totonu o le tafatolu o mea e le tatau ona atinae ai o tatou faatuatua. Faailoa atu o le faatafafā e maua ai se nofoaga mausali e atinae ai, ae o le tafatolu e le saogalemu ma e le malupuipuia. Aisea e taua ai ona atinae o tatou faatuatua i luga o Iesu Keriso nai lo o luga o isi mea?

Mataupu Faavae ma Feagaiga 63:23

Ao ou tausia poloaiga, o le a aoao mai e le Atua ia te a’u Ana upumoni.

O “mealilo o le malo a le [Atua]” e avanoa mo na o i latou e tausia poloaiga a le Atua. O le mafuaaga lenei e avea ai ma mealilo i le toatele o tagata. O le a fesoasoani lenei mataupu faavae i tamaiti ao latou sailia le upumoni.

Gaoioiga e Mafai Ona Fai

• Tusi i luga o le laupapa A o tausia poloaiga, ona, ma fai atu i tamaiti e tusi i luga o le laupapa auala eseese e faauma ai le fuaiupu. Fai atu ia i latou e faitau le Mataupu Faavae ma Feagaiga 63:23 ma saili se mea e mafai ona latou faaopoopoa i a latou lisi. Faaali atu i tamaiti se ipu vai, ma fesili atu ia i latou pe faapefea ona avea upumoni o le talalelei e pei o se vai ia i tatou.

• Faaali atu i tamaiti se ata o se vaieli, ma fai atu ia i latou e tusi se ata o se vaieli. A mavae le faitauga faatasi o le Mataupu Faavae ma Feagaiga 63:23, fesoasoani ia i latou e mafaufau i upumoni latou te iloa e uiga i le talalelei, ma valaaulia i latou e tusi faataamilo nei upumoni i o latou vaieli. E faapefea ona pei nei upumoni o le “vai ola”?

Mataupu Faavae ma Feagaiga 63:58–64

E le tatau ona ou ta’ufua le suafa o le Atua.

O tamaiti o loo e aoaoina atonu na latou faalogo o faaaoga e isi le suafa o le Atua i auala le migao ma le mataga. E mafai faapefea ona e fesoasoani ia i latou ia malamalama o suafa o le Tama Faalelagi ma Iesu Keriso “e ao ona tautalagia ma le faaeteete”? (Mataupu Faavae ma Feagaiga 63:64).

Gaoioiga e Mafai Ona Fai

• Faitau atu i tamaiti mai le Mataupu Faavae ma Feagaiga 63:58: “O se aso lenei o le lapataiga.” Fai atu ia i latou e talanoa e uiga i lapataiga latou te faalogoina mai o latou matua, faiaoga, ma taitai o le Ekalesia. Ona fesoasoani lea ia i latou e saili lapataiga mai le Alii i fuaiupu 58–64. O a nisi auala talafeagai e “faaaoga [ai] le suafa o le Alii”? (fuaiupu 62).

• Iloilo faatasi le “Gagana” i le Mo Le Malosi o le Autalavou (itulau 20–21). Fai atu i tamaiti e fai ni tamai pepa faalauiloa e faamanatu ai ia i latou mea na latou aoaoina e uiga i le ala e faaaoga ai suafa o le Tama Faalelagi ma Iesu Keriso.

• Usu faatasi se pese e faatatau i le migao, e pei o le “Ia Migao Filemu” (Tusipese a Tamaiti, 11). E mafai faapefea ona tatou mautinoa o tatou migao pe a tatou talanoa e uiga i le Tama Faalelagi ma Iesu Keriso?

aikona o le aoaoina

Fautuaina le Aoaoina i le Aiga

Afai e leai sou taimi e fai ai le itulau o gaoioiga o le vaiaso lenei i le vasega, mafaufau e ave ni kopi i tamaiti taitoatasi e ave i le fale e faauma ai ma o latou aiga.

Faaleleia o Lo Tatou Aoao Atu

Ia atinae le talitonuga mautinoa o tamaiti. O nisi tamaiti atonu latou te le lagona e mafai ona latou aoaoina le talalelei na o latou lava. O se tasi o auala e atinae ai lo latou lototele o le viia o i latou pe a latou auai i talanoaga i le vasega. Folafola atu i tamaiti o le a fesoasoani le Agaga Paia ia i latou ao latou aoao.

Itulau o gaoioiga: E tatau ona ou taulimaina ma le migao ia mea paia