C. C. A. Christensen (1831–1912), Zion’s Camp, c. 1878, tempera on muslin, 78 × 114 inches. Brigham Young University Museum of Art, gift of the grandchildren of C. C. A. Christensen, 1970

Jeptōm̧ba 13–19

Katak im Bujen Ko 102–105

“Ālkin Eļap En̄taan … Ej itok Kōjeraam̧m̧an”

Ta pedped in katak ko jān Katak im Bujen Ko 102–5 me eļap meļeļeier n̄an kwe? Ļōmņak n̄an rekoote ļōmņak ko am̧ im im̧we ko kōn pedped kein.

Je En̄jake ko Rej Im̧we Eok

Armej ro Rekwojarjar ilo Kirtland rekar rub buruōer ke rej ron̄ bwe brother ro im sister ro aer ilo Jackson County, Missouri, kar kadiwōjļo̧k er jān m̧ōko m̧ōer. Emaron̄ kar lukkuun juon menin kōketak, innem, ke Irooj ekar kwaļo̧k bwe “lo̧m̧o̧o̧r eo an Zaion” enaaj “itok jān kajoor” (Katak im Bujen Ko 103:15). Kōn kallim̧ur eo ilo buruōer, elōn̄ļo̧k jān 200 em̧m̧aan, ekoba tarin 25 kōrā im ajri ro, deļo̧n̄eļo̧k men eo rej ņa etan Kamp eo an Israel, tokālik kar ņa etan Kāām eo an Zaion. Kōttōbar eo ej kar n̄an m̧aaj n̄an Missouri im lo̧mo̧o̧ren Zaion.

N̄an member ro an kāām eo, lo̧mo̧o̧ren Zaion meļeļein kōjepļaaktok Armej ro Rekwojarjar n̄an āne ko aer. Ak m̧okta jān aer tōpar kāām eo ilo Jackson County, Irooj ekar ba n̄an Josep Smith n̄an kabōjrak im joļo̧k doulul eo etan Kamp eo an Zaion. Jet membōr in Kamp eo rekar pok im illu kōn kōmeļeļe in ekāāl; n̄an er, meļeļein bwe kōttōpar eo elikjab im kallim̧ur ko an Irooj rekar jab kūrm̧ool. Ro jet, mekarta, ekar oktak meļeļe eo aer. Ke Armej ro Rekwojarjar ro rekar pād jikin ko rettoļo̧k jān kabijuknen rekar jan̄in jepļaak n̄an Jackson County, menin ekar boktok “lọmọọren” n̄an Zaion, im ekar “itok jān kajoor.” Membōr ro retiljek an Kamp eo an Zaion, elōn̄ ro jet me tokālik rekar erom̧ ritōl ro an Kabun̄ in, kar kam̧ool bwe en̄jake eo ekar kōkajoorļo̧k tōmak eo aer ilo kajoor eo an Anij, ilo kūr eo ekwojarjar an Josep Smith, im ilo Zaion—ejjab Zaion jikin wōt ak Zaion ej armej eo an Anij. Ijelo̧kin kajjitōkin aorōk in jerbal ko me ilo kalimjōki ejjeļo̧k tōprakier, rekar ekkatak bwe jerbal eo em̧ool ej n̄an ļoor Rilo̧mo̧o̧r, men̄e jejjab meļeļe aolep men. En̄in wāween an Zaion, kar āliktata, naaj bōk lo̧mo̧o̧r.

Lale Saints, 1:194–206; “The Acceptable Offering of Zion’s Camp,” Revelations in Context, 213–18.

Kamp eo an Zaion ekar pād wōt itōrerein Reba in En̄wōd Jidikdik eo, kar pija ijin.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Katak im Bujenko 102:12–23

Ta kōttōpar eo an kōmeļeļe ko ilo eoon kein?

Jekjen 102 epād ie dipdikin meļeļe in kweilo̧k eo ilo Kirtland, Ohio, ijo high ko̧o̧njeļ eo jinoin an Kabun̄ in ekar ejaak. Eoon ko 12–23 rej kōmeļeļeiki jerbal ko high ko̧o̧njeļ ro rej ļoori n̄e rej kōm̧m̧an ko̧o̧njeļ in kauwe ko n̄an ro me rekar kōm̧m̧an jerawiwi ko reļļap.

Būreejtōn M. Russell Ballard ekar katakin, “Membōr ro jet iien rej kajjitōk etke ko̧o̧njeļ in kauwe ko an Kabun̄ rej kōm̧m̧an. Un eo ej ļapļo̧k jilu kōttan: n̄an lo̧mo̧o̧ren jetōb eo an eo ekar kōm̧m̧an bōd, n̄an kōjparok ro ejjeļo̧k ruōer, im n̄an bōbrae erreo, m̧ool, im kōm̧anm̧an etan Kabun̄ in.” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).

Barāinwōt lale Gospel Topics, “Church Disciplinary Councils,” topics.ChurchofJesusChrist.org.

Katak im Bujen Ko 103:1–12, 36; 105:1–19

Zaion emaron̄ bar ekkaļ ioon wōt pedped ko an wānōk.

Etke Armej ro Rekwojarjar rekar luuji āneen kallim̧ur eo aer ilo Missouri? Im etke Irooj ekar jab kōtļo̧k an Kamp eo an Zaion n̄an jepļaak n̄an āne ko aer? Ealikkar bwe jorrāān im m̧akūtkūt ko an rinana ro ilo Missouri rekar kōm̧m̧ane menin, im kabna eo an Missouri ekar kallim̧ur n̄an rie Armej ro Rekwojarjar ak ekar jab. Ak Irooj ekar ba bwe “eļan̄n̄e ekar jab kōn nana ko an armej ro Aō,” Zaion “remaron̄ kar bōk lo̧mo̧o̧ren” (Katak im Bujen Ko 105:2). Ilo am̧ riiti Katak im Bujen Ko 103:1–12, 36; 105:1–19, kwomaron̄ kile jet men ko me ekar bōbrae ejaak eo an Zaion ilo Missouri im ro jet bwe remaron̄ bar bōk jipan̄. Ta eo kwoj ekkatak me emaron̄ jipan̄ eok ejaake Zaion ilo buruōm̧ im m̧ōko?

Katak im Bujen Ko 103:12–13; 105:1–6, 13–19

Kōjeraam̧m̧an ko rej itok ālkin en̄taan im idajon̄jon̄ eo in tōmak.

Ilo elōn̄ wāween ko, bōk koņaam̧ ilo Kamp eo an Zaion ekar juon idajon̄jon̄ eo in tōmak. Iaļ eo ekar aitok, ekar lukkun bwil mejatoto, im m̧ōn̄ā im dān rekar jet iien jabwe. Im ālkin aolep men rekar kijenmej kaki, Armej ro Rekwojarjar rekar jab wōt maron̄ jepļaak n̄an āne eo aer. Ļōmņak kōn wāween an pedped in katak ko ilo Katak im Bujen Ko 103:12–13 im 105:1–6, 13–19 maron̄ kar jipan̄ membōr ro an Kamp eo an Zaion ro rekar kōņaan jeļā eļan̄n̄e kien eo n̄an ejaake Kamp eo an Zaion ekar lukkuun itok jān Anij jinointata. Ewi wāween an pedped in katak ko jipan̄ eok ilo melijjon̄ in tōmak eo am̧ make?

Kwomaron̄ barāinwōt riit kōn en̄jake ko an membōr ro an Kamp eo an Zaion ilo “Voices of the Restoration” ilo jem̧lo̧kin laajrak in. Ta eo ej im̧we eok kōn m̧wil ko aer? Ta eo kwomaron̄ ekkatak jān waanjon̄ak ko aer?

Barāinwōt lale David A. Bednar, “On the Lord’s Side: Lessons from Zion’s Camp,” Ensign, July 2017, 26–35.

Katak im Bujen ko 104:11–18, 78–83

N̄a juon “ribōk eddo ioon kōjeraam̧m̧an ko an laļ.”

N̄an kakobaba n̄an melijjon̄ ko ilo Missouri, ilo 1834 Kabun̄ in ekar jelm̧ae apan̄ ikkijeen jāān, ekoba m̧ūri ko reļļap im jāān n̄an aikuj ko aer. Ilo jekjen 104 Irooj ekar kapilōk ikkijeen jekjek eo an jāān ko an Kabun̄ in. Ewi wāween am̧ kōjerbal pedped in katak ko ilo eoon ko 11–18 im 78–83 n̄an kālet ko am̧ make ikkijeen jāān?

N̄an ekkatak kōn juon iaan wāween ko Irooj ekar kōpooje n̄an Kabun̄ in bwe en karōļo̧k er jān lokjak in m̧ūri, alooje “Treasure in Heaven: The John Tanner Story” (video, ChurchofJesusChrist.org).

N̄an ekkatak eļapļo̧k kōn “wāween eo an [Irooj] make” (eoon 16) n̄an leļo̧k n̄an Armej ro An Rekwojarjar, kwomaron̄ ekkatak jān enaan eo an Būreejtōn Dieter F. Uchtdorf “Providing in the Lord’s Way” (Ensign ak Liahona, Nov. 2011, 53–56).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 103:12, 36; 105:9–13.Em̧ōj ke an baam̧le eo am̧ (ak juon iaan ro jibūm̧ im jim̧aam̧ etto) kar kajjitōkin n̄an kōm̧m̧ane juon men eo me ekar jab waļo̧k ilo wāween eo kwar kōtmene? Ta eo kwomaron̄ ekkatak jān en̄jake ko an membōr ro ilo Kamp eo an Zaion ke iaļ eo aer ekar jab bōk jikin ilo wāween eo rekar kōtmene? (lale “Voices of the Restoration” ilo jem̧ļo̧kin laajrak in).

Katak im Bujen Ko 104:13–18.Ta eo Irooj ekar letok n̄an kōj? Ta eo E ej kōtmene kōj n̄an kōm̧m̧ani kōn men kein?

Katak im Bujen Ko 104:23–46.Baam̧le eo am̧ emaron̄ kappukot eoon kein n̄an lale jete kōttan an Irooj kallim̧ur n̄an “koorļo̧k kōjeraam̧m̧an ko” (eoon 23) n̄an ro retiljek. Bolen menin enaaj erom̧ juon iien em̧m̧an n̄an “bwini menin joij” (“N̄e Kwoj Ion Buktak Ko An Mour,” Al ko, no. 6) im kōnono kōn wāween ad bwōni kōjeraam̧m̧an ko maron̄ jipan̄ kōj ilo iien ko reppen. Ajri ro reddik remaron̄ em̧m̧an ippāer jin̄n̄a kōjeraam̧m̧an ko rej kam̧m̧oolol eļaptata kaki.

Katak im Bujen Ko 105:38–41.Ewi wāween ad maron̄ kōm̧m̧ane “kean̄ in aeņōm̧m̧an” (eoon 40) n̄e ro jet rej nana im kalijōkļo̧k n̄an kōj? Ta eo jemaron̄ kōm̧m̧an n̄an erom̧ “juon flag in aeņōm̧m̧an” (eoon 39) ilo m̧weo im̧ōd?

N̄an ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.

Al eo kar elmakote: “N̄e Kwoj Ion Buktak Ko An Mour In,” Al ko, nō. 6.

Ainikien ko an Jepļaaktok eo

Kamp eo an Zaion

Kōnke Kamp eo an Zaion ekar jab bar kōjepļaak Armej ro Rekwojarjar n̄an āne ko aer ilo Jackson County, elōn̄ armej rekar en̄jake bwe aer kajjieon̄ n̄an lo̧mo̧o̧ren Zaion ekar juon likjab. Mekarta, elōn̄ ro rekar bōk koņaer ilo Kamp eo an Zaion rekar reilikļo̧k n̄an en̄jake ko aer im lo wāween an Irooj kakūrm̧ool e juon kōttōpar eo eutiej tata ilo mour ko aer im ilo aelōn̄ in kiin̄ eo An. Erkein rej jet iaan naan in kam̧ool ko aer.

Josep Smith

Ilōn̄inļo̧k 40 iiō ālkin Kamp eo an Zaion, Josep Young, eo eto an membōr in kamp eo, ekar riboot ke Josep Smith ekar ba naan kein:

“Em̧m̧an ro rejitōn bōro, jet iaami rej illu ippa, kōnke kom̧ kar jab ire ilo Missouri; ak ij ba n̄an kom̧, Anij ekar jab kōņaan bwe kom̧ en ire. Ekar jab ejaake aelōn̄ in kiin̄ eo an kōn jon̄oulruo em̧m̧aan ro n̄an kōm̧m̧an bwe en boktok gospel eo n̄an laļ ko ilo laļ in, im jiljilimjuonn̄oul em̧m̧aan ro ium̧win tōl eo aer n̄an ļoor tōl ko aer, m̧ae ekar bōk er jān kurup in em̧m̧aan ro ro me rekar aje mour koaer, im ro rekar kōm̧m̧an kaarmājet ko reļļap āinwōt kar Ebream.

“Kiiō, Irooj ekar ejaake Jon̄oulruo im Jiljilimjuonn̄oul ro An, im enaaj bar wōr doulul ko jet an jiljilimjuonn̄oul , ro renaaj kōm̧m̧an kaarmājet, im ro me rekar jab kōm̧m̧an kaarmājet ko im joortak ko aer kiiō, renaaj kōm̧m̧ane kiiō im etal.”¹

Brigham Young

“Ke kōm kar itaakļo̧k Missouri Irooj ekar kōnono n̄an rikarejaran Josep im ba: ‘Ij m̧ōņōņō kōn joortak eo am̧,’ im kōm kar maron̄ bar jepļaak n̄an kapijuknen. Ke ikar jepļaak elōn̄ ro m̧ōtta rekar kajjitōk ippa ta jeraam̧m̧an eo ijeņ ilo aer kūr em̧m̧aan ro n̄an etal jān jerbal ko aer n̄an Missouri innem bar rool, ilo an ejjeļo̧k aer tōprak jej loe. Wōn eo ej jeraam̧m̧an jān menin?’ rekar kajjitōk. Eļan̄n̄e Irooj ekar kakien bwe en dedeļo̧k, ta kōttōpar eo an ilo an erreim̧aanļo̧k n̄an kōm̧m̧ane? Ikar ba n̄an em̧m̧aan ro bwe ekar em̧m̧an wōneeō— kar kōļļāik eō kōn wōneen eo eļap—aeet jon̄an ke jeraam̧m̧an eo ikar bōk ekar lukkuun ļap kōn jeļāļo̧kjeņ eo me ikar bōk ilo aō kar ito itak ippān Rikanaan eo.”²

Wilford Woodruff

“Ikar pād ilo Kamp eo an Zaion ippān Rikanaan eo an Anij. Ikar lo jerbal ko an Anij ilo e. Ikar lo kajoor eo an Anij ilo e. Ikar lo bwe e ekar juon Rikanaan. Ta eo ekar waļo̧k n̄an e kōn kajoor eo an Anij kōn mijen eo ekar lukkuun aorōk n̄an n̄a im aolep ro me rekar bōk katak ko an.”³

“Ke membōr ro ilo Kamp eo an Zaion kar kūr elōn̄ iaam kōm jan̄in kar lo mejān doon; kōm kar ruwamājet wōt n̄an doon im elōn̄ rekar jan̄in lo mejān rikanaan eo. Kōm kar jokwe ejepelōklōk, āinwōt ko̧o̧n ko rej liklik ilo juon kein liklik, ilo aolepān laļ eo. Kōm kar likao wōt, im kar kūr kōm ilo tōre eo n̄an etal im lo̧mo̧o̧ren Zaion, im ta eo kōm kar aikuj kōm̧m̧ani rekar aikuj dedeļo̧k kōn tōmak. Kōm kar kuk ippān doon jān kajjojo jikin ko ilo Kirtland im etal im lo̧mo̧o̧ren Zaion, n̄an kakūrm̧ool kien eo an Anij n̄an kōm. Anij ekar m̧ōņōņō kōn jerbal eo am āinwōt An kar kōm̧m̧ane n̄an jerbal ko an Ebream. Kōm kar kōtōprak elōn̄ men ko, men̄e rijerawiwi im ro rejjab tōmak elōn̄ alen rekar kajjitōk kajjitōk in ‘elmen ami kar kōm̧m̧ane?’ Kōm kar bōk juon en̄jake eo me kōm ban kar bōk [ilo] jabdewōt wāween ko jet. Kōm kar jeram̧m̧an kōn am kar lo mejān rikanaan eo, im kar jeraam̧m̧an kōn ito itak eo 1600 kilomita ippān, im loe jerbal ko an jetōb eo an Anij ilo e, im revelesōn ko an Jisōs Kraist n̄an e im kūrm̧ool eo an revelesōn ko. Im ekar aiin tarin rubwuki elder ro jān aolepān laļ eo ilo tōre ko etto ilo bwebwenato an Kabun̄ in im jilkinļo̧k kōm ipeļaakin laļ in n̄an kajedeed gospel eo an Jisōs Kraist. Eļan̄n̄e in kar jab etal ippān Kamp eo an Zaion iban kar pād ijin rainin [ilo Salt Lake City, jerbal ilo Doulul eo an Jon̄oulruo ro]. … Ilo am kar etal n̄an Missouri kar kajju letok am iien em̧m̧an n̄an kajedeed gospel eo, im Irooj ekar m̧ōņōņō kōn jerbal eo am. Im ilo aolep jerbal ko am im kakkure ko, ekkā an kauwōtata n̄an mour ko am, kōm kar aikuj jerbal im mour kōn tōmak.”

“En̄jake eo [kōm] kar en̄jake ilo iien am̧ kar ito itak ilo Kamp eo an Zaion ekar ļap tokjen jān gold.”

Kakeememej ko

1. In Joseph Young Sr., History of the Organization of the Seventies (1878), 14.

2. “Discourse,” Deseret News, Dec. 3, 1862, 177.

3. In Conference Report, Apr. 1898, 29–30; barāinwōt lale Teachings of Presidents of the Church: Wilford Woodruff (2004), 135.

Zion’s Camp (Zion’s Camp at Fishing River), jān Judith A. Mehr